ភ្នំពេញៈ មន្ត្រីអភិរក្សបរិស្ថាន និងអង្គការសង្គមស៊ីវិលបានអះអាងថា ដើមឈើធំៗដែលមានអាយុកាលរាប់រយឆ្នាំដែលមាននៅតំបន់ដែនជម្រកសត្វព្រៃកែវសីមាក្នុងខេត្តមណ្ឌលគិរី កំពុងត្រូវបានការពារយ៉ាងយកចិត្តទុកដាក់។
លោក ព្រំ វិបុលរតនៈ ប្រធានដែនជម្រកសត្វព្រៃកែវសីមាបានប្រាប់ ភ្នំពេញ ប៉ុស្តិ៍ ពីម្សិលមិញថា បច្ចុប្បន្ននៅតំបន់ដែនជម្រកសត្វព្រៃកែវសីមាក្នុងខេត្តមណ្ឌលគិរីមានដើមឈើដែលមានអាយុកាលរាប់រយឆ្នាំដូចជាដើមត្រាច ដើមឈើទាល ដើមគគី មានដើមស្ពុងជាដើម។
លោកថ្លែងថា៖ «ដើមឈើធំៗទាំងនោះយើងដើរល្បាតឃើញរាល់ថ្ងៃ មិនមែនទើបតែរកឃើញទេ។ វាជាប្រភេទដើមឈើស្ថិតនៅក្នុងព្រៃចាស់ដែលមន្ត្រីយើងដើរល្បាតរាល់ថ្ងៃហើយតំបន់នោះមិនមែនជាតំបន់សាធារណៈតែជាតំបន់អភិរក្សដែលក្នុងច្បាប់ចំពោះប្រជាពលរដ្ឋ ឬអ្នកដែលគ្មានការអនុញ្ញតក្រៅពីមន្ត្រីឧទ្យានុរក្ស គឺមិនអាចចូលទៅបានទេដែលការងារនេះមន្ត្រីយើងបានល្បាតរាល់ថ្ងៃ រាល់ម៉ោង»។
លោក វិបុលរតនៈ ប្រាប់ថាចំពោះដើមឈើ ១ ដើមដែលបានបង្ហោះនៅក្នុងបណ្តាញសង្គមហ្វេសប៊ុកនោះគឺជាដើមស្ពុង ហើយដើមស្ពុង ១ ដើមនេះ ក៏លោកមិនអាចប៉ាន់ស្មានឱ្យប្រាកដថា មានអាយុកាលប៉ុន្មានឆ្នាំដែរ តែអាយុកាលរបស់វារាប់ពី ១០០ ឆ្នាំឡើងហើយ។
ចំណែកឯកម្ពស់របស់វាវិញ គឺអាចប្រហែលជាមិនក្រោម ៤០ ម៉ែត្រទេព្រោះបើមើលពីក្រោមទៅ វាមានលក្ខណៈខ្ពស់សន្លឹមដោយការប៉ាន់ស្មាននេះគឺដោយសារលោកមើលពីសំណុំស្លឹករបស់ដើមស្ពុងនោះផងដែរ។ ឯថាដើមឈើធំៗទាំងនោះមានមុខកាត់ប៉ុន្មានយ៉ាងណានោះទាល់តែផ្នែកជំនាញចុះសិក្សាទើបដឹង។
លោកបញ្ជាក់ប្រាប់ថា បច្ចុប្បន្ននេះបទល្មើសដឹកជញ្ជូនឈើទ្រង់ទ្រាយធំ គឺគ្មានទេ ប៉ុន្តែអាចមាននៅសល់បទល្មើសតូចៗខ្លះៗដែលប្រជាពលរដ្ឋដឹកតាមម៉ូតូ តែមន្ត្រីខំប្រឹងទប់ស្កាត់ និងតែងតែបង្ក្រាប។ សកម្មភាពបទល្មើសកើតមានទៅតាមខែ តែខែខ្លះប្រជាពលរដ្ឋរវល់ធ្វើចម្ការក៏មិនសូវកើតមានបទល្មើសដែរ។ រាល់បទល្មើសកើតឡើងគឺភាគច្រើនបង្កឡើងដោយបងប្អូនជនជាតិភាគតិចព្រោះពួកគាត់រស់នៅតំបន់ព្រៃក្បែរៗនោះ។
លោកថ្លែងថា៖ «បទល្មើសមានខ្លះដែរ តែយើងខំប្រឹងទប់ជាអតិបរមា។ នៅតំបន់ដែនជម្រកសត្វព្រៃកែវសីមានោះយើងមានដាក់ស្លាកសញ្ញាតាំងពីផ្លូវចូល។ ដោយយើងមានការបែងចែកជាតំបន់គ្រប់គ្រង អភិរក្ស តំបន់ស្នូល និងតំបន់ការពារធម្មជាតិ»។
លោក ព្រំ វិបុលរតនៈ បានបញ្ជាក់ថា នៅតំបន់ដែនជម្រកសត្វព្រៃកែវសីមា មិនទាន់បានសិក្សាស្រាវជ្រាវពីធម្មជាតិទេ តែបានសិក្សាស្រាវជ្រាវទៅលើសត្វព្រៃ។ ប៉ុន្តែបើរុក្ខជាតិអ្វីប្លែកៗគឺលោករដ្ឋមន្ត្រីក្រសួងបរិស្ថានមានការចាប់អារម្មណ៍ដូចជាដើមឈើមានផ្កា ឬក៏រុក្ខជាតិអីដែលដុះប្លែកៗ ចម្លែកៗទាក់ទាញសោភណភាពនោះគឺលោកឱ្យការពារតាមឃ្លាំមើលការពារយ៉ាងហ្មត់ចត់បំផុត។
លោក នេត ភក្ត្រា អ្នកនាំពាក្យក្រសួងបរិស្ថានមិនអាចទាក់ទងសុំអត្ថាធិប្បាយបានទេកាលពីម្សិលមិញ។
លោក កែវ សុជាតិ ប្រធានអង្គការសន្សំម្លប់ព្រៃ ថ្លែងថា ដើមឈើរាប់ពាន់ឆ្នាំមាននៅសេសសល់តិចតួចទេ ដូចជាដើមកកោះ គគីរ បេង ធ្នង់ ជាដើម។ អង្គការធ្វើការរួមសហការជាមួយក្រសួងបរិស្ថានឈរជើងនៅតំបន់ណាសម្បូរទៅដោយព្រៃឈើក្រាស់ៗមាននៅដូចជាខេត្តមណ្ឌលគិរីខេត្តរតនគិរីជាដើម៕