.jpg)
សំណង់ពលរដ្ឋដែលចោទថាសង់លើដីហាមឃាត់ត្រូវរុះរើ សប្តាហ៍មុន។ ផា លីណា
ព្រះសីហនុៈ មន្ត្រីកងរាជអាវុធហត្ថខេត្តព្រះសីហនុម្នាក់ត្រូវបញ្ឈប់ពីការងារបណ្តោះអាសន្ន ដោយដាក់ឲ្យស្ថិតក្រោមការស៊ើបអង្កេត ខណៈគណៈកម្មការចំពោះកិច្ចកំពុងបន្តនីតិវិធីស្វែងរកគ្រាប់កាំភ្លើងដែលបាញ់ចេញបណ្តាលឲ្យពលរដ្ឋម្នាក់រងរបួសធ្ងន់ក្នុងហេតុការណ៍ប៉ះទង្គិចគ្នារវាងពលរដ្ឋមានជម្លោះដីធ្លី និងអាជ្ញាធរចម្រុះចុះអនុវត្តសាលដីកាក្នុងស្រុកព្រៃនប់ កាលពីថ្ងៃទី ២៤ ខែមករា។
រយៈពេល ១ សប្តាហ៍ហើយដែលគណៈកម្មការចំពោះកិច្ច ត្រូវបានបង្កើតឡើងដើម្បីចុះធ្វើអធិការកិច្ចការប៉ះទង្គិចមួយនៅខេត្តព្រះសីហនុ ក្រោយបែកធ្លាយវីដេអូឃ្លីបលើបណ្តាញសង្គមបង្កឲ្យមានការរិះគន់និងទាមទារឲ្យមានការទទួលខុសត្រូវលើអំពើហិង្សានេះ។
លោកសៅ សុខា មេបញ្ជាការកងរាជអាវុធហត្ថលើផ្ទៃប្រទេស ប្រាប់ភ្នំពេញប៉ុស្តិ៍ ពីម្សិលមិញថា ការចុះធ្វើអធិការកិច្ចនេះ មិនទាន់បិទបញ្ចប់នៅឡើយទេ ប៉ុន្តែការងារចំពោះមុខ គឺគណៈកម្មការបានសម្រេចបញ្ឈប់មន្ត្រីកងរាជអាវុធហត្ថម្នាក់បណ្តោះអាសន្ន ប៉ុន្តែលោកពុំបានបញ្ជាក់ថា មន្ត្រីម្នាក់នោះ មានឈ្មោះអ្វីនោះទេ។
លោកបញ្ជាក់ថា៖ «ការបានប្រព្រឹត្តជារូបភាពចងមនុស្សហើយយកជើងទៅធាក់មនុស្សដែលបានចងដេកនៅលើដីហ្នឹង គឺពិតប្រាកដ យើងបានរកឃើញមនុស្សហើយ។ បច្ចុប្បន្ន យើងផ្អាកការងារគាត់ ឲ្យនៅនឹងកន្លែង ដើម្បីយើងធ្វើការត្រួតពិនិត្យបន្តព្រោះរឿងលើសពីបញ្ហាដែលប្រើហិង្សា ដោយការវាយដំច្រំធាក់ហ្នឹង ដែលយើងឃើញគឺមានរបួសមនុស្ស ដោយសារតែគ្រាប់កាំភ្លើងទៀត អ៊ីចឹងមានរឿងហួសខ្ពស់ជាងហ្នឹងទៀត»។
បន្ថែមពីនេះ លោក សៅ សុខា បញ្ជាក់ដែរថា គណៈកម្មការក៏បានដកហូតអាវុធចំនួន ៦ ដើម ដែលអាជ្ញាធរចម្រុះបានប្រើក្នុងហេតុការណ៍ប៉ះទង្គិចនោះដើម្បីយកមកធ្វើការវិនិច្ឆ័យរកកាំភ្លើងពិតដែលបាញ់ចេញបណ្តាលឲ្យពលរដ្ឋម្នាក់រងគ្រោះផងដែរ។ តែលោកអះអាងថា ជំហានដំបូង គឺអនុវត្តចំពោះតែមន្ត្រីកងរាជអាវុធហត្ថប៉ុណ្ណោះ ដោយឡែកមន្ត្រីដែលល្មើសក្នុងអង្គភាពផ្សេង អាស្រ័យលើចំណាត់ការរបស់តុលាការ។
លោកបន្តថា៖ «យើងកំពុងស្រាវជ្រាវបញ្ហាទាក់ទងរបួសមនុស្សដែលត្រូវបានវះកាត់យកក្បាលគ្រាប់ ដូច្នេះយើងប្រមូលកាំភ្លើងទាំងអស់។ ជំហានទី ១ ដោយសារតែកម្លាំងប្រដាប់អាវុធដែលអនុវត្តតាមស្មារតីសាលដីកានេះ មានដល់ទៅ ៣ អង្គភាពខុសៗគ្នា គឺមានអាវុធហត្ថ មានកងយោធាខេត្ត និងមន្ត្រីនគរបាល ដូច្នេះអ្វីដែលខ្ញុំកំពុងធ្វើខ្ញុំគឺជាមេបញ្ជាការកងរាជអាវុធហត្ថ ខ្ញុំត្រូវត្រួតពិនិត្យកម្លាំងនៅក្រោមឱវាទរបស់ខ្ញុំ ចំណែកអង្គភាពផ្សេង មានគេដាក់ពាក្យបណ្តឹងទៅតុលាការឲ្យមានចំណាត់ការផ្សេង»។
