The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​សង្ឃ​បណ្តេញ​សង្ឃ​គាំទ្រ​ ខឹម ​វាសនា ​១៣ ​​អង្គ​ចេញ​ពី​វត្ត

មន្ត្រី​សង្ឃ​បណ្តេញ​សង្ឃ​គាំទ្រ​ ខឹម ​វាសនា ​១៣ ​​អង្គ​ចេញ​ពី​វត្ត

ព្រះសង្ឃ​ ១៣ ​អង្គ​នៅ​វត្ត​ជ្រៃហូរព្នៅ​ខ្លះ​យំ​នៅ​ពេល​ឮ​មន្ត្រី​សង្ឃ​ប្រកាស​បណ្តេញ​ចេញ​។
ព្រះសង្ឃ​ ១៣ ​អង្គ​នៅ​វត្ត​ជ្រៃហូរព្នៅ​ខ្លះ​យំ​នៅ​ពេល​ឮ​មន្ត្រី​សង្ឃ​ប្រកាស​បណ្តេញ​ចេញ​។ រូបថត ហ្វេសប៊ុក

មន្ត្រី​សង្ឃ​បណ្តេញ​សង្ឃ​គាំទ្រ​ ខឹម ​វាសនា ​១៣ ​​អង្គ​ចេញ​ពី​វត្ត

កំពង់ស្ពឺៈ មន្ត្រី​សង្ឃ​ថ្នាក់​ខេត្ត​កំពង់ស្ពឺ​បាន​សម្រេច​បណ្តេញ​ព្រះសង្ឃ​ដែល​មាន​និន្នាការ​ទៅ​​រក​គណបក្ស​សម្ព័ន្ធ​ដើម្បី​ប្រជាធិបតេយ្យ​ដែល​ដឹកនាំ​ដោយ​លោក ខឹម វាសនា ចំនួន ១៣ អង្គ​ចេញ​ពី​វត្ត​ដោយ​ចោទ​ថា​ព្រះសង្ឃ​ទាំង​នោះ​មិន​ស្តាប់​វិន័យ​សង្ឃ និង​​បាន​បង្ក​ការ​លំបាក​នៅ​ក្នុង​វត្ត​ជាច្រើន​លើក​ច្រើន​សា​តែ​ព្រះសង្ឃ​រង​ការ​បណ្តេញ​ចេញ​ចាត់​ទុក​ថា​ជា​រឿង​អយុត្តិធម៌។

ចៅ​អធិការ​ស្តីទី​វត្ត​និគ្រោធ នរលក្ខណ៍ (វត្ត​ជ្រៃហូរព្នៅ) ស្ថិត​នៅ​ឃុំ​វាល ស្រុក​គងពិសី ខេត្ត​កំពង់ស្ពឺ ព្រះតេជគុណ ប៊ូ ពុទ្ធីណា មាន​សង្ឃដីកា​ប្រាប់​ភ្នំពេញ​ប៉ុស្តិ៍​កាលពី​ម្សិលមិញ​ថា​មន្ត្រី​សង្ឃ​ថ្នាក់​ខេត្ត និង​​ព្រះសង្ឃ​នៅក្នុង​ស្រុក​បាន​សម្រេច​បណ្តេញ​​ព្រះសង្ឃ​ទាំង ១៣ អង្គ​ចេញ​ពី​វត្ត​ហើយ​កាលពី​ថ្ងៃ​ទី ៩ ខែ​កុម្ភៈ។

ព្រះអង្គ​មាន​ដីកា​បន្ត​ថា ​ការ​បណ្តេញ​ចេញ​ដោយសារ​ព្រះសង្ឃ​ទាំង ១៣ អង្គ​ពុំ​បាន​ស្តាប់​ធម៌​វិន័យ​បង្ក​បញ្ហា​ក្នុង​វត្ត និង​ស្តាប់​តែ​ថ្នាក់ដឹកនាំ​បក្ស​របស់​ខ្លួន​លោក ខឹម វាសនា ប៉ុណ្ណោះ។

ព្រះអង្គ​បញ្ជាក់​ថា៖ «ព្រះតេជគុណ​ទាំង​នោះ​បង្ក​បញ្ហា​ជាច្រើន​មិន​ប្រព្រឹត្ត​ទៅ​តាម​វិន័យ​​ព្រះពុទ្ធ​សាសនា​ហើយ​អត់​ស្តាប់​ការ​ទូន្មាន និង ឌឺ​ដាក់​ព្រះចៅ​អធិការ​និយាយ​ទៅ​មិន​​គោរព​តាម​​ព្រះពុទ្ធ​សាសនា​​ព្រោះ​ព្រះសង្ឃ​ទាំង​នោះ​​គិត​តែ​តាម​បក្ខពួក​ហើយ​ពេល​ខ្លះ​ស្តាប់​តែ​លោក ខឹម វាសនា អត់​ស្តាប់​ធម៌​ទេ»។

