The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​ឧទ្យានុរក្ស ២៣ នាក់ ទៅ​ចូលរួម​វគ្គ​បណ្ដុះបណ្ដាល​នៅ​ថៃ

មន្ត្រី​ឧទ្យានុរក្ស ២៣ នាក់ ទៅ​ចូលរួម​វគ្គ​បណ្ដុះបណ្ដាល​នៅ​ថៃ

Content image - Phnom Penh Post
មន្ត្រីឧទ្យានុរក្សកម្ពុជាពេលទៅចូលរួម​វគ្គ​បណ្ដុះបណ្ដាលនៅថៃ​​។ សហការី

មន្ត្រី​ឧទ្យានុរក្ស ២៣ នាក់ ទៅ​ចូលរួម​វគ្គ​បណ្ដុះបណ្ដាល​នៅ​ថៃ

ភ្នំពេញៈ ឧទ្យានុរក្ស​ខ្មែរ​ ២៣ ​នាក់ ​កំពុង​ចូលរួម​ក្នុង​វគ្គ​បណ្ដុះបណ្ដាល​ឧទ្យានុរក្ស​នៅ​ប្រទេស ​ថៃ ​ស្ដីពី​ការ​ពង្រឹង​ការ​អនុវត្ត​ច្បាប់​នៅ​តាម​​ព្រំដែន​ដោយ​ផ្ដោត​លើ​កិច្ច​សហប្រតិបត្តិការ​ស្ដីពី​តំបន់​ការពារ​ និង​ការ​គ្រប់គ្រង​តំបន់​ទេសភាព​ព្រម​ទាំង​ការ​អភិរក្ស​ជីវ​ចម្រុះ​។ ​វគ្គ​បណ្ដុះបណ្ដាល​នេះ​ធ្វើ​ឡើង​ចាប់​ពី​ថ្ងៃទី ​៥​ ដល់​ថ្ងៃទី ​១៦​ ខែ​សីហា ​ដែល​រៀបចំ​ឡើង​ដោយ​អង្គការ​ការពារ​សត្វ​ព្រៃ ​Freeland នៅ​តំបន់​ឧទ្យានជាតិ​តាប្រាយ៉ា​ប្រទេស ​ថៃ​។

លោក ​ចាន់ ​សុជាតិ​ គ្រូ​បង្គោល​ម្នាក់​ដែល​មាន​បទពិសោធ​ដើរ​ល្បាត​ព្រៃ​ជាង ​១៤ ​ឆ្នាំ​​ និង​កំពុង​ចូលរួម​វគ្គ​បណ្ដុះបណ្ដាល​នេះ​ បាន​ប្រាប់​ភ្នំពេញ​ប៉ុស្ដិ៍​កាល​ពី​ថ្ងៃ​ចន្ទ​ថា ក្នុង​ចំណោម​ឧទ្យានុរក្ស​ខ្មែរ​ទាំង ​២៣ ​នាក់​ ដែល​ចូលរួម​វគ្គ​បណ្ដុះបណ្ដាល​នោះ​ គឺ ​២០ ​នាក់ ​ជា​មន្ត្រី​ឧទ្យានុរក្ស​ក្រសួង​បរិស្ថាន​មក​ពី​ខេត្ត​ឧត្តរមានជ័យ បន្ទាយមានជ័យ ​និង​ខេត្ត​បាត់ដំបង​ ២ ​នាក់ ​ជា​គ្រូ​បង្គោល ​និង​ម្នាក់​ទៀត​ជា​បុគ្គលិក​របស់​អង្គការ ​CI​ ប្រចាំ​នៅ​តំបន់​ព្រៃ​ឡង់ ​ហើយ​ភាគី​ថៃ ​គឺ​មាន​មន្ត្រី​ឧទ្យានុរក្ស​ចូលរួម​ចំនួន ​១៥ ​នាក់។

