.jpg)
មន្ត្រីមន្ទីររៀបចំដែនដីខេត្តពោធិ៍សាត់ទាំង ៣ នាក់នេះ ត្រូវបានចាប់ខ្លួនទាក់ទងអំពើពុករលួយ។ សហការី
ភ្នំពេញៈ តំណាងអយ្យការអមសាលាដំបូងរាជធានីភ្នំពេញលោក គុជ គឹមឡុង ពីម្សិលមិញ បានសម្រេចចោទប្រកាន់ និងឃុំខ្លួនប្រធាន អនុប្រធាន និងមន្ត្រីសុរិយោដីខេត្តពោធិ៍សាត់ទាំង ៣ នាក់ហើយ ដែលពាក់ព័ន្ធនឹងអំពើពុករលួយជំរិតទារប្រាក់ពីពលរដ្ឋចំនួន ១០ ម៉ឺនដុល្លារ ជាថ្នូរនឹងការចេញច្បាប់ឲ្យសាងសង់រោងចក្រ ដោយតុលាការបានចោទប្រកាន់ចំនួន ៣ បទល្មើស។
លោក គុជ គឹមឡុង ព្រះរាជអាជ្ញារងនៃអយ្យការ និងជាអ្នកនាំពាក្យសាលាដំបូងរាជធានីភ្នំពេញបានថ្លែងថា សាលាដំបូងរាជធានីភ្នំពេញ នៅថ្ងៃ ទី ៣១ ខែ កក្កដា បន្ទាប់ពីបញ្ចប់ការសួរនាំជនជាប់ចោទឈ្មោះ លៀម ប៊ុនរឿន ប្រធានមន្ទីរសុរិយោដីខេត្តពោធិ៍សាត់ ឈ្មោះ ជាង វុទ្ធី អនុប្រធានមន្ទីរទទួលការងារសំណង់ និងឈ្មោះ តែ ប៊ុនថេង មន្ត្រីសុរិយោដីខេត្តទទួលបន្ទុកច្រក តុលាការបានចោទពួកគេហើយ ប៉ុន្ដែលោកមិនបានបញ្ជាក់មាត្រាអ្វីខ្លះទេ។
លោកបញ្ជាក់ថា៖ «តំណាងអយ្យការបានសម្រេចចោទប្រកាន់បុគ្គលទាំង៣នាក់នេះចំនួន៣បទល្មើស រួមមានទី១ បទវីតិក្រម តាមក្រមព្រហ្មទណ្ឌ ទី២ បទរំលោភអំណាច តាមច្បាប់ស្ដីពីការប្រឆាំងអំពើពុករលួយ និងទី៣ បទសម្អាតប្រាក់ តាមច្បាប់ស្ដីពីការប្រឆាំងការសម្អាតប្រាក់ និងហិរញ្ញវត្ថុ»។
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) កាលពីម្សិលមិញ នៅតែមិនទាន់អាចទាក់ទងសុំការបញ្ជាក់ជុំវិញករណីនេះបាននៅឡើយទេ។
លោក សន ជ័យ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា (ANSA) ថ្លែងថា វាសនាមន្ត្រីទាំង ៣ នាក់នេះ ប្រហែលជាពិបាកនឹងរួចខ្លួន ដោយសារមានការអន្តរាគមន៍ ពីលោកនាយករដ្ឋមន្ត្រី ហ៊ុន សែន រួមផ្សំ នឹងភ័ស្ដុតាងដ៏ជាក់លាក់បំផុតថែមទៀត។ ម្យ៉ាងទៀត វាជារដូវកាលអនុវត្តអភិក្រមទាំង ៥ របស់រដ្ឋាភិបាលចំពោះមន្ត្រីដែលមិនព្រមកែប្រែឥរិយាបថអាក្រក់ៗផងដែរ។
