.jpg)
លោកស្រី ឱ វណ្ណឌីន ក្នុងជំនួបជាមួយមន្ត្រីនៅមណ្ឌលគិរី។ រូបថត សហការី
មណ្ឌលគិរីៈ ក្រុមមន្ត្រីសុខាភិបាលដែលដឹកនាំដោយលោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងលោកស្រី Li Ailan ប្រធានអង្គការសុខភាពពិភពលោកប្រចាំកម្ពុជាបានធ្វើទស្សនកិច្ចទៅកាន់ខេត្តទេសចរណ៍ដាច់ស្រយាលចំនួន ៣ ស្ថិតនៅភាគឦសាន ដើម្បីជំរុញឱ្យមន្ត្រីថ្នាក់ក្រោមជាតិ ប្រឹងប្រែងបន្ថែមទៀតក្នុងការទប់ស្កាត់កុំឲ្យមានរលកទី ២ នៃជំងឺឆ្លងកូវីដ ១៩។
លោកស្រី ឱ វណ្ឌឌីន បានប្រាប់ភ្នំពេញប៉ុស្ដិ៍ពីថ្ងៃម្សិលមិញថា ការចុះទៅទស្សនកិច្ចនៅក្នុងខេត្តមណ្ឌលគិរី រតនគិរី និងខេត្តក្រចេះ ដែលចាប់ផ្ដើមពីថ្ងៃទី ៨ ដល់ថ្ងៃទី ១២ ខែមិថុនា គឺដើម្បីជំរុញឱ្យមន្ត្រីថ្នាក់ក្រោមជាតិនៅតាមខេត្តទាំងនោះត្រៀមលក្ខណៈឱ្យបានគ្រប់គ្រាន់ក្នុងការឆ្លើយតបឱ្យបានទាន់ពេលវេលាក្នុងករណីកើតមានជំងឺឆ្លងកូវីដ ១៩ ខណៈខេត្តទាំង ៣ នេះមិនទាន់មានបទពិសោធកើតមានអ្នកឈឺដោយសារជំងឺកូវីដនៅឡើយ។ លោកស្រីថា៖ «យើងចុះមកទីនេះគឺដើម្បីប្រយុទ្ធប្រឆាំងនឹងជំងឺកូវីដ និងការពារកុំឱ្យមានរលកទី ២ នៃជំងឺនេះ ដោយសារខេត្តទាំងនោះគឺជាគោលដៅទេសចរណ៍ ក្រៅពីនោះយើងក៏ធ្វើការងារដើម្បីលុបបំបាត់ជំងឺគ្រុនចាញ់ដែរ»។
លោកស្រី ឱ វណ្ឌឌីន និងលោកស្រី Li Ailan បានចាប់ផ្ដើមដំណើរទស្សនកិច្ចនៅក្នុងខេត្តមណ្ឌលគិរីកាលពីថ្ងៃទី ៨ ខែមិថុនា ដោយបានជួបជាមួយប្រធានមន្ទីរសុខាភិបាលខេត្តនេះ និងនៅថ្ងៃទី ៩ ខែមិថុនាបានបន្តជួបពិភាក្សាជាមួយលោក ស្វាយ សំអ៊ាង អភិបាលខេត្តមណ្ឌលគិរីមុនបន្តដំណើរទៅកាន់ខេត្តរតនគិរី។
លោកស្រីបន្តថា បច្ចុប្បន្ននេះពលរដ្ឋចាប់ផ្ដើមនាំគ្នាសម្រុកធ្វើដំណើរកម្សាន្តទៅកាន់តំបន់ទេសចរណ៍នានា ហើយភ្លេចការពារខ្លួនពីជំងឺកូវីដ ១៩ ជាក់ស្ដែងដូចជានៅតាមផ្ទះសំណាក់ និងសណ្ឋាគារនៅក្នុងខេត្តមណ្ឌលគិរីចាប់ផ្ដើមមានភ្ញៀវទៅស្នាក់នៅពេញៗបន្ទប់ដែលទាមទារឱ្យមន្ត្រីក្នុងខេត្តនេះត្រៀមលក្ខណៈឱ្យបានមុនក្នុងករណីកើតមានជំងឺកូវីដ ១៩។
ដំណើរទស្សនកិច្ចនេះក៏មានការចូលរួមពីមន្ត្រីនៅនាយកដ្ឋានមន្ទីរពេទ្យនាយកដ្ឋានប្រយុទ្ធនឹងជំងឺឆ្លង មជ្ឈមណ្ឌលជាតិលើកកម្ពស់សុខភាព និងនាយកដ្ឋានសហប្រតិបត្តិការអន្តរជាតិរបស់ក្រសួងសុខាភិបាល ដើម្បីជួយសម្របសម្រួល និងណែនាំទៅដល់មន្ត្រីនៅតាមបណ្ដាខេត្តភូមិភាគឦសានទាំងនេះឱ្យត្រៀមលក្ខណៈ និងចេះនូវនីតិវិធីក្នុងការចាត់ចែងអ្នកជំងឺ។
