កំពង់ឆ្នាំងៈ មន្ត្រីមជ្ឈមណ្ឌលសកម្មភាពកំចាត់មីនកម្ពុជា (CMAC) ចំនួន ៦០ នាក់ បានបញ្ចប់វគ្គហ្វឹកហ្វឺនជំនាញបោសសម្អាតគ្រាប់មីន និងគ្រាប់យុទ្ធភណ្ឌមិនទាន់ផ្ទុះនៅវិទ្យាស្ថានបច្ចេកទេសសកម្មភាពកំចាត់មីនស៊ីម៉ាក់ខេត្តកំពង់ឆ្នាំង ក្រោយពីហ្វឹកហ្វឺនទាំងទ្រឹស្តី និងការអនុវត្តជាក់ស្តែងចំនួន ៤ ខែ ដោយសិក្ខាកាមប្ដេជ្ញាបំពេញការងារក្នុងវិស័យដោះមីនឱ្យបានល្អ។
លោក ហេង រតនា អគ្គនាយក CMAC ថ្លែងពីម្សិលមិញថា សិក្ខាកាម CMAC ចំនួន ៦០ នាក់ នៅថ្ងៃទី ២០ តុលា បានបញ្ចប់វគ្គហ្វឹកហ្វឺនអ្នកជំនាញបោសសម្អាត គ្រាប់មីន និងគ្រាប់យុទ្ធភណ្ឌមិនទាន់ផ្ទុះនៅវិទ្យាស្ថានបច្ចេកទេសស៊ីម៉ាក់ខេត្តកំពង់ឆ្នាំង។ វគ្គហ្វឹកហ្វឺនទាំងទ្រឹស្តី និងការអនុវត្តជាក់ស្តែងនេះមានរយៈពេល ៤ ខែពីថ្ងៃទី ២០ មិថុនា-២០ តុលា។
បើតាមលោក ហេង រតនា សិក្ខាកាមទាំង ៦០ នាក់ ជាអ្នកបន្តវេន ឬជាអ្នកទទួលបន្ទុកការងារបន្តពីមន្ត្រីចាស់ៗដែលបានចូលនិវត្តន៍នាពេលកន្លងមក។ អ្នកបន្តវេនទាំងនេះ សុទ្ធតែកូនៗបង្កើតរបស់មន្ត្រីរបស់ស៊ីម៉ាក់ដែលបានចូលនិវត្តន៍ ដើម្បីផ្ដល់ឱកាសឱ្យក្មេងៗជំនាន់ក្រោយអាចបន្តការងារពីឪពុកម្ដាយពួកគាត់។
លោកបញ្ជាក់ថា៖ «យើងផ្ដល់ឱកាសឱ្យកូនចៅមន្ត្រីចាស់ៗរបស់ យើងដែលគាត់បានចូលនិវត្តន៍ ហើយគាត់មានកូនកំពុងមានសមត្ថភាព និងទេពកោសល្យអាចបំពេញការងារនេះបាន ទើបយើងជ្រើសរើសគាត់តាមរយៈការប្រឡងយ៉ាងតឹងរ៉ឹង។ បើសិនពួកគាត់ប្រឡងជាប់ទើបយើងជ្រើសរើសគាត់យកមកបណ្ដុះបណ្ដាល និងចូលរួមហ្វឹកហ្វឺនក្នុងវគ្គនេះ»។
លោក សុខ កក្កដា សិក្ខាកាមម្នាក់ក្នុងចំណោម ៦០ នាក់ថ្លែងថា លោកបានចូលរួមក្នុងវគ្គហ្វឹកហ្វឺនរបស់អង្គភាពស៊ីម៉ាក់រយៈពេល ៤ ខែដោយទទួលបានចំណេះដឹង និងជំនាញពីគ្រូបង្គោលរបស់អង្គភាពជាច្រើនចំណុច។ លោកថានឹងយកចំណេះជំនាញនេះទៅបម្រើការងារក្នុងវិស័យបោសសម្អាតមីន និងគ្រាប់យុទ្ធភណ្ឌមិនទាន់ផ្ទុះឱ្យបានល្អប្រសើរ។
លោកថា៖ «មុនពេលបានចូលសិក្សាក្នុងវគ្គហ្វឹកហ្វឺននេះ គឺខ្ញុំបានប្រឡងចូលយ៉ាងហ្មត់ចត់ ដោយមិនមានការស៊ីសំណូកអ្វីទេ បើទោះបីជាឪពុកខ្ញុំជាអតីតមន្ត្រីស៊ីម៉ាក់ក៏ដោយ។ វគ្គនេះគឺមានចំណុចពិបាកច្រើនជាងចំណុចមិនពិបាក តែយ៉ាងណា ខ្ញុំបានតាំងចិត្តព្យាយាមរៀនសូត្ររហូតទទួលបានជោគជ័យ ហើយខ្ញុំនឹងយកចំណេះជំនាញទាំងអស់ទៅបម្រើកិច្ចការសង្គមជាតិ»។
តាមរបាយការណ៍របស់ស៊ីម៉ាក់ពីម្សិលមិញ មន្ត្រីចូលនិវត្តន៍ និងពិការភាពដែលជាអតីតមន្ត្រីរបស់ស៊ីម៉ាក់ ១ ០១៣ នាក់ ត្រូវបានដាក់បញ្ចូលក្នុងក្របខ័ណ្ឌ និងផ្តល់ឋានន្តរស័ក្តិក្នុងជួរកងយោធពលខេមរភូមិន្ទ ដើម្បីទទួលបានរបបយោធិនពេលចូលនិវត្តន៍។
របាយការណ៍បន្តថា គិតត្រឹមដើមខែតុលានេះអតីតមន្ត្រីជំនាញស៊ីម៉ាក់ ៤ វគ្គ ហើយដែលត្រូវបានកាត់ឈ្មោះបញ្ចូលក្នុងក្របខ័ណ្ឌ និងផ្តល់ឋានន្តរស័ក្តិក្នុងជួរកងយោធពលខេមរភូមិន្ទនៃក្រសួងការពារជាតិ៕