ពោធិ៍សាត់ៈ ប្រធាន អនុប្រធាន និងមន្ត្រីមន្ទីរសុរិយោដីខេត្តពោធិ៍សាត់ចំនួន ៣ រូប ត្រូវបានអង្គភាពប្រឆាំងអំពើពុករលួយ (ACU) បាននឹងកំពុងធ្វើការសាកសួរ បន្ទាប់ពីអង្គភាពនេះបានឃាត់ខ្លួនពួកគេ កាលពីថ្ងៃទី ២៧ ខែ កក្កដា ដោយសង្ស័យឃុបឃិតគ្នាប្រព្រឹត្តអំពើពុករលួយទារលុយពីពលរដ្ឋម្ចាស់ដីចំនួន ១០ ម៉ឺនដុល្លារ ជាថ្នូរនឹងការចេញច្បាប់សាងសង់សំណង់អគារ។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) ពីម្សិលមិញ មិនទាន់អាចទាក់ទងសុំការបញ្ជាក់ជុំវិញការឃាត់ខ្លួនមន្ត្រីទាំង ៣ នាក់នេះនៅឡើយទេ ដោយលោកបានព្យាយាមចុចផ្ដាច់ទូរស័ព្ទទៅវិញ។
ប៉ុន្ដែសារព័ត៌មាន Thmey Thmey បានដកស្រង់សម្ដីលោក ឱម យ៉ិនទៀង ពីម្សិលមិញថា៖ «ខ្ញុំឃើញមានការចុះផ្សាយហើយ វាមានច្រើនករណី ហើយករណីមួយដែលគេបានផ្សាយ គឺការទារលុយពីពលរដ្ឋចំនួន ១០ ម៉ឺនដុល្លារ ប៉ុន្ដែរឿងលម្អិតជាងនេះ យើងមិនទាន់អាចនិយាយបានទេព្រោះនីតិវិធីកំពុងសាកសួរគាត់»។
លោកបន្តថា៖ «ពួកគេបានទាមទារលុយពីពលរដ្ឋជាថ្នូរបញ្ហាដីធ្លី និងច្បាប់សំណង់ យើងបាននាំខ្លួនពីកន្លែងប្រព្រឹត្តជាក់ស្ដែងមក យើងបានសាកសួរ និងពិនិត្យភ័ស្ដុតាង។ នៅរសៀលថ្ងៃទី ២៧ កក្កដា យើងបានប្រកាសឃាត់ខ្លួន ក្រោយពីប្រកាសឃាត់ខ្លួនហើយ យើងក៏បានជូនដំណឹងទៅព្រះរាជអាជ្ញាថា យើងបានឃាត់ខ្លួន។ យើងកំពុងបន្តនីតិវិធី ៤៨ ម៉ោង ដើម្បីបញ្ជូនទៅតុលាការ»។
ចំណែកសារព័ត៌មាន Fresh News បានចេញផ្សាយពីម្សិលមិញថា ប្រធាន អនុប្រធាន និងមន្ត្រីមន្ទីរសុរិយោដី ខេត្តពោធិ៍សាត់ ដែលត្រូវចាប់ខ្លួន ៣ នាក់ រួមមាន ទី១-ឈ្មោះ លៀម ប៊ុនរឿន ប្រធានមន្ទីរសុរិយោដីខេត្តពោធិ៍សាត់ ទី២-ឈ្មោះ ជាង វុទ្ធី អនុប្រធានមន្ទីរទទួលការងារសំណង់ និងទី៣-ឈ្មោះតែ ប៊ុនថេង មន្ត្រីសុរិយោដីខេត្តទទួលបន្ទុកច្រក។
សារព័ត៌មានផ្សាយបន្តថា ពួកគេទាំង ៣ នាក់ ត្រូវបានឃាត់ខ្លួនដោយសង្ស័យពាក់ព័ន្ធការឃុបឃិតគ្នាប្រព្រឹត្តអំពើពុករលួយទារលុយពីប្រជាពលរដ្ឋជាម្ចាស់ដីដោយខុសច្បាប់ចំនួន ១០ ម៉ឺនដុល្លារ ជាថ្នូរចេញច្បាប់សាងសង់។ ការឃាត់ខ្លួននេះ នៅភោជនីយដ្ឋានមហាលាភ ក្រុងពោធិ៍សាត់ នៅថ្ងៃទី ២៧ កក្កដា ខណៈពួកគេ និងម្ចាស់ដីណាត់ជួបគ្នា ដើម្បីប្រគល់លុយ។
Fresh News បញ្ជាក់ថា៖ «ប្រភពបានបង្ហើបថា ប្រធានមន្ទីរសុរិយោដីខេត្តពោធិ៍សាត់ បានទារលុយពីគេចំនួន ៤ ម៉ឺនដុល្លារ គេមិនព្រម បង្កការលំបាកទាល់តែគេមកអង្វរ ក៏ទារពីគេដល់ ១០ ម៉ឺនដុល្លារ ទើបចេញច្បាប់សាងសង់ឲ្យ ហើយត្រូវកក់ភ្លាម ៥០ ភាគរយ (៥ ម៉ឺនដុល្លារ)។ កាលពីថ្ងៃទី ២៦ ខែ កក្កដា ឆ្នាំ ២០១៩ គេកក់ ៥ ពាន់ដុល្លារ នៅបន្ទប់ការិយាល័យប្រធានមន្ទីរតែម្តង ហើយនៅព្រឹកថ្ងៃទី ២៧ ខែ កក្កដា ឆ្នាំ ២០១៩ កក់ឲ្យ ៤ ម៉ឺន ៥ ពាន់ដុល្លារទៀត បង្គ្រប់ ៥០ ភាគរយ នៅភោជនីយដ្ឋាន មហាលាភ ទើបអង្គភាពប្រឆាំងអំពើពុករលួយ ឃាត់នាំខ្លួនទាំងអស់តែម្តង»។
