កោះកុងៈ មងចាប់សត្វស្លាបប្រវែង ៣ ២០០ ម៉ែត្របន្ថែមទៀត ត្រូវបានកម្លាំងមន្ត្រីឧទ្យានុរក្សស្នាក់ការល្បាតស្ទឹងព្រាត់ រួមសហការជាមួយក្រុមឧទ្យានុរក្សនៃអង្គការសម្ព័ន្ធមិត្តការពារសត្វព្រៃ (Wildlife Alliance) រុះរើ និងដកហូតនៅក្នុងពេលដែលពួកគេបានរួមគ្នាចុះល្បាត ហើយប្រទះឃើញគេដាក់ពង្រាយនៅលើវាលស្មៅនៃតំបន់ព្រៃកោងកាងដែលស្ថិតនៅភាគខាងត្បូងជួរភ្នំក្រវាញកាលពីថ្ងៃអង្គារ។
លោក Ionescu Dragos អ្នកសម្របសម្រួលកម្មវិធីចុះល្បាតនៃក្រុមឧទ្យានុរក្សប្រចាំតំបន់ភាគខាងត្បូងជួរភ្នំក្រវាញនៃអង្គការសម្ព័ន្ធមិត្តការពារសត្វព្រៃបានប្រាប់ភ្នំពេញប៉ុស្តិ៍នៅថ្ងៃពុធថា មងចាប់សត្វស្លាបត្រូវបានបង្ក្រាបជាបន្តបន្ទាប់ ប៉ុន្តែបទល្មើសនៅតែបន្តកើតឡើង ពិសេសនៅដើមរដូវរងារនេះ។ ជាក់ស្ដែងកាលពីថ្ងៃអង្គារ ក្រុមឧទ្យានុរក្សនៃអង្គការសម្ព័ន្ធមិត្តការពារសត្វព្រៃស្នាក់ការល្បាតស្ទឹងព្រាត់ក្នុងស្រុកថ្មបាំង ខេត្តកោះកុងបានរុះរើមងចាប់សត្វស្លាបប្រវែង ៣ ២០០ ម៉ែត្រ ដែលត្រូវបានគេដាក់ពង្រាយនៅលើវាលស្មៅនៃតំបន់ព្រៃកោងកាងភាគខាងត្បូងជួរភ្នំក្រវាញដើម្បីចាប់សត្វស្លាបយកទៅលក់។
លោក Dragos បានបន្តថា៖ «កាលពីពេលថ្មីៗនេះ ក្រុមឧទ្យានុរក្សស្នាក់ការកោះពៅ និងត្រពាំងរូងបានរុះរើមងចាប់បក្សីប្រវែង ៤ ៨០០ ម៉ែត្រ និង រឹបអូសយកប្រព័ន្ធឧបករណ៍បំពងសំឡេងចំនួន ៧ គ្រឿង ដែលចាក់សំឡេងបក្សីដើម្បីទាក់ទាញសត្វព្រៃឲ្យចូលក្នុងមងរបស់ពួកគេ។ ខណៈពេលដែលរុះរើចាប់មងខុសច្បាប់របស់អ្នកប្រមាញ់ ក្រុមល្បាតរបស់យើងបានជួយសង្គ្រោះសត្វបក្សីចំនួន ៣១ ក្បាល និងបានដោះលែងពួកវាឲ្យចូលទៅក្នុងព្រៃវិញ»។
ជុំវិញករណីនេះលោក ម៉ម ផល្លា ប្រធានមន្ទីរបរិស្ថានខេត្តកោះកុងបានប្រាប់ភ្នំពេញប៉ុស្តិ៍ថា ក្រុមមន្ត្រីឧទ្យានុរក្សបានសហការជាមួយក្រុមអង្គការសម្ព័ន្ធមិត្តការពារសត្វព្រៃចុះល្បាតស្រាវជ្រាវ និងបង្ក្រាបជាប្រចាំ។ ជាមួយគ្នានេះមន្ត្រីនៃមន្ទីរបរិស្ថានក៏បានសហការជាមួយអាជ្ញាធរមូលដ្ឋាន ចុះអប់រំផ្សព្វផ្សាយជាបន្តបន្ទាប់ដល់ប្រជាពលរដ្ឋឲ្យបញ្ឈប់ការបរបាញ់ដាក់អន្ទាក់ចាប់សត្វព្រៃ និងការរាយសំណាញ់ មងចាប់សត្វស្លាបនេះផងដែរ ប៉ុន្តែបទល្មើសនៅតែបន្តកើតមានដែលទាមទារឲ្យមានការចូលរួមពីគ្រប់ភាគីពាក់ព័ន្ធទាំងអស់ដើម្បីបញ្ឈប់វា។
