កំពង់ធំៈ តុលាការខេត្តកំពង់ធំបានសម្រេចឃុំខ្លួនសកម្មជននៃអតីតគណបក្សសង្គ្រោះជាតិនៅស្រុកបារាយណ៍ចំនួន ៣ នាក់ ជាបន្តបន្ទាប់នាដើមខែកញ្ញានេះដោយ ២ នាក់ ត្រូវបានចោទប្រកាន់ពីបទជេរប្រមាថនាយករដ្ឋមន្ត្រី និងឃោសនាឱ្យរង់ចាំទទួលការវិលចូលស្រុករបស់លោក សម រង្ស៊ី ខណៈម្នាក់ទៀតនៅមិនទាន់ដឹងពីបទចោទនៅឡើយ។
ការឃុំខ្លួននេះបានធ្វើឡើងបន្ទាប់ពីនគរបាលខេត្តបានចុះចាប់ខ្លួនសកម្មជនអតីតគណបក្សសង្គ្រោះជាតិចំនួន ៤ នាក់ កាលពីថ្ងៃទី ៣១ ខែ សីហា ដល់ថ្ងៃទី ១ ខែ កញ្ញា។ ប៉ុន្តែសកម្មជនម្នាក់ត្រូវដោះលែងវិញ និង ៣ នាក់ទៀតត្រូវបានបញ្ជូនបន្តទៅកាន់តុលាការ ហើយក៏ត្រូវបានតុលាការសម្រេចឃុំខ្លួនក្នុងពន្ធនាគារបណ្តោះអាសន្ន។
លោក ថៃ ធីម សមាជិកគណៈកម្មការប្រតិបត្តិខេត្តកំពង់ធំរបស់អតីតគណបក្សសង្គ្រោះជាតិបានប្រាប់ភ្នំពេញប៉ុស្ដិ៍ពីម្សិលមិញថា ក្នុងចំណោមអតីតសកម្មជនទាំង ៤ នាក់ គឺមានឈ្មោះ រស់ គឹមសៀង ប្រធានយុវជនអតីតគណបក្សខេត្តលោក ស៊ុន ប៊ុនថុន អតីតសមាជិកក្រុមប្រឹក្សាឃុំបារាយណ៍ លោក នូ ភឿន សកម្មជនស្រុកបារាយណ៍ និងលោក មៀច វឿន សកម្មជននៅឃុំឈូកខ្សាច់ ស្រុកបារាយណ៍។
លោកបន្តថាលោក មៀច វឿន ត្រូវចាប់ខ្លួននឹងដោះលែងវិញនៅថ្ងៃជាមួយគ្នាកាលពីថ្ងៃទី ៣១ សីហា ខណៈលោក ស៊ុន ប៊ុនថុន និងលោក នូ ភឿន ត្រូវបានតុលាការសម្រេចចោទប្រកាន់ និងបញ្ជូនទៅឃុំឃាំងបណ្ដោះអាសន្នកាលពីវេលាម៉ោង ៦ ល្ងាចថ្ងៃទី ២ ខែកញ្ញា។ ឯលោក រស់ គឹមសៀង ក៏ត្រូវបានតុលាការឃុំខ្លួនបណ្ដោះអាសន្នដែរកាលពីម៉ោង ៥ ល្ងាចថ្ងៃទី ៣ ខែកញ្ញា ប៉ុន្តែមិនដឹងអំពីបទចោទនៅឡើយទេ។
លោក ថៃ ធីម និយាយថា៖ «លោក ស៊ុន ប៊ុនថុន និងលោក នូ ភឿន ត្រូវបានតុលាការឃុំខ្លួនដោយចោទប្រកាន់ពីបទមួយចំនួនដូចជាករណីនិយាយទូរស័ព្ទឆ្លើយឆ្លងគ្នាជេរនាយករដ្ឋមន្ត្រី។ ករណីញុះញង់ឱ្យមានការរើសអើង។ ករណីចែកចាយព័ត៌មានតាមហ្វេសប៊ុកដែលមានលក្ខណៈជេរប្រមាថថ្នាក់ដឹកនាំ និងការឃោសនាឱ្យមានការរង់ចាំទទួលលោក សម រង្ស៊ី វិលចូលស្រុក»។