លោក​បន្ត​ថា ក្នុង​វគ្គ​បណ្ដុះបណ្ដាល​រយៈពេល ​១១ ​ថ្ងៃ​នេះ​ គឺ​គ្រូ​បង្គោល​កម្ពុជា-ថៃ ធ្វើ​បទ​បង្ហាញ​លម្អិត​ពី​ប្រធានបទ​សំខាន់​ចំនួន ​៤ គឺ​ទី​១ ​បច្ចេកទេស​ដើរ​ល្បាត​ព្រៃ​ ទី២ បច្ចេកទេស​សង្គ្រោះ​បឋម​ដល់​អ្នក​ល្បាត​ព្រៃ​ ទី៣ បច្ចេកទេស​ចាប់​ចង​ជនល្មើស​ និង​ទី៤ បច្ចេកទេស​មើល​ផែនទី ត្រីវិស័យ​ និង​ប្រើប្រាស់​ប្រព័ន្ធ​ GPS​។

លោក​ថា៖ «ឧទាហរណ៍​ថា សិក្ខាកាម​ហ្នឹង​ ពី​មុន​អត់​ចេះ​ប្រើ​ត្រីវិស័យ អ៊ីចឹង! ពួក​ខ្ញុំ​ជា​គ្រូ​ទាំង​គ្រូ​បង្គោល​ខ្មែរ ​និង​ថៃ​ហ្នឹង គឺ​បង្រៀន​ពួក​គាត់​ឱ្យ​ចេះ​ប្រើប្រាស់​ និង​ចេះ​មើល​ផែនទី​ និង​ចេះ​យក​ម៉ាស៊ីន GPS ចុច​មើល​នៅ​លើ​ផែន​ទី និង​ចេះ​ប្រើប្រាស់​ត្រី​វីស័យ ដើម្បី​ឱ្យ​គាត់​ចេះ​ប្រើ​នៅ​ពេល​ដើរ​ចូល​ទៅ​ក្នុង​ព្រៃ គាត់​បាន​ដើរ​ដល់​គោលដៅ​ណា ហើយ​ប្រសិន​បើ​វង្វេង​នៅ​ក្នុង​ព្រៃ តើ​ពួក​គាត់​ត្រូវ​ធ្វើ​យ៉ាង​ម៉េច»។

លោក​បន្ត​ថា៖​ «ជា​ពិសេស​នៅ​ពេល​បោះ​ជំរំ​នៅ​ក្នុង​ព្រៃ​ ពួក​គាត់​ត្រូវ​ចេះ គឺ​ត្រូវ​បោះ​ជំរំ​យ៉ាង​ម៉េច​ដើម្បី​មាន​សុវត្ថិភាព​ និង​អាច​គេច​ផុត​ពី​ការ​លួច​បាញ់​របស់​ជនល្មើស​ ហើយ​ប្រសិន​បើ​ជនល្មើស​លួច​បាញ់ ត្រូវ​ការពារ​ខ្លួន ​ឬ​បាញ់​តបត​អី​យ៉ាង​ម៉េច ​អ៊ីចឹង​!»។

បើតាម​លោក​ ចាន់​ សុជាតិ​ កត្តា​ដែល​អង្គការ​ Freeland នៅ​ប្រទេស ​ថៃ ​អញ្ជើញ​មន្ត្រី​ឧទ្យានុរក្ស​ និង​គ្រូ​បង្គោល​ពី​ខ្មែរ​ទៅ​ទទួល​វគ្គ​បណ្ដុះបណ្ដាល​ និង​ចែក​រំលែក​បទពិសោធ​នេះ​ គឺ​ដោយសារ​តែ​ប្រទេស​ទាំង ​២ ​មាន​តំបន់​ដែល​ត្រូវ​ការពារ​ និង​អភិរក្ស​ធនធាន​ធម្មជាតិ​នៅ​ជាប់​គ្នា​។

គ្រូ​បង្គោល​រូប​នេះ​​បន្ថែម​ថា​ កន្លង​មក​អង្គការ​ Freeland ​បាន​រៀបចំ​ឱ្យ​មាន​វគ្គ​បណ្ដុះបណ្ដាល​ជា​ច្រើន​លើក​រួច​មក​ហើយ​​នៅ​ក្នុង​ប្រទេស ​ថៃ​ ដូចជា​ នៅ​ឆ្នាំ ​២០១២​ ឆ្នាំ ​២០១៥ ​និង​ឆ្នាំ ​២០១៩ ​នេះ​។

