.jpg)
មន្ត្រីវៀតណាម ក្នុងជំនួបជាមួយមន្ត្រីកម្ពុជា កាលពីថ្ងៃអង្គារ។ រូប សហការី
ភ្នំពេញៈ លោក សុខ ផល រដ្ឋលេខាធិការក្រសួងមហាផ្ទៃកាលពីម្សិលមិញបានប្រាប់ភ្នំពេញប៉ុស្តិ៍ឲ្យដឹងថា លោក ជិនគួក ជុង សមាជិកគណៈកម្មាធិការមជ្ឈិមបក្ស និងជាលេខាបក្សក្រុងកឹនថឺនៃសាធារណរដ្ឋសង្គមនិយមវៀតណាមកាលពីសប្ដាហ៍មុនបានធ្វើដំណើរទៅពិនិត្យមើលស្ថានភាពរស់នៅរបស់អន្តោប្រវេសន៍វៀតណាមដែលត្រូវបានអាជ្ញាធរកម្ពុជាផ្លាស់ប្ដូរកន្លែងរស់នៅរបស់ពួកគេពីក្នុងទន្លេសាបទៅរស់នៅទីទួលនៅក្នុងខេត្តកំពង់ឆ្នាំង។
លោក សុខ ផល បានទទួលជួបសមភាគីវៀតណាមកាលពីរសៀលថ្ងៃទី ១៧ ខែធ្នូ ឆ្នាំ ២០១៩ នៅទីស្តីការក្រសួងមហាផ្ទៃបានពិភាក្សាអំពីការងារមួយចំនួន ពាក់ព័ន្ធសន្តិសុខជនបរទេសអន្តោប្រវេសន៍ ការផ្តល់អាហារូបករណ៍ដល់សាកលវិទ្យាល័យបាត់ដំបង និងកិច្ចសហការការងារមួយចំនួនផ្សេងទៀត។
ដំណើរទស្សនកិច្ចរបស់សមភាគីវៀតណាមបានធ្វើឡើងស្របពេលដែលអាជ្ញាធរខេត្តកំពង់ឆ្នាំងបាននិងកំពុងរៀបចំផ្លាស់ប្ដូរទីតាំងរស់នៅរបស់ប្រជាពលរដ្ឋដែលរស់នៅលើផ្ទះបណ្តែតទឹកក្នុងភូមិសាស្ត្រឃុំ-សង្កាត់ចំនួន ៩ ដែលសរុបទាំងអស់មាន ៤ ៥៦៣ គ្រួសារក្នុងនោះមានទាំងខ្មែរ ខ្មែរ-អ៊ិស្លាម និងវៀតណាមឲ្យឡើងមករស់នៅលើគោកវិញក្នុងគោលបំណងថែរក្សាបរិស្ថានទន្លេសាប ធនធានធម្មជាតិ និងជីវចម្រុះដើម្បីពង្រឹងការថែរក្សាសន្តិសុខ និងសុវត្ថិភាពសាធារណៈ និងដើម្បីចូលរួមទប់ស្កាត់បទល្មើសបំផ្លាញធនធានធម្មជាតិ ជាពិសេសធនធានជលផល។
លោក សុខ ផល បានថ្លែងថា៖ «គាត់ (លោក ជិនគួក ជុង) មកហ្នឹងដោយសារទី ១ គាត់ចង់ទៅមើលនៅកំពង់ឆ្នាំងអំពីការបំផ្លាស់ទីប្រជាពលរដ្ឋរស់នៅលើផ្ទះបណ្តែតទឹកទៅកន្លែងគោកដោយសារតែនៅក្នុងហ្នឹងមានប្រជាពលរដ្ឋដែលមកពីខេត្តរបស់គាត់ ហើយគាត់ចង់ជួយពីព្រោះឥឡូវនេះអ្នកទាំងអស់ហ្នឹងគឺជាជនអន្តោប្រវេសន៍នៅឡើយទេ»។
