ព្រះវិហារៈ ក្រុមមន្ត្រីឧទ្យានុរក្សដែនជម្រកព្រៃព្រះរកាឆែប និងសកម្មជនការពារព្រៃឈើមួយចំនួន បានចុះល្បាតព្រៃរួមគ្នាកាលពីចុងសប្តាហ៍មុន ហើយបានបង្ក្រាបចាប់ឃាត់ខ្លួនជនសង្ស័យចំនួន ២ នាក់ រួមទាំងវត្ថុតាងមួយចំនួន បញ្ជូនទៅតុលាការខេត្តព្រះវិហារ ខណៈដែលបទល្មើសព្រៃឈើនៅក្នុងតំបន់អភិរក្សមួយនេះនៅតែបន្តកើតមាន។
លោក ប៊ុន សឿង នាយកដែនជម្រកព្រៃព្រះរកាឆែប បានប្រាប់ភ្នំពេញប៉ុស្តិ៍ កាលពីថ្ងៃអង្គារថា ជនសង្ស័យឈ្មោះ ឡែន និង ឈ្មោះ រី ជាអ្នករស់នៅក្នុងស្រុកឆែប ខេត្តព្រះវិហារ។ ពួកគេត្រូវបានក្រុមមន្ត្រីឧទ្យានុរក្ស ចាប់ឃាត់ខ្លួន ខណៈកំពុងប្រព្រឹត្តបទល្មើសកាប់និងអារឈើដោយខុសច្បាប់នៅចំណុចអាហារដ្ឋានត្មាត ស្ថិតក្នុងតំបន់ព្រៃព្រះរកាឆែប កាលពីថ្ងៃសុក្រសប្ដាហ៍មុន។
លោកបានថ្លែងថា៖ «ជនសង្ស័យត្រូវបានតុលាការសម្រេចឃុំខ្លួន ក្នុងពន្ធនាគារខេត្តជាបណ្ដោះអាសន្នកាលពីថ្ងៃចន្ទ ដោយចោទប្រកាន់ពីបទកាប់បំផ្លាញព្រៃឈើដោយគ្មានការអនុញ្ញាត»។
បើតាមសម្ដីរបស់លោកសឿង បទល្មើព្រៃឈើ នៅក្នុងតំបន់ដែនជម្រកព្រៃព្រះរកា នៅតែជាក្ដីកង្វល់ដែលទាមទារឲ្យមានការចូលរួមពីគ្រប់ភាគីពាក់ព័ន្ធទាំងអស់ ពិសេសប្រជាសហគមន៍ និងអាជ្ញាធរមូលដ្ឋាន ដែលរស់នៅនិងមានមូលដ្ឋានក្បែរទីតាំងនៃតំបន់ដែនជម្រកនេះ។ លោកបានប្រាប់ទៀតថា គិតចាប់ពីដើមខែមករា ឆ្នាំ ២០១៩ រហូតមកដល់ពេលនេះ សមត្ថកិច្ចបានបង្ក្រាបចាប់រឹបអូសវត្ថុតាង បានរណារយន្ត ៥០ គ្រឿង គោយន្ត ២០ គ្រឿង កាំភ្លើងកែច្នៃ ១៥ ដើម ឈើចម្រុះគ្រប់ប្រភេទជាង ១៥ ម៉ែត្រគុបនិងអន្ទាក់ចាប់សត្វព្រៃមួយចំនួនទៀត។
លោក ពេជ្រ ពាន់ ប្រធានសហគមន៍ព្រៃឈើព្រៃព្រះរកា បានថ្លែងថា បទល្មើសព្រៃឈើនិងសត្វព្រៃ ជារឿយៗច្រើនកើតមាននៅពេលរដូវប្រាំង ហើយសកម្មភាពនៃបទល្មើសភាគច្រើនកើតឡើងនៅពេលយប់។ ទោះជាបែបណាក្ដី ក្រុមជនល្មើស មួយចំនួន ត្រូវបានក្រុមប្រជាសហគមន៍ការពារព្រៃឈើ និងក្រុមមន្ត្រីឧទ្យានុរក្ស រួមគ្នាចុះបង្ក្រាបចាប់ឃាត់ខ្លួននិងបានបញ្ជូនទៅឲ្យតុលាការផ្ដន្ទាទោសតាមច្បាប់ជាបន្តបន្ទាប់ដែរ។
លោកបន្តថា៖ «ការបង្ក្រាបបទល្មើសព្រៃឈើនិងសត្វព្រៃ មិនមែនងាយស្រួលប៉ុន្មានទេ ព្រោះជនល្មើសនៅទីងងឹតហើយយើងនៅទីភ្លឺ ប៉ុន្តែ យើងមិនត្រូវរួញរានោះទេ យើងត្រូវបន្តចូលរួមជាមួយសមត្ថកិច្ចពាក់ព័ន្ធ ដើម្បីឃ្លាំមើល ទប់ស្កាត់ និងបង្ក្រាបវាជាប្រចាំ ព្រោះវាមិនមែនជាការទទួលខុសត្រូវរបស់មន្ត្រី ឬក្រសួងបរិស្ថានតែមួយនោះទេ វាជាកាតព្វកិច្ចរបស់យើងគ្រប់គ្នា»។
ដោយឡែក ប្រជាសហគមន៍តំបន់ព្រៃឡង់ក្នុងស្រុកជ័យសែន និងស្រុករវៀង ខេត្តព្រះវិហារ បានសម្ដែងក្ដីព្រួយកង្វល់អំពីការគំរាមកំហែងរបស់ក្រុមជនប្រព្រឹត្តបទល្មើសមកលើពួកគាត់ ដែលជាអ្នកការពារព្រៃឈើ ក្នុងអំឡុងនៃការចុះល្បាតការពារព្រៃឈើក្នុងតំបន់ដែនជម្រកសត្វព្រៃព្រៃឡង់។
អ្នកស្រី ភោគ ហុង តំណាងប្រជាសហគមន៍បណ្ដាញព្រៃឡង់មកពីឃុំធ្មាស្រុកជ័យសែន ខេត្តព្រះវិហារ បានថ្លែងថា មកទល់ពេលនេះ សំណុំរឿងរបស់អ្នកស្រី ដែលបានប្ដឹងប្រឆាំងក្រុមជនសង្ស័យប្រព្រឹត្តបទល្មើសព្រៃឈើ កាលពីដើមខែមករាកន្លងមកនោះ នៅមិនទាន់ឃើញដោះស្រាយចប់នៅឡើយទេខណៈជនសង្ស័យ នៅតែបន្តសកម្មភាព គំរាមកំហែងដោយប្រយោលមកលើអ្នកស្រី និងសកម្មជនដទៃទៀតនៅក្នុងសហគមន៍។
អ្នកស្រីបានបន្តថា៖ «វាពិតជាពិបាកនិយាយណាស់នៅពេលដែលសួរថា តើយើងគួរធ្វើបែបណា ដើម្បីការពារនិងទប់ស្កាត់បទល្មើសព្រៃឈើ និងសត្វព្រៃឲ្យមានប្រសិទ្ធភាពខណៈប្រជាពលរដ្ឋ និង មន្ត្រីរាជការមួយចំនួន នៅតែមិនចូលរួមគោរពនិងអនុវត្តច្បាប់ការពារព្រៃឈើ និងសត្វព្រៃ ហើយពួកគេនៅតែបន្តគាំទ្រអ្នកប្រព្រឹត្តបទល្មើស តាមរយៈការបរិភោគសាច់សត្វព្រៃ និងទិញឈើដែលគ្មានប្រភពច្បាស់លាស់»៕