បើ​តាម​ព្រះតេជគុណ ប៊ូ ពុទ្ធីណា ព្រះសង្ឃ​ទាំង ១៣ អង្គ​មិនមែន​ជា​អ្នក​បួស​នៅ​ស្រុក​គងពិសី ​ខេត្ត​កំពង់ស្ពឺ​ទេ​ពោល​ព្រះសង្ឃ​ទាំង​នោះ​មកពី​ទី​ឆ្ងាយ និង​បាន​ចូល​មក​ស្នាក់​នៅ​វត្ត​តាម​បក្ខពួក​ពុំ​មាន​​ការ​អនុញ្ញាត​ហើយ​បាន​បង្ក​បញ្ហា​ជាច្រើន។

ទោះ​ជា​មន្ត្រី​សង្ឃ​ថ្នាក់​ខេត្ត​បណ្តេញ​​ព្រះសង្ឃ​ចេញ​ពី​វត្ត​ក្តី​តែ​ព្រះសង្ឃ​ទាំង​​នោះ​មិន​ព្រម​​ចាកចេញ​ទេ។ ការ​មិន​ព្រម​ចាកចេញ​នេះ​ព្រះតេជគុណ ប៊ូ ពុទ្ធីណា មាន​សង្ឃដីកា​ថា​ទុក​ឱ្យ​ថ្នាក់​លើ​ជា​អ្នក​សម្រេច​ថា​នឹង​មាន​វិធានការ​អ្វី​បន្ត​ទៀត។

ព្រះសង្ឃ​ដែល​រង​ការ​បណ្តេញ​ចេញ​ព្រះតេជគុណ ថោម សឿន មាន​សង្ឃដីកា​ប្រាប់​ភ្នំពេញ​ប៉ុស្តិ៍​ថា​ការ​បណ្តេញ​ចេញ និង​រាល់​ការ​ចោទប្រកាន់​ទាំង​នេះ​ជា​រឿង​អយុត្តិធម៌​បំផុត និង​ចាត់ទុក​ថា​ជា​រឿង​បក្ខពួក​និយម។

ព្រះអង្គ​មាន​ដីកា​ថា​៖ «ក្នុង​ករណី​នេះ​ជា​រឿង​អយុត្តិធម៌​បំផុត​នៅ​ថ្ងៃ​អង្គារ​ពេល​ដែល​មន្ត្រី​សង្ឃ​បាន​សម្រេច​ហ្នឹង​គឺ​មិន​ឱ្យ​យើង​តវ៉ា ឬ​និយាយ​ពី​ហេតុផល​ដែល​នាំ​ឱ្យ​កើត​រឿង​ទេ​អ៊ីចឹង​យើង​​យល់​ថា​អ្វី​ដែល​សម្រេច​ហ្នឹង​​យើង​​មិន​ទាន់​អស់​ចិត្ត​​ទេ​សម្រាប់​ក្រុម​អាត្មា និង​មិន​​ត្រឹមត្រូវ​ទៅ​តាម​មេរៀន​នៃ​ព្រះធម៌​ទេ»។

ព្រះអង្គ​បន្ត​ថា​ព្រះអង្គ​ពិតជា​បាន​គាំទ្រ​លោក ខឹម វាសនា មែន​តែ​ពុំ​បាន​ធ្វើ​ឱ្យ​មាន​បញ្ហា​នៅក្នុង​វត្ត​ដូច​ការ​ចោទប្រកាន់​ទេ។

យ៉ាង​ណា​ក៏ដោយ​ព្រះអង្គ​បាន​ប្តេជ្ញា​ថា ​ក្រុម​របស់​ព្រះអង្គ​នឹង​បន្ត​ស្នាក់នៅ​ក្នុង​វត្ត​រហូត​​ទាល់​តែ​មាន​ដំណោះស្រាយ​សមរម្យ​ពី​សម្តេច​សង្ឃ និង​ក្រសួង​ធម្មការ និង​សាសនា​នឹង​បន្ត​ស្វែងរក​អន្តរាគមន៍​ពី​នាយក​រដ្ឋមន្ត្រី​ថែម​​ទៀត។ បើ​តាម​ព្រះតេជគុណ ថោម សឿន មន្ត្រី​សង្ឃ​ថ្នាក់​​ខេត្ត​បាន​ចោទ​ក្រុម​របស់​ព្រះអង្គ​ថា​មិន​បាន​ជួយ​សម្អាត​ស្មៅ យក​ទឹកនោម​ឱ្យ​ព្រះសង្ឃ​ឆាន់ និង​អត់​ស្តាប់​ធម៌​ជាដើម។ យ៉ាង​នេះ​ក្តី​ព្រះអង្គ​ចាត់​ទុក​ថា​ការ​ចោទប្រកាន់​ទាំង​នេះ​ ៩​ ចំណុច​​គ្រាន់តែ​ជា​លេស​ប៉ុណ្ណោះ។

