.jpg)
សត្វពពូលរស់ជាង ១០០ ក្បាល ត្រូវបានមន្ត្រីឧទ្យានុរក្សដែនជម្រកសត្វព្រៃកែវសីមា បានជួយរំដោះពីលុបរបស់ព្រាន។ រូបថត សហការី
មណ្ឌលគិរីៈ សត្វពពូលរស់ជាង ១០០ ក្បាល ត្រូវបានក្រុមមន្ត្រីឧទ្យានុរក្សដែនជម្រកសត្វព្រៃកែវសីមា និង អង្គការ WCS ដោះលែងឲ្យមានសេរីភាពចូលទៅក្នុងព្រៃធម្មជាតិវិញ បន្ទាប់ពីសត្វស្លាបទាំងនោះត្រូវបានក្រុមព្រាន វាយលុបចាប់ពួកវានៅក្នុងដែនជម្រកសត្វព្រៃកែវសីមាស្ថិតក្នុងឃុំស្រែឈូក ស្រុកកែវសីមា កាលពីរសៀលថ្ងៃទី ១០ ខែ ឧសភា ឆ្នាំ ២០២១។
លោក ញឹម ញៀន នាយក្រុមល្បាតនៃកម្លាំងកងរាជអាវុធហត្ថដែលត្រូវបានចាត់ឲ្យជួយអន្តរាគមន៍ដល់កម្លាំងឧទ្យានុរក្ស ស្នាក់ការរងរហ៊ូតនៃដែនជម្រកសត្វព្រៃកែវសីមា ប្រាប់ ភ្នំពេញ ប៉ុស្តិ៍ថា ក្នុងប្រត្តិបត្តិការចុះល្បាតព្រៃការពារ និង ស្រាវជ្រាវបង្ក្រាបបទល្មើស សត្វព្រៃ និងព្រៃឈើ នារសៀលថ្ងៃទី ១០ ខែឧសភា ក្រុមអ្នកអភិរក្សបានប្រទះឃើញ បុរសម្នាក់កំពុងប្រើធ្នាក់ និងវាយលុប ចាប់សត្វពពូលនៅចំណុចភូមិចក់ចារ ឃុំស្រែឈូក ស្រុកកែវសីមា ដែលស្ថិតក្នុងដែនជម្រកសត្វព្រៃកែវសីមា។
លោកបានថ្លែងថា៖ «នៅពេលនោះ ជនសង្ស័យក៏បានប្រទះឃើញក្រុមល្បាតយើងដែរ ហើយបានរត់គេចខ្លួនចូលទៅក្នុងព្រៃបាត់ទៅបន្សល់ទុកវត្ថុតាងនៅនឹងកន្លែងកើតហេតុ ដែលក្នុងនោះរួមមានមងទាក់សត្វ និង សត្វពពូលរស់ចំនួន ១១៦ ក្បាល និង សត្វពពូលងាប់ចំនួន ២៥ ក្បាល»។
បើតាម លោក ញៀន សត្វពពូលដែលងាប់ទាំង ២៥ ក្បាលនោះត្រូវបានក្រុមមន្ត្រីឧទ្យានុរក្សសម្រេចដុតបំផ្លាញចោលនៅនឹងកន្លែងកើតហេតុ ។ ចំណែកសត្វពពូល ១១៦ ក្បាលទៀត ត្រូវបាននាំយកទៅដោះលែងឲ្យមានសេរីភាពឡើងវិញ នៅក្នុងព្រៃធម្មជាតិនៃដែនជម្រកសត្វព្រៃកែវសីមា។
លោក ហាន សុខន ប្រធានដែនជម្រកសត្វព្រៃកែវសីមាបានប្រាប់ភ្នំពេញប៉ុស្តិ៍ថា នៅពេលនេះ ក្រុមមន្ត្រីឧទ្យានុរក្សកំពុងបន្តកិច្ចសហការជាមួយកម្លាំងកងរាជអាវុធហត្ថ និង នគរបាលមូលដ្ឋានស្រាវជ្រាវស្វែងរកអត្តសញ្ញាណបុរសជាព្រាន ដែលប្រើធ្នាក់ទាក់ចាប់សត្វស្លាបនៅក្នុងដែនជម្រកសត្វព្រៃកែវសីមា ដើម្បីចាប់ឃាត់ខ្លួន និងកសាងសំណុំរឿងបញ្ជូនទៅឲ្យតុលាការ ចាត់វិធានការទៅតាមនីតិវិធីច្បាប់។
លោក សុខន បញ្ជាក់ថា៖ «បើតាមការប៉ាន់ប្រមាណនូវចំនួនសត្វស្លាប ដែលក្រុមល្បាតយើងបង្ក្រាបបាន ករណីប្រើមង និង សំណាញ់ ដោយភ្ជាប់ជាមួយធ្នាក់ ដែលជាឧបករណ៍បំពងសំឡេងទាក់សត្វព្រៃនេះ គឺជនប្រព្រឹត្តបទល្មើសមានគ្នាជាក្រុម ដែលមានចំនួនលើសពី ៣ នាក់»។
លោកឲ្យដឹងផងដែរថា សត្វពពូលមានច្រើនប្រភេទក្នុងតំបន់ដែនជម្រកសត្វព្រៃកែវសីមា ប៉ុន្តែសត្វពពូល ដែលក្រុមព្រានវាយលុបចាប់បាននោះ គឺជាសត្វពពូលបំពង់កលឿងគឺជាប្រភេទបក្សី ដែលចូលចិត្តរស់នៅក្នុងព្រៃស្រោង និងព្រៃពាក់កណ្ដាលស្រោង។
បក្សីនេះមានលក្ខណៈស្រដៀងសត្វកំប្លុកដែរតែចំពុះវាពណ៌ប្រផេះ និងតូចស្រឡូនជាង បំពង់កមានដៅពណ៌លឿង និងទ្រូងពណ៌ទឹកក្រូច គ្មានវ័ណ្ណបៃតងជុំវិញភ្នែកទេ។
លោកបានបន្តថាជាទូទៅបក្សីនេះច្រើនរកស៊ីផ្លែឈើ និងរស់នៅជាហ្វូង។ ពពូលបំពង់កលឿងតែងតែបង្ហាញវត្តមានពេញមួយឆ្នាំ និងមាននៅគ្រប់ទីកន្លែងតាមតំបន់ខាងលើ ហើយធ្វើការបន្តពូជចាប់ពីខែមេសា ដល់ខែឧសភា៕