លោក ផល្លា បានបញ្ជាក់ថា៖ «ជារៀងរាល់ឆ្នាំ ក្រុមឧទ្យានុរក្សយើង និងអង្គការសម្ព័ន្ធភាពការពារសត្វព្រៃ Wildlife Alliance បានសហការគ្នាចុះល្បាតស្រាវជ្រាវ និងបង្ក្រាប និងរឹបអូសវត្ថុតាងនៃបទល្មើសសំណាញ់មងរាប់ពាន់វង់ [ត្បូង] ដែលក្រុមអ្នកប្រមាញ់បានចងពង្រាយលើវាលស្មៅ ដើម្បីចាប់សត្វស្លាប»។
លោកបានឲ្យដឹងថា សំណាញ់ចាប់សត្វស្លាបភាគច្រើនមានប្រវែងរាប់ពាន់ម៉ែត្រ ហើយចាប់សត្វស្លាបណាដែលហើរចូលទៅក្នុងសំណាញ់នោះ។
យ៉ាងណាក៏ដោយបើតាមលោក Dragos ការប្រើសំណាញ់ ឬមងចាប់សត្វស្លាបគឺជាទម្លាប់មួយរបស់ប្រជាជននៅក្នុងខេត្តកោះកុងដែលនៅជាប់ឆ្នេរសមុទ្រមួយនេះ។ ពិសេសការមកដល់នៃពពួកសត្វស្លាបបំផ្លាស់ទីផ្សេងៗទៀតនារដូវរងានេះ គឺជាពេលវេលាដែលពួកគេចាប់ផ្ដើមនូវសកម្មភាពល្មើសច្បាប់ទាំងនេះ។
លោក Dragos បានប្រាប់ទៀតថា៖ «អ្នកប្រមាញ់បានបង្កើតជញ្ជាំងចេញពីសំណាញ់ខ្មៅ ឬស ស្តើងដែលគ្របដណ្ដប់រាប់រយម៉ែត្រ។ ដើម្បីទាក់ទាញសត្វបក្សី អ្នកប្រមាញ់ប្រើសត្វព្រាបឈ្មោលដែលមានភាពចាស់ទុំ ដើម្បីទាក់ទាញបក្សីដទៃទៀត»។
លោកបន្តថា អ្នកប្រមាញ់ខ្លះទៀតបានប្រើឧបករណ៍អេឡិចត្រូនិកឧបករណ៍បំពងសំឡេងដែលភ្ជាប់ម៉ាស៊ីនចាក់ស៊ីឌី និងអាគុយឡាន។ ចម្រៀងបក្សីត្រូវបានគេចាក់ម្តងហើយម្តងទៀត។ វិធីសាស្ត្រនេះត្រូវបានគេប្រើភាគច្រើននៅពេលយប់ស្ថិតនៅឆ្ងាយពីផ្លូវ និងតំបន់សហគមន៍ ហើយប្រសិទ្ធភាពរបស់វា គឺចាប់សត្វបានយ៉ាងច្រើន ស្ទើរតែមិនគួរឱ្យជឿ។
លោក Dragos បានថ្លែងទៀតថា៖ «នៅពេលនេះជារដូវកាលនៃការផ្លាស់ទីលំនៅរបស់បក្សី ហើយក៏ជាពេលដែលក្រុមការងាររបស់យើងត្រូវពង្រឹងការចុះល្បាតការពារតំបន់ឆ្នេរ និងស្រាវជ្រាវបង្ក្រាបអន្ទាក់បក្សីកាន់តែខ្លាំងឡើងថែមទៀត»៕