.jpg)
គំនរឈើក្នុងតំបន់ព្រៃឡង់នៅខែកក្កដានេះ។ រូប ហ្វេសប៊ុក Heng Sros
ភ្នំពេញ: មន្ត្រីក្រសួងបរិស្ថានបានអះអាងថា ក្រសួង និងផ្នែកពាក់ព័ន្ធនៅតែបន្តអនុវត្តវិធានការការពារព្រៃឈើ និងអភិរក្សដោយការទទួលខុសត្រូវ ស្របពេលមានក្រុមសកម្មជនការពារព្រៃឈើសម្តែងការខកចិត្ត ចំពោះការគ្មានលទ្ធភាពចុះល្បាតព្រៃបន្តទៀត ដោយសារមានការរារាំង ខណៈបានដឹងពីការកាប់ឈើផ្គត់ផ្គង់ឲ្យក្រុមហ៊ុនចំនួន ២ ។
កាលពីម្សិលមិញមានព្រះសង្ឃ សកម្មជន សហគមន៍ សមាគម និងអង្គការសង្គមស៊ីវិលជាង ៦០ នាក់/អង្គ បានចេញសេចក្ដីប្រកាសព័ត៌មានរួមគ្នាថា ការហាមឃាត់មិនឲ្យពួកគេចុះល្បាតព្រៃបានផ្តល់ឱកាសល្អ សម្រាប់ឧក្រិដ្ឋជនព្រៃឈើពិសេសក្រុមហ៊ុនអាជីវកម្មឈើឲ្យសម្រុកកាប់ និងដឹកឈើចេញពីតំបន់ការពារដោយរលូន។
សេចក្ដីប្រកាសព័ត៌មានបញ្ជាក់ថា៖ «ទឹកភ្នែករបស់យើងខ្ញុំបានហូរស្រក់ដោយមិនដឹងខ្លួន និងមានការឈឺចាប់យ៉ាងខ្លាំងនៅពេលបានឃើញដើមឈើធំៗគ្រប់ប្រភេទពិសេសដើមច្បោះត្រូវបានគេកាប់យ៉ាងរង្គាល និងដឹកជញ្ជូនយ៉ាងគគ្រឹកគគ្រេងនៅនឹងមុខយកទៅផ្គត់ផ្គង់ឲ្យក្រុមហ៊ុន Think Biotech (Cambodia) Co., Ltd ដើម្បីធ្វើអាជីវកម្មនាំឈើចេញទៅទីផ្សារអន្តរជាតិបន្តទៀតតាមរយៈក្រុមហ៊ុនដៃគូឈ្មោះ AngkorPlywood Co., Ltd»។
សេចក្ដីប្រកាសបានបន្ថែមថាទោះបីគ្រឿងចក្ររោងចក្រអារឈើ និងផលិតក្តារបន្ទះនៃក្រុមហ៊ុនទាំង ២ នេះបានរុះរើបញ្ឈប់សកម្មភាពផលិតឈើនៅដើមឆ្នាំនេះក្ដី ក៏ការដឹកឈើពីព្រៃធម្មជាតិនៅតែមានបន្ត។ ក្រុមហ៊ុនទាំងនេះនៅតែបន្តអាជីវកម្មក្នុងពេលមានការរីករាលដាលនៃជំងឺកូវីដ១៩ ស្របពេលសកម្មជនព្រៃឈើ ពិសេសបណ្តាញព្រៃឡង់ត្រូវបានរារាំងមិនឲ្យចូលព្រៃក្នុងតំបន់ស្នូលកន្លងមក។
លោក ហេង ស្រស់ សកម្មជនម្នាក់ក្នុងចំណោម ៦០ នាក់/អង្គបានថ្លែងពីម្សិលមិញថាក្នុងពេលហាមឃាត់ពីអាជ្ញាធរនេះ ពួកលោកបានរកឃើញមានការកាប់ឈើ និងដឹកជញ្ជូនឈើមានដូចជា បេង សុក្រំ ផ្តៀក កកោះ ជាពិសេសឈើ ត្រសេក ឈើទាល ស្រឡៅ ដែលជាតម្រូវការរបស់ក្រុមហ៊ុន ត្រូវបានគេដឹកដោយគោយន្តរាប់រយគ្រឿងក្នុង ១ ថ្ងៃៗ។
លោកបន្តថា ថ្មីៗនេះក្រុមហ៊ុនបានប្រើយុទ្ធសាស្ត្រថ្មីដោយមិនមានរោងចក្រអារឈើ មិនមានដេប៉ូ ឬគំនរឈើ និងឃ្លាំងស្តុកឈើទៀតទេ ដើម្បីកុំឲ្យឃើញភ័ស្តុតាងពីឧក្រិដ្ឋកម្មព្រៃឈើក្នុងក្រុមហ៊ុនទាំងនេះ។