លោកស្រីថា ទិសដៅទី ១ គឺដើម្បីពង្រឹងការងារ ថ្វីដ្បិតនៅភូមិភាគឦសានរកមិនឃើញមានករណីជំងឺកូវីដ១៩ក្តី ប៉ុន្តែដោយសារថ្មីៗនេះ ប្រជាពលរដ្ឋបានធ្វើដំណើរទៅទីនោះច្រើនមែនទែនទើបក្រសួងសុខាភិបាលត្រូវចាត់ចែងត្រៀមលក្ខណៈឱ្យបានជាមុនដោយសារគ្មាននរណាម្នាក់ដឹងថា ជំងឺកូវីដ ១៩ នៅកន្លែងណាឡើយ ហើយការឆ្លងរាលដាលនៃជំងឺនេះគឺកើតឡើងនៅពេលពលរដ្ឋធ្វើដំណើរចល័ត និងមានការជួបជុំគ្នាច្រើន។
លោកស្រីបន្តថា៖ «យើងត្រូវតែគិតគូរឱ្យបានមុន ដើម្បីកុំឱ្យដើរតាមក្រោយសភាពការណ៍ ដើម្បីឱ្យមន្ទីរសុខាភិបាលរាជធានី-ខេត្តឱ្យចេះគ្រប់គ្រង និងនីតិវិធី ដើម្បីជួយទៅដល់ប្រជាពលរដ្ឋនៅក្នុងករណីមានអ្នកឆ្លងជំងឺកូវីដ១៩ នៅពេលខាងមុខដើម្បីឱ្យការឆ្លើយតបបានលឿន និងបានទាន់ពេលវេលាគឺកាលណាយើងបានរកឃើញភ្លាមយើងយកមកព្យាបាលភ្លាម គឺមានន័យថា យើងទប់ស្កាត់បានការចម្លងពីបុគ្គលមួយទៅបុគ្គលមួយ»។
បើតាមលោកស្រី វណ្ណឌីន ដំណើរទស្សនកិច្ចនេះគឺដើម្បីចុះទៅសិក្សាស្វែងយល់អំពីការចាត់ចែងប្រតិបត្តិការទប់ស្កាត់ជំងឺកូវីដ១៩នៅខេត្តទាំង ៣ នេះហើយក្រុមការងារក៏ចុះទៅពិនិត្យផ្ទាល់នៅតាមមន្ទីរពេទ្យបង្អែក និងមណ្ឌលសុខភាព និងការចុះជំរុញការងារដល់មន្ត្រីភូមិឃុំ និងអ្នកស្ម័គ្រចិត្តនៅតាមភូមិឃុំដើម្បីឲ្យពួកគេចូលរួមឱ្យបានកាន់តែសកម្មជាងមុនក្នុងការផ្សព្វផ្សាយទៅកាន់ប្រជាពលរដ្ឋនៅតាមសហគមន៍ឱ្យអនុវត្តនូវវិធានការការពារវីរុសកូរ៉ូណា។
លោក ប៊ុន សួរ ប្រធានមន្ទីរសុខាភិបាលខេត្តមណ្ឌលគិរីថ្លែងពីម្សិលមិញដែរថា គណៈកម្មការប្រយុទ្ធប្រឆាំងជំងឺកូវីដ១៩ នៅខេត្តមណ្ឌលគិរីគឺនៅតែបំពេញការងារនៅតាមមុខសញ្ញា និងភារកិច្ចរៀងៗខ្លួនជាប្រចាំ ដូចជាចុះទៅពិនិត្យនៅតាមផ្ទះសំណាក់ សណ្ឋាគារ និងភោជនីយដ្ឋាន ដើម្បីអប់រំអំពីសុខភាព និងណែនាំឱ្យដាក់អាល់កុល និងត្រូវប្រើម៉ាស៊ីនបាញ់វាស់កម្ដៅភ្ញៀវ និងការចុះទៅផ្សព្វផ្សាយទៅដល់សហគមន៍ជនជាតិដើមជាដើម។ លោកបន្តថានៅក្នុងខេត្តមណ្ឌលគិរីក៏បានបង្កើតឱ្យមានប៉ុស្ដិ៍ត្រួតពិនិត្យសុខភាព និងបាញ់ថ្នាំសម្លាប់មេរោគនៅកង់ឡានរបស់អ្នកដំណើរដែលធ្វើដំណើរឆ្លងចូលមកកាន់ខេត្តមណ្ឌលគិរីចំនួន ២ កន្លែងគឺនៅព្រំប្រទល់រវាងខេត្តមណ្ឌលគិរីជាមួយខេត្តក្រចេះ និងមណ្ឌលគិរីជាមួយខេត្តរតនគិរី។
លោកថា៖ «ការងារទាំងអស់គឺបានចុះធ្វើការអប់រំផ្សព្វផ្សាយ គឺទាំងអាជ្ញាធរដែនដីនៅតាមភូមិ និងនៅតាមឃុំដែលសហការជាមួយក្រុមការងារកាកបាទក្រហម និងក្រុមយុវជន។ និយាយឱ្យចំទៅគឺធ្វើសកម្មភាពទាំងអស់ហ្នឹង តាំងពីកម្ពុជាយើងចាប់ផ្ដើមមានជំងឺកូវីដ ១៩»៕
