The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​អូស្ត្រាលី​មក​ពិនិត្យ​ការ​ផ្ទេរ​ជនភៀស​ខ្លួន

មន្ត្រី​អូស្ត្រាលី​មក​ពិនិត្យ​ការ​ផ្ទេរ​ជនភៀស​ខ្លួន

ជនភៀសខ្លួន​នៅលើ​កោះ​ណូរុតវ៉ា​កាលពី​ចុង​ឆ្នាំ​មុន​។
ជនភៀសខ្លួន​នៅលើ​កោះ​ណូរុតវ៉ា​កាលពី​ចុង​ឆ្នាំ​មុន​។ រូបថត សហការី

មន្ត្រី​អូស្ត្រាលី​មក​ពិនិត្យ​ការ​ផ្ទេរ​ជនភៀស​ខ្លួន

ភ្នំពេញៈ មន្រ្តី​យោធា​ជាន់ខ្ពស់​របស់​អូស្រ្តាលី​ម្នាក់​ដែល​ទទួល​បន្ទុក​ក្នុង​ការ​សម្របសម្រួល​​កិច្ចព្រមព្រៀង​ផ្តល់​ការ​តាំង​លំនៅ​​ដល់​ជនភៀសខ្លួន​ជាមួយ​កម្ពុជា​បាន​មក​​ទស្សនកិច្ច​​នៅ​រាជធានី​ភ្នំពេញ​​កាលពី​ចុង​សប្តាហ៍​មុន​​ដើម្បី​បញ្ចប់​ការងារ​​​រៀបចំ​​ការ​ផ្ទេរ​ជនភៀសខ្លួន​បួន​នាក់​​មក​កម្ពុជា​​។ នេះ​បើ​តាម​គណៈកម្មាធិការ​ព្រឹទ្ធសភា​​​ដែល​ត្រូវ​បាន​គេ​ប្រាប់​នា​សប្តាហ៍​​នេះ​។

ឧត្តមសេនីយ៍​ទោ Andrew Bottrell មេបញ្ជាការ​​កងកម្លាំង​ទីភ្នាក់ងារ​ចម្រុះ​​សម្រាប់​ប្រតិបត្តិការ​​ផ្នែក​អធិបតេយ្យ​ព្រំដែន​និង​ «​ទំនាក់ទំនង​ប្រតិបត្តិការ​ជាមួយ​​រដ្ឋាភិបាល​កម្ពុជា​» បាន​ប្រាប់​គណៈកម្មាធិការ​កិច្ចការ​ច្បាប់​ និង​រដ្ឋធម្មនុញ្ញ​​អូស្ត្រាលី​កាលពី​​ថ្ងៃ​ចន្ទ​ថា កាលបរិច្ឆេទ​ចុងក្រោយ​សម្រាប់​ការ​មក​ដល់​របស់​ពួកគេ នៅ​មិន​ទាន់​ត្រូវ​បាន​ព្រមព្រៀង​នៅ​ឡើយ​ទេ​។

លោក​បន្ត​ថា​៖ «​ខ្ញុំ មិន​អាច​ផ្តល់​កាលបរិច្ឆេទ​ចុងក្រោយ​ដល់​អ្នក​បាន​ទេ ដោយសារ​យើង​មិន​ទាន់​បាន​​បញ្ចប់​ការ​ព្រមព្រៀង​គ្នា​ជា​ចុងក្រោយ​ជាមួយ​រដ្ឋាភិបាល​កម្ពុជា​​»។ ​លោក​បញ្ជាក់​ថា​៖ «​​យើង​បន្ត​ធ្វើ​ការងារ​ជិតស្និទ្ធ​ជាមួយ​រដ្ឋាភិបាល​កម្ពុជា​ដើម្បី​បញ្ចប់​ការងារ​រៀបចំ​នេះ សម្រាប់​ការ​បញ្ជូន​អ្នក​ទាំង​បួន​នាក់​នោះ​»។

ជនភៀស​ខ្លួន​បួន​​នាក់ ដែល​មាន​ជនជាតិ​អ៊ីរ៉ង់​បី​នាក់ និង​មីយ៉ាន់ម៉ា​ម្នាក់ ត្រូវ​បាន​បញ្ជូន​តាម​យន្តហោះ​ពី​កោះ​ណូរុ​ទៅ​ភាគ​ខាង​ជើង​អូស្រ្តាលី​កាលពី​ដើម​ខែ​ឧសភា ហើយ​ត្រូវ​បាន​ផ្តល់​កន្លែង​ស្នាក់នៅ​នៅ​​មន្ទីរ​អន្តោប្រវេសន៍​​មួយ នៅ​ជិត​​ព្រលាន​យន្តហោះ​ចាប់​តាំងពី​ពេល​នោះ​មក ដោយ​រង់ចាំ​ការ​អនុម័ត​​សម្រាប់​ការ​បញ្ជូន​មក​កម្ពុជា​។ ចាប់​តាំងពី​គម្រោង​ផ្តល់​ការ​តាំង​លំនៅ​ដែល​ចុះហត្ថលេខា​​កាលពី​ខែ​ កញ្ញា ត្រូវ​បាន​លើក​ឡើង​​ដំបូង នៅក្នុង​កិច្ចប្រជុំ​បិទ​ទ្វារ រវាង​រដ្ឋមន្រ្តី​ការបរទេស​អូស្រ្តាលី Julie Bishop និង​លោក​នាយករដ្ឋមន្រ្តី ហ៊ុន សែន កាលពី​ខែ​ កុម្ភៈ ឆ្នាំ​មុន វា​ត្រូវ​ដំណើរការ​ក្នុង​លក្ខណៈ​សម្ងាត់។

