.jpg)
អ្នកចូលរួមនៅក្នុងសិក្ខាសាលាកាលពីថ្ងៃចន្ទម្សិលមិញ។ ហេង ជីវ័ន
ភ្នំពេញៈ មន្ត្រីរំពឹងថាកម្ពុជានឹងអាចសម្រេចបានទៅតាមផែនការគ្រោងទុក ក្នុងការអភិវឌ្ឍដែលនឹងធ្វើឲ្យរាជធានីភ្នំពេញឲ្យក្លាយទៅជាទីក្រុងនិរន្តរភាព ធ្វើឲ្យប្រជាពលរដ្ឋរស់នៅដោយមានផាសុកភាព ដោយមានការរៀបចំអភិវឌ្ឍឲ្យមានលម្ហបៃតង កន្លែងសម្រាក ឬកន្លែងហាត់កីឡា និងការអភិវឌ្ឍលើវិស័យដឹកជញ្ជូន ដើម្បីកាត់បន្ថយការកកស្ទះចរាចរណ៍ ខណៈដែលគម្រោងនេះបានចាប់ផ្តើមអនុវត្តចាប់តាំងពីឆ្នាំ ២០១៨ មក។
លោក តាំង ម៉េងអៀង ប្រធាននាយកដ្ឋានអភិវឌ្ឍន៍សេដ្ឋកិច្ចបៃតងនៃក្រុមប្រឹក្សាជាតិអភិវឌ្ឍន៍ដោយចីរភាពបានថ្លែងនៅក្នុងសិក្ខាសាលា ត្រួតពិនិត្យលទ្ធផលការងារអភិវឌ្ឍន៍ដោយចីរភាពឆ្នាំ ២០១៩ និងទិសដៅការងារឆ្នាំ ២០២០ នៅទីស្ដីការក្រសួងបរិស្ថានកាលពីម្សិលមិញថា ឯកសារគោលនយោបាយអំពីផែនការអនុវត្តទីក្រុងនិរន្តរភាពសម្រាប់រាជធានីភ្នំពេញឆ្នាំ ២០១៨-២០៣០ គឺត្រូវបានដាក់ឱ្យដំណើរការរួចហើយដែលគោលនយោបាយនោះមានខ្លឹមសារសំខាន់ៗជាច្រើនដូចជាការអភិវឌ្ឍលើវិស័យដឹកជញ្ជូន ដើម្បីកាត់បន្ថយការកកស្ទះចរាចរណ៍ ការបង្កើតលម្ហបៃតង និងការអភិរក្សទីតាំងបេតិកភណ្ឌនានា។
លោកថា៖ «ទីក្រុងនិរន្តរភាពបានន័យថា ទីក្រុងមួយដែលអាចឱ្យប្រជាជនក្នុងទីក្រុងរស់នៅដោយមានផាសុកភាព។ បានន័យថានៅពេលពលរដ្ឋធ្វើដំណើរទៅណាដោយអាចកាត់បន្ថយការកកស្ទះចរាចរណ៍។ សម្រាប់ផ្ដោតលើផាសុកភាពគឺយើងផ្ដល់នូវលំហបៃតងកន្លែងសម្រាក ឬកន្លែងហាត់កីឡា»។
លោកបញ្ជាក់ថា បញ្ហាសំរាមក៏ជាបញ្ហាគោលសំខាន់ផងដែរ ដែលផ្ដោតលើការរៀបចំគោលនយោបាយតាំងពីលើកកម្ពស់ការយល់ដឹងរបស់ប្រជាពលរដ្ឋតាំងពីការប្រើប្រាស់វត្ថុធាតុដើមមិនងាយរលាយទៅវិញ ការគ្រប់គ្រងនូវការចោលសំរាម ការទុកដាក់សំរាម និងរហូតដល់ការដឹកជញ្ជូន និងឈានទៅដល់ការកែច្នៃសំរាមទៅជាប្រភពដែលអាចប្រើប្រាស់បានដូចថាមពល ឬឧស្ម័ន។
