ភ្នំពេញៈ រដ្ឋលេខាធិការ និងជាអ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានបដិសេធ និងថ្កោលទោសចំពោះការផ្សព្វផ្សាយដែលថា ក្រសួងបានលួចលក់វ៉ាក់សាំងកូវីដ ១៩ ស៊ីណូហ្វាមនៅមន្ទីរពេទ្យកាល់ម៉ែត និងថា ការចាក់វ៉ាក់សាំងនេះក៏មិនតម្រូវឱ្យបង់ប្រាក់ដែរ ខណៈការចាក់វ៉ាក់សាំងពីដំបូង គឺធ្វើឡើងសម្រាប់តែក្រុមមនុស្សស្ម័គ្រចិត្តតាមការប្រកាសពីក្រសួងសុខាភិបាល។
លោកស្រីបានបញ្ជាក់ កាលពីម្សិលមិញថា៖ «ខ្ញុំសុំប្រកាសច្រានចោលទាំងស្រុង ហើយក៏សូមថ្កោលទោសចំពោះជនដែលបំពុលសង្គមដែលប្រឌិតបង្កើតនូវពាក្យ និងព័ត៌មានដែលមិនពិតនេះឡើង ដោយសារយើងមិនមានការចាក់ដោយតម្រូវឱ្យមានការបង់ប្រាក់ទេ ហើយបច្ចុប្បន្ននេះក៏មិនមានវ៉ាក់សាំងណាដែលប្រកាសចាក់ដោយមានការបង់ថ្លៃដែរ ពីព្រោះវ៉ាក់សាំងយើងមានកំណត់»។
ជាមួយគ្នានេះ លោកស្រី បានស្នើឱ្យអាជ្ញាធរចាត់វិធានការទៅលើស្ថាប័នសារព័ត៌មានដែលបានផ្សាយមិនពិតពីរឿងនេះផងដែរ។
កាលពីម្សិលមិញនេះដែរ ស្ថានទូតចិនប្រចាំនៅកម្ពុជាបានចេញសេចក្តីជូនដំណឹងជាភាសាចិន ដោយអំពាវនាវដល់ជនរួមជាតិរបស់ខ្លួននៅកម្ពុជាឱ្យប្រយ័ត្នចំពោះការលក់វ៉ាក់សាំងខុសច្បាប់។
តាមសេចក្ដីជូនដំណឹងនេះស្ថានទូតចិនប្រចាំនៅកម្ពុជាបានលើកឡើងថា ថ្មីៗនេះស្ថានទូតបានទទួលរបាយការណ៍ពីពលរដ្ឋចិនមួយចំនួននៅកម្ពុជាថា មានអ្នកខ្លះបានផ្ញើសារជាភាសាចិនតាមទូរស័ព្ទដៃរបស់ពួកគេដោយអះអាងថា គ្រាន់តែត្រូវបង់ថ្លៃសេវាចំនួន ១២០ ដុល្លារអាមេរិក ដល់ពួកគេក្នុងការណាត់ ដើម្បីចាក់វ៉ាក់សាំងកូវីដ ១៩។ មានមនុស្សមួយចំនួនទៀតបានផ្សព្វផ្សាយជាសាធារណៈតាមបណ្តាញសង្គមពីការលក់វ៉ាក់សាំងកូវីដរបស់ប្រទេសចិនក្នុងតម្លៃ ៤៥០ ដុល្លារ ដែលធ្វើឱ្យប្រជាជនចិនក្នុងប្រទេសកម្ពុជាមានការសង្ស័យជាខ្លាំង។
ស្ថានទូតចិនបានរំឭកថា៖ «យោងតាមការយល់ដឹងរបស់យើងរដ្ឋាភិបាល និងយោធាកម្ពុជាទទួលខុសត្រូវចំពោះការរក្សាទុក និងចាក់វ៉ាក់សាំងជំនួយរបស់ចិន។ ពាក្យសុំចាក់វ៉ាក់សាំងត្រូវស្ថិតក្រោមនីតិវិធីអនុម័តយ៉ាងតឹងរ៉ឹងបំផុត។ មិនអាចមានវ៉ាក់សាំងនេះចូលក្នុងទីផ្សារបានទេ។ រាល់ការផ្សាយពាណិជ្ជកម្មនានាទាក់ទងនឹងការចាក់វ៉ាក់សាំងកូវីដ ១៩ របស់ ប្រទេសចិនគឺជាការក្លែងបន្លំដូច្នេះសូមមេត្តាប្រុងប្រយ័ត្ន»។
ជាមួយគ្នានេះលោកស្រី ឱ វណ្ណឌីន ក៏បានសុំការអធ្យាស្រ័យចំពោះអ្នកដែលមានបំណងចង់ចាក់វ៉ាក់សាំងកូវីដ ១៩ ផងដែរ ដោយសារចំនួនវ៉ាក់សាំងមានកម្រិតដែលត្រូវរក្សាទុកសម្រាប់ចាក់លើកទី២ ដល់អ្នកដែលបានចាក់លើកទី១ រួចហើយ។