ចំណែក​លោក​ កត​ បូរ៉ាន ​ប្រធាន​មន្ទីរ​បរិស្ថាន​ខេត្ត​បាត់ដំបង​បាន​ប្រាប់​ភ្នំពេញ​ប៉ុស្ដិ៍​កាល​ពី​ថ្ងៃ​ចន្ទ​ដែរ​ថា​ បាត់ដំបង​បាន​បញ្ជូន​មន្ត្រី​ឧទ្យានុរក្ស​ចំនួន ​៣ ​នាក់ ​ទៅ​ចូលរួម​វគ្គ​បណ្ដុះបណ្ដាល​នៅ​ប្រទេស ​ថៃ ​នេះ ​ដោយ​លោក​បាន​អះអាង​ថា កន្លង​មក​មន្ត្រី​ដែល​បញ្ជូន​ទៅ​បណ្ដុះបណ្ដាល​គឺ​បន្ទាប់​មក​តែង​ក្លាយ​ជា​គ្រូ​បង្គោល ​ដើម្បី​ចែក​រំលែក​ចំណេះ​ដឹង​បន្ត​ទៅ​កាន់​មន្ត្រី​ឧទ្យានុរក្ស​ផ្សេង​ទៀត​។

លោក​ថា៖ ​«វគ្គ​ហ្នឹង​ពិសេស​ដែរ​ព្រោះ​តាម​អ្វី​ដែល​ក្ដាប់​បាន​ពី​មន្ត្រី​ខ្ញុំ​ដែល​រាយការណ៍​ពី​ថៃ​មក វា​មាន​ដូច​ជា ​វិធីសាស្ដ្រ​ដើរ​ល្បាត វិធីសាស្ដ្រ​ការពារ​ខ្លួន​ពី​សត្វ​សាហាវ ​និង​មាន​វិធីសាស្ដ្រ​ជា​ច្រើន​ផ្សេង​ទៀត អ៊ីចឹង​មន្ត្រី​យើង​ទទួល​បាន​ចំណេះ​ច្រើន​»​។

បើ​តាម​លោក ​កត​ បូរ៉ាន ខេត្ត​បាត់ដំបង​ គឺ​មាន​តំបន់​ការពារ​ចំនួន ​២ ​នៅ​ជាប់​ព្រំដែន​​ថៃ​មាន​ប្រវែង​ប្រហែល ​៤០ ​គីឡូ​ម៉ែត្រ ​គឺ​តំបន់​ប្រើប្រាស់​ច្រើន​យ៉ាង​សំឡូត​ និង​តំបន់​ដែន​ជម្រក​សត្វ​ព្រៃ​ភ្នំ​សំកុស។​

កម្ពុជា​មាន​ខេត្ត​ចំនួន ​៧ ស្ថិត​នៅ​ជាប់​ព្រំដែន​ថៃ​ដូច​ជា​ ខេត្ត​កោះកុង ខេត្ត​ពោធិ៍សាត់ ខេត្ត​ប៉ៃលិន ​ខេត្ត​បាត់ដំបង​ ខេត្ត​បន្ទាយមានជ័យ ខេត្ត​ឧត្តរមានជ័យ​ និង​ខេត្ត​ព្រះវិហារ​៕​

អត្ថបទគួរចាប់អារម្មណ៍

  • ជនជាតិ​ភាគតិច និង​សង្គម​ស៊ីវិល​ប្ដឹង​ជំទប់​ឃុំ និង​អភិបាលរង​ខេត្ត ​រឿង​ចេញ​បណ្ណ​សម្គាល់​ដី​ជាន់​លើ​ដី​ព្រៃ

