The Phnom Penh Post Search

Search form

Logo of Phnom Penh Post newspaper Phnom Penh Post - មន្ត្រី​សាលាឧទ្ធរណ៍​ម្នាក់​ ត្រូវ​បាន​បណ្តេញ​ចេញ​ពី​ក្របខ័ណ្ឌ​ ពាក់ព័ន្ធ​អំពើ​ពុករលួយ




មន្ត្រី​សាលាឧទ្ធរណ៍​ម្នាក់​ ត្រូវ​បាន​បណ្តេញ​ចេញ​ពី​ក្របខ័ណ្ឌ​ ពាក់ព័ន្ធ​អំពើ​ពុករលួយ

Content image - Phnom Penh Post
មន្ត្រី​សាលាឧទ្ធរណ៍​លោក​ ទេព ធីរិទ្ធ ដែល​ត្រូវ​បាន​បណ្តេញ​ពី​ក្របខ័ណ្ឌ​។ រូបថត ក្រសួង​យុត្តិធម៌

មន្ត្រី​សាលាឧទ្ធរណ៍​ម្នាក់​ ត្រូវ​បាន​បណ្តេញ​ចេញ​ពី​ក្របខ័ណ្ឌ​ ពាក់ព័ន្ធ​អំពើ​ពុករលួយ

ភ្នំពេញៈ ក្រសួង​យុត្តិធម៌​បាន​បណ្ដេញ​ក្រឡាបញ្ជី​សាលាឧទ្ធរណ៍​ម្នាក់​ចេញពី​ក្របខ័ណ្ឌ​មន្ត្រីរាជការ បន្ទាប់ពី​មន្ត្រី​រូបនេះ​ត្រូវ​បាន​អង្គភាព​ប្រឆាំង​អំពើ​ពុករលួយ​ (ACU) ​ធ្វើការ​ឃាត់ខ្លួន​ពី​បទ​ពាក់ព័ន្ធ​នឹង​ការប្រព្រឹត្ត​អំពើ​ពុករលួយ ប៉ុន្តែ​មន្ត្រី​មិនអាច​បញ្ជាក់​ឱ្យ​ជាក់​ច្បាស់​អំពី​ទោសកំហុស​អ្វីខ្លះ​ដែល​មន្ត្រី​តុលាការ​រូប​នេះ​បាន​ប្រព្រឹត្ត​អំឡុងពេល​បំពេញ​តួនាទី​នោះទេ​។

ការប្រកាស​របស់​ក្រសួង​យុត្តិធម៌​បាន​ឱ្យ​ដឹង​ថា លោក​ ទេព ធីរិទ្ធ ក្រឡា​បញ្ជី​សាលាឧទ្ធរណ៍​ភ្នំពេញ​ត្រូវ​បណ្ដេញ​ចេញ​ពី​មុខតំណែង​រាជការ​ក្របខ័ណ្ឌ​ក្រសួង​ចាប់ពី​ថ្ងៃទី​ ១៩ ខែ​កញ្ញា ឆ្នាំ​ ២០១៩ នេះ​ទៅ​។

លោក​ ជិន ម៉ាលីន មន្ត្រី​នាំពាក្យ​ក្រសួង​យុត្តិធម៌​បាន​ប្រាប់​ភ្នំពេញ​ប៉ុស្ដិ៍​យ៉ាងខ្លី​នៅ​ម្សិលមិញ​ថា ការបណ្ដេញ​មន្ត្រី​នេះ​ចេញ​ពី​ក្របខ័ណ្ឌ​រាជការ​ដោយ​សារបាន​ប្រព្រឹត្ត​អំពើ​ខុសឆ្គង​មិន​អាច​លើកលែង​បាន​។