លោកស្រីបានបន្តថា អ្នកមិនស្ថិតក្នុងក្រុមមនុស្សដែលមានការប្រកាសរបស់ក្រសួង សុខាភិបាលសុំកុំទាន់មកចាក់វ៉ាក់សាំង ដោយរង់ចាំមើលតាមសេចក្តីប្រកាសព័ត៌មានរបស់ក្រសួងសុខាភិបាលនៅពេលដែលទទួលបានវ៉ាក់សាំងកូវីដ ១៩ ជាបន្តបន្ទាប់ទៀត។
រីឯស្ថានទូតអូស្ត្រាលីប្រចាំកម្ពុជាក៏បានបង្ហោះសារលើបណ្តាញសង្គមរបស់ខ្លួនកាលពីម្សិលមិញដែរថា រាជរដ្ឋាភិបាលកម្ពុជាបានបញ្ជាក់ថា ជនបរទេសទាំងអស់ដែលកំពុងរស់នៅ ឬធ្វើការនៅកម្ពុជានឹងអាចទទួលបានវ៉ាក់សាំងប្រឆាំងនឹងជំងឺកូវីដ ១៩ ស្របតាមកម្មវិធីចាក់វ៉ាក់សាំងការពារជំងឺកូវីដ ១៩ របស់ប្រទេសកម្ពុជា។
ស្ថានទូតបានបន្តថា៖ «រាជរដ្ឋាភិបាលកម្ពុជាបានបញ្ជាក់ថា ការចាក់វ៉ាក់សាំងនឹងត្រូវផ្តល់ជូនដោយឥតគិតថ្លៃ ហើយព័ត៌មានលម្អិតនៃកម្មវិធីចាក់វ៉ាក់សាំងនេះនឹងត្រូវផ្តល់ជូនតាមពេលវេលាកំណត់។ យើងនឹងផ្តល់ព័ត៌មានលម្អិតបន្ថែមទៀត នៅពេលយើងទទួលបានព័ត៌មានបន្ថែម»។
យ៉ាងណាក៏ដោយ អ្នកនាំពាក្យក្រសួងសុខាភិបាលមិនបានបញ្ជាក់ពីដំណើរការនៃការចាក់វ៉ាក់សាំងប្រឆាំងនឹងជំងឺកូវីដ ១៩ ជូនដល់ជនបរទេសនឹងចាប់ផ្តើមនៅពេលណានោះទេ។
ដោយឡែកនៅថ្ងៃទី ២៥ ខែកុម្ភៈនេះ មន្ទីរសុខាភិបាលខេត្តបាត់ដំបងនឹងអនុវត្តកម្មវិធីចាក់វ៉ាក់សាំងកូវីដ ១៩ លើកទី១ ដល់មន្ត្រីនគរបាលខេត្ត មន្ត្រីរាជការសុខាភិបាលទូទាំងខេត្ត និងនិស្សិតសាលាមធ្យមសិក្សាសុខាភិបាលភូមិភាគបាត់ដំបង។
តាមការឱ្យដឹងរបស់រដ្ឋបាលខេត្តបាត់ដំបង ការចាក់វ៉ាក់សាំងនេះនឹងចាប់ផ្តើមពីម៉ោង ៨ ព្រឹក ដល់ម៉ោង ១២ ថ្ងៃត្រង់ និងពីម៉ោង ២ ដល់ម៉ោង ៥ រសៀល។ ការចាក់នេះនឹងធ្វើនៅក្នុងទីតាំងចំនួន ៦ គឺ មន្ទីរពេទ្យបង្អែកខេត្តបាត់ដំបង, មន្ទីរពេទ្យបង្អែកមោងប្ញស្សី, មន្ទីរពេទ្យបង្អែកសំពៅលូន, មន្ទីរពេទ្យបង្អែកថ្មគោល, មន្ទីរពេទ្យបង្អែកបវេល និងមន្ទីរពេទ្យបង្អែកឯកភ្នំ។
ចំណែកនៅក្នុងខេត្តបន្ទាយមានជ័យការចាក់វ៉ាក់សាំងកូវីដ ១៩ បានចាប់ផ្តើមពីថ្ងៃម្សិលមិញដោយក្នុងនោះមានពីថ្នាក់ដឹកនាំ និងមន្ត្រីរាជការទូទាំងខេត្តបានចូលរួមយុទ្ធនាការចាក់វ៉ាក់សាំងបង្ការជំងឺកូវីដ ១៩ នេះ នៅមន្ទីរពេទ្យមិត្តភាពកម្ពុជា-ជប៉ុន ស្រុកមង្គលបុរី។
រីឯទីតាំងចាក់វ៉ាក់សាំងបង្ការជំងឺកូវីដ ១៩ សម្រាប់ខេត្តបន្ទាយមានជ័យគឺមានចំនួន ៤ កន្លែងគឺ មន្ទីរពេទ្យមិត្តភាពកម្ពុជា-ជប៉ុន ស្រុកមង្គលបុរី, មន្ទីរពេទ្យបង្អែក ស្រុកថ្មពួក, មន្ទីរពេទ្យបង្អែកប៉ោយប៉ែត និងមន្ទីរពេទ្យបង្អែក ព្រះនេត្រព្រះ៕
វីដេអូ៖