    មណ្ឌលគិរី: ពលរដ្ឋ​សហគមន៍​ជនជាតិ​ដើម​ភាគតិច និង​សង្គម​ស៊ីវិល​ចំនួន ៦ ​នាក់​ បាន​ដាក់​ពាក្យបណ្ដឹង​ចំនួន ២ ​ដាច់​ ដោយឡែក​ពី​គ្នា​ប្ដឹង​មនុស្ស ៤ ​នាក់ ​ទៅ​តុលាការខេត្ត​ក្នុង​នោះ​មាន​ជំទប់​ទី​ ១ ​ឃុំ​ប៊ូស្រា​ម្នាក់ និង​អភិបាលរង​ខេត្តមណ្ឌលគិរី​ម្នាក់​ដោយ​ចោទ​ពាក់ព័ន្ធ​ការចេញ​បណ្ណ​សម្គាល់​ម្ចាស់​ដីធ្លី​ជាន់​លើដី​គម្រប​ព្រៃឈើ និង​បទ​ចោទ​ពាក់ព័ន្ធ​លួច​គាស់​យក​ថ្ម​ធម្មជាតិ​

  • កាណាដា​ពិន័យ VW ១៥០ ​លាន​ដុល្លារ

    ក្រុងតូរ៉ុនតូៈ តុលាការ​ក្នុង​ទីក្រុង​តូរ៉ុនតូ​កាលពី​ថ្ងៃ​ពុធ​បាន​បញ្ជា​ឲ្យ​ក្រុមហ៊ុន Volkswagen (VW) បង់ប្រាក់​ពិន័យ ១៩៦,៥ លាន​ដុល្លារ​កាណាដា (១៥០ ​លាន​ដុល្លារ​អាមេរិក​) បន្ទាប់ពី​ក្រុមហ៊ុន​ផលិត​រថយន្ត​មួយ​នេះ​បាន​សារភាព​កំហុស​ចំពោះ​ការរំលោភច្បាប់​បរិស្ថាន​ក្នុង​រឿងអាស្រូវ​បោក​បន្លំ​ការបញ្ចេញ​កាបូន​។

  • សហជីព​បារាំង​​ព្យាយាម​បន្ត​ការ​តវ៉ា​ប្រឆាំង​ការ​កែ​ទម្រង់​ប្រាក់​សោធននិវត្តន៍​​ ដើម្បី​ដាក់​សម្ពាធ​លើ​រដ្ឋាភិបាល​​

    ក្រុង​ប៉ារីស៖ ក្រុម​សហជីព​បារាំង​កាល​ពី​ថ្ងៃ​ពុធ​ បាន​បន្ត​ធ្វើ​​កូដកម្ម​ជា​ច្រើន​ ដោយ​​មាន​​បំណង​បង្កើន​សម្ពាធ​​​​ទៅ​លើ​រដ្ឋាភិបាល​មុន​នឹង​រដ្ឋាភិបាល​នេះ​ ធ្វើ​ការ​បង្ហាញ​ការ​កែ​ទម្រង់​ប្រាក់​សោធននិវត្តន៍​ចុង​ក្រោយ ​ដែល​បាន​​​ជំរុញ​ឲ្យ​មាន​ការ​តវ៉ា​ពី​បញ្ហា​ការងារ​ធំ​បំផុត​នៅ​បារាំង​ជា​ច្រើន​ទសវត្សរ៍​នោះ​​។ ​

  • លាភ ​រដ្ឋា ​និង ​ផាន់ ​គ្រាន់ ​ប៉ះ​ថៃ​ចំណូល​ថ្មី​

    ភ្នំពេញ៖ ​អ្នក​លេង​កណ្តាប់​ដៃ​របស់​កម្ពុជា​ចំនួន ​២ ​នាក់ គឺ ​លាភ ​រដ្ឋា និង​ ផាន់ ​គ្រាន់​ ​នឹង​​ត្រូវ​បង្ហាញ​ខ្លួន​រួមគ្នា នៅ​​លើ​សង្វៀន​ SEATV នា​រសៀល​ថ្ងៃ​សៅរ៍​ស្អែក​នេះ ​ដោយ​ពួក​គេ​ត្រូវ​ជួប​ជាមួយ​​កីឡាករ​ថៃ​​ចំណូល​ថ្មី​ មិន​ធ្លាប