អនុរដ្ឋលេខាធិការ​ក្រសួង​ធម្មការ​​ និង​សាសនា​លោក​ សេង សុមុនី ដែល​​បាន​​ចូលរួម​ក្នុង​កិច្ចប្រជុំ​ប្រាប់​ភ្នំពេញ​ប៉ុស្តិ៍​ថា​បើ​តាម​ការ​ឃ្លាំ​មើល​របស់​លោក​ខាង​មន្ត្រី​សង្ឃ​ថ្នាក់​ខេត្ត​បាន​សម្រេច​ទៅ​តាម​ព្រះវិន័យ​សង្ឃ​ដោយ​រកឃើញ​ថា​ព្រះសង្ឃ​ទាំងនោះ​បាន​ក្លែង​ឯកសារ​ធ្វើ​ជា​ចៅអធិការ​វត្ត​ទៀត​ផង។ ករណី​នេះ​ខុស​នីតិវិធី​ព្រោះ​ពុំ​មាន​ការ​ចុះហត្ថលេខា​ពី​មន្ត្រី​សង្ឃ​ថ្នាក់​ខេត្ត និង​ខុស​ផ្នែក​រដ្ឋបាល​របស់​ព្រះសង្ឃ។ យ៉ាងនេះ​ក្តី​លោក​ស្នើ​ឱ្យ​ព្រះសង្ឃ​ទាំងអស់​មាន​ការ​សម្រប​សម្រួល​ដោយ​សន្តិវិធី។

លោក​បញ្ជាក់​ថា៖ «បើ​ទាស់​​ខុស​វិន័យ​យ៉ាង​ណា​ខាង​ព្រះសង្ឃ និង​ព្រះសង្ឃ​គួរ​ដោះស្រាយ​ដោយ​សន្តិវិធី​​»​។

ប្រធាន​គណបក្ស​សម្ព័ន្ធ​ដើម្បី​ប្រជាធិបតេយ្យ​លោក ខឹម វាសនា បាន​ថ្លែង​កាលពី​ម្សិលមិញ​ថា​លោក​កំពុង​បញ្ជូន​សមាជិក​របស់​លោក​ទៅ​តាមដាន​ករណី​នេះ។ តែ​លោក​ថា​ព្រះសង្ឃ​ទាំង​នោះ​នឹង​ត្រូវ​បណ្ដេញ​ចេញ​ពី​វត្ត​ដោយសារ​តែ​ពួកគេ​គឺជា​អ្នក​គាំទ្រ​គណបក្ស LDP មិន​មែន​ដោយសារ​តែ​ហេតុផល​ណា​មួយ​ផ្សេង​ទៀត​ឡើយ។

អ្នក​បាន​ដឹង​ហើយ​ថា​គណបក្ស LDP តែងតែ​ប្រាប់​សាធារណៈ​អំពី​ការ​បង្រៀន​របស់​​ព្រះពុទ្ធ​ដែល​ជា​ការ​ខុស​គ្នា​​ខ្លាំង​ណាស់​ពី​អ្វី​ដែល​ព្រះសង្ឃ​បាន​​ប្រាប់​ប្រជាជន​សព្វ​ថ្ងៃ​នេះ​ប៉ុន្តែ​យើង​មិន​ខ្វល់​អំពី​ពួកគេ យើង​ខ្វល់​អំពី​ការ​ផ្លាស់ប្តូរ​សង្គម​របស់​យើង​ដោយ​ផ្លាស់​ប្តូរ​ផ្នត់​គំនិត​នៃ​ប្រជាជន​នោះ​ហើយ​​ជា​​មូលហេតុ​ដែល​ព្រះសង្ឃ​ជាច្រើន​ខឹង​នឹង​គណបក្ស ​LDP»៕

រាយការណ៍​បន្ថែម​ដោយ​ Jack Davies

អត្ថបទគួរចាប់អារម្មណ៍