ពោធិ៍សាត់ៈ មន្ត្រីសិទ្ធិមនុស្សអាដហុកខេត្តពោធិ៍សាត់ត្រូវជនមិនស្គាល់មុខទូរស័ព្ទគំរាម និងជេរប្រមាថបន្ទាប់ពីមន្ត្រីរូបនេះចុះអង្កេតករណីចោរប្លន់មួយកន្លែងនៅស្រុកភ្នំក្រវាញ។
មន្ត្រីការពារសិទ្ធិមនុស្សអាដហុកប្រចាំខេត្តពោធិ៍សាត់លោក ភួង សុភា ប្រាប់ភ្នំពេញប៉ុស្តិ៍កាលពីម្សិលមិញដោយរៀបរាប់ថាកាលពីថ្ងៃទី ១៦ ខែមករាលោកបានចុះទៅអង្កេត និងសាកសួរផ្ទះដែលត្រូវចោរប្លន់ដើម្បីផ្តល់ភាពយុត្តិធម៌ដល់ជនរងគ្រោះដែលស្លាប់ និងជនសង្ស័យដែលជាប់ពន្ធនាគារ។ តែលោកថាបន្ទាប់ពីចេញពីផ្ទះជនរងគ្រោះស្រាប់តែមានជនមិនស្គាល់មុខទូរស័ព្ទមកគំរាម និងជេរប្រមាថរូបលោក។
លោកបញ្ជាក់ថា៖ «នៅម៉ោង ១ និង ៤៧ នាទីមានលេខទូរស័ព្ទមួយ ០៩៧ ៩០០ ២០០៧ គាត់បានខលមកហើយសួរថាលោកឯងមកអង្កេតហ្នឹងមានគោលបំណងអីតែខ្ញុំប្រាប់ជននោះវិញថាមកអង្កេតនេះដើម្បីផ្តល់យុត្តិធម៌ដល់អ្នកស្លាប់ក៏ដូចជាផ្តល់យុត្តិធម៌អ្នកជាប់ពន្ធនាគារ»។
លោកថា៖ «យើងសុំសួរឈ្មោះគាត់ (ជនអនាមិក) គាត់អត់ប្រាប់អាហ្នឹងទី ១ ដល់ពេលទី ២ គាត់ក៏ខលមកម្តងទៀតតាមរយៈលេខហ្នឹងដដែលថា ហែង(ភួង សុភា) អត់រួចខ្លួនទេហែងមានបញ្ហាជាមួយអញហើយយើងព្យាយាមនិយាយជាមួយគាត់តាមសម្រួលតែគាត់បិទទូរស័ព្ទទៅ»។
លោកបញ្ជាក់ថាប្រសិនជនអនាមិកមិនបង្ហាញខ្លួនដើម្បីសុំទោសរូបលោក ឬសារភាពពីមូលហេតុដែលគំរាមនោះទេលោកនឹងដាក់ពាក្យប្តឹងទៅសមត្ថកិច្ចឱ្យចាត់វិធានការតាមផ្លូវច្បាប់។ ទោះជាយ៉ាងណាលោកនៅតែបង្ហាញការព្រួយបារម្ភពីសុវត្ថិភាពរបស់លោកក្រោយមានការគំរាមនេះ។
ម្ចាស់ទូរស័ព្ទលេខដែលរងការចោទប្រកាន់ ០៩៧ ៩០០ ២០០៧ មិនប្រាប់ឈ្មោះបានអះអាងថាខ្លួនជាប្អូនបង្កើតរបស់ជនរងគ្រោះដែលស្លាប់បានប្រាប់ភ្នំពេញប៉ុស្តិ៍កាលពីម្សិលមិញថា៖ «អ្នកឯងមានភ័ស្តុតាងអីថាខ្ញុំគំរាម»។