លោក​បញ្ជាក់​ថា​៖ «​គាត់​មាន​កំហុស​ខាង​វិន័យ​ធ្ងន់ធ្ងរ គឺ​ពាក់ព័ន្ធ​ទៅនឹង​ការបំពេញ​វិជ្ជាជីវៈ​ការងារ​របស់គាត់​។ អ៊ីចឹង​ហើយ​បាន​ជា​ក្រុមប្រឹក្សាវិន័យ​នៃ​ក្រសួងយុត្តិធម៌​សម្រេច​ដាក់ពិន័យ​គាត់ ដោយ​បញ្ឈប់​ការងារ​របស់​គាត់​ និង​លុបឈ្មោះ​ចេញ​ពី​ក្របខ័ណ្ឌ ហើយ​ថា​កំហុស​គាត់​បាន​ប្រព្រឹត្ត​អី​ខ្លះ អាហ្នឹង ជា​ការងារ​ផ្ទៃក្នុង​របស់​មន្ត្រីរាជការ​ដែល​យើង​មិន​អាច​បញ្ចេញ​ជា​សាធារណៈ​បាន​ទេ​»​។

ជាមួយ​គ្នា​នេះ​លោក​ ទូច ថារិទ្ធ អ្នកនាំពាក្យ​សាលាឧទ្ធរណ៍​និយាយ​យ៉ាងខ្លី​ដែរ​ថា​លោក​មិន​ចង់​លើក​ឡើង​ជាថ្មី​អំពី​មូលហេតុ​ដែល​ដក​លោក​​ ទេព ធីរិទ្ធ ចេញ​ពី​តួនាទី​ឡើយ ព្រោះ​លោក​ថា​មូលហេតុ​នោះ​ត្រូវ​បាន​សារព័ត៌មាន​ផ្សព្វផ្សាយ​អស់ហើយ​។

លោក​ថ្លែងថា​៖ «​ព័ត៌មាន​គេ​បាន​ចុះ​ព្រោងព្រាត​អស់​ហើយ​ហ្នឹង បន្ទាប់ពី ACU គេ​បាន​ហៅ​ (​ទេព ធីរិទ្ធ​) ​ទៅ​»​។

កាលពី​ថ្ងៃទី​ ៥ ​កក្កដា​អ្នកនាំពាក្យ​សាលាឧទ្ធរណ៍​បាន​ចេញ​សេចក្ដី​ប្រកាស​ព័ត៌មាន​ថា លោក​ ទេព ធីរិទ្ធ ត្រូវបាន​បញ្ឈប់​ពី​ការងារ​ជា​ក្រឡាបញ្ជី​កាលពី​ថ្ងៃទី​ ២ ខែ​មេសា ឆ្នាំ​ ២០១៩​។ ក្រោយមក​មន្ត្រី​រូបនេះ​ត្រូវបាន​អង្គភាព​ប្រឆាំង​អំពើពុករលួយ​ឃាត់ខ្លួន​ពី​បទប្រព្រឹត្ត​អំពើ​ពុករលួយ​កាលពី​ថ្ងៃទី​ ៥ កក្កដា ដោយសារ​នៅ​តែ​អាច​ឆ្លៀត​យក​តួនាទី​ជា​ក្រឡាបញ្ជី​ទៅ​ប្រព្រឹត្ត​អំពើ​ខុសឆ្គង ថ្វី​ដ្បិត​បាន​បញ្ឈប់​ពី​តួនាទី​ហើយ​ក្ដី​។

ការប្រកាស​បញ្ជាក់ថា​៖ «​មន្ត្រី​រូបនេះ​ធ្លាប់​បាន​ទទួល​ការអប់រំ ណែនាំ​ជារឿយៗ​ពី​អគ្គលេខាធិការ​ពី​ចៅក្រម​ផង និង​ពី​ប្រធាន​សាលាឧទ្ធរណ៍​ផង​ក៏ដោយ ប៉ុន្តែ​ឈ្មោះ​នេះ​នៅ​តែ​មិន​ទទួល​យក​នូវ​ការអប់រំ ការណែនាំ​ឡើយ​។ មូលហេតុ​នេះ​ហើយ​ទើប​សាលាឧទ្ធរណ៍​បញ្ឈប់​ការងារ​មន្ត្រី​រូបនេះ និង​បាន​ធ្វើ​លិខិត​ជូន​ទៅ​ក្រសួង​យុត្តិធម៌ ដើម្បី​ឱ្យ​ក្រុមប្រឹក្សា​វិន័យ​ក្រសួង​យុត្តិធម៌​សម្រេច​ពី​ទោសកំហុស​របស់​គាត់​ទៅ​តាម​ច្បាប់​»​។