លោកបានឲ្យដឹងទៀតថា៖ «គាត់មកជួយនៅពេលដែលយើងចល័តលើកពីក្នុងទឹកមកលើគោក គាត់អាចជួយជាជីវភាពរស់នៅ ហើយអ្វីដែលគាត់អាចជួយបានគាត់ជួយ ដោយសារតែជាសាច់ឈាមគាត់ ដូច្នេះរឿងធំគឺគាត់សុំការអនុញ្ញាតទៅជួបសួរសុខទុក្ខ និងជួយឧបត្ថម្ភ។ គាត់បានឯកភាពទាំងស្រុងចំពោះការបំផ្លាស់ទីចេញពីក្នុងទឹកហ្នឹង។ ធម្មតាទេ គាត់សុំឲ្យយើងជួយយកចិត្តទុកដាក់ការលំបាករបស់ប្រជាជនហ្នឹងហើយគាត់ក៏រួមចំណែកជួយដែរ»។
លោក ស៊ុន សុវណ្ណារិទ្ធ អភិបាលរងខេត្តកំពង់ឆ្នាំងបានឲ្យដឹងថាលោក ជិនគួកជុង បានទស្សនកិច្ចទៅខេត្តកំពង់ឆ្នាំងហើយបានជួបសំណេះសំណាលជាមួយមន្ត្រី ខេត្តកំពង់ឆ្នាំងផងដែរ និងបានចុះទៅសួរសុខទុក្ខជនជាតិវៀតណាមដែលរស់នៅលើផ្ទះបណ្តែតទឹកផងដែរ។
លោក សុវណ្ណារិទ្ធ បានឲ្យដឹងថា៖ «គាត់មកដើម្បីជួបសំណេះសំណាលជាមួយយើង ហើយគាត់បានជួបជាមួយបងប្អូនគាត់ដើម្បីសួរសុខទុក្ខ»។
លោកអភិបាលខេត្តបានបញ្ជាក់ជាថ្មីថា អាជ្ញាធរខេត្តកំពង់ឆ្នាំងបាននិងកំពុងរៀបចំបណ្តើរក្នុងការបំផ្លាស់ទីប្រជាពលរដ្ឋរស់នៅលើផ្ទះបណ្តែតទឹកទៅលើគោក ដែលជាដីរបស់ជនជាតិខ្មែរឯកជនមិនមែនជាការកាត់ដីឲ្យពួកគេនោះទេ តែពួកគេអាចជួលស្នាក់នៅ តែមិនមានសិទ្ធិកាន់កាប់ដីទាំងនោះជាកម្មសិទ្ធិឡើយ។
របាយការណ៍រដ្ឋបាលខេត្តកំពង់ឆ្នាំងបានឲ្យដឹងថា ប្រជាជនខ្មែរ និងខ្មែរ-អ៊ិស្លាមដែលស្ម័គ្រចិត្តរើផ្ទះបណ្តែតទឹកទៅរស់នៅលើគោកនោះគឺមានសិទ្ធិទទួលបានដីនោះក្នុង ១ គ្រួសារ ៥ ម៉ែត្រគុណ ២០ ម៉ែត្រ។ ឯក្រុមហ៊ុនឯកជនទទួលបានប្រាក់ចំណេញស្របច្បាប់ ចំណែកពលរដ្ឋដែលត្រូវបំផ្លាស់ទីពីដងទន្លេទៅរស់នៅក្នុងតំបន់នោះ អាចទិញ ឬជួលដីក្នុងតម្លៃសមរម្យ។
យោងតាមរបាយការណ៍ខេត្តកំពង់ឆ្នាំងដដែលនោះបានឲ្យដឹងថា ប្រជាពលរដ្ឋដែលរស់នៅផ្ទះបណ្តែតទឹកលើដងទន្លេសាបសរុបទាំងអស់មាន ៤៥៦៣ គ្រួសារក្នុងនោះមានទាំងខ្មែរ ខ្មែរ-អ៊ិស្លាម និង វៀតណាម។ ពលរដ្ឋខ្មែរមាន ២ ០១០ គ្រួសារស្មើនឹង ៩១៦៨ នាក់ ខ្មែរ-អ៊ិស្លាមមាន ៧៣ គ្រួសារស្មើនឹង ២៤២ នាក់។ ឯវៀតណាមមានដល់ទៅ ២ ៤៨០ គ្រួសារស្មើនឹង ១០ ៣១១ នាក់៕