លោក ផៃ ស៊ីផាន អ្នកនាំពាក្យរដ្ឋាភិបាលគាំទ្រចំពោះសកម្មភាពអង្គភាពប្រឆាំងអំពើពុករលួយ ក៏ដូចជាគណៈកម្មការបង្ក្រាប និងទប់ស្កាត់ បទល្មើសធនធានធម្មជាតិ ដែលមានសកម្មភាពដ៏ផុសផុល ក្នុងកិច្ចបង្ក្រាបភាពមិនប្រក្រតីដែលបំផ្លាញកិត្តិយសរាជរដ្ឋាភិបាល។ លោកថា ជាពិសេសក្នុងកិច្ចពង្រឹងលក្ខណសម្បត្តិនៃការផ្តល់អាជ្ញាប័ណ្ណសាងសង់ ដែលរាជរដ្ឋាភិបាលបាននឹងកំពុងចាត់វិធានការ ក្នុងកិច្ចផ្តល់សេវាកម្មរបស់រាជរដ្ឋាភិបាលជូនចំពោះប្រជាពលរដ្ឋដែលពាក់ព័ន្ធក្នុងវិស័យសំណង់នេះ។
លោក ផៃ ស៊ីផាន បញ្ជាក់ថា៖ «យើងខ្ញុំនៅតែលើកទឹកចិត្តដល់មហាជនគ្រប់រូបមេត្តា ចូលរួមកិច្ចសហការជាមួយអង្គភាព ACU និងគណៈកម្មការបង្ក្រាប និងទប់ស្កាត់បទល្មើសធនធានធម្មជាតិ។ យើងទាំងអស់គ្នារួមគ្នា សម្រាប់សេចក្តីសុខ និងរុងរឿងរបស់ប្រជាជាតិតាមរយៈសហការ និងអនុវត្តគ្រប់ជ្រុងជ្រោយនៃគោលការណ៍អភិក្រមរបស់សម្តេចតេជោនាយករដ្ឋមន្ត្រី»។
លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ ពីម្សិលមិញថ្លែងថា លោកមិនទាន់បានទទួលព័ត៌មានអ្វីថ្មីបន្ថែមទៀតទេ ដោយលោកថា គ្រាន់តែដឹងមន្ត្រីទាំង ៣ នាក់នេះ ត្រូវបាន ACU ចាប់ខ្លួនពាក់ព័ន្ធបទល្មើសអំពើពុករលួយ។
លោក ម៉ៅ ធនិន្ទ អភិបាលខេត្តពោធិ៍សាត់ បានថ្លែងយ៉ាងខ្លីកាលពីម្សិលមិញថា៖ «ខ្ញុំដឹងដែរហើយ ហើយវាជាការអនុវត្តច្បាប់ ខ្ញុំអត់មានព័ត៌មានអ្វីទេ បើចង់ដឹងច្បាស់ទៅសួរអ្នកចាប់ហ្នឹងទៅ»។
លោក សន ជ័យ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា (ANSA) ថ្លែងថា ករណីនេះមិនថាតែលុយរហូតដល់ ១០ ម៉ឺនដុល្លារ សូម្បីតែលុយលើសតម្លៃសេវារដ្ឋបាលកំណត់ ក៏គេចាត់ទុកជាប្រភេទអំពើពុករលួយដែរ។ រាល់ការទារទាំងឡាយណាដែលលើសពីតម្លៃសេវាសាធារណៈ វាសុទ្ធតែទង្វើខុសច្បាប់ទាំងអស់។
លោកបន្តថា៖ «ខ្ញុំគិតថា នីតិវិធីនៅស្មុគស្មាញនៅឡើយពាក់ព័ន្ធការសុំច្បាប់សាងសង់នេះ សូម្បីតែពលរដ្ឋសុំច្បាប់ធ្វើផ្ទះ ឬផ្ទះល្វែងតិចតួចហ្នឹង ក៏មានភាពស្មុគស្មាញដែរ។ ច្បាប់បានកំណត់ហើយថា តម្លៃសេវាហ្នឹងប៉ុណ្ណឹង ប៉ុន្ដែនីតិវិធីនៅស្មុគស្មាញ គឺពលរដ្ឋខ្លះគាត់មិនបានដឹងថា កម្រិតផ្ទះគាត់ហ្នឹង ត្រូវសុំច្បាប់ត្រឹមណា ឬនៅកន្លែងណាទេ ហើយពាក្យបំពេញសំណុំបែបបទហ្នឹង ក៏ពិបាកបំពេញដែរ ដូច្នេះវាជាឱកាសសម្រាប់មន្រ្តីរកលុយកាក់ទៅតាមហ្នឹងដែរ»។
លោក គឹម ស្រ៊ន់ មន្ត្រីសម្របសម្រួលផ្នែកសិទ្ធិមនុស្សនៃអង្គការលីកាដូ ប្រចាំខេត្តពោធិ៍សាត់ថ្លែងថា៖ «ខ្ញុំក៏គាំទ្រដែរ វាជាការក្រើនរំឭកមន្ត្រីដទៃទៀតឲ្យបញ្ឈប់សកម្មភាពពុករលួយរបស់ខ្លួន ដើម្បីប្រទេសយើងគ្មានអំពើពុករលួយ។ យើងជំរុញឲ្យមានការស៊ើបអង្កេតឲ្យបានល្អិតល្អន់ ព្រោះពេលខ្លះវាអាចជាអំពើប៉ែងជើងគ្នា ដើម្បីយកអំណាច ឬមុខតំណែងណាមួយ»៕