.jpg)
សកម្មភាពរថយន្តដឹកដីចាក់លុបបឹងតាមោកនៅខណ្ឌព្រែកពៅ្នពីថ្ងៃទី ២០ ធ្នូ។ រូប ឈន ណន
ភ្នំពេញៈ មន្ត្រីសង្គមស៊ីវិលដែលធ្វើការងារទាក់ទងបរិស្ថាន និងសិទ្ធិមនុស្ស បារម្ភពីការលុបបឹងតាមោកជាបន្តបន្ទាប់ ដោយពួកគេអះអាងថា អាចនឹងបង្កគ្រោះថ្នាក់ដល់បរិស្ថាន ការរស់នៅរបស់ពលរដ្ឋ និងទឹកជន់លិចរាជធានីភ្នំពេញ ប៉ុន្ដែមន្ត្រីរដ្ឋាភិបាលថាមុនពេលសម្រេចកាត់ដីបឹងនេះ ក្រសួងជំនាញបានសិក្សាពីផលប៉ះពាល់ត្រឹមត្រូវរួចរាល់ហើយ។
ការលើកឡើងនេះបន្ទាប់ពីទីស្តីការគណៈរដ្ឋមន្ត្រីកាលពីថ្ងៃទី ២៤ ធ្នូ បានចេញ ស.ជ.ណ. ឬសេចក្ដីជូនដំណឹងដោយយល់ព្រមកាត់ផ្ទៃដីបឹងតាមោកចំនួន ២០ ហិកតាទៅឱ្យលោក លន់ ហាក់ និងអ្នកស្រី ឈុន ចាន់ធី ដែលជាម្ចាស់ដី ១ កន្លែងស្ថិតនៅសង្កាត់ស្រះចក ខណ្ឌដូនពេញ ដើម្បីដោះដូរសម្រាប់សាងសង់អគារទីបញ្ជាការស្រាលក្នុងការការពារសន្តិសុខ សុវត្ថិភាពជូនថ្នាក់ដឹកនាំនៅចំណុចគោលដៅទីស្ដីការគណៈរដ្ឋមន្ត្រី។
លោក អំ សំអាត នាយករងអង្គការលីកាដូបានថ្លែងកាលពីថ្ងៃម្សិលមិញថា ការលុបបឹងធម្មជាតិ ជាបន្តបន្ទាប់ដូចជាបឹងជើងឯក បឹងទំពុន បឹងកក់ ជាពិសេសបឹងតាមោកដែលជាបឹងធំជាងគេនៅភ្នំពេញអាចនឹងធ្វើឱ្យទីក្រុងភ្នំពេញប្រឈមនឹងជំនន់ទឹកភ្លៀងលិចលង់។ លើសពីនេះអាចជាការព្រួយបារម្ភចំពោះការប៉ះពាល់បរិស្ថាន។
លោកបញ្ជាក់ថា៖ «រដ្ឋាភិបាលគួរតែសិក្សាឱ្យបានច្បាស់លាស់មុននឹងសម្រេចលុបបឹងណាមួយ ព្រោះយើងមានការបារម្ភពីផលប៉ះពាល់បរិស្ថាន និងជំនន់ទឹកភ្លៀងនៅក្នុងរាជធានីភ្នំពេញ»។
មន្ត្រីសិទ្ធិមនុស្សរូបនេះបន្តថា៖ «យើងបានកត់សម្គាល់ឃើញថា ប៉ុន្មានឆ្នាំចុងក្រោយនេះមានជំនន់ទឹកភ្លៀងជន់លិចនៅក្នុងក្រុងភ្នំពេញយើង។ ការលុបបឹងធម្មជាតិ បើសិនចៀសបានគឺគួរតែចៀស ព្រោះបឹងធម្មជាតិអាចជួយរំដោះទឹកភ្លៀង និងបរិស្ថាន»។
លោក តឹក វណ្ណារ៉ា នាយកប្រតិបត្តិវេទិកានៃអង្គការមិនមែនរដ្ឋាភិបាលស្តីពីកម្ពុជា ថ្លែងពីម្សិលមិញថា រដ្ឋាភិបាលគួរតែបង្ហាញគម្រោងអភិវឌ្ឍន៍ និងការវាយតម្លៃផលប៉ះពាល់នៅតំបន់បឹងតាមោកឱ្យបានលម្អិតជាងនេះ ដើម្បីឱ្យអង្គការសង្គមស៊ីវិល និងសាធារណជនបានយល់ពីគោលបំណងរបស់រដ្ឋាភិបាល។ ពិសេសពលរដ្ឋអាចដឹងពីទំហំនៃការអភិវឌ្ឍថាតើនៅសល់ ផ្ទៃដីបឹងប៉ុន្មាន ឬត្រូវអភិវឌ្ឍទំហំប៉ុន្មាន ហើយអាចនឹងមានផលប៉ះពាល់អ្វីខ្លះ?