លោកបន្ថែមថា៖ «ឲ្យគាត់មកជួបខ្ញុំឱ្យច្បាស់មកនៅផ្ទះខ្ញុំលេខទូរស័ព្ទអត់ដូរទេឱ្យមកជួបលោកហ្នឹងឈ្មោះអី...ខ្មោចងាប់ជាងមួយខែហើយទើបមកសួរ (ចុះស៊ើបអង្កេត) ទៅសួរចោរមុនខា្លចគេធ្វើបាបចោរ ឬបើគាត់ចង់ឆ្ងល់ថាខ្ញុំគំរាមឱ្យមកជួបខ្ញុំផ្ទាល់មក»។
បើតាមលោក ភួង សុភា ការចុះស្រាវជ្រាវករណីចោរប្លន់នោះធ្វើឡើងបន្ទាប់ពីក្រុមគ្រួសារជនរងគ្រោះដែលសមត្ថកិច្ចចាប់ដាក់ពន្ធនាគារបានស្នើឱ្យលោកជួយរកយុត្តិធម៌ជូនគ្រួសារគាត់ដោយអះអាងថាលោក អ៊ូច ប៊ុនឡេង កំពុងជាប់ពន្ធនាគារមិនបានប្រព្រឹត្តដូចការចោទប្រកាន់ទេ។ លោកឱ្យដឹងថាកាលពីថ្ងៃទី ១៤ និង ១៥ ខែធ្នូលោកបានចុះរកសាក្សីបន្ថែមនៅក្រុងប៉ោយប៉ែតតាមបណ្តឹងរបស់គ្រួសារដែលជាប់ពន្ធនាគារ។
លោកថា នៅពេលចុះសាកសួរសាក្សីដែលស្គាល់លោក អ៊ូច ប៊ុនឡេង បញ្ជាក់ថាក្នុងអំឡុងពេលហេតុការណ៍ប្លន់នៅខេត្តពោធិ៍សាត់នោះគឺលោក អ៊ូច ប៊ុនឡេង កំពុងពិសារអាហារជាមួយអ្នកជិតខាងនៅឯក្រុងប៉ោយប៉ែត។
ស្នងការរងខេត្តពោធិ៍សាត់ទទួលបន្ទុកព្រហ្មទណ្ឌលោក កែវ សុគន្ធា បានឲ្យដឹងកាលពីម្សិលមិញថា ក្រោយហេតុការណ៍នោះសមត្ថកិច្ចបានបើកការស៊ើបអង្កេត និងតាមការចង្អុលបង្ហាញពីគ្រួសារជនរងគ្រោះថាលោក អ៊ូច ប៊ុនឡេង ជា ជនសង្ស័យម្នាក់ក្នុងចំណោមក្រុមចោរប្លន់ប្រដាប់ដោយអាវុធ ៤ នាក់ផ្សេងទៀត។ លោកបន្តថាខាងសមត្ថកិច្ចកំពុងតាមចាប់អ្នកពាក់ព័ន្ធផ្សេងទៀត និងកំណត់បានមុខសញ្ញាពីរបន្ថែមទៀត។ «វាមានការចង្អុលបង្ហាញផងការស៊ើបអង្កេតរបស់យើងហ្នឹងបានឈានទៅដល់ការឃុំខ្លួនជនសង្ស័យ អ៊ូច ប៊ុនឡេង»។
បើតាមលោក សុគន្ធា កាលពីថ្ងៃទី ១២ ខែធ្នូឆ្នាំ ២០១៥ ម៉ោងជាង ៦ ល្ងាចមានក្រុមចោរប្លន់ ៣ នាក់ប្រដាប់ដោយអាវុធខ្លីមួយដើម និងអាវុធវែងប្រភេទ AK ពីរដើមបានសម្រុកចូលប្លន់អាជីវករប្ដូរប្រាក់វេរលុយវីង និងលក់គ្រឿងសំណង់នៅឃុំផ្ទះរុង ស្រុកភ្នំក្រវាញដែលក្រុមចោរបានបាញ់ស្រ្តីម្នាក់ស្លាប់ និងអ្នកផ្សេងទៀតរងរបួស៕