លោកបន្តថា តាំងពីឆ្នាំ ២០១៨ មកគឺមានគម្រោងមួយចំនួនហើយដែលក្រុមប្រឹក្សាជាតិអភិវឌ្ឍន៍ដោយចីរភាពបានសហការជាមួយរដ្ឋបាលរាជធានីភ្នំពេញបានអនុវត្ត ដូចជាការរៀបចំឱ្យមានរថយន្តក្រុងសាធារណៈដែលជាផ្នែកមួយនៃការអភិវឌ្ឍទីក្រុងនិរន្តរភាពនេះ។
លោកថា នៅក្នុងដំណាក់កាលទី ២ រដ្ឋាភិបាលនឹងផ្ដោតលើការអភិវឌ្ឍទីក្រុងនិរន្តរភាពចំនួន ៧ ផ្សេងទៀតដែលជាទីក្រុងសំខាន់សម្រាប់វិស័យទេសចរណ៍ និងសេដ្ឋកិច្ចក្នុងនោះក៏មានទីក្រុងសៀមរាប ទីក្រុងព្រះសីហនុ និងទីក្រុងស្វាយរៀងផងដែរ។
ចំណែកលោក ម៉េត មាសភក្ដី អ្នកនាំពាក្យសាលារាជធានីភ្នំពេញបញ្ជាក់ថា ផែនការអនុវត្តប្រែក្លាយទីក្រុងភ្នំពេញទៅជាទីក្រុងនិរន្តរភាពក្នុងឆ្នាំ ២០៣០ នឹងប្រាកដជាអនុវត្តបានជោគជ័យ។
លោកបន្តថា ផែនការអប់រំ និងផ្សព្វផ្សាយឱ្យប្រជាពលរដ្ឋយល់ដឹងអំពីការវេចខ្ចប់ និងទុកដាក់សំរាមឱ្យបានត្រឹមត្រូវនេះគឺត្រូវការចំណាយពេលយូរ។ ប៉ុន្តែដំណាលនឹងការអនុវត្តផែនការនេះឱ្យបានជោគជ័យគឺចំពោះបញ្ហាប្រឈមមុខដែលកើតឡើងរៀងរាល់ថ្ងៃ ដូចជាការបោះចោលសំរាមពាសវាលពាសកាល ឬបោះចោលសំរាមនៅក្រៅធុងសំរាមជាដើមគឺអាជ្ញាធរនៅតែចាត់វិធានការផាកពិន័យ និងបោសសម្អាត កើបយកទៅចាក់ចោលនៅទីតាំងសំរាមដដែលដើម្បីធ្វើយ៉ាងណាឱ្យទីក្រុងមានភាពស្រស់បំព្រងជាបណ្ដោះអាសន្នសិន។
លោកថា៖ «ទន្ទឹមនឹងនេះយើងក៏ត្រូវធ្វើអាណាដែលត្រូវចំណាយពេលយូរ ដូចជា អប់រំផ្សព្វផ្សាយអ៊ីចឹងទៅ»។
លោក សាន ដារ៉ាវិត ស្ថាបនិកនៃក្រុមយុវជនសំរាមបានលើកឡើងដែរថា កាលពីពេលកន្លងទៅលោក ឃួង ស្រេង អភិបាលរាជធានីភ្នំពេញធ្លាប់បានប្រាប់យុវជនសំរាមអំពីផែនការអភិវឌ្ឍទីក្រុងនិរន្តរភាពនេះដែរដូចជាការសាងសង់ផ្លូវក្រោមដី និងធ្វើស្ពាន ដើម្បីកាត់បន្ថយការកកស្ទះចរាចរណ៍។
