.jpg)
លោក សឿង សារ៉ន នាយកប្រតិបត្តិសមាគមធាងត្នោត។ រូបថត សហការី
ភ្នំពេញៈ មន្ត្រីអង្គការលីកាដូ និងមន្ត្រីសមាគមធាងត្នោត នឹងចូលរួមកិច្ចពិភាក្សាចង្អៀតនៅទីស្ដីការគណៈរដ្ឋមន្ត្រីនៅថ្ងៃពុធស្អែកនេះ តាមការអញ្ជើញរបស់ទីស្ដីការគណៈរដ្ឋមន្ត្រីដើម្បីពន្យល់ជុំវិញការរកឃើញរបស់អង្គការទាំង ២ ដែលថាស្ថាប័នមីក្រូហិរញ្ញវត្ថុបានធ្វើឱ្យមានការរំលោភបំពានសិទ្ធិមនុស្សធ្ងន់ធ្ងរតាមរយៈបំណុល។
លិខិតចំនួន ២ របស់ទីស្ដីការគណៈរដ្ឋមន្ត្រីចេញកាលពីថ្ងៃទី ៣០ ខែសីហា បានអញ្ជើញលោកស្រី ពុង ឈីវកេក ប្រធានអង្គការលីកាដូ និងលិខិតមួយទៀត អញ្ជើញលោក សឿង សារ៉ន នាយកប្រតិបត្តិសមាគមធាងត្នោតឲ្យចូលរួមក្នុងកិច្ចពិភាក្សាចង្អៀតមួយលើប្រធានបទ «មីក្រូហិរញ្ញវត្ថុ និងផលប៉ះពាល់» ដែលរៀបចំឡើងដោយទីស្ដីការគណៈរដ្ឋមន្ត្រីនៅថ្ងៃទី ៤ ខែកញ្ញា។
លោក អំ សំអាត ប្រធានផ្នែកឃ្លាំមើល និងការពារសិទ្ធិមនុស្សនៃអង្គការលីកាដូបានប្រាប់ភ្នំពេញ ប៉ុស្ដិ៍ កាលពីថ្ងៃអាទិត្យថា អង្គការលីកាដូ បានសម្រេចចិត្តរួចហើយថានឹងទៅចូលរួម ប៉ុន្តែលោកមិនទាន់ច្បាស់ថាលោកស្រី ពុង ឈីវកេក នឹងអញ្ជើញទៅផ្ទាល់ ឬក៏ចាត់អ្នកតំណាងលោកស្រីឲ្យទៅជំនួសនោះឡើយ។
លោកថា៖ «គាត់ (លោកស្រី ពុង ឈីវកេក) ទើបតែអញ្ជើញទៅប្រទេសបារាំងដែរ ហើយលិខិតទើបនឹងមកតាមក្រោយ។ អ៊ីចឹង! មិនដឹងថាគាត់អញ្ជើញមកវិញទាន់ឬក៏អត់។ ខ្ញុំមិនទាន់ដឹងថា គាត់មកវិញថ្ងៃណាដែរ ប៉ុន្តែគាត់បានចេញនៅព្រឹកថ្ងៃសុក្រ ហើយលិខិតមកដល់ល្ងាចថ្ងៃសុក្រ»។
លោក សំអាត បន្តថា កិច្ចពិភាក្សាចង្អៀតនេះនឹងជួយឱ្យភាគីរដ្ឋាភិបាល និងអង្គការរបស់លោកអាចស្វែងយល់ពីគ្នាបន្ថែមទៀត ពីព្រោះការចេញរបាយការណ៍គឺដើម្បីជំរុញកុំឱ្យធ្វើអ្វីប៉ះពាល់ដល់សិទ្ធិរបស់អតិថិជនខ្ចីប្រាក់ពីមីក្រូហិរញ្ញវត្ថុប៉ុណ្ណោះ។
ចំណែកលោក សឿង សារ៉ន នាយកប្រតិបត្តិសមាគមធាងត្នោតបានប្រាប់ភ្នំពេញប៉ុស្ដិ៍តាមទូរស័ព្ទថា លោកនឹងបញ្ជាក់ពីជំហរចូលរួមនេះតាមអ៊ីមែល។ ទោះជាយ៉ាងណាលោកបានប្រាប់វិទ្យុ VOA កាលពីថ្ងៃទី ២៩ ខែសីហាថា លោកនឹងចូលរួមតាមការអញ្ជើញដើម្បីពន្យល់ឱ្យបានច្បាស់អំពីការសិក្សាដើម្បីកុំឱ្យមានការយល់ច្រឡំ។
ការចេញលិខិតអញ្ជើញរបស់គណៈរដ្ឋមន្ត្រីនេះធ្វើឡើងបន្ទាប់ពីអង្គការទាំង ២ នេះបានចេញរបាយការណ៍មួយកាលពីថ្ងៃ ៧ ខែសីហាដែលរកឃើញថានៅដើមឆ្នាំ ២០១៩ នេះមានពលរដ្ឋកម្ពុជា ២ លាន ៤ សែននាក់បានជំពាក់បំណុលមីក្រូហិរញ្ញវត្ថុសរុបចំនួន ៨ ពាន់លានដុល្លារ ហើយភាគច្រើនត្រូវបានតម្រូវឱ្យដាក់បញ្ចាំបណ្ណកម្មសិទ្ធិដីធ្លីដែលអាចបង្កឱ្យមានការរំលោភសិទ្ធិមនុស្សធ្ងន់ធ្ងរ។
