ភ្នំពេញៈ អ្នកនាំពាក្យក្រសួងសុខាភិបាល លោកស្រី ឱ វណ្ណឌីន កាលពីថ្ងៃទី ១២ មករា បានអំពាវនាវដល់ប្រជាពលរដ្ឋក៏ដូចជា កងកម្លាំងប្រដាប់អាវុធបង្កើនការយកចិត្តទុកដាក់ថែទាំសុខភាពឲ្យបានល្អ ជាពិសេសនៅពេលអាកាសធាតុកាន់តែចុះត្រជាក់ខ្លាំង ព្រោះវាអាចបង្កផលប៉ះពាល់ធ្ងន់ធ្ងរដល់សុខភាព។
សេចក្ដីអំពាវនាវនេះបានធ្វើឡើងបន្ទាប់ពីក្រសួងធនធានទឹក និងឧតុនិយម បានផ្សព្វផ្សាយថាចាប់ពីថ្ងៃទី ១៣ ដល់ ១៩ ខែមករា អាកាសធាតុត្រជាក់នឹងធ្លាក់ចុះក្នុងរង្វង់ពី ១១-១៤ អង្សាសេ សម្រាប់បណ្ដាខេត្តដែលនៅជាប់តំបន់ជួរភ្នំដងរែក និងខ្ពង់រាបឦសាននៃប្រទេសកម្ពុជា និងក្នុងចន្លោះពី ១៣-១៦ អង្សាសេ សម្រាប់បណ្ដាខេត្តដែលស្ថិតនៅក្នុងតំបន់វាលទំនាបកណ្ដាល។ ដោយឡែកខេត្តជាប់មាត់សមុទ្រ សីតុណ្ហភាពនឹងធ្លាក់ចុះក្នុងចន្លោះពី ១៩-២២ អង្សាសេ។
លោកស្រី ឱ វណ្ណឌីន ប្រាប់ ភ្នំពេញ ប៉ុស្តិ៍ ថា អាកាសធាតុត្រជាក់នឹងបង្កឲ្យកើតមានជំងឺគ្រុនផ្ដាសាយ រលាកបំពង់ក ឬ ផ្លូវដង្ហើម និងជំងឺគាំងបេះដូង ដែលអាចបណ្ដាលឲ្យស្លាប់។ ដើម្បីបង្ការគ្រោះថ្នាក់ដែលបង្កឡើងពីអាកាសធាតុត្រជាក់ ចាំបាច់ត្រូវស្លៀកសម្លៀកបំពាក់ក្រាស់ៗ ដែលអាចរក្សាកម្ដៅក្នុងរាងកាយ និងត្រូវបរិភោគទឹកក្ដៅឧណ្ហៗ ជាពិសេសត្រូវអនុវត្តវិធានអនាម័យឲ្យបានល្អជាប់ជាប្រចាំ។
លោកស្រីបញ្ជាក់ថា៖ «បច្ចុប្បន្ន យើងកំពុងប្រយុទ្ធប្រឆាំងចំពោះជំងឺឆ្លងកូវីដ ១៩។ ដូច្នេះប្រសិនបើមានពលរដ្ឋយើងកើតមានជំងឺគ្រុនផ្ដាសាយ ឬជំងឺរលាកផ្លូវដង្ហើម ដែលបង្កឡើងពីអាកាសធាតុត្រជាក់នេះទៀតនោះ វានឹងបង្កឲ្យមានក្ដីព្រួយបារម្ភកាន់តែខ្លាំង។ ពិសេសយើងបារម្ភពីមនុស្សចាស់ជរា កុមារតូចៗ ដែលងាយនឹងកើតមានជំងឺទាំងនេះ»។
បើតាមលោកស្រី វណ្ណឌីន អាកាសធាតុត្រជាក់ក៏នឹងបង្កឲ្យបាត់បង់ជាតិទឹកពីក្នុងខ្លួនច្រើនផងដែរ ដូច្នេះត្រូវទទួលទានទឹកក្ដៅឧណ្ហៗឲ្យបានច្រើន ចៀសវាងការបរិភោគអាហារដែលមានជាតិខ្លាញ់ និងជាតិស្ករច្រើនពេក។ ក្រៅពីនេះមិនចាំបាច់ត្រូវនាំគ្នាអង្គុយលេងនៅទីវាលក្រៅផ្ទះ ឬដើរកម្សាន្តពេលយប់នោះទេ។
ទោះជាបែបនេះក្ដី កងកម្លាំងប្រដាប់អាវុធដែលឈរជើងនៅតាមជួរបន្ទាត់ព្រំដែន រួមទាំងមន្ត្រីឧទ្យានុរក្សបានលើកឡើងថា អាកាសធាតុត្រជាក់គឺមិនមែនជាឧបសគ្គសម្រាប់ពួកគាត់ឡើយ។ ពួកគាត់នៅតែបន្តការចុះល្បាតទាំងយប់ទាំងថ្ងៃ ដើម្បីបង្ការទប់ស្កាត់បទល្មើសផ្សេងៗនៅក្នុងតំបន់ដែនជម្រកសត្វព្រៃ និងតាមជួរបន្ទាត់ព្រំដែន។
