.jpg)
មន្ត្រីឧទ្យានុរក្សរឹបអូសបានឧបករណ៍មួយចំនួន ក្នុងដែនជម្រកសត្វព្រៃសៀមប៉ាង។ រូបថត ក្រសួងបរិស្ថាន
ស្ទឹងត្រែងៈ មន្ត្រីឧទ្យានុរក្សដែនជម្រកសត្វព្រៃសៀមប៉ាងចំនួន ៤ នាក់ បានចុះរុះរើជំរំជនល្មើសលាក់ខ្លួនអារឈើចំនួន ៥ កន្លែង និងជំរុំបរបាញ់ចំនួន ១ ស្ថិតនៅឃុំព្រែកមាស ស្រុកសៀមប៉ាងក្នុងអំឡុងពេលកំពុងធ្វើការល្បាតរយៈពេល ៥ ថ្ងៃដោយបានរឹបអូសវត្ថុតាង រណារយន្ត ៤ គ្រឿង ស្នាតេះ ២ ដើម និងអន្ទាក់ ៣៦ ខ្សែ។
យោងតាមហ្វេសប៊ុកក្រសួងបរិស្ថានកាលពីថ្ងៃព្រហស្បតិ៍បានឲ្យដឹងថា ជនល្មើស ២ នាក់ ត្រូវបាននាំយកមកសួរនាំ និងធ្វើកិច្ចសន្យាបញ្ឈប់ការលួចកាប់ឈើទៅតាមច្បាប់ស្តីពីការការពារតំបន់ធម្មជាតិ។ វត្ថុតាងទាំងអស់ត្រូវបានប្រមូលយកមករក្សាទុកនៅស្នាក់ការរងដែនជម្រកសត្វព្រៃ ព្រៃឡង់សៀមបូក។
លោក ម៉ែន គុង អ្នកនាំពាក្យសាលាខេត្តស្ទឹងត្រែងបានប្រាប់ភ្នំពេញប៉ុស្តិ៍កាលពីថ្ងៃព្រហស្បតិ៍ថា វិធានការទប់ស្កាត់បទល្មើសព្រៃឈើបានដាក់ចេញតាមរយៈការអនុវត្តផែនការរបស់គណៈបញ្ជាការឯកភាពនៅក្នុងការទប់ស្កាត់បទល្មើសធនធានធម្មជាតិ ជាពិសេសគឺធនធានព្រៃឈើ ការកាប់ទន្ទ្រានយកដីព្រៃរបស់រដ្ឋធ្វើជាកម្មសិទ្ធិដោយខុសច្បាប់។ នៅក្នុងផែនការនោះការចាប់ផ្តើមដំបូងគឺជំរុញការទប់ស្កាត់បទល្មើសទាំងឡាយណានៅក្នុងតំបន់ការពារធនធានធម្មជាតិដែលគ្រប់គ្រងដោយផ្នែកបរិស្ថាន។
លោក គុង ថ្លែងថា៖ «ផែនការគឺយើងបានអនុវត្តជាប្រចាំដោយមានឧទ្យានុរក្សប្រចាំការគោលដៅនីមួយៗទៅតាមតំបន់ការពារធម្មជាតិ។ ប៉ុន្តែប្រតិបត្តិការដែលចុះធ្វើសកម្មភាពល្បាតនៅគ្រប់ទីតាំងទាំងអស់ហ្នឹងបានធ្វើទៅតាមផែនការប្រចាំខែនីមួយៗរបស់គណៈបញ្ជាការឯកភាព»។
លោក គុង ថ្លែងថា ក្រុមឧទ្យានុរក្សប្រចាំការតាមតំបន់ការពារ ចុះដើរល្បាតតាមគ្រប់ទីកន្លែងនៅក្នុងតំបន់ការពារធម្មជាតិ ទាំងតំបន់ការពារធម្មជាតិនៃឧទ្យានវីរជ័យ តំបន់ការពារធម្មជាតិសៀមប៉ាងខាងលិច ហើយទាំងនៅព្រៃឡង់ជាដើម៕
