ភ្នំពេញៈ សមាជិកគណៈកម្មាធិការអចិន្រៃ្តយ៍ និងគណៈកម្មាធិការនាយកនៃអតីតគណបក្សសង្គ្រោះជាតិដែលកំពុងស្ថិតនៅក្នុងការហាមឃាត់មិនឱ្យធ្វើសកម្មភាពនយោបាយរយៈពេល ៥ ឆ្នាំតាមអំណាចសាលដីកាលេខ ៣៤០ របស់តុលាការកំពូលកាលពីម្សិលមិញបានដាក់លិខិតទៅលោកឧបនាយករដ្ឋមន្ត្រី ស ខេង ស្នើសុំឲ្យលើកបម្រាមសិទ្ធិនយោបាយ ដើម្បីផ្តល់នីតិសម្បទាឡើងវិញ។
យោងតាមលិខិតស្នើសុំរបស់លោក សុន ឆ័យ អតីតសមាជិកគណៈកម្មាធិការអចិន្រៃ្តយ៍លោក ភាវ គឹមឈន និងលោក វ៉ា សាម៉ុន អតីតសមាជិកគណៈកម្មាធិការនាយកនៃអតីតគណបក្សសង្គ្រោះជាតិចុះថ្ងៃទី ២៧ ខែសីហា បានសរសេរថា៖ «សូមគោរពជូនសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃសុំលើកបម្រាមសិទ្ធិនយោបាយ ដើម្បីផ្តល់នីតិសម្បទាឡើងវិញ»។
លិខិតដដែលបានលើកឡើងថា ពួកគេកំពុងស្ថិតនៅក្នុងការហាមឃាត់មិនឱ្យធ្វើសកម្មភាពនយោបាយសម្រាប់រយៈពេល ៥ ឆ្នាំតាមអំណាចសាលដីកាលេខ ៣៤០ (ឆ) ករណីគណបក្សសង្គ្រោះជាតិចុះថ្ងៃទី ១៦ ខែ វិច្ឆិកា ឆ្នាំ ២០១៧ របស់តុលាការកំពូល។ ការស្នើសុំសិទ្ធិធ្វើនយោបាយវិញនេះដោយផ្អែកតាមមាត្រា ៤៥ ថ្មី (ស្ទួន ១) នៃច្បាប់ស្តីពីគណបក្សនយោបាយដែលបង្កលក្ខណៈឱ្យអ្នកដែលត្រូវបានហាមឃាត់មិនឱ្យធ្វើសកម្មភាពនយោបាយអាចទទួលបាននីតិសម្បទាធ្វើនយោបាយឡើងវិញ។
លិខិតខាងលើនេះបញ្ជាក់ថា៖ «ខ្ញុំបាទសូមស្នើសុំសម្តេចក្រឡាហោមឧបនាយករដ្ឋមន្ត្រី មេត្តា ពិនិត្យ តាមនីតិវិធី ដើម្បីផ្តល់នីតិសម្បទាធ្វើនយោបាយឡើងវិញដល់រូបខ្ញុំ ដោយក្តីអនុគ្រោះ។ សេចក្តីដូចបានគោរពជម្រាបជូនខាងលើ សូម សម្តេចក្រឡាហោម មេត្តា ពិនិត្យ និងសម្រេចដ៏ខ្ពង់ខ្ពស់»។
លោក សុន ឆ័យ មិនអាចទាក់ទងសុំការអត្ថាធិប្បាយបន្ថែមជុំវិញការស្នើសុំនេះបានទេកាលពីម្សិលមិញ ដោយសារទូរស័ព្ទរបស់លោកមិនអាចទាក់ទងបាន។
លោក អ៊ូ ច័ន្ទរ័ត្ន អតីតតំណាងរាស្ត្រអតីតគណបក្សសង្គ្រោះជាតិបានថ្លែងកាលពីម្សិលមិញថា លោកមិនបានឃើញលិខិតស្នើសុំរបស់មន្ដ្រីជាន់ខ្ពស់ទាំង ៣ រូបរបស់អតីតគណបក្សសង្គ្រោះជាតិនេះទេ។ ប៉ុន្ដែលោកថ្លែងថា ពិតជាមានអ្នកចង់ស្នើសុំសិទ្ធិធ្វើនយោបាយឡើងវិញមែន។
លោកបន្តថា៖ «ខ្ញុំគ្រាន់តែដឹងថា ពួកគាត់អាចនឹងមានការសម្រេចចិត្ដបែបនេះ។ ខ្ញុំយល់ថាការស្នើសិទ្ធិរបស់ពួកគាត់នេះ វាគឺជាជំហាន ១ ដើម្បីយកសិទ្ធិក្នុងនាមជាពលរដ្ឋធម្មតាកុំឱ្យមានការភ័យខ្លាចក្នុងការនិយាយស្ដី និងការទំនាក់ទំនងជាដើម។ ព្រោះបើគ្មានសិទ្ធិនយោបាយ សូម្បីតែការនិយាយគ្នា ក៏ត្រូវតែមានការប្រុងប្រយ័ត្នដែរ។ ដូច្នេះការរស់នៅរបស់ពួកគាត់គឺមានការលំបាក»។