លោក Bottrell បាន​ថ្លែង​បញ្ជាក់​ថា​៖ «​ស្រប​ជាមួយ​ពិធីសារ​សម្រាប់​ព័ត៌មាន​ពាក់ព័ន្ធ​ការ​ចូលរួម​ជា​អន្តរជាតិ សេចក្តី​លម្អិត​នៃ​ការ​ពិភាក្សា​​ទ្វេភាគី ផ្លូវការ​​ ឬ​ការ​ប្រាស្រ័យ​ទាក់ទង​រវាង​ទីភ្នាក់ងារ​ប្រតិបត្តិ នឹង​មិន​ត្រូវ​បាន​បង្ហាញ​ជា​សាធារណៈ​»។

អូស្រ្តាលី​យល់ព្រម​ផ្តល់​ជំនួយ​បន្ថែម​ចំនួន​ ៤០ ​លាន​ដុល្លារ​អូស្រ្តាលី​ (ប្រហែល ៣១ លាន​ដុល្លារ) ​ដល់​កម្ពុជា​ជា​ផ្នែក​​នៃ​ការ​រៀបចំ​នេះ ហើយ​កាលពី​ដើម​សប្តាហ៍​នេះ បាន​ប្រកាស​ថា ខ្លួន​នឹង​ចំណាយ​ប្រមាណ​ ១៥,៥ លាន​ដុល្លារ​អូស្រ្តាលី​ (ប្រហែល​ ១២ លាន​ដុល្លារ) ​ទៀត​ដើម្បី​​ផ្តល់​ថវិកា​ដល់​សេវា​​តាំង​លំនៅ​នេះ​។

លោក Bottrell បាន​ប្រាប់​គណៈកម្មាធិការ​ព្រឹទ្ធសភា​អូស្ត្រាលី​ថា គោល​នយោបាយ​ជនភៀស​ខ្លួន​យោធា​របស់​ប្រទេស​នេះ ​«​​អាច​ធ្វើឲ្យ​លោក​អាច​ប្រើប្រាស់​សមត្ថភាព សម្របសម្រួល​ជាមួយ​ស្ថាប័ន​ផ្សេងៗ​នៅក្នុង​កម្លាំង​ការងារ​ទីភ្នាក់ងារ​ចម្រុះ​ដើម្បី​ជួយ​ក្នុង​ការ​អនុវត្ត​​​ជម្រើស​តាំងលំនៅ នៅ​ប្រទេស​ទី​បី​រវាង​អូស្រ្តាលី និង​កម្ពុជា​»។

លោក Mike Pezzulo ​​លេខា​នៃ​នាយកដ្ឋាន​​កិច្ចការ​ព្រំដែន​ និង​អន្តោប្រវេសន៍​អូស្រ្តាលី បាន​ប្រាប់​គណៈកម្មាធិការ​ដដែល​នេះ កាលពី​​ថ្ងៃ​អង្គារ​ថា ភាព​សម្ងាត់​នោះ​គឺ​ដោយសារ​ទីក្រុង​កង់បេរ៉ា​​ «​មិន​ចង់​ឲ្យ​ជនភៀស​ខ្លួន​ក្លាយ​ជា​វត្ថុ​តាំង​នៅក្នុង​សួន​សត្វ​»។

«​ពួកគេ​កំពុង​ត្រូវ​បាន​គ្រប់គ្រង​ក្នុង​លក្ខណៈ​យក​ចិត្ត​ទុក​ដាក់ ប៉ុន្តែ​មាន​លក្ខណៈ​រសើប​។ មាន​អ្នក​មើល​ថែទាំ​ពួកគេ ខណៈ​ពួកគេ​កំពុង​ស្ថិត​នៅក្នុង​ការ​ផ្ទេរ ហើយ​យើង​កំពុង​ទន្ទឹង​រង់ចាំ​ជួយ​ពួកគេ​​​ដើម្បី​ទៅ​ដល់​ផ្លូវ​របស់​ពួកគេ​ហើយ​តាំង​លំនៅ​ក្នុង​ប្រទេស​កម្ពុជា ក្នុង​រយៈពេល​មិន​យូរ នា​ពេល​ខាង​មុខ​»។

