.jpg)
មន្ត្រីពិនិត្យគ្រាប់យុទ្ធភណ្ឌមិនទាន់ផ្ទុះដែលកាយពីរណ្តៅដី។ រូប នគរបាល
កណ្តាលៈ ក្រុមមន្ត្រីជំនាញនៃមជ្ឈមណ្ឌលកំចាត់មីនកម្ពុជាហៅកាត់ថា ស៊ីម៉ាក់ បានទៅប្រមូលយកគ្រាប់យុទ្ធភណ្ឌមិនទាន់ផ្ទុះចំនួន ៤៣ គ្រាប់ ពីទីតាំងការដ្ឋានជីកអាចម៍ដី ១ កន្លែង ស្ថិតនៅក្បែរវត្តស្អាងភ្នំ ក្នុងភូមិពាមសាលា ឃុំស្អាងភ្នំ ស្រុកស្អាងទៅរក្សាទុកបន្ទាប់ពីក្រុមអ្នកធ្វើអាជីវកម្មជីកអាចម៍ដីបានប្រទះឃើញ និងរាយការណ៍ដល់មន្ត្រីជំនាញកាលពីព្រឹកថ្ងៃទី ២៧ ខែ មីនា ឆ្នាំ ២០២១។
លោក អ៊ូច អូន ប្រធានក្រុមការងារបោសសម្អាតមីនចល័តនៃស៊ីម៉ាក់បានប្រាប់ ភ្នំពេញ ប៉ុស្តិ៍ នៅថ្ងៃអាទិត្យម្សិលមិញថា គ្រាប់ដែលក្រុមអ្នកធ្វើអាជីវកម្មជីកអាចម៍ដីលក់ប្រទះឃើញនោះមានចំនួនសរុប ៤៣ គ្រាប់ ក្នុងនោះប្រភេទគ្រាប់ផ្លោង ១០៥ មិល្លីម៉ែត្រចំនួន ១៤ គ្រាប់ ប្រភេទគ្រាប់កាំភ្លើងមិនធាក់ថយ ១០៦ មិល្លីម៉ែត្រ ចំនួន ៨ គ្រាប់ ប្រភេទគ្រាប់កាំភ្លើងត្បាល់ ៨១ មិល្លីម៉ែត្រ ចំនួន ១៣ គ្រាប់ និងគ្រាប់ AN-M41 (ប្រភេទគ្រាប់បែកខ្នាតតូច ទម្លាក់ពីលើយន្តហោះដែលមានទម្ងន់ ២០ ផោនក្នុង ១ គ្រាប់) ចំនួន ៨ គ្រាប់។
លោកបានបញ្ជាក់ថា៖ «គ្រាប់ទាំងនោះ ងាយនឹងផ្ទុះនៅពេលមានការប៉ះទង្គិចខ្លាំងជាមួយនឹងវត្ថុរឹង»។
លោកបន្ថែមថា៖ «ពួកគេ [ក្រុមធ្វើអាជីកម្មកាយអាចម៍ដីលក់] ពិតជាសំណាងណាស់ ដែលគ្រាប់នោះមិនផ្ទុះនៅពេលដែលពួកគេប្រើគ្រឿងចក្រកាយដីប៉ះចំលើគ្រាប់ទាំងនោះ»។
បើតាមលោក អូន គ្រាប់យុទ្ធភណ្ឌមិនទាន់ផ្ទុះទាំងនោះទំនងជាត្រូវបានគេលាក់ទុកតាំងពីសម័យសង្គ្រាម រវាងកងទ័ពព្រៃខ្មែរក្រហម និងកងទ័ពរបស់លោកសេនាប្រមុខ លន់ ណុល។ ទោះយ៉ាងណា នៅពេលនេះគ្រាប់ទាំងនោះត្រូវបានក្រុមការងាររបស់លោកនាំយកទៅរក្សាទុកនៅក្នុងឃ្លាំងសុវត្ថិភាពហើយ ដើម្បីរង់ចាំដុតកម្ទេចចោលនៅពេលក្រោយ៕
