កោះកុងៈ មន្ត្រីកងរាជអាវុធហត្ថខេត្តកោះកុង ៣ នាក់បានរងរបួសស្រាល ក្នុងគ្រោះថ្នាក់ចរាចរណ៍មួយ កាលពីព្រឹកថ្ងៃអង្គារ គ្រាដែលពួកគាត់កំពុងបំពេញបេសកកម្មការងារ បើករថយន្តស៊ឺរ៉ែននាំមុខក្បួនរថយន្តប្រតិភូវៀតណាម នៅលើកំណាត់ផ្លូវជាតិលេខ ៤៨ ស្ថិតក្នុងភូមិឈូក ឃុំជីខលើ ស្រុកស្រែអំបិល ខេត្តកោះកុង។
លោក សេង ធាន នាយផ្នែកនគរបាលចរាចរណ៍ស្រុកស្រែអំបិល ខេត្តកោះកុង បានប្រាប់ភ្នំពេញប៉ុស្តិ៍ នៅថ្ងៃពុធថា មន្ត្រីកងរាជអាវុធហត្ថ ដែលរងគ្រោះថ្នាក់ក្នុងហេតុការណ៍គ្រោះថ្នាក់ចរាចរណ៍ខាងលើនេះ រួមមានឈ្មោះ គឹម ឌីណា អាយុ ៤៥ ឆ្នាំ ជាអ្នកបើកបររថយន្តស៊ឺរ៉ែន ម៉ាក 4 RUNER និង ២ នាក់ទៀត គឺម្នាក់ឈ្មោះ សុខ សារឿន និង ម្នាក់ទៀតឈ្មោះ ឆុន ឆៃយ៉ា ជាអ្នករួមដំណើរក្នុងរថយន្តនោះ។
ចំណែកអ្នកបើករថយន្តបង្កហេតុឈ្មោះ វ៉ាន់ ថុង អាយុ ៤៨ ឆ្នាំ ជាមន្ត្រីនៃមន្ទីរកសិកម្ម រុក្ខាប្រមាញ់ និងនេសាទខេត្តកោះកុង និងមានលំអចិន្រៃ្តយ៍នៅភូមិ ៦ សង្កាត់ទួលស្វាយព្រៃទី ១ ខណ្ឌចំកាមន រាជធានីភ្នំពេញ។
លោក ធាន បានបញ្ជាក់ថា៖ «យោងតាមការវាស់វែងនៅកន្លែងកើតហេតុ គ្រោះថ្នាក់ចរាចរណ៍ខាងលើនេះ បង្កឡើងដោយអ្នកបើកបររថយន្ត LEXUS បើកបរក្នុងល្បឿនលឿន ក្នុងស្ថានភាពផ្លូវមានគ្រោះថ្នាក់ ដោយខ្វះការប្រុងប្រយ័ត្ន»។
លោកបានបន្តថា ទោះជាបែបណាក្ដី នៅក្នុងហេតុការណ៍គ្រោះថ្នាក់ចរាចរណ៍នេះ ភាគីទាំង ២ បានសម្រុះសម្រួលគ្នានៅនឹងកន្លែងកើតហេតុរួចរាល់ហើយ ដោយភាគីបង្កបានទទួលកំហុស និងយល់ព្រមចេញថ្លៃជួសជុលរថយន្តរបស់ភាគីជនរងគ្រោះទាំងស្រុង ជាថ្នូរក្នុងការទទួលបានក្ដីអនុគ្រោះ ពីខាងភាគីជនរងគ្រោះ។
បើយោងតាមសម្ដីរបស់លោក សេង ធាន នៅមុនពេលកើតហេតុ គេឃើញរថយន្តបង្កបានបើកបរក្នុងទិសដៅពីកើតទៅលិចក្នុងល្បឿនលឿន ខណ:ស្ថានភាពផ្លូវកោងនិងបត់បែនច្រើនកន្លែង។
លុះមកដល់ចំណុចកើតហេតុខាងលើ ក៏បានរេចង្កូតចូលទៅក្នុងគន្លងផ្លូវម្ខាងទៀត ស្របពេលដែលរថយន្តស៊ឺរ់ែននាំមុខក្បួនប្រតិភូវៀតណាម មកដល់ក៏បានបុកទៅលើរថយន្តស៊ឺរ៉ែននោះ ហើយរថយន្តដឹកប្រតិភូវៀតណាមដែលបើកពីក្រោយរថយន្តស៊ឺរ៉ែននោះ ចាប់ ហ្រ្វាំងមិនទាន់ក៏បុកពីក្រោយរថយន្តស៊ឺរ៉ែននោះថែមទៀត បណ្ដាលឲ្យរថយន្តទាំង ៣ គ្រឿងរងការខូចខាតយ៉ាងដំណំនិងបណ្ដាលឲ្យមន្ត្រីកងរាជអាវុធហត្ថ ៣ នាក់ក្នុងរថយន្តស៊ឺរ៉ែននាំមុខរងរបួសស្រាលផងដែរ៕