កំពង់ចាមៈ មន្ត្រីសុខាភិបាលបានបញ្ជាក់ថា ស្ដ្រីខ្មែរ-អាមេរិកកាំងម្នាក់ ដែលបានរត់ចេញពីកន្លែងធ្វើចត្តាឡីស័កនៅភ្នំពេញកាលពីថ្ងៃទី ១៧ កក្កដា គឺត្រូវបានអនុញ្ញាតឱ្យទៅស្នាក់នៅផ្ទះរបស់សាច់ញាតិនៅក្រុងកំពង់ចាម ក្រោយពីស្ដ្រីរូបនេះ បានធ្វើតេស្ដលើកទី ៣ គ្មានវីរុសកូវីដ ១៩។
លោកវេជ្ជបណ្ឌិត គឹម សួរភិរុណ ប្រធានមន្ទីរសុខាភិបាលខេត្តកំពង់ចាមបានប្រាប់ភ្នំពេញប៉ុស្ដិ៍នៅថ្ងៃនេះថា ស្ដ្រីរូបនេះត្រូវអនុញ្ញាតឲ្យទៅផ្ទះ បន្ទាប់ពីបញ្ចប់ការធ្វើចត្តាឡីស័កនៅក្នុងសណ្ឋានគាររយៈពេល ១៤ ថ្ងៃ និងបន្ទាប់ការធ្វើតេស្ដជាលើកទី៣ នៅថ្ងៃទី ២៩ កក្កដា មានលទ្ធផលអវិជ្ជមាន។
លោកថ្លែងថា៖ «យើងឱ្យគាត់ទៅនៅផ្ទះ ប៉ុន្តែឱ្យគាត់រក្សាគោលការណ៍របស់ក្រសួងសុខាភិបាល និងមានមន្ត្រីយើងតាមដានសុខភាពគាត់។ គាត់បានលិខិតឱ្យទៅផ្ទះ ប៉ុន្តែអត់អាចដើរហើរបាននៅឡើយទេ គឺគាត់ត្រូវស្នាក់នៅក្នុងផ្ទះរយៈពេល ១៤ ថ្ងៃទៀត»។
ស្ដ្រីខ្មែរនេះ គឺបានធ្វើដំណើរតាមជើងយន្តហោះដែលដឹកអ្នកដំណើរសរុប ៩១ នាក់ មកពីសហរដ្ឋអាមេរិក និងបានតជើងហោះហើរពីប្រទេសកូរ៉េខាងត្បូង មកដល់កម្ពុជាកាលពីថ្ងៃ ១៥ កក្កដា ហើយក្នុងចំណោមអ្នកដំណើរទាំងនេះគឺមានពីរនាក់បានឆ្លងជំងឺកូវីដ ១៩ ដែលជាមន្ត្រីទូតជាន់ខ្ពស់របស់ស្ថានទូតសហរដ្ឋអាមេរិកប្រចាំនៅកម្ពុជា។ នាងត្រូវបានដាក់នៅកន្លែងធ្វើចត្តាឡីស័កនៅក្នុងសណ្ឋានគារមួយនៅភ្នំពេញ ប៉ុន្តែនៅយប់ថ្ងៃទី ១៧ កក្កដា គឺបានលួចរត់និងជិះតាក់ស៊ីទៅខេត្តកំពង់ចាម និងត្រូវអាជ្ញាធរខេត្តនេះរកឃើញ ក្នុងផ្ទះសំណាក់នៅថ្ងៃទី ១៨ កក្កដា។
នៅថ្ងៃនេះ ក្រសួងសុខាភិបាលបានរាយការណ៍ករណីជំងឺកូវីដ ១៩ ម្នាក់ទៀត ដែលជាមន្ត្រីជាន់ខ្ពស់ម្នាក់ទៀតរបស់ស្ថានទូតសហរដ្ឋអាមេរិក ដែលធ្វើឱ្យករណីឆ្លងសរុបនៅកម្ពុជាកើនដល់ ២៣៤ នាក់ និងករណីជាសះស្បើយចំនួន ៨ នាក់បន្ថែមទៀត ដែលធ្វើចំនួនជាសះស្បើយកើនដល់ ៧០ នាក់។
ក្រសួងសុខាភិបាលបញ្ជាក់ថា មន្ត្រីជាន់ខ្ពស់ស្ថានទូតសហរដ្ឋអាមេរិកនេះ គឺត្រូវបានធ្វើតេស្ដរកឃើញជំងឺកូវីដ ១៤ នៅថ្ងៃទី ២៩ កក្កដា បន្ទាប់ពីធ្វើចត្តាឡីស័កបាន ១៣ ថ្ងៃ។ អ្នកជំងឺនេះ គឺត្រូវបានដាក់ក្នុងបន្ទប់មួយនៅក្នុងស្ថានទូត ដើម្បីទទួលការព្យាបាលពីមន្ត្រីពេទ្យប្រចាំស្ថានទូត៕