.jpg)
លោក នួន ផារ័ត្ន អភិបាលរងរាជធានីភ្នំពេញ និងជាសមាជិកគណៈកម្មការបិទខ្ទប់ ក្នុងសន្និសីទសារព័ត៌មានកាលពីព្រឹកមិញ។ រូបថត យូសុះ អាប់ឌុលរ៉ាស់ហ៊ីម
ភ្នំពេញ៖ មន្ត្រីសាលារាជធានីភ្នំពេញបានបកស្រាយពីការកំណត់តំបន់ណាមួយ ជាតំបន់ក្រហម តំបន់លឿងទុំ និងតំបន់លឿង ដោយឈរលើមូលដ្ឋាន ៣ ដែលមានការសិក្សាគ្រប់ជ្រុងជ្រោយ ដើម្បីបញ្ចៀសនូវហានិភ័យនៃការឆ្លងរីករាលដាលនៃជំងឺកូវីដ ១៩។
ការអះអាងយ៉ាងដូច្នេះ បានធ្វើឡើងក្នុងសន្និសីទសារព័ត៌មានស្តីពីការបន្តបិទខ្ទប់ភូមិសាស្ត្ររាជធានីភ្នំពេញ និងក្រុងតាខ្មៅ នៃខេត្តកណ្តាល នៅព្រឹកថ្ងៃទី ២៨ មេសា បន្ទាប់ពីមានចម្ងល់កើតឡើងពីពលរដ្ឋ ក្រោយរាជរដ្ឋាភិបាលកម្ពុជាសម្រេចដាក់តំបន់របស់ពួកគេក្នុងតំបន់ពណ៌នីមួយៗ។
លោក នួន ផារ័ត្ន អភិបាលរងរាជធានីភ្នំពេញ និងជាសមាជិកគណៈកម្មការ គបខ បានថ្លែងថា ការកំណត់តំបន់ក្រហម មានន័យថា ជាតំបន់មានការរីករាលដាលធ្ងន់ធ្ងរ។ តំបន់លឿងទុំ មានន័យថា ជាតំបន់មានការឆ្លងរីករាលដាលមធ្យម ហើយតំបន់លឿង គឺជាតំបន់ដែលមានការឆ្លងរីករាលដាលក្នុងកម្រិតស្រាល ដែលតម្រូវឲ្យពលរដ្ឋ អាចធ្វើសកម្មភាពទៅតាមការកំណត់ណាមួយរបស់រាជរដ្ឋាភិបាល។
លោកអះអាងថា ការកំណត់តំបន់ណាមួយជាតំបន់លឿង មិនមែនមានន័យថា តំបន់នោះ មិនមានការឆ្លងរីករាលដាលនៃជំងឺកូវីដ ១៩ នោះទេ ព្រោះការវាយតម្លៃទាំងនេះ គឺឈរលើមូលដ្ឋាន ៣ ដើម្បីអាចបញ្ជាក់បានថា មូលដ្ឋាននីមួយៗ ត្រូវស្ថិតក្នុងការពិចារណាគ្រប់ជ្រុងជ្រោយ។
លោក នួន ផារ័ត្ន បានពន្យល់ថា មូលដ្ឋានទី១ គឺមើលលើចំនួនជាក់ស្តែងនៃអ្នកជំងឺកូវីដ ១៩ បូករួមប្រភពនៃការចម្លង ដែលមិនអាចគ្រប់គ្រងបាន ខណៈតំបន់ដែលបានកំណត់ជាតំបន់ក្រហមទាំងនេះ បានបង្ហាញថា ចំនួនអ្នកឆ្លងនៅតែបន្តកើនឡើង និងមិនមានប្រភពឆ្លងច្បាស់លាស់ ដែលអាចគ្រប់គ្រងបាន។
សម្រាប់មូលដ្ឋានទី២ លោកបានអះអាងថា ក្រុមការងារនឹងធ្វើការវាយតម្លៃទៅលើស្ថានភាពរស់នៅជាក់ស្តែងរបស់ប្រជាពលរដ្ឋនៅក្នុងតំបន់ ដែលវាជាផ្នែកមួយជួយឲ្យមន្ត្រីជំនាញពិនិត្យមើលពីលទ្ធភាពនៃការចម្លងជំងឺកូវីដ ១៩ បានកម្រិតណា ព្រោះស្ថានភាពនៃការរស់នៅរបស់ពលរដ្ឋ គឺមានសារៈសំខាន់ណាស់។
លោកបញ្ជាក់ថា៖ «ការវាយតម្លៃលើមូលដ្ឋាននេះហើយ ដែលបងប្អូនយើងមួយចំនួនមានការងឿងឆ្ងល់ថា មានតំបន់ខ្លះមានការផ្ទុះកូវីដ ១៩ គាត់ឆ្លងមិនលឿន ឬឆ្លងក្នុងបរិមាណមួយតិចតួច ប៉ុន្តែតំបន់ខ្លះទៀត គ្រាន់តែផ្ទុះភ្លាមក៏មានការឆ្លងរីករាលដាលលឿន»។
ចំពោះមូលដ្ឋានទី៣ សម្រាប់វាយតម្លៃក្នុងការបែងចែងតំបន់នេះ លោក នួន ផារ័ត្ន បានអះអាងបន្តថា ក្រុមការងារក៏បានសិក្សាអំពីកត្តាភូមិសាស្ត្រនៃតំបន់នីមួយៗជារួមផងដែរ ព្រោះភាគច្រើននៃតំបន់ដែលក្រុមការងារបានកំណត់ជាតំបន់លឿងទុំ គឺជាតំបន់ដែលនៅជុំវិញតំបន់ពណ៌ក្រហម ព្រោះកត្តានេះ គឺនឹងបង្កើតនូវហានិភ័យនៃការឆ្លងតគ្នាបានខ្ពស់។
មន្ត្រីជំនាញរូបនេះ ក៏បានបដិសេធថា៖ «សាលារាជធានី មិនមានចេតនាដាក់ឲ្យច្រើនជាតំបន់ក្រហមនោះទេ។ យើងព្យាយាមបង្រួម និងគិតដល់ប្រសិទ្ធភាពនៃការគ្រប់គ្រងការរីករាលដាលជំងឺនេះ ក៏ដូចជាការគ្រប់គ្រងនៃហានិភ័យដែលអាចកើតមានឡើងផងដែរ»។
កាលពីថ្ងៃទី ២៧ មេសា រាជរដ្ឋាភិបាលបានសម្រេចបិទខ្ទប់រាជធានីភ្នំពេញ និងក្រុងតាខ្មៅ នៃខេត្តកណ្តាលរយៈពេល ១ សប្តាហ៍បន្ថែមទៀត ក្នុងនោះក៏បានបែងចែកតំបន់ទាំងនោះ ជា «តំបន់ក្រហម» «តំបន់លឿងទុំ» និង «តំបន់លឿង» សម្រាប់ធ្វើការរឹតត្បិតសេរីភាពណាមួយរបស់ពលរដ្ឋ ដើម្បីបញ្ចៀសនូវការឆ្លងរាលដាលផងដែរ៕
