ភ្នំពេញៈ មន្ត្រីរដ្ឋបាលស្រុកភ្នំស្រុក ៥ នាក់ ត្រូវបានកោះហៅចូលបំភ្លឺជុំវិញករណីការចោទប្រកាន់លក់ដីរដ្ឋក្នុងតំបន់អាងត្រពាំងថ្ម ដែលក្នុងនោះមានទាំងដីទីស្នាក់ការសន្តិសុខរបស់កងកម្លាំងប្រដាប់អាវុធទាំង ៣ ប្រភេទនៃមូលដ្ឋានស្រុកភ្នំស្រុកផងដែរ។
លោក លី សារី អភិបាលរង និងជាអ្នកនាំពាក្យសាលាខេត្តបន្ទាយមានជ័យ បាននិយាយថា មន្ត្រីរដ្ឋបាលស្រុកភ្នំស្រុកដែលត្រូវបានរដ្ឋបាលខេត្តកោះហៅឲ្យមកឆ្លើយបំភ្លឺនោះ រួមមាន លោក សុខ ឫទ្ធី, លោក ធួន ឡាំហិញ, លោក សៅ ឡែន (អភិបាលរងស្រុកភ្នំស្រុក) លោក តាំង ផាន ប្រធានការិយាល័យភូមិបាលស្រុកភ្នំស្រុក និងលោក ឃុត ឃួន មេឃុំប៉ោយចារ។ លោកបានបន្តថា ក្រៅពីមន្ត្រីទាំង ៥ រូបនេះ រដ្ឋបាលខេត្តគ្រោងនឹងកោះហៅអ្នកពាក់ព័ន្ធផ្សេងទៀតមកឆ្លើយបំភ្លឺផងដែរ។ ប៉ុន្តែលោកមិនបានប្រាប់ឲ្យដឹងថាអ្នកដែលនឹងត្រូវកោះហៅជាបន្ទាប់មកទៀតនោះជានរណានោះទេ។
លោកថ្លែងថា៖ «ក្រោយការសាកសួរ មន្ត្រីទាំង ៥ នោះត្រូវបានរដ្ឋបាលខេត្តអនុញ្ញាតឲ្យត្រឡប់ទៅធ្វើការនៅមូលដ្ឋានរបស់ខ្លួនវិញ»។
លោក សារី បានឲ្យដឹងថាការកោះហៅមន្ត្រីទាំង ៥ រូបនោះ គឺធ្វើឡើងបន្ទាប់ពីប្រធានអង្គភាពនៃកងកម្លាំងប្រដាប់អាវុធ នគរបាល កងរាជអាវុធហត្ថ និងយោធាសឹករងស្រុកភ្នំស្រុកបានធ្វើរបាយការណ៍ដាក់មកថ្នាក់ខេត្តថា លោក យឹម សំណាង អភិបាលស្រុកភ្នំស្រុកបានឃុបឃិតជាមួយមន្ត្រីក្រោមឱវាទ និងប្រធានការិយាល័យភូមិបាលស្រុក និងប្រជាពលរដ្ឋក្នុងមូលដ្ឋានព្រមទាំងឈ្មួញដីពីខាងក្រៅ ចាក់ដីលុបចំណីបឹងត្រពាំងថ្ម ដើម្បីយកដីចែកគ្នា និងលក់ទីស្នាក់ការសន្តិសុខរបស់កងកម្លាំងទាំងនោះដែលមានទីតាំងស្ថិតនៅភូមិត្រពាំងថ្ម ឃុំប៉ោយចារ ស្រុកភ្នំស្រុកដែលមានទំហំ ៣៦ ម៉ែត្រគុណ ៩២ ម៉ែត្រផងដែរ។
លោក យឹម សំណាង អភិបាលស្រុកភ្នំស្រុកបានឲ្យដឹងកាលពីថ្ងៃអង្គារថា គ្មានករណីលក់ដីទីស្នាក់ការរបស់អង្គភាពប្រដាប់អាវុធទាំងនោះទេ ហើយក៏គ្មានករណីរំលោភចាក់លុបដីចំណីបឹងអាងត្រពាំងថ្ម មកធ្វើជាកម្មសិទ្ធិឯកជនដោយខុសច្បាប់នោះដែរ។