លោកនិយាយថា៖ «ក្នុងនាមយើងជាសង្គមស៊ីវិល គឺចង់ឱ្យរដ្ឋាភិបាលបង្ហាញការវាយតម្លៃផលប៉ះពាល់បរិស្ថាន បន្ទាប់មកបើកទូលាយ ឬទទួលយកមតិយោបល់របស់សង្គមស៊ីវិល ដើម្បីធ្វើការកែប្រែយុទ្ធសាស្ត្រអភិវឌ្ឍន៍មួយចំនួនដែលមានផលប៉ះពាល់ដល់បរិស្ថាន និងការដោះស្រាយបញ្ហាទឹកជំនន់នៅក្នុងរាជធានីភ្នំពេញ»។
បើតាមសារព័ត៌មានក្នុងស្រុកមួយបានផ្សាយលិខិតដែលចុះហត្ថលេខា ដោយលោក កែន សត្ថា រដ្ឋលេខាធិការទីស្តីការគណៈរដ្ឋមន្ត្រីចុះថ្ងៃទី ២៣ ខែធ្នូ គឺរាជរដ្ឋាភិបាលបានសម្រេចធ្វើប្រទានកម្មជូនលោក លន់ ហាក់ និងអ្នកស្រី ឈុន ចាន់ធី នូវផ្ទៃដីបឹងតាមោក (កប់ស្រូវ) ទំហំ ២០ ហិកតា ស្ថិតនៅសង្កាត់គោករកា ខណ្ឌព្រែកព្នៅ រាជធានីភ្នំពេញដូចមានគំនូសប្លង់បង្ហាញទីតាំងភ្ជាប់ជាមួយ។
លិខិតបន្តថា អ្នកទាំង ២ ត្រូវប្រគល់ដីកម្មសិទ្ធិទំហំ ១ ៥៧១, ១៨៩ ម៉ែត្រក្រឡា ស្ថិតនៅសង្កាត់ស្រះចក ខណ្ឌដូនពេញ រាជធានីភ្នំពេញ និងចំណាយថវិកាបន្ថែម ដើម្បីសាងសង់អគារទីបញ្ជាការស្រាលទំហំ ២១,៧ ម៉ែត្រ គុណនឹង ៤២ ម៉ែត្រ កម្ពស់ ៣ ជាន់ និងបំពាក់សម្ភារបរិក្ខារចាំបាច់នានានៅលើទីតាំងខាងលើជូនរដ្ឋបាលរាជធានីភ្នំពេញឱ្យបានរួចរាល់ជាស្ថាពរក្នុងរយៈពេល ១៨ ខែក្រោយពីទទួលបានគោលការណ៍អនុញ្ញាតពីរាជរដ្ឋាភិបាល។ ការផ្ទេរកម្មសិទ្ធិអចលនទ្រព្យទាំងអស់ខាងលើពន្ធអាករ និងសេវាអន្តរក្រសួងនានាជាបន្ទុករបស់រដ្ឋ។
លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ និងអ្នកនាំពាក្យសាលារាជធានីភ្នំពេញលោក ម៉េត មាសភក្តី ពីម្សិលមិញមិនអាចទាក់ទងតាមទូរស័ព្ទ ដើម្បីសួរអំពីបញ្ហានេះបានទេ។
ប៉ុន្តែលោក ផៃ ស៊ីផាន អ្នកនាំពាក្យរដ្ឋាភិបាលថ្លែងពីម្សិលមិញថា មុនសម្រេចបែបនេះគណៈកម្មការដែលមានការចូលរួមពីអន្តរក្រសួងបានប្រជុំជាច្រើនលើក ហើយបានសម្រេចជាសមូហភាព។ ដូច្នេះដីបឹងដែលបានកាត់បង្វិលទៅឱ្យឯកជននេះគឺជាផលប្រយោជន៍សាធារណៈរបស់រដ្ឋ។
បើតាមលោក ផៃ ស៊ីផាន ការសម្រេចនេះមិនមែនជាការចាត់ចែងដោយបុគ្គល ឬឯកជនណាម្នាក់ទេពោលគឺការសម្រេចដោយសមូហភាពតាមរយៈអន្តរក្រសួងដែលមានក្រសួងសាមី ដូចជា ក្រសួងសេដ្ឋកិច្ច និងហិរញ្ញវត្ថុ ជាអ្នកផ្ទៀងផ្ទាត់តម្លៃ។ ក្រសួងរៀបចំដែនដីនគរូបនីយកម្ម និងសំណង់ ឃ្លាំមើលទាក់ទងនឹងច្បាប់ និងក្រសួងបរិស្ថាន ត្រួតពិនិត្យទាក់ទងនឹងផលប៉ះពាល់បរិស្ថាន។ ដូច្នេះក្រសួងជំនាញទាំង ៣ បានសិក្សាពីផលប៉ះពាល់រួចហើយ។
លោកថា៖ «ចំពោះអ្នករិះគន់ គឺយើងស្វាគមន៍អ្នករិះគន់ទាំងអស់ វាអាស្រ័យដោយគាត់មិនមែនជាអ្នកទទួលខុសត្រូវក្នុងការបម្រើជាតិ។ បើសិនជារាជរដ្ឋាភិបាលមានចំណុចកង្វះខាតណាមួយ អ្នករិះគន់ហ្នឹង មិនដែលបានចូលរួមដោះស្រាយជាមួយរាជរដ្ឋាភិបាលទេ គឺក្រៅតែពីរិះគន់។ ដូច្នេះការរិះគន់នេះខ្ញុំសូមអរគុណ ប៉ុន្ដែអ្នករិះគន់គួរតែសិក្សាស្វែងយល់ពីការឆ្លើយតបរបស់រាជរដ្ឋាភិបាល»។
គួររំឭកថា បឹងតាមោក គឺជាបឹងធំមួយនៅភ្នំពេញដែលមានផ្ទៃក្រឡាជាង ៣ ០០០ ហិកតា។ រយៈពេលចុងក្រោយនេះត្រូវបានរដ្ឋាភិបាលសម្រេចលុបផ្ទៃបឹងនេះជាច្រើនហិកតា ដើម្បីប្រគល់ជូនទៅសាលារាជធានីភ្នំពេញធ្វើជាសួនច្បារ ឧទ្យានធម្មជាតិសាធារណៈ កាត់ឱ្យអគ្គស្នងការដ្ឋាននគរបាលជាតិ និងអគារការិយាល័យរបស់ក្រសួងយុត្តិធម៌ជាដើម៕
វីដេអូ៖