ប៉ុន្ដែក្រុមហ៊ុនបានពង្រាយកម្មករចូលក្នុងព្រៃ ហើយនាំឈ្មួញជាដៃគូទិញ-លក់ ចូលទៅវាស់ឈើក្នុងព្រៃរួចដឹកចេញទៅក្រៅប្រទេសតែម្ដង។
លោក ស្រស់ បញ្ជាក់ថា៖ «រាជរដ្ឋាភិបាលត្រូវតែបើកឱកាសឲ្យយើងខ្ញុំបានចូលទៅក្នុងតំបន់ការពារដើម្បីបន្តល្បាតព្រៃ និងស៊ើបអង្កេតស្រាវជ្រាវបទល្មើសព្រៃឈើឡើងវិញ ដែលជាការបង្ហាញពីកិច្ចសហការ ជាពិសេសយើងខ្ញុំទទូចម្តងហើយម្តងទៀត សូមឲ្យរាជរដ្ឋាភិបាលបិទអាជីវកម្មឈើរបស់ក្រុមហ៊ុនខាងលើនេះជាស្ថាពរដើម្បីបញ្ជាក់ជំហរឲ្យបានច្បាស់លាស់អំពីឆន្ទៈការពារ និងអភិរក្សព្រៃឈើពិតប្រាកដមែន»។
យ៉ាងណាក្ដីលោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានថ្លែងពីម្សិលមិញថា ក្រសួងបរិស្ថានព្រមទាំងអាជ្ញាធរពាក់ព័ន្ធនៅតែបន្តអនុវត្តវិធានការពារ និងអភិរក្សតំបន់ការពារធម្មជាតិដែលខ្លួនគ្រប់គ្រងប្រកបដោយការទទួលខុសត្រូវ និងចាត់វិធានការលើរាល់បទល្មើសធនធានធម្មជាតិដែលបានកើតឡើង។
លោកបានបញ្ជាក់ថា៖ «ចំពោះបញ្ហាដែលទាក់ទងនឹងការចេញ licence ឲ្យទៅក្រុមហ៊ុនគួរតែទាក់ទងក្រសួងកសិកម្មរុក្ខាប្រមាញ់ និងនេសាទ។ លើសពីនេះខ្ញុំអត់អាចបកស្រាយអ្វីបន្ថែមបានទេ»។
លោក ស្រី វុឌ្ឍី អគ្គលេខាធិការនៃអគ្គលេខាធិការដ្ឋាន និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទមិនអាចសុំការបញ្ជាក់ពីករណីនេះបានទេ ដោយទូរស័ព្ទលោកគ្មានអ្នកទទួលកាលពីម្សិលមិញ។ ចំណែកលោក កែវ អូម៉ាលីស្ស ប្រតិភូរាជរដ្ឋាភិបាលទទួលបន្ទុកប្រធានរដ្ឋបាលព្រៃឈើនៃក្រសួងនេះក៏មិនអាចទាក់ទងសុំការបញ្ជាក់បានដែរ។
លោក ឡៃ ហៀង ជាបុគ្គលិកក្រុមហ៊ុន Think Biotech (Cambodia) Co., Ltd បានថ្លែងពីម្សិលមិញថា ក្រុមហ៊ុនលោកមិនបានកាប់ឈើដូចការចោទប្រកាន់របស់សកម្មជនព្រៃឈើទាំងនេះទេ ខណៈកំពុងដាំដើមកាស្យា និងដើមប្រេងខ្យល់រាប់ម៉ឺនដើម ដើម្បីផ្គត់ផ្គង់ទីផ្សារ។
លោកបន្តថា ក្រុមហ៊ុនមានសិទ្ធិកាប់កូនឈើដែលបានដាំក្នុងដីដែលក្រុមហ៊ុនទទួលបានសិទ្ធិពីរាជរដ្ឋាភិបាល ហើយក៏មិនបានឆ្លៀតឱកាសកាប់ឈើនៅទីតាំងក្រៅពីដីក្រុមហ៊ុនដែរ។
លោកថា៖ «សព្វថ្ងៃនេះយើងកំពុងដាំកូនដើមកាស្យា ប្រេងខ្យល់លើផ្ទៃដីជិត ១ ០០០ ហិកតាហើយ តែឥឡូវផ្អាកតិចសិនព្រោះរាំងគ្មានភ្លៀងទេ បើយើងដាំទៅវាងាប់។ រឿងកាប់ឈើហ្នឹងពួកខ្ញុំកាប់តែកូនឈើតូចៗក្នុងដីក្រុមហ៊ុនទេ។ការចោទប្រកាន់នេះមិនត្រឹមត្រូវសោះ»៕
