ក្រចេះ៖ មន្ត្រីឧទ្យានុរក្សដែនជម្រកសត្វព្រៃព្រែកប្រសព្វ កំពុងពិចារណាសំណើរបស់លោក សូម សារិទ្ធ អភិបាលស្រុកសំបូរ ដែលស្នើសូមឲ្យប្រគល់គោយន្តកន្រៃ្ត ១ គ្រឿង និងម៉ូតូ ១ គ្រឿង ជូនពលរដ្ឋ ៣ គ្រួសារវិញ បន្ទាប់ពីបានចាប់ឃាត់ នៅពេលពលរដ្ឋទាំងនោះ កំពុងបោះបង្គោលប្រមាណ ៥០០ ដើម នៅលើទីតាំងដីព្រៃប្រមាណ ១០ ហិកតា ដែលនៅជាប់ដីស្រែរបស់ពួកគាត់។
លោក សារិទ្ធ បានប្រាប់ភ្នំពេញប៉ុស្តិ៍កាលពីម្សិលមិញថា យោងតាមរបាយការណ៍ពីអាជ្ញាធរឃុំ ដែលបានបញ្ជូនមក ក្រោយពីពិនិត្យទីតាំងកើតហេតុ ឃើញថាពលរដ្ឋទាំងនោះបានបោះបង្គោលហ៊ុមព័ទ្ធដីព្រៃ ដែលនៅជាប់នឹងដីស្រែរបស់ពួកគាត់។
លោកបញ្ជាក់ថា៖ «របាយការណ៍ដែលមេឃុំ បានបញ្ជូនមក ទីតាំងនោះ គឺជាដីព្រៃ ប៉ុន្តែប្រជាពលរដ្ឋទាំង ៣ គ្រួសារ បោះបង្គោលហ៊ុមព័ទ្ធសម្រាប់ទុកចងគោក្របីរបស់ពួកគាត់ និងជ្រកម្លប់នៅពេលនឿយហត់ ក្រោយពីការបង្កបង្កើនផល»។
បើតាមលោក សារិទ្ធ អ្នកភូមិអះអាងថា ពួកគាត់គ្មានបំណងវាតយកដីនោះជាកម្មសិទ្ធិផ្ទាល់ខ្លួនទេ តែការបោះបង្គោលរបង គឺដើម្បីជួយការពារកុំឲ្យមានគេមកកាប់ទន្ទ្រានដីព្រៃនៅទីតាំងនោះតែប៉ុណ្ណោះ ហើយថា គាត់មិនជំទាស់ចំពោះសមត្ថកិច្ច ដែលដកហូតយកបង្គោលរបងនោះទេ តែសូមអធ្យាស្រ័យ និងផ្ដល់គោយន្ត ១ គ្រឿង និងម៉ូតូ ១ គ្រឿង ឲ្យពួកគាត់វិញ។
លោកបន្តថា៖ «ក្រោយពីពិនិត្យរបាយការណ៍របស់អាជ្ញាធរឃុំហើយ ខ្ញុំបានទាក់ទងទៅមន្ត្រីជំនាញដើម្បីសុំការអធ្យាស្រ័យចំពោះអ្នកភូមិដែលបានដឹងនូវកំហុសរបស់ខ្លួន ហើយប្រគល់វត្ថុតាងដែលបានរឹបអូសនោះជូនពួកគាត់វិញតែខាងមន្ត្រីជំនាញ គេបានប្រាប់ថា គេនឹងពិចារណាសាជាថ្មី ចំពោះទង្វើរបស់អ្នកភូមិទាំងនោះ»។
លោក ដួង ឆាយសាវុធ ប្រធានមន្ទីរបរិស្ថានខេត្តក្រចេះ មិនអាចទាក់ទងសុំអធិប្បាយបានទេកាលពីម្សិលមិញ ប៉ុន្តែលោកបានប្រាប់ភ្នំពេញប៉ុស្តិ៍កាលពីថ្ងៃទី ២៣ ខែមេសាថា កាលថ្ងៃទី ២១ ខែមេសា មន្ត្រីឧទ្យានុរក្ស ដែនជម្រកសត្វព្រៃព្រែកប្រសព្វ រួមសហការជាមួយប្រជាសហគមន៍ បានចុះល្បាតព្រៃ ដើម្បីទប់ស្កាត់បទល្មើសធនធានធម្មជាតិ នៅក្នុងតំបន់ដែនជម្រកសត្វព្រៃព្រែកប្រសព្វ ហើយបានប្រទះឃើញករណីបោះបង្គោលហ៊ុមព័ទ្ធដីព្រៃរបស់រដ្ឋធ្វើកម្មសិទ្ធិ ដោយខុសច្បាប់មួយកន្លែង នៅចំណុចប៉ារ៉ុង ភូមិសាស្រ្តឃុំវឌ្ឍនៈ ស្រុកសំបូរ។ ប៉ុន្តែក្រុមជនសង្ស័យ បានរត់គេចខ្លួនមុនពេលកម្លាំងសមត្ថកិច្ចចូលទៅដល់។
លោកបញ្ជាក់ថា៖ «ទីតាំងដែលត្រូវបានហ៊ុមព័ទ្ធនោះ មានទំហំប្រមាណ ១០ ហិកតា និងមានបង្គោលចំនួន ៥០០ ដើម។ មន្ត្រីយើងរួមទាំងប្រជាសហគមន៍ បានរុះរើបង្គោលនោះចេញ។ យើងរឹបអូសវត្ថុតាងមួយចំនួនទៀត រួមមាន គោយន្តកន្រៃ្ត ១ គ្រឿង ម៉ូតូ ១ គ្រឿង កាំបិតផ្គាក់ ១ ដើម ពូថៅ ១ និងចបជីក ១»។ លោកបន្តថា៖ «នៅពេលនេះ មន្ត្រីឧទ្យានុរក្សយើង កំពុងបន្តស្រាវជ្រាវស្វែងរកមុខសញ្ញាជនសង្ស័យ ដើម្បីកសាងសំណុំរឿងបញ្ជូនទៅតុលាការ»។
លោក គង់ នី អាយុ ៥២ឆ្នាំ តំណាងពលរដ្ឋទាំង ៣ គ្រួសារ បានប្រាប់ភ្នំពេញប៉ុស្តិ៍ថា ទីតាំងដីដែលបានបោះបង្គោលគ្រាក់ ហ៊ុមព័ទ្ធនោះ គឺជាដីព្រៃដែលនៅជាប់នឹងដីស្រែរបស់ពួកលោក។
លោក យុន ស៊ីម មេឃុំវឌ្ឍនៈ ថ្លែងថា លោករួមទាំងមន្ត្រីក្រុមប្រឹក្សាឃុំ និងមេភូមិ អនុភូមិ ប្រធានក្រុមក្នុងមូលដ្ឋានឃុំវឌ្ឍនៈ បានចុះទៅពិនិត្យមើលទីតាំងដីដែលត្រូវបានបោះបង្គោលហ៊ុមព័ទ្ធនោះហើយឃើញថា ទីតាំងនោះគឺជាដីព្រៃ ដែលនៅជាប់នឹងដីស្រែរបស់ពលរដ្ឋ។
បើតាមលោក ឆាយសាវុធ ដីនោះជាដីក្នុងតំបន់ដែនជម្រកសត្វព្រៃព្រែកប្រសព្វ ហើយទីតាំងនោះ ជាចំណុចឆ្លងកាត់នៃសត្វក្ដាន់ ដែលកំពុងរងគ្រោះ និងជិតផុតពូជ៕