អង្គការទាំង ២ នេះបន្តថាគ្រឹះស្ថានមីក្រូហិរញ្ញវត្ថុបានយាយីលើអ្នកខ្ចីប្រាក់ ធ្វើឱ្យពួកគេលក់ដីទាំងបង្ខំ ការប្រើប្រាស់កម្លាំងពលកម្មកុមារ ការធ្វើចំណាកស្រុក ការខ្វះស្បៀងអាហារ និងការធ្វើឱ្យជាប់បំណុលរឹតតែច្រើន។ ការចេញរបាយការណ៍នេះគឺធ្វើឡើងដោយផ្អែកតែលើការសិក្សារយៈពេល ៣ សប្ដាហ៍ប៉ុណ្ណោះ គឺពីខែ មីនា ដល់ខែ ឧសភា ឆ្នាំ ២០១៩ ដោយបានសម្ភាសពលរដ្ឋត្រឹមតែ ២៨ គ្រួសារ ដែលធ្លាប់រងគ្រោះពីអំពើរំលោភបំពានសិទ្ធិមនុស្សធ្ងន់ធ្ងរដោយសារជំពាក់បំណុលមីក្រូហិរញ្ញវត្ថុនៅក្នុងឃុំចំនួន ១០ នៃខេត្តចំនួន ៤ ដូចជា ខេត្តកំពង់ចាម កណ្ដាល ព្រៃវែង ត្បូងឃ្មុំ និងរាជធានីភ្នំពេញ។
ក្នុងចំណោមពលរដ្ឋទាំង ២៨ គ្រួសារដែលផ្ដល់សម្ភាសគឺមាន ២២ គ្រួសារបានប្រាប់ពីការបង្ខំឱ្យលក់ដីធ្លី ១៣ គ្រួសារមានប្រើប្រាស់ពលកម្មកុមារ ១៨ គ្រួសារមានសមាជិកចំណាកស្រុក ២៦ គ្រួសារ បរិភោគអាហារគ្មានគុណភាព និង ២២ គ្រួសារ ខ្ចីប្រាក់ពីអ្នកចងការប្រាក់ដើម្បីដោះបំណុលមីក្រូហិរញ្ញវត្ថុ។
លោក ផៃ ស៊ីផាន អ្នកនាំពាក្យរដ្ឋាភិបាលដែលត្រូវដឹកនាំកិច្ចពិភាក្សាចង្អៀតនេះមិនអាចទាក់ទងសុំការបញ្ជាក់បន្ថែមពីបញ្ហានេះបានទេកាលពីថ្ងៃអាទិត្យ។ ប៉ុន្តែលោកធ្លាប់បានប្រាប់សារព័ត៌មានមួយចំនួនដោយចាត់ទុករបាយការណ៍របស់អង្គការទាំង ២ ថាគ្រាន់តែជាការបញ្ចេញយោបល់ហើយថាការអញ្ជើញពួកគេមកពិភាក្សានេះគឺដើម្បីបង្ហាញអំពីសុចរិតភាព។
ជាមួយគ្នានេះធនាគារជាតិនៃកម្ពុជា និងសមាគមមីក្រូហិរញ្ញវត្ថុកម្ពុជាក៏បានចាត់ទុករបាយការណ៍នេះថា មិនឆ្លុះបញ្ចាំងអំពីតថភាពជាក់ស្ដែងរបស់វិស័យមីក្រូហិរញ្ញវត្ថុផងដែរ ហើយថាពួកគេនឹងស៊ើបអង្កេតករណីនេះថា តើមានមីក្រូហិរញ្ញវត្ថុរំលោភបទប្បញ្ញត្តិនេះដែរឬយ៉ាងណា?
ទោះជាយ៉ាងណាលោក អំ សំអាត បានបញ្ជាក់ថាអង្គការរបស់លោកគឺនៅតែរក្សាជំហរចំពោះការរកឃើញដដែលពីព្រោះក្នុងរបាយការណ៍ពុំបានបញ្ជាក់ថា តំណាងឱ្យអ្នកខ្ចីប្រាក់មីក្រូហរិញ្ញវត្ថុនៅទូទាំងប្រទេសឡើយ ប៉ុន្តែជាក្រុមពលរដ្ឋរស់នៅតំបន់គោលដៅស្រាវជ្រាវ។
លោកបន្តថា៖ «គោលនយោបាយរបស់រដ្ឋាភិបាល និងគោលនយោបាយរបស់មីក្រូហិរញ្ញវត្ថុ គឺលើកកម្ពស់ជីវភាពរស់នៅរបស់ពលរដ្ឋ ហើយកាលណាធ្វើឱ្យប៉ះពាល់សិទ្ធិពួកគាត់បាត់បង់ដីធ្លី អាហ្នឹងម៉េចហៅថា លើកកម្ពស់ជីវភាពរបស់ពលរដ្ឋ ហើយវាក៏ធ្វើឱ្យប៉ះពាល់មុខមាត់រដ្ឋាភិបាលដែរ ហើយបើថ្ងៃក្រោយទៅបញ្ហាហ្នឹងរាលដាលធំទៅ វានឹងពិបាកទប់ស្កាត់»៕
