.jpg)
កូនទន្សោង ១ ក្បាល ដែលប្រទះឃើញជាប់អន្ទាក់ងាប់។ រូបថត ក្រសួងបរិស្ថាន
មណ្ឌលគិរី: កូនសត្វទន្សោង ១ ក្បាល ត្រូវបានមន្ត្រីឧទ្យានុរក្សនៃដែនជម្រកសត្វព្រៃលំផាត់ឃុំរយ៉ ស្រុកកោះញែកបានប្រទះឃើញជាប់អន្ទាក់ងាប់នៅក្នុងដែនជម្រកសត្វព្រៃលំផាត់នៅថ្ងៃទី ៣ ខែមិថុនា ក្នុងអំឡុងពេលចុះល្បាត។
លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានថ្លែងពីម្សិលមិញថា កូនទន្សោងនេះបានដាច់ជើងក្រោយ ១ ដោយសារជាប់អន្ទាក់របស់ព្រានព្រៃ ហើយក្រុមការងារបានដុតបំផ្លាញចោលនៅនឹងកន្លែង។ លោកបន្តថា ទោះបីជាមានការរឹតបន្តឹងការអនុវត្តច្បាប់ បង្កើនសកម្មភាពអប់រំស្តីពីច្បាប់តំបន់ការពារធម្មជាតិពីសំណាក់មន្ត្រីអនុវត្តច្បាប់ក៏ដោយ ប៉ុន្ដែបទល្មើសធនធានធម្មជាតិទ្រង់ទ្រាយតូចដូចជាការលួចកាប់ឈើ ការបរបាញ់ និងការដាក់អន្ទាក់សត្វព្រៃនៅតែបន្ដកើតមាននៅក្នុងតំបន់ការពារធម្មជាតិដែលចាំបាច់ភាគីពាក់ព័ន្ធត្រូវចាត់វិធានការចាំបាច់ទប់ស្កាត់ និងបង្ក្រាបបទល្មើសទាំងនេះបន្តថែមទៀត។
លោក ភក្ត្រា បញ្ជាក់ថា៖ «យើងមានការសោកស្ដាយដែលសត្វកម្ររបស់យើង ត្រូវបានគេសម្លាប់ជាបន្តបន្ទាប់ ហើយកិច្ចខិតខំរបស់យើងគឺប្រឹងទប់ស្កាត់ ប៉ុន្ដែជនខិលខូចនៅតែបន្តបំផ្លាញជាហូរហែ។ យើងសូមជំរុញបន្ថែមប្រជាពលរដ្ឋចូលរួមឲ្យកាន់តែសកម្ម និងប្រកបដោយភាពជាដៃគូ ស្មោះត្រង់បន្ថែមទៀតនៅក្នុងការងារគ្រប់គ្រង និងអភិរក្សធនធានធម្មជាតិ»។
លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរីថ្លែងពីម្សិលមិញថា កូនសត្វទន្សោងនេះត្រូវបានងាប់ ៣ ឬ ៤ ថ្ងៃមកហើយដោយហើម និងរលួយនៅកន្លែងខ្លះនៃដងខ្លួន។ លោកថា៖ «ក្រៅពីប្រទះឃើញកូនទន្សោងងាប់មួយក្បាលនេះ យើងបានរកឃើញប្រហែល ៥០ អន្ទាក់ដែលក្រុមជនល្មើស បានដាក់ពង្រាយនៅក្នុងដែនជម្រកសត្វព្រៃលំផាត់។ យើងចុះល្បាតជាប្រចាំដែរប៉ុន្ដែព្រានព្រៃគាត់ធ្វើសកម្មភាពនៅពេលយប់ អ៊ីចឹងយើងពិបាកក្នុងការទប់ស្កាត់»។
លោក ប្រុង ណច ប្រធានសហគមន៍ការពារព្រៃឈើនៅតំបន់ដែនជម្រកសត្វព្រៃលំផាត់ថ្លែងពីម្សិលមិញថា លោកសោកស្ដាយចំពោះការបាត់បង់កូនសត្វទន្សោងមួយក្បាលនេះ ព្រោះវាជាសត្វកម្រ និងកំពុងមានហានិភ័យខ្ពស់នៃការផុតពូជ។ លោកបន្តថា នៅដែនជម្រកសត្វព្រៃលំផាត់នេះមិនសូវមានបទល្មើសព្រៃឈើទេ ប៉ុន្ដែមានការដាក់អន្ទាក់សត្វមួយចំនួនដែរ ដោយព្រានព្រៃតែងតែធ្វើសកម្មភាពពេលយប់ស្ងាត់។ មួយរយៈចុងក្រោយនេះពលរដ្ឋសហគមន៍មិនសូវបានចូលល្បាតទេ ដោយសារដល់រដូវធ្វើស្រែចម្ការហើយ។
លោកបញ្ជាក់ថា៖ «យើងមិនដឹងធ្វើយ៉ាងម៉េច បើព្រានព្រៃគាត់ធ្វើសកម្មភាពលួចលាក់អ៊ីចឹង ហើយសត្វទន្សោងហ្នឹងមិនមែនយើងចិញ្ចឹមបានដូចគោ ដូចក្របីឯណា វារស់ខ្លួនវា រកស៊ីខ្លួនវា ហើយយើងចេះតែទៅបាញ់ ទៅសម្លាប់វា អ៊ីចឹងហិនហោចអស់ហើយ បើយើងមិនការពារវាទេ វាជិតផុតពូជអស់ហើយ»។
បើតាមលោក នេត្រ ភក្ត្រា ក្នុងរយៈពេល ៤ ខែដើមឆ្នាំនេះ មន្ត្រីឧទ្យានុរក្ស បានបង្ក្រាបបទល្មើសធនធានធម្មជាតិបានចំនួន ២ ៣៣៣ ករណី៕
