ភ្នំពេញៈ មន្ត្រីមន្ទីរប្រឆាំងគ្រឿងញៀននៃក្រសួងមហាផ្ទៃបានសម្រេចចោទប្រកាន់ជនសង្ស័យឈ្មោះ ឈុន សុមេធា នាយការិយាល័យប្រឆាំងបទល្មើសគ្រឿងញៀននៃកងរាជអាវុធហត្ថខេត្តតាកែវម្នាក់ និងស្ត្រីជាបក្ខពួកម្នាក់ទៀតឈ្មោះ កេន ចាន់រី ពីបទជួញដូរគ្រឿងញៀន ហើយគ្រោងនឹងបញ្ជូនទៅកាន់សាលាដំបូងរាជធានីភ្នំពេញនៅថ្ងៃនេះ។
លោក អ៊ិន សុង នាយករងនៃមន្ទីរប្រឆាំងគ្រឿងញៀននៃក្រសួងមហាផ្ទៃបានថ្លែងឲ្យដឹងកាលពីម្សិលមិញថា ជនសង្ស័យទាំង ២ នាក់ ត្រូវបានសមត្ថកិច្ចជំនាញបញ្ចប់ការសាកសួរ និងរៀបចំសំណុំរឿងតាមនីតិវិធីច្បាប់ ដើម្បីបញ្ជូនទៅកាន់សាលាដំបូងរាជធានីនៅថ្ងៃទី ៨ ខែ មិថុនា ២០២០។
លោក សុង ថ្លែងថា៖ «ខ្ញុំបញ្ជូនពួកគេបន្តទៅតុលាការដើម្បីចាត់ការតាមនីតិវិធីច្បាប់»។
លោក សុង បានឲ្យដឹងថា ជនសង្ស័យឈ្មោះ ឈុន សុមេធា និង កេន ចាន់រី ត្រូវបានចាប់ខ្លួនកាលពីពីរសៀលថ្ងៃទី ៤ ខែ មិថុនា ឆ្នាំ ២០២០ នៅចំណុចស្ថានីយសាំងសូគីម៉ិច សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។ សមត្ថកិច្ចដកហូតបានជាក់ស្តែងមានគ្រឿងញៀនប្រភេទមេតំហ្វេតាមីនចំនួន ២ គីឡូក្រាមនៅក្នុងរថយន្ត។
លោក សុង ថ្លែងថាក្រោយពីការចាប់ខ្លួនសមត្ថកិច្ចបានបន្តទៅឆែកឆេរនៅផ្ទះរបស់ជនសង្ស័យឈ្មោះ ឈុន សុមេធា នៅភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ ដោយសហការជាមួយសមត្ថកិច្ចនៃស្នងការដ្ឋាននគរបាលខេត្តតាកែវហើយក៏មានការសម្របសម្រួលផ្នែកផ្លូវច្បាប់ពីលោក ជីវ ចាន់តារា ព្រះរាជអាជ្ញាអមសាលាដំបូង ខេត្តតាកែវក្នុងការឆែកឆេរលំនៅឋាន។
លោក សុង ថ្លែងថា ចំពោះវត្ថុតាងដែលសមត្ថកិច្ចដកហូតបានពីផ្ទះជនសង្ស័យឈ្មោះ ឈុន សុមេធា មានអាវុធខ្លីចំនួន ២ ដើម (ប្រើហ្គាស) និងជញ្ជីងថ្លឹងថ្នាំញៀនចំនួន ១ គ្រឿងព្រមទាំងកញ្ឆាក្រៀមចំនួន ២ ស្បោងស្មើ ៨ គីឡូក្រាម។ បន្ទាប់មកសមត្ថកិច្ចបានបន្តទៅឆែកឆេរនៅបន្ទប់ជួលរបស់ជនសង្ស័យមា្នក់ទៀតឈ្មោះ កេន ចាន់រី នៅភូមិអង្គតាកុប ឃុំលាយបូរ ស្រុកត្រាំកក់ ខេត្តតាកែវ ដោយដកហូតវត្ថុតាងបានម៉ាស៊ីនកាមេរ៉ាសុវត្ថិភាពចំនួន ១ គ្រឿង ស្លាកលេខម៉ូតូចំនួន ៣ បន្ទះ និងកាតគ្រីម៉ូតូចំនួន ២ សន្លឹកទៀត។
លោក សុង ថ្លែងថា៖ «ខ្ញុំមិនអាចបង្ហាញពីចម្លើយសារភាពរបស់ជនសង្ស័យទាំង ២ នាក់នោះបានទេ ព្រោះវាជាជំនាញរបស់សមត្ថកិច្ច»។
លោក សុង បានឲ្យដឹងផងដែរពីករណីបង្ក្រាបគ្រឿងញៀនដោយមួយទៀត ទៅលើជនជាតិចិនម្នាក់ពាក់ព័ន្ធបញ្ហាគ្រឿងញៀនក៏ត្រូវបញ្ជូនទៅសាលាដំបូងរាជធានីភ្នំពេញនៅថ្ងៃទី ៨ មិថុនាដែរ។ ប៉ុន្តែជនសង្ស័យគ្រាន់តែមានឧបករណ៍សម្រាប់កែច្នៃគ្រឿងញៀនប៉ុណ្ណោះមិនទាន់ដំឡើងទេ។
ជនសង្ស័យឈ្មោះ ហ៊ី យីរី (HE YIRI) ភេទប្រុស អាយុ ៥៦ ឆ្នាំព្រមទាំងដកហូតវត្ថុតាងបទល្មើសដែលជនសង្ស័យបានរក្សាទុកនៅក្នុងបន្ទប់ដោយបិទប្លុមបេ។ ការបង្ក្រាបនេះធ្វើកាលពីថ្ងៃទី ៦ ខែមិថុនា នៅខុនដូឈ្មោះ «សោភា» សង្កាត់បឹងកេងកងទី ១ ខណ្ឌបឹងកេងកង យកធ្វើជាទីតាំងកែច្នៃគ្រឿងញៀន៕