ក្រចេះ: ក្រុមអ្នកអភិរក្សសត្វផ្សោត និងប្រជាសហគមន៍នៅតំបន់រមណីយដ្ឋានអន្លង់កាំពី និយាយថាបទល្មើសនេសាទក្នុងតំបន់អភិរក្សអន្លង់ផ្សោតកាំពីនៅតែបន្តកើតមានគួរឱ្យព្រួយបារម្ភ។ ការលើកឡើងរបស់ពួកគេ ធ្វើឡើងក្រោយពីប្រទះឃើញផ្សោតឈ្មោលពេញវ័យ ១ ក្បាលថ្មីទៀត ទម្ងន់ជិត ១០០ គីឡូក្រាម ងាប់ដោយជាប់មងក្នុងតំបន់អភិរក្សអន្លង់ផ្សោតកាំពី កាលពីថ្ងៃព្រហស្បតិ៍សប្ដាហ៍មុន។
លោក តាន់ សុមេធប៊ុនវឌ្ឍន៍ នាយរងខណ្ឌរដ្ឋបាលជលផលខេត្តក្រចេះប្រាប់ភ្នំពេញប៉ុស្តិ៍កាលពីថ្ងៃទី ១៧ មករាថា បើទោះជាមានការផ្សព្វផ្សាយហាមឃាត់ការនេសាទ និងចុះល្បាតជាប្រចាំយ៉ាងណាក៏ដោយ ក៏បទល្មើសនេសាទនៅតែបន្តកើតមានគួរឱ្យព្រួយបារម្ភនៅក្នុងតំបន់អភិរក្សអន្លង់ផ្សោតកាំពី។ ជាពិសេស ផ្សោតឈ្មោលពេញវ័យ ១ ក្បាល ដែលទើបប្រទះឃើញងាប់ក្នុងដងទន្លេមេគង្គនៃតំបន់អន្លង់ផ្សោតកាំពីក្នុងភូមិសាស្ត្រឃុំសំបុក ស្រុកចិត្របុរី ខេត្តក្រចេះ កាលពីពេលថ្មីៗនេះ គឺដោយសារជាប់មង។ បំណែកមងដែលជាប់នឹងសពផ្សោតឈ្មោលនោះមានក្រឡា ១៥ សង់ទីម៉ែត្រ ធ្វើពីអំបោះនីឡុងទន់ស្វិត និងមិនងាយរលាយនៅក្នុងទឹក។
លោកថ្លែងថា៖ «ឧបករណ៍មង មានហានិភ័យខ្ពស់បំផុតសម្រាប់សត្វផ្សោត។ សពផ្សោតឈ្មោលដែលយើងប្រទះឃើញកាលពីល្ងាចថ្ងៃទី ១៤ ខែ មករា ឆ្នាំ ២០២១ នោះគឺមានជាប់មងផ្នែកកន្ទុយ និងដងខ្លួន។ នេះជាក្ដីព្រួយកង្វល់ដ៏ធំបំផុតរបស់យើង»។
បើតាមលោក ប៊ុនវឌ្ឍន៍ សពផ្សោតឈ្មោលនោះមានប្រវែង ១៩៨ សង់ទីម៉ែត្រ ទម្ងន់ ៨៥ គីឡូក្រាម និងមានអាយុចន្លោះពី ១២ ទៅ ១៥ ឆ្នាំ ជាវ័យកំពុងពេញបន្តពូជ។ វាទំនងជាងាប់ក្នុងរយៈពេល ៣ ថ្ងៃមកហើយ ព្រោះសពរបស់វាមានសភាពហើមស្អុយ។ បច្ចុប្បន្នសាកសពរបស់វាត្រូវបានក្រុមការងាររក្សាទុកក្នុងទូក្លាស្សេការិយាល័យអង្គការ WWF ប្រចាំខេត្តក្រចេះ ក្រោយពីវះកាត់យកសំណាកគំរូវិភាគសម្រាប់ផ្នែកវេជ្ជសាស្ត្រនៅថ្ងៃទី ១៥ ខែ មករា ឆ្នាំ ២០២១។
ក្រោយពីមានករណីនេះកើតឡើងក្រុមឆ្មាំទន្លេបាននាំគ្នាបង្កើន ការងារចុះល្បាតស្រាវជ្រាវ ទាំងយប់ទាំងថ្ងៃ ដើម្បីស្វែងរកអត្តសញ្ញាណជនសង្ស័យដែលបានលួចដាក់មងនៅក្នុងតំបន់នោះមកផ្ដន្ទាទោសទៅតាមផ្លូវច្បាប់។
ករណីនេះលោក ញ៉ែម យ៉ុន អ្នកប្រកបមុខរបរសេវាកម្មទូកទេសចរណ៍ក្នុងតំបន់រមណីយដ្ឋានអន្លង់កាំពីសម្ដែងការសោកស្ដាយជាខ្លាំងចំពោះការបាត់បង់ផ្សោតឈ្មោលពេញវ័យ ១ ក្បាលនេះ។ លោក យ៉ុន ដែលរស់នៅពឹងផ្អែកលើការដឹកភ្ញៀវទេសចរតាមទូកសម្រាប់ការទស្សនាកម្សាន្តសត្វផ្សោតក្នុងតំបន់រមណីយដ្ឋានអន្លង់កាំពី ប្រាប់ភ្នំពេញប៉ុស្តិ៍នៅថ្ងៃទី ១៧ មករា ថា៖ «មានផ្សោតមានទេសចរមានប្រាក់ចំណូល មានជីវភាពល្អប្រសើរ»។
លោកបានបន្តថា ប្រជាពលរដ្ឋនៅក្នុងសហគមន៍របស់គាត់តែងតែចូលរួមការពារ និងអភិរក្សសត្វផ្សោត ដោយនាំគ្នាចុះល្បាត បង្ក្រាបបទល្មើស និងផ្សព្វផ្សាយពីផលប្រយោជន៍នៃសត្វផ្សោត ទន្លេមេគង្គនៅរៀងរាល់ ១ សប្ដាហ៍ម្ដងដល់ប្រជាពលរដ្ឋនៅតាមបណ្ដាភូមិផ្សេងៗ និងសិស្សសាលា។
បើតាមលោក ញ៉ែម យ៉ុន ក្រុមជនប្រព្រឹត្តបទល្មើសទំនងជាមកពីតំបន់ផ្សេងៗ ហើយលួចឆ្មក់នៅពេលយប់៕