លោកបញ្ជាក់ថា៖ «វាជារឿងធម្មតា បើសិនមានការបង្ក្រាបសកម្មភាពទៅលើជនប្រព្រឹត្តកំហុសណាមួយ គឺអាចចាត់ទុកថា ជាការព្រមានអ្នកដែលកំពុងមានចិត្តស្ទាក់ស្ទើរក្នុងការប្រព្រឹត្តកំហុស ហើយពួកគេខ្លះក៏កំពុងភ័យខ្លួនខ្លះដែរ។ ម្យ៉ាងទៀត អ្នកដែលកំពុងមានគំនិតនេះ អាចចាប់ពន្លឿនការងាររបស់ខ្លួន ដោយឈប់មានគំនិតវៀចវេរ ព្រោះពួកគាត់បានឃើញគំរូជាក់ស្ដែងស្រាប់ហើយ»។
តាម Fresh News ចេញផ្សាយពីថ្ងៃទី ២៨ កក្កដា ថាពួកគេទាំង ៣ នាក់ ត្រូវបានឃាត់ខ្លួនដោយសង្ស័យពាក់ព័ន្ធការឃុបឃិតគ្នាប្រព្រឹត្តអំពើពុករលួយទារលុយពីប្រជាពលរដ្ឋ ជាម្ចាស់គម្រោងរោងចក្រ ដោយខុសច្បាប់ ចំនួន ១០ ម៉ឺនដុល្លារ ជាថ្នូរនឹងការចេញច្បាប់សាងសង់។ ការឃាត់ខ្លួនបុគ្គលទាំង ៣ ធ្វើឡើងនៅភោជនីយដ្ឋានមហាលាភ ក្រុងពោធិ៍សាត់ នៅថ្ងៃទី ២៧ កក្កដា ខណៈពួកគេ និងម្ចាស់ដីណាត់ជួបគ្នា ដើម្បីប្រគល់លុយ។
Fresh News បានបញ្ជាក់ថា៖ «ប្រភពបានបង្ហើបថា ប្រធានមន្ទីរសុរិយោដីខេត្តពោធិ៍សាត់ បានទារលុយពីគេចំនួន ៤ ម៉ឺនដុល្លារ គេមិនព្រម បង្កការលំបាកទាល់តែគេមកអង្វរ ក៏ទារពីគេដល់ ១០ ម៉ឺនដុល្លារ ទើបចេញច្បាប់សាងសង់ឲ្យ ហើយត្រូវកក់ភ្លាម ៥០ ភាគរយ (៥ ម៉ឺនដុល្លារ)។ កាលពីថ្ងៃទី ២៦ ខែ កក្កដា ឆ្នាំ ២០១៩ គេកក់ ៥ ពាន់ដុល្លារ នៅបន្ទប់ការិយាល័យប្រធានមន្ទីរតែម្តង ហើយនៅព្រឹកថ្ងៃទី ២៧ ខែ កក្កដា ឆ្នាំ ២០១៩ កក់ឲ្យ ៤ ម៉ឺន ៥ ពាន់ដុល្លារទៀត បង្គ្រប់ ៥០ ភាគរយ នៅភោជនីយដ្ឋាន មហាលាភ ទើបអង្គភាពប្រឆាំងអំពើពុករលួយ ឃាត់នាំខ្លួនទាំងអស់តែម្តង»។
គួររំឭកថា ប្រធាន អនុប្រធាន និងមន្ត្រីមន្ទីរសុរិយោដីខេត្តពោធិ៍សាត់ ត្រូវបានលោក ឱម យ៉ិនទៀង ប្រធានអង្គភាពប្រឆាំងអំពើពុករលួយ (ACU) បានដឹកនាំកម្លាំងសមត្ថកិច្ចចុះទៅឃាត់ខ្លួនផ្ទាល់ នៅព្រឹកថ្ងៃទី ២៧ ខែ កក្កដា នៅក្រុង/ខេត្តពោធិ៍សាត់ ដោយសង្ស័យពួកគេប្រព្រឹត្តអំពើពុករលួយ ដោយឃុបឃិតគ្នាទារលុយពីម្ចាស់គម្រោងរោងចក្រមួយដោយខុសច្បាប់ចំនួន ១០ ម៉ឺនដុល្លារ ជាថ្នូរនឹងការចេញច្បាប់សាងសង់៕