អង្គការ​អន្តរជាតិ​​សម្រាប់​ទេសន្តរ​ប្រវេសន៍ (IOM) ដែល​កំពុង​ផ្តល់​កន្លែង​ស្នាក់នៅ​ដំបូង​ដល់​ជនភៀស​ខ្លួន​ និង​សេវា​មួយ​ចំនួន​ទៀត​ កាលពី​ថ្ងៃ​ពុធ​បាន​លើក​ឡើង​ថា លទ្ធភាព​ផ្តល់​ព័ត៌មាន ដល់​ប្រព័ន្ធផ្សព្វផ្សាយ​​អំពី​ជនភៀសខ្លួន​នឹង​មិន​​ទាន់​មាន​ទេ។

អ្នក​នាំពាក្យ IOM ​ថ្លែង​ថា​៖ «​ការ​បង្ហាញ​ដល់​ប្រព័ន្ធ​ផ្សព្វផ្សាយ​អាច​ប៉ះពាល់​ដល់​តម្រូវការ​ការពារ​ជនភៀសខ្លួន​ និង​ធ្វើឲ្យ​ពួកគេ​មាន​ហានិភ័យ​ខ្ពស់​ចំពោះ​គ្រួសារ​របស់​ពួកគេ​»។

ប៉ុន្តែ​ IOM ឲ្យ​ដឹង​កាលពី​សប្តាហ៍​មុន​ថា ខ្លួន​មាន​កន្លែង​ស្នាក់នៅ ​«​បែប​វីឡា​» ​​ក្នុង​រាជធានី​ភ្នំពេញ ដែល​ត្រៀម​រួច​ហើយ សម្រាប់​ការ​មក​ដល់​របស់​ជនភៀសខ្លួន​ទាំង​បួន​នាក់​នោះ​។

លោក ខៀវ សុភ័គ អ្នក​នាំពាក្យ​ក្រសួង​មហាផ្ទៃ មិន​អាច​ទាក់ទង​សុំ​អត្ថាធិប្បាយ​បាន​ទេ ហើយ​លោក កែម សារិន ប្រធាន​នាយកដ្ឋាន​ជនភៀសខ្លួន​បាន​បដិសេធ​​ធ្វើ​អត្ថាធិប្បាយ​។

អ្នក​នាំពាក្យ​ក្រសួង​ការបរទេស លោក កុយ គួង បាន​ថ្លែង​ថា ឧត្តមសេនីយ៍ទោ General Bottrell នឹង​បាន​ជួប​ផ្ទាល់​ជាមួយ​មន្រ្តី​ជាន់ខ្ពស់​ក្រសួង​មហាផ្ទៃ​ក្នុង​អំឡុង​ដំណើរ​ទស្សនកិច្ច​របស់​គាត់​ ខណៈ​ក្រសួង​ការបរទេស​មិន​ត្រូវ​បាន​ជម្រាប​»​។

លោក Pezzulo ​បាន​ថ្លែង​ថា អូស្រ្តាលី​សង្ឃឹម​ថា កម្ពុជា​នឹង​យក​តាម​គោលការណ៍​ស្ម័គ្រចិត្ត ​«​នូវ​ជនភៀស​ខ្លួន​» ​ច្រើន​តាម​ដែល​អាច​ធ្វើ​ទៅ​បាន ខណៈ​កម្ពុជា ក៏​មាន​ឆន្ទៈ​ទទួល​យក​ផង​ដែរ ហើយ​​នៅ​ពេល​មាន​ជនភៀស​ខ្លួន​ច្រើន​តាំង​លំនៅ​នៅ​ទីនេះ នោះ​ជនភៀស​ខ្លួន​កាន់តែ​ច្រើន​នឹង​ដំណើរការ​នីតិវិធី​ទៅ​តាម​នេះ​ដែរ​»។

លោក David Manne នាយក​ប្រតិបត្តិ​នៃ​មជ្ឈមណ្ឌល​ផ្នែក​ច្បាប់​សម្រាប់​ជនភៀស​ខ្លួន និង​អន្តោប្រវេសន៍​ដែល មាន​មូលដ្ឋាន​នៅ​ប្រទេស​អូស្រ្តាលី ថ្លែង​ថា ភាព​សម្ងាត់​នោះ​បាន​យាយី​ដល់​កិច្ចព្រមព្រៀង​ចាប់​តាំងពី​ថ្ងៃ​ដំបូង​។

លោក​ថ្លែង​ថា ភាព​សម្ងាត់​នេះ​ក៏​ជា​បញ្ហា​ស៊ី​ជម្រៅ​ក្រោម​គោលនយោបាយ​រយៈពេល​ខ្លី ដែល​អូស្រ្តាលី​កំពុង​បន្ថែម​​ដោយ​ផ្តល់​ថវិកា​សម្រាប់​ការ​បង្វែរ​ការ​ទទួល​ខុសត្រូវ​របស់​ខ្លួន​ទៅ​កម្ពុជា ដែល​ជា​ប្រទេស​ក្រីក្រ និង​មាន​​បញ្ហា​សិទ្ធិ​មនុស្ស​...​និង​ជា​កន្លែង​យ៉ាង​លំបាក​សម្រាប់​ការ​តាំងលំ​នៅ​របស់​ជនភៀស​ខ្លួន​»៕ PS

អត្ថបទគួរចាប់អារម្មណ៍