លោក អ៊ូ ច័ន្ទរ័ត្ន បន្តថា ការស្នើសុំនេះក៏ព្រោះមន្ដ្រីជាន់ខ្ពស់អតីតគណបក្សប្រឆាំងទាំងនេះនៅមិនទាន់ទទួលបានដំណោះស្រាយណាមួយ ពីតុលាការកំពូលចំពោះបម្រាមសិទ្ធិធ្វើនយោបាយស្របពេលដែលរឿងនេះបានអូសបន្លាយយូរមកហើយ។
លោកថ្លែងថា៖ «សម្រាប់ខ្ញុំការស្នើសិទ្ធិនេះមិនមានអ្វីប្លែកទេវាជារឿងធម្មតាសម្រាប់ពួកគាត់ ព្រោះយើងដឹងហើយ ពួកគាត់បានរងគ្រោះដោយការរំលាយគណបក្ស និងបិទសិទ្ធិនយោបាយច្រើនឆ្នាំហើយ។ ខ្ញុំមើលទៅការសម្រេចរបស់តុលាការកំពូលកាលពីឆ្នាំ ២០១៧ នោះគឺមិនអាចថយក្រោយទេ បើសិនជាថយក្រោយ គេមិនចាំបាច់ទុករហូតដល់ដាច់ EBA ទេ»។
លោក ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងថា ក្រសួងមហាផ្ទៃ បានទទួលលិខិតរបស់មន្ដ្រីជាន់ខ្ពស់ អតីតគណបក្សសង្គ្រោះជាតិទាំង ៣ នាក់នេះរួចហើយកាលពីម្សិលមិញ ហើយត្រូវបានលោក ស ខេង ចាត់ឱ្យមន្ដ្រីពាក់ព័ន្ធពិនិត្យមើលលើការស្នើសុំនេះ។
លោកថ្លែងបន្តថា៖ «សម្ដេចក្រឡាហោមលោកបានចារលើលិខិតនេះ ហើយឱ្យអគ្គនាយកដ្ឋានរដ្ឋបាល អគ្គស្នងការនគរបាលជាតិ និងក្រុមអ្នកច្បាប់ក្រសួងពិនិត្យ ដើម្បីលើកជាយោបល់មកជូនលោកវិញ»។
លោកថ្លែងថា ករណីនេះបើតាមនីតិវិធីគឺក្រសួងមហាផ្ទៃត្រូវពិនិត្យ ទើបដាក់ជូនទៅលោកនាយករដ្ឋមន្ដ្រី ដើម្បីលោកនាយករដ្ឋមន្ត្រីស្នើទៅព្រះមហាក្សត្រសុំឲ្យព្រះអង្គឡាយព្រះហស្តលេខាសម្រេចជាចុងក្រោយ។
លោកប៉ា ចន្ទរឿន ប្រធានវិទ្យាស្ថានប្រជាធិបតេយ្យកម្ពុជាលើកឡើងក្នុងនាមជាពលរដ្ឋ និងជាអ្នកធ្វើការងារផ្នែកលទ្ធិប្រជាធិបតេយ្យនៅកម្ពុជាម្នាក់ថា អ្នកនយោបាយខ្មែរគួរតែដល់ពេលដាក់ចុះរឿងទំនាស់ផ្ទាល់ខ្លួន ឬទំនាស់បក្សពួកដោយឡែកសិនហើយងាកមករកការចរចា ដើម្បីអាចអង្គុយធ្វើការជាមួយគ្នា សម្រាប់ឲ្យមានកម្លាំងរឹងមាំបម្រើប្រជាជន និងដោះស្រាយបញ្ហាចម្បងៗរបស់ជាតិ។
លោកថ្លែងថា៖ «ស្រុកខ្មែរយើង យើងមើលប្រវត្ដិសាស្ដ្រ ៥០០ ឆ្នាំទៅក្រោយ គ្មានពេលណាដែលខ្មែរយើងមានសេចក្ដីសុខ សន្ដិភាពភាពសុខដុមរមនាជាមួយគ្នាបានយូរជាង ក្រោយការបោះឆ្នោតឆ្នាំ ១៩៩៣ ដែលកម្ពុជាដើរតាមដំណើរការប្រជាធិបតេយ្យក្នុងការគោរពសិទ្ធិមនុស្សទេ»៕