.jpg)
រូបចម្លាក់បុរាណដែលប្រជានេសាទប្រគល់ជូនរដ្ឋបាលខេត្តកែប កាលពីថ្ងៃទី ១៨ មេសា។ រូបថត ហ្វេសប៊ុក
ភ្នំពេញ៖ មន្ត្រីជំនាញនៃក្រសួងវប្បធម៌ និងវិចិត្រសិល្បៈបានអះអាងថា រូបចម្លាក់ព្រះនរាយណ៍ឈរលើស្តេចគ្រុឌ ដែលរដ្ឋបាលខេត្តកែបទទួលបានពីប្រជានេសាទនាពេលកន្លងមក មិនមែនជាវត្ថុបុរាណ និងមានតម្លៃថ្លៃដូចអ្វីដែលមានការផ្សព្វផ្សាយនោះទេ។
លោក ឡុង ប៉ុណ្ណាសិរីវត្ថ អ្នកនាំពាក្យក្រសួងវប្បធម៌ និងវិចិត្រសិល្បៈបានប្រាប់ ភ្នំពេញ ប៉ុស្តិ៍ នៅថ្ងៃទី ១៦ ឧសភានេះថា មន្ត្រីជំនាញរបស់ក្រសួងបានចុះទៅពិនិត្យរួចហើយកាលពីថ្ងៃសុក្រកន្លងមកនេះ ហើយជាលទ្ធផលឃើញថា រូបចម្លាក់នេះ គឺជារបស់ដែលគេកសាងថ្មី និងផលិតឡើងពីស្ពាន់ មិនមែនជាវត្ថុបុរាណ ឬរបស់មានតម្លៃអ្វីនោះទេ។
លោកបានបន្តថា បើទោះបីមានរូបគ្រុឌ និងព្រះនរាយក៏ដោយ ក៏រូបចម្លាក់នេះ ត្រូវបានជាងធ្វើឡើងតាមការនឹកឃើញប៉ុណ្ណោះ ព្រោះតាមការពិនិត្យជាក់ស្តែងរបស់មន្ត្រីជំនាញ វាមិនមានបែបបទត្រឹមត្រូវទេ។
ទោះជាយ៉ាងណា លោក ឡុង ប៉ុណ្ណាសិរីវត្ថ បានបញ្ជាក់ថា មន្ត្រីជំនាញនឹងធ្វើរបាយការណ៍ជូនលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ដើម្បីឯកភាពនូវអ្វីដែលបានរកឃើញនេះនៅថ្ងៃចន្ទស្អែកនេះ។
លោកបានថ្លែងថា៖ «ខ្ញុំសូមបញ្ជាក់ថា គាត់ (មន្ត្រីជំនាញ) បានចុះទៅពិនិត្យផ្ទាល់មានន័យថា របស់នេះគឺថ្មី តាមពិតនៅទីនោះក៏មានអ្នកជំនាញបុរាណវិទ្យាគេបញ្ជាក់រួចហើយ ប៉ុន្តែខាងមន្ទីរគេមិនអស់ចិត្ត កុំឱ្យអ្នកសារព័ត៌មាន ឬអ្នកផ្សេងទៀតមានការសង្ស័យទៅជារឿងវែងឆ្ងាយ ក៏តម្រូវឱ្យខាងអ្នកជំនាញពិនិត្យឱ្យបានច្បាស់លាស់»។
លោក តុង ភោ ប្រធានមន្ទីរវប្បធម៌ និងវិចិត្រសិល្បៈបានឱ្យដឹងដែរថា លោក អ៊ុក សុខា អគ្គនាយកបេតិកភណ្ឌនៃក្រសួងវប្បធម៌ និងវិចិត្រសិល្បៈបានប្រាប់លោកថា រូបចម្លាក់នេះ មិនមែនជាវត្ថុបុរាណអ្វីទេ នៅពេលដែលលោកបានមកពិនិត្យជាក់ស្តែង។
ទោះជាយ៉ាងណា លោកបានឱ្យដឹងថា មន្ទីរបានបញ្ជូនរបាយការណ៍ទៅក្រសួងតាមតេឡេក្រាមតាំងពីថ្ងៃទី ១៣ ឧសភា ម្តងរួចហើយ និងកាលពីថ្ងៃទី ១៥ ខែឧសភា ក៏បានបញ្ជូនរបាយការណ៍បន្ថែមតាម លោក អ៊ុក សុខា ទៅជូនលោក ស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ដើម្បីពិនិត្យ និងផ្តល់យោបល់រួចហើយដែរ។
លោក តុ ភោ បញ្ជាក់ថា៖ «យើងគ្រាន់តែស្នើសុំអនុសាសន៍ ឬមន្ត្រីជំនាញមកពិនិត្យបញ្ជាក់បន្ថែម ហើយយ៉ាងយូរនៅសប្តាហ៍នេះ នឹងទទួលបានលទ្ធផល។ នៅពេលដែលទទួលលទ្ធផលរួចហើយ មន្ទីរនឹងធ្វើសេចក្តីប្រកាសព័ត៌មានមួយផ្សព្វផ្សាយកុំឱ្យពលរដ្ឋមានការយល់ច្រឡំទៀត»។
បើតាមលោក តុង ភោ រូបចម្លាក់ដែលមានព្រះនរាយណ៍ ឬព្រះវិស្ណុឈរពីលើស្តេចគ្រុឌនេះ ត្រូវបានមន្ត្រីជំនាញរបស់ក្រសួងវប្បធម៌ និងវិចិត្រសិល្បៈអះអាងថា ត្រូវបានកសាងនៅក្នុងអំឡុងពេល ១០ ឆ្នាំចុងក្រោយនេះ ដែលគេផលិតឡើងមិនមានក្បួនខ្នាតអ្វីទេ និងមានឥទ្ធិពលមកពីប្រទេសថៃ។
លោកបានថ្លែងថា៖ «ខ្ញុំសូមលើកជាឧទាហរណ៍តែមួយទេ គឺព្រះវិស្ណុ ឬព្រះនរាយណ៍មិនដែលកាន់ត្រីសូរ្យនោះទេ ព្រោះនៅក្នុងរឿងព្រេងកថា ឬនៅក្នុងរូបចម្លាក់មិនមានរូបអ៊ីចឹងទេ»។
ប្រជានេសាទឈ្មោះ កាន់ ថា ភេទប្រុស អាយុ ៣៧ ឆ្នាំ រស់នៅភូមិកំពង់ត្នោត ឃុំកូនសត្វ ស្រុកទឹកឈូ ខេត្តកំពត គឺជាអ្នកដែលរើសបានរូបចម្លាក់នេះពីក្នុងសមុទ្រនៅខេត្តព្រះសីហនុ និងបានប្រគល់រូបចម្លាក់នេះទៅឱ្យអភិបាលខេត្តកែប ដើម្បីរក្សាទុកជាសម្បត្តិរដ្ឋកាលពីថ្ងៃទី ១៨ ខែ មេសា ឆ្នាំ ២០២១ ខណៈពេលដែលលោកត្រឡប់ទៅកាន់ស្រុកកំណើតរបស់លោកវិញ៕
