ពោធិ៍សាត់ៈ មន្ត្រីសិទ្ធិមនុស្សប្រចាំខេត្តពោធិ៍សាត់ធ្វើការសន្និដ្ឋានថាករណីទណ្ឌិតម្នាក់ស្លាប់ក្នុងពន្ធនាកាលពីថ្ងៃចន្ទនៅមណ្ឌលកែប្រែទី៤ជាអំពើឃាតកម្មមិនមែនជាករណីចងកសម្លាប់ខ្លួនឯងដូចការលើកឡើងរបស់សមត្ថកិច្ចជំនាញដែលបានធ្វើកោសល្យវិច័យនោះទេ។
ទណ្ឌិតឈ្មោះ តូវ វណ្ណារ៉ា អាយុ ២៦ ឆ្នាំ ដែលជាប់ចោទពីបទល្មើសជួញដូរគ្រឿងញៀនបានស្លាប់ក្នុងពន្ធនាគារកាលពីថ្ងៃចន្ទនៅវេលាម៉ោង ៥ ព្រឹកស្ថិតនៅមណ្ឌលអប់រំកែប្រែទី៤ក្នុងភូមិជ្រៃក្រឹម ឃុំផ្ទះរុង ស្រុកភ្នំក្រវាញ ខេត្តពោធិ៍សាត់។
មន្ត្រីសម្របសម្រួលសមាគមអាដហុកប្រចាំខេត្តពោធិ៍សាត់លោក ភួង សុធា បានប្រាប់ ភ្នំពេញ ប៉ុស្តិ៍ កាលពីម្សិលមិញថា តាមការសិក្សា និងទទួលបានឯកសារនៃការធ្វើកោសល្យវិច័យរបស់អ្នកជំនាញលោកសន្និដ្ឋានថាទណ្ឌិតស្លាប់ក្នុងពន្ធនាគារជាករណីមនុស្សឃាតដោយសារមានស្នាមឈាមហូរនៅខាងឆ្វេងនៃសាកសព។
លោកថា៖ «តាមកោសល្យវិច័យនៃការអះអាងថាស្រមោចខាំអ៊ីចឹងវាមិនអាចមានស្រមោចខាំរហូតដល់ហូរឈាមបានទេទីពីរមនុស្សហ្នឹងគាត់ជាមនុស្សទាប ១, ៦០ ម៉ែត្រជាងហើយចម្រឹងចងកមាន ១,៨៨ ម៉ែត្រអ៊ីចឹងលុះត្រាមានឧបករណ៍សម្រាប់តម្កល់បានមនុស្សហ្នឹងអាចធ្វើអត្តឃាតខ្លួនឯងបានប៉ុន្តែក្នុងពន្ធនាគារអត់មានកៅអីសម្រាប់តម្កល់ឡើងទេ»។ «អ៊ីចឹងវាមិនមែនជាករណីអត្តឃាតខ្លួនឯងគឺករណីមនុស្សឃាតច្រើនជាង»។
លោកបន្តថា មួយវិញទៀតអ្វីដែលជាការមន្ទិលសង្ស័យទណ្ឌិតនោះជាមុខសញ្ញានៃការជួញដូរគ្រឿងញៀនហើយកន្លងមកអនុរក្សមណ្ឌលកែប្រែអប់រំទី ៤ ធ្លាប់មានរឿងអាស្រូវរឿងជួញដូរគ្រឿងញៀនក្នុងពន្ធនាគារផងដែរ។ បើតាមមន្ត្រីរូបនេះទណ្ឌិតដែលបានស្លាប់នោះអាចមានជម្លោះផ្ទៃក្នុងជាមួយមន្ត្រីអនុរក្សក្នុងពន្ធនាគារ។
ប៉ុន្តែ ប្រធានមណ្ឌលអប់រំកែប្រែទី ៤ ស្ថិតនៅក្នុងស្រុកភ្នំក្រវាញ ខេត្តពោធិ៍សាត់ លោក អ៊ុក គឹមជន បានថ្លែងថាអ្វីដែលសង្គមស៊ីវិលធ្វើការសន្និដ្ឋានជារឿងរបស់គេតែជាក់ស្តែងក្រុមអ្នកជំនាញបានធ្វើកោសល្យវិច័យ និងរកឃើញថាពិតជាការធ្វើអត្តឃាតខ្លួនឯងមែន។