យុវជនរូបនេះបន្តថា ចំពោះបញ្ហាសំរាម អភិបាលក្រុងភ្នំពេញក៏អះអាងអំពីការសហការដោយផ្ដល់កម្លាំងឱ្យមកចូលរួមជាមួយយុវជនសំរាមដើម្បីធ្វើយ៉ាងណាឱ្យតាមបណ្ដាខណ្ឌនីមួយៗ គ្មានសំរាមដោយកិច្ចការងារនេះត្រូវចាប់ផ្ដើមធ្វើពីខណ្ឌចំការមនដំបូងគេ ដើម្បីយកធ្វើជាខណ្ឌគំរូទៅដល់ខណ្ឌឯទៀត។
លោកបន្ថែមថា ការចូលរួមសហការរបស់សាលារាជធានីភ្នំពេញជាមួយក្រុមយុវជនសំរាម នៅពេលនេះគឺប្រៀបដូចជាការបើកទ្វារទទួលយកការគិត និងការផ្ដល់យោបល់ផ្សេងៗរបស់យុវជនក្នុងការដោះស្រាយបញ្ហាសំរាមដែលយុវជនសំរាមរំពឹងថា ការអភិវឌ្ឍទីក្រុងនិរន្តរភាពនឹងទទួលបានជោគជ័យតាមផែនការចង់បានរបស់រដ្ឋាភិបាល។
លោកបន្តថា៖ «ខ្ញុំគិតថា ចាប់ពីពេលនេះទៅដល់ឆ្នាំ ២០៣០ គឺមានរយៈពេល ១០ ឆ្នាំទៀត ហើយដោយសារបច្ចុប្បន្នប្រទេសកំពុងអភិវឌ្ឍន៍សំណង់ផ្សេង អ៊ីចឹងវារាងមានសំរាមដំបូងបន្តិច។ អ៊ីចឹង! នៅពេលសំណង់ហើយរួចរាល់អស់។ ខ្ញុំថា វាអាចកែប្រែបានច្រើន ឬអាចមុនឆ្នាំ ២០៣០ ក៏ថាបាន»។
គម្រោងដើម្បីអនុវត្តផែនការអភិវឌ្ឍន៍ទីក្រុងភ្នំពេញឱ្យក្លាយជាទីក្រុងនិរន្តរភាពក្នុងឆ្នាំ ២០៣០ ខាងមុខគឺមានចំនួន ៤៨ គម្រោង ដូចជា គម្រោងបង្កើតឱ្យមានសួនច្បារសាធារណៈពហុបំណងសម្រាប់ហាត់ប្រាណ ជិះស្គី និងលំហែអារម្មណ៍ហើយទីធ្លាសាធារណៈបន្ថែមដោយគម្របព្រៃឈើដើម្បីជាម្លប់ ដាំបន្លែ និងចុល្លព្រឹក្សបន្ថែមដើម្បីរក្សាទឹកទុក។ តំបន់បៃតងនឹងអាចមានផ្លូវដើរធម្មជាតិសម្រាប់ជាការកម្សាន្តការរត់យឺតៗ និងផ្លូវជិះកង់ជាដើម ហើយក៏បង្កើនជីវចម្រុះតំបន់ក្រុង និងការទាក់ទាញប្រភេទបក្សីមកតំបន់ទីក្រុងវិញ។
គម្រោងស្ដារឡើងវិញនូវទីតាំងបេតិកភណ្ឌវប្បធម៌ដែលនឹងជ្រើសរើសអគារសម័យអាណានិគមបារាំង ឬអគារស្ថាបត្យកម្មខ្មែរសម័យថ្មីដែលទំនេរ ដើម្បីបង្ហាញហើយនឹងត្រូវបានកែប្រែលម្អលើរចនាសម្ព័ន្ធដើម្បីប្រើប្រាស់ និងទេសចរណ៍រួមទាំងគម្រោងបង្កើតជាសេចក្ដីព្រាងបទប្បញ្ញត្តិស្ដីពីការហាមឃាត់ការប្រើប្រាស់ថង់ប្លាស្ទិកប្រើតែ ១ ដងជាដើម៕