លោក ធីម ចាត់ទុកករណីឃាត់ខ្លួនសកម្មជនទាំងនេះថា ជាការគំរាមកំហែងផ្នែកនយោបាយដើម្បីបំបាក់ស្មារតីចំពោះអ្នកដែលចង់ទៅទទួលលោក សម រង្ស៊ី ដែលប្រកាសសន្យាវិលចូលស្រុកវិញនៅថ្ងៃទី ៩ ខែវិច្ឆិកា ឆ្នាំ ២០១៩។
បើតាមលោក ថៃ ធីម គឺកាលពីល្ងាចថ្ងៃអង្គារ នគរបាលខេត្តក៏បានចាប់ខ្លួនបុរសម្នាក់ទៀតដែលត្រូវជាប្អូនថ្លៃរបស់លោក រស់ គឹមសៀង បន្ទាប់ពីបុរសរូបនោះបានទៅមើលលោក រស់ គឹម សៀង ដល់ស្នងការខេត្ត។ ពេលនោះ លោកក៏បានថត និងចែកចាយរូបភាពបងថ្លៃរបស់លោកជាប់ខ្នោះដៃ អំឡុងពេលសមត្ថកិច្ចបញ្ជូនចេញពីស្នងការខេត្តទៅតុលាការ។ លោក ធីម បានបញ្ជាក់ទៀតថា ប្អូនថ្លៃរបស់លោក រស់ គឹមសៀន មិនមែនជាសកម្មជនអតីតបក្សប្រឆាំងឡើយ។
អ្នកនាំពាក្យសាលាដំបូងខេត្តកំពង់ធំលោក វ៉ាន សេង ពីម្សិលមិញនិយាយថា លោកមិនអាចឆ្លើយសំណួរក្នុងករណីខាងលើនេះបានទេ ដោយរុញឱ្យទៅសួរព្រះរាជអាជ្ញា លោកអ៊ិត សុធា ដែលភ្នំពេញ-ប៉ុស្តិ៍មិនអាចទាក់ទងបាន។
លោក អ៊ុក កុសល ស្នងការនគរបាលខេត្តកំពង់ធំមិនបានលើកទូរស័ព្ទឡើយ ខណៈលោក សួន ថេន អធិការស្រុកបារាយណ៍បានលើកទូរស័ព្ទតែបញ្ជាក់ថាលោករវល់ប្រជុំ។
កាលពីថ្ងៃទី ២ កញ្ញាលោក សុខ លូ អភិបាលខេត្តកំពង់ធំបានប្រាប់ភ្នំពេញប៉ុស្ដិ៍ថា ការចាប់ខ្លួនសកម្មជនអតីតគណបក្សសង្គ្រោះជាតិទាំងនេះ គឺធ្វើឡើងតាមច្បាប់។
លោកថ្លែងថា៖ «ខ្ញុំមិនច្បាស់ដែរបញ្ហាហ្នឹង ប៉ុន្តែសំខាន់បើមានការចាប់ខ្លួនគឺដោយសារពួកគាត់ធ្វើខុសហើយ។ បើមិនធ្វើខុស គេក៏មិនចាប់ខ្លួនដែរ ព្រោះប្រទេសយើងមានច្បាប់ មិនអាចបណ្ដោយឱ្យអ្នកណាធ្វើអីផ្ដេសផ្ដាសបានទេ។ ប្រទេសមានច្បាប់ អ្នកណាធ្វើខុសគឺមានទោស បក្សប្រឆាំង ឬមិនបក្សប្រឆាំងក៏ដោយ»។
លោក សុក រដ្ឋា មន្ត្រីសម្របសម្រួលសមាគមការពារសិទ្ធិមនុស្ស (អាដហុក) ខេត្តកំពង់ធំបានឲ្យដឹងថា ខាងសមាគមកំពុងស៊ើបអង្កេតពីករណីនេះ ថាតើមូលហេតុអ្វីបានជាសមត្ថកិច្ចចាប់ខ្លួនសកម្មជនអតីតគណបក្សប្រឆាំងទាំងនោះ បន្ទាប់ពីមានសាច់ញាតិមកប្ដឹងនៅសមាគមអាដហុក។
លោកនិយាយថា៖ «អ៊ីចឹងយើងអត់ទាន់បានធ្វើការសន្និដ្ឋានថា ការឃាត់ខ្លួនហ្នឹងដោយសាររឿងអីនៅឡើយទេ»៕