លោក សំណាង បានថ្លែងថា៖ «ខ្ញុំពិតជាហួសចិត្តណាស់ នៅពេលឮពីដំណឹងនោះ។ ដីក្នុងតំបន់ដែលខាងកងកម្លាំងប្រដាប់អាវុធទាំង ៣ ប្រភេទបានរាយការណ៍ទៅថ្នាក់ខេត្តនោះ គឺជាដីស្រែរបស់ប្រជាពលរដ្ឋមិនមែនជាដីស្នាក់ការសន្តិសុខនោះទេ ហើយក៏មិនមែនជាដីចំណីមាត់បឹងអាងត្រពាំងថ្មនោះដែរ»។
លោក ឃុត ឃួន មេឃុំប៉ោយចារបានប្រាប់ភ្នំពេញប៉ុស្តិ៍ថា ការកសាងរបាយការណ៍របស់កងកម្លាំងប្រដាប់អាវុធទាំងនោះទៅថ្នាក់ខេត្តគឺជារឿងមិនពិត។
លោកបានថ្លែងថា៖ «ខ្ញុំបានទៅបំភ្លឺដល់រដ្ឋបាលខេត្តបន្ទាយមានជ័យរួចហើយ និងបានផ្ដល់នូវរបាយការណ៍ និងឯកសារជាច្រើនទៀត ដែលពាក់ព័ន្ធការងារអភិវឌ្ឍន៍ក្នុងមូលដ្ឋានរួមទាំងឯកសារដោះដូរទីតាំងមណ្ឌលសុខភាពប៉ោយចារដល់រដ្ឋបាលខេត្តផងដែរ។ ប្រសិនបើអង្គភាពកងកម្លាំងប្រដាប់អាវុធទាំង ៣ ប្រភេទអះអាងថា មានដីទីស្នាក់ការទំហំ ៣៦ ម៉ែត្រគុណ ៩២ ម៉ែត្រនៅក្នុងតំបន់នោះមែនសូមបង្ហាញនូវលិខិតឧតូបករណ៍គតិយុត្តិទៅគណៈកម្មការជំនាញ ដើម្បីត្រួតពិនិត្យ»។
លោក ឃួន បានអះអាងថាចាប់តាំងពីតំបន់អាងត្រពាំងថ្មបានក្លាយទៅជាកន្លែងលម្ហែកាយដ៏ពេញនិយមសម្រាប់ទេសចរជាតិ និងអន្តរជាតិនោះ ប្រជាពលរដ្ឋមានជីវភាពធូរធារ ហើយពួកគេបានធ្វើការអភិវឌ្ឍលំនៅឋាន របស់ពួកគេឲ្យបានសមរម្យដោយអ្នកខ្លះបានចាក់ដីលើកទីទួលផ្ទះរបស់ពួកគេឲ្យខ្ពស់។
លោក ស៊ិន ដៀប មេបញ្ជាការកងរាជអាវុធហត្ថមូលដ្ឋានស្រុកភ្នំស្រុកបានឲ្យដឹងដែរថា ទីតាំងដីនោះត្រូវបានអតីតអភិបាលស្រុកភ្នំស្រុកគឺ លោក សេង ទី ផ្ដល់ជូនសមត្ថកិច្ចកងកម្លាំងទាំង ៣ ប្រភេទក្នុងអំឡុងឆ្នាំ ២០១២ ទុកសម្រាប់ធ្វើទីស្នាក់ការការពារសន្តិសុខក្នុងរដូវបុណ្យចូលឆ្នាំ ភ្ជុំ និងបុណ្យផ្សេងទៀត ពេលដែលមានមនុស្សច្រើនមកលម្ហែកាយ។
ប៉ុន្តែក្នុងឆ្នាំ ២០១៩ ស្រាប់តែមានគេមកចាក់ដីលុប លុះសាកសួរទៅ អ្នកដែលបានមកចាក់ដីលុបទីតាំងនោះថា គេបានទិញ និងមានការទទួលស្គាល់ពីអាជ្ញាធរភូមិ-ឃុំ ស្រុក និងភូមិបាលស្រុកត្រឹមត្រូវទើបដឹងថា ដីនោះត្រូវបានគេឃុបឃិតគ្នាលួចលក់ទៅឲ្យក្រុមឈ្មួញមកពីក្រៅ៕