កាលពីថ្ងៃទី ២៤ មករា មានការប៉ះទង្គិចគ្នាក្នុងជម្លោះដីធ្លី ក្នុងស្រុកព្រៃនប់ ខេត្តព្រះសីហនុ បណ្តាលឲ្យមនុស្សម្នាក់របួសធ្ងន់ដោយគ្រាប់កាំភ្លើង និងម្នាក់ទៀតរបួសស្រាល ហើយ ៤ នាក់ត្រូវបានឃាត់ខ្លួនតែដោះលែងវិញនៅថ្ងៃដដែលនោះ។
ភ្នំពេញប៉ុស្តិ៍ មិនអាចទាក់ទង លោកយន្ត មីន អភិបាលខេត្តព្រះសីហនុបានទេ ពីម្សិលមិញ។ តែបើតាមរបាយការណ៍របស់លោកអះអាងថា ការចុះអនុវត្តសាលដីការបស់តុលាការកំពូលលើដីមានទំនាស់ ស្ថិតក្នុងភូមិគគីរ ឃុំបិតត្រាំង ស្រុកព្រៃនប់ មានកម្លាំងចម្រុះប្រមាណជាង ៣០០ នាក់ ក្នុងនោះកម្លាំងអាវុធហត្ថ ១០០ នាក់ កម្លាំងយោធា ១០០ នាក់ កម្លាំងនគរបាលចំនួន ១០០ នាក់ មន្ត្រីរដ្ឋបាលខេត្តស្រុកនិងមន្ទីរអង្គភាពពាក់ព័ន្ធចំនួន ២០ នាក់។
ហេតុការណ៍នោះលោកយន្ត មីន អះអាងថា ការផ្ទុះអាវុធ គឺជាការអនុវត្តខុសពីបទបញ្ជារបស់គណៈបញ្ជាការឯកភាពដែលបានណែនាំក្នុងពេលប្រជុំ និងមុនចុះអនុវត្តតែដោយសារសភាពការណ៍ពិបាកទប់ទល់ មានភាពតានតឹងខ្លាំងនិងមានការប្តេជ្ញាចិត្តរបស់ព្រះរាជអាជ្ញា ក៏ដូចជាក្រុមការងារ និងកងកម្លាំងទាំងអស់ថា ត្រូវតែអនុវត្តសាលដីការបស់តុលាការកំពូលឲ្យបាន ទើបមានកម្លាំងខ្លះ បានបាញ់ឡើងលើជាការគំរាម តែមិនមែនជាការបាញ់ដោយចេតនា ឬមានការបញ្ជាឲ្យធ្វើដូច្នេះឡើយ។
លោកថា៖ «ចំពោះជនរងគ្រោះដោយគ្រាប់កាំភ្លើង សមត្ថកិច្ចកំពុងស្រាវជ្រាវរកជនបង្ក ព្រោះសង្ស័យថា មានជនទី ៣ បង្កប់ជាមួយក្រុមប្រជាពលរដ្ឋ»។
ព្រះរាជអាជ្ញាអមសាលាដំបូងខេត្តព្រះសីហនុ លោក ហួត វិចិត្រ ប្រាប់ភ្នំពេញប៉ុស្តិ៍ ម្សិលមិញ ថា លោកពុំបានទទួលពាក្យបណ្តឹងណាមួយពាក់ព័ន្ធនឹងការប៉ះទង្គិចនេះនៅឡើយទេ ហើយថាលោក ក៏មិនទាន់បានរបាយការណ៍ណាមួយជុំវិញបញ្ហានេះដែរ។
លោកបញ្ជាក់ថា៖ «ខ្ញុំអត់ទាន់ដឹង ចំពោះចំណាត់ការនេះ ចាំតែរបាយការណ៍របស់សមត្ថកិច្ច ជំនាញ ហើយក៏អត់ដឹងខាងណាប្រព្រឹត្តដែរ ខាងរាជអាវុធហត្ថអីហ្នឹង ខ្ញុំអត់ដឹងទេ»។
លោកអេង ហ៊ី អ្នកនាំពាក្យ កងរាជអាវុធហត្ថ លើផ្ទៃប្រទេស អះអាងម្សិលមិញថា៖ «យើងបានដកហូតអាវុធទាំងអស់ ពាក់ព័ន្ធហ្នឹងការប្រើប្រាស់នៅពេលហ្នឹង ធ្វើកោសល្យវិច័យ ហើយយើងកំពុងធ្វើការហើយ។ ដូចខ្ញុំជំរាបអ៊ីចឹងខ្ញុំមិនអាចជំរាបលើសពីហ្នឹងទេ ការស៊ើបអង្កតចប់ នឹងមានការធ្វើសន្និសីទកាសែត»៕