លោកថា៖ «ជំនាញសង្គមស៊ីវិលធម្មតាទេចេះតែនិយាយប៉ុន្តែករណីជាក់ស្តែងយើងទុកសាកសពរហូតដល់ខាងជំនាញគេធ្វើកោសល្យវិច័យគ្រប់បែបយ៉ាងទាំងអស់ហើយរង់ចាំគ្រួសារគេដើម្បីពិនិត្យធ្វើកោសល្យវិច័យម្តងទៀតប្រសិនបើគ្រួសារចង់ធ្វើហើយគេអស់ចិត្ត»។
តែលោកថាខាងគ្រួសារពុំបានស្នើឱ្យធ្វើកោសល្យវិច័យឡើងវិញទេហើយព្រមទទួលយកសពទៅបូជានៅភ្នំពេញវិញ។
យ៉ាងណាក៏ដោយ លោកថា មូលហេតុដែលទណ្ឌិតចងកសម្លាប់ខ្លួននោះអាចមកពីវិបត្តិក្នុងគ្រួសាររបស់គាត់។
លោកបានបញ្ជាក់ថា៖ «យើងធ្លាប់យកចម្លើយអ្នករស់នៅក្នុងបន្ទប់ជាមួយគ្នា (ទណ្ឌិត) គាត់ធ្លាប់ទាក់ទងទៅគ្រួសារគាត់ហើយបងប្រុសទីពីរស្តីបន្ទោសឱ្យជាច្រើន។ មួយវិញទៀតគាត់មានវិបត្តិជាមួយប្រពន្ធរបស់គាត់ទើបគាត់គិតខ្លីមួយពេលចងកសម្លាប់ខ្លួនទៅ»។
បើតាមប្រធានពន្ធនាគារូបនេះទណ្ឌិតស្លាប់នៅក្នុងបន្ទប់ទឹកម៉ោង ៥ ព្រឹកចងកដោយកន្សែងពោះគោដែលប្រើសព្វថ្ងៃ។ លោកបន្ថែមថាសមាសភាពចូលធ្វើកោសល្យវិច័យមានខាងប៉ូលិសបច្ចេកទេសខេត្ត បច្ចេកទេសស្រុក ព្រហ្មទណ្ឌស្រុក ព្រហ្មទណ្ឌខេត្ត កងរាជអាវុធហត្ថ និងមានវេជ្ជបណ្ឌិតជំនាញម្នាក់ផងដែរ។
នាយរងការិយាល័យបច្ចេកទេសវិទ្យាសាស្ត្រលោក ថាច់ ទីន ដែលចូលរួមការស៊ើបអង្កេតនេះបានថ្លែងថាក្រោយការធ្វើកោសល្យវិច័យមន្ត្រីជំនាញសន្និដ្ឋានថាទណ្ឌិតនោះធ្វើអត្តឃាតដោយខ្លួនឯងដោយសារខឹងនឹងក្រុមគ្រួសារមិនមកលេង។
លោកបានបញ្ជាក់ថា៖ «មូលហេតុទី ១ ខឹងម្តាយមិនមកសួរសុខទុក្ខ ទី ២ គេផ្លាស់បន្ទប់ទណ្ឌិតរូបនោះឱ្យទៅដេកនៅក្រោមបន្ទាប់ពីបានវៃគ្នាហើយវាអន់ចិត្តម៉េចៗយើងមិនដឹងដែរគ្រាន់តែយើងសន្និដ្ឋានថាជាករណីអត្តឃាតខ្លួនឯង»។
ទណ្ឌិតរូបនេះត្រូវបានសាលាដំបូងរាជធានីភ្នំពេញផ្តន្ទាទោសដាក់ពន្ធនាគារ ៣ ឆ្នាំពីបទជួញដូរគ្រឿងញៀនកាលពីថ្ងៃទី ១ ខែឧសភា ឆ្នាំ ២០១៤ ប្រព្រឹត្តនៅចំណុច ភូមិត្រពាំងឈូក សង្កាត់ទឹកថ្លា ខណ្ឌសែនសុខហើយក្រោយការកាត់ទោសត្រូវបានបញ្ជូនទៅឃុំខ្លួននៅពន្ធនាគារខេត្តពោធិ៍សាត់ចាប់តាំងពីថ្ងៃទី ៥ ខែ ០៥ ឆ្នាំ ២០១៤ ដែលគិតរហូតមកដល់ពេលនេះបានជាប់ពន្ធនាគារជាង ១ ឆ្នាំហើយ៕