លោក បួនសេង សុពិសិដ្ឋ ប្រធានវរការពារព្រំដែនលេខ ៦២៣ នៃខេត្តរតនគិរី ប្រាប់ ភ្នំពេញ ប៉ុស្តិ៍ ថា ការចុះល្បាតរក្សាសុវត្ថិភាព សន្តិសុខនៅតាមជួរបន្ទាត់ព្រំដែន នឹងមិនមានការប្រែប្រួលនោះទេ បើទោះជាអាកាសធាតុចុះត្រជាក់ដល់កម្រិត ១១ អង្សាសេ ឬក្រោមនេះក៏ដោយ។
លោកថ្លែងថា៖ «៣-៤ យប់មកហើយ នៅតំបន់កន្ទុយនាគ អាកាសធាតុត្រជាក់បានធ្លាក់ចុះក្រោម ១១ អង្សាសេ។ ប៉ុន្តែកងកម្លាំងនគរបាលការពារព្រំដែនយើងមិនរាថយ ឬស្ពឹកស្រពន់ ដោយសារតែអាកាសធាតុត្រជាក់នេះទេ។ យើងនៅតែ ចុះល្បាតតាមដងព្រៃនៃជួរបន្ទាត់ព្រំដែនរបស់យើង ដើម្បីទប់ស្កាត់ និងបង្ក្រាបរាល់បទល្មើសផ្សេងៗនៅតាមបន្ទាត់ព្រំដែន»។
បើតាមលោក សុពិសិដ្ឋ កម្លាំងរបស់លោកបានទទួលអាវរងា និងគ្រឿងសម្ភារបំពាក់ជាប់ខ្លួន ពេលចុះល្បាតគ្រប់គ្រាន់តាំងពីដើមខែធ្នូ ឆ្នាំ ២០២០ មកម្ល៉េះ ហេតុនេះទើបកម្លាំងរបស់លោកមិនបារម្ភចំពោះអាកាសធាតុត្រជាក់នេះឡើយ។
ស្រដៀងគ្នានេះលោក ខាង សឿង មន្ត្រីឧទ្យានុរក្សស្នាក់ការរកាថ្មីនៃតំបន់ដែនជម្រកសត្វព្រៃកែវសីមា ដែលមានទីតាំងនៅក្នុងភូមិពូហ្យាម ឃុំសែនមនោរម្យ ស្រុកអូររាំង ខេត្តមណ្ឌលគិរីប្រាប់ ភ្នំពេញ ប៉ុស្តិ៍ ថា អាកាសធាតុត្រជាក់វាមិនមែនជាឧបសគ្គរបស់មន្ត្រីឧទ្យានុរក្សដែលមានតួនាទី និងភារកិច្ច ថែរក្សាការពារព្រៃឈើ និងសត្វព្រៃនោះឡើយ។
លោកនិយាយថា៖ «យើងមិនអាចព្រោះតែអាកាសធាតុត្រជាក់ លួចខ្ជិលច្រអូស មិនចុះល្បាតព្រៃ ទុកឲ្យបទល្មើសកើតឡើងនោះទេ»។
លោកបានបន្តថា កាលពីយប់ថ្ងៃចន្ទ សីតុណ្ហភាពនៅក្នុងតំបន់ទីស្នាក់ការរកាថ្មីបានធ្លាក់ចុះមកនៅក្នុងកម្រិត ១៤ អង្សាសេ។ ក្រុមមន្ត្រីឧទ្យានុរក្សដែលប្រចាំការនៅទីនោះ បាននាំគ្នាជីកដីធ្វើជាគុកចង្ក្រាន ដើម្បីដុតកម្ដៅខ្លួន ប៉ុន្តែ នៅពេលថ្ងៃសីតុណ្ហភាពបានកើនឡើងដល់កម្រិត ២២ អង្សាសេវិញ។
បើតាមសម្ដីលោក សឿង បច្ចុប្បន្ននៅក្នុងតំបន់ដែនជម្រកសត្វព្រៃកែវសីមា គ្មានបទល្មើសកើតឡើងនោះទេ ព្រោះកម្លាំងមន្ត្រីឧទ្យានុរក្សបានពង្រឹងការចុះល្បាតការពារព្រៃឈើ និងសត្វព្រៃជាប់ជាប្រចាំទាំងយប់ ទាំងថ្ងៃ ដោយមានការចូលរួមពីប្រជាសហគមន៍ និងអាជ្ញាធរមូលដ្ឋាន៕