ក្រោយពី​បញ្ចប់​ការសាកសួរ ACU បាន​បញ្ជូន​លោក​ ទេព ធីរិទ្ធ ទៅឱ្យ​តុលាការ​សាកសួរ​បន្ត​ហើយ​ក្រោយ​មក​សាលាដំបូង​រាជធានី​ភ្នំពេញ បាន​សម្រេច​ចោទប្រកាន់​ពីបទ​វីតិក្រម​ដែល​សម្រេច​ឱ្យ​នៅ​ក្រៅ​ឃុំ​បណ្ដោះអាសន្ន ប៉ុន្តែ​ដាក់​ស្ថិត​ក្រោម​ការត្រួតពិនិត្យ​តាម​ផ្លូវ​ច្បាប់​របស់​តុលាការ​។

លោក​ អំ សំអាត ប្រធាន​ផ្នែក​ឃ្លាំមើល​ និង​ការពារ​សិទ្ធិមនុស្ស​នៃ​អង្គការ​លីកាដូ លើកឡើង​ថា នៅក្នុង​ប្រព័ន្ធតុលាការ​ដែល​មាន​មន្ត្រី​ប្រព្រឹត្ត​ពុករលួយ គឺ​ធ្វើឱ្យ​ប៉ះពាល់​ធ្ងន់ធ្ងរ​ដល់​ដំណើរការ​ស្វែងរក​យុត្តិធម៌​។ លោក​គាំទ្រ​ឱ្យ​ចាត់​វិធានការ​តាមផ្លូវ​ច្បាប់​ចំពោះ​មន្ត្រី​ពុករលួយ​ក្នុង​តុលាការ​ដោយ​មិន​ត្រឹមតែ​បណ្ដេញចេញ​ពី​ក្របខ័ណ្ឌ​នោះ​ទេ​។

លោក​ថា​៖ «​អ៊ីចឹង​ហើយ​បាន​ជា​ខាង​សង្គម​ស៊ីវិល​ជាតិ សហគមន៍​អន្តរជាតិ ក៏ដូចជា​ឧត្តម​ស្នងការ​អង្គការ​សហប្រជាជាតិ​ទទួល​បន្ទុក​សិទ្ធិមនុស្ស​បាន​ជំរុញ​ធ្វើ​យ៉ាង​ណា​ឱ្យ​កម្ពុជា ធ្វើការ​កែទម្រង់​ប្រព័ន្ធតុលាការ ប្រព័ន្ធ​យុត្តិធម៌​ហ្នឹង​ទៅ​ជា​ប្រព័ន្ធ​មួយ​...​ជឿទុក​ចិត្ត​បាន​»​។

កាលពី​ដើម​ខែកញ្ញា​នេះ​មន្ត្រី​ក្រសួង យុត្តិធម៌​បាន​លើក​ឡើង​ថា ក្រសួង​កំពុង​ធ្វើការងារ​ជាមួយ​ស្ថាប័ន​ពាក់ព័ន្ធ​ដូចជា​អង្គភាព​ប្រឆាំង​អំពើ​ពុករលួយ ឧត្តមក្រុមប្រឹក្សា​នៃ​អង្គចៅក្រម និង​គណៈមេធាវី​នៃ​ព្រះរាជាណាចក្រ​កម្ពុជា ដើម្បី​បង្កើត​យន្តការ​ប្រឆាំង​អំពើ​ពុករលួយ​ក្នុង​ប្រព័ន្ធ​យុត្តិធម៌​ដែល​ប្រព្រឹត្ត​ឡើង​ដោយ​មន្ត្រី​តុលាការ និង​មេធាវី​៕

អត្ថបទគួរចាប់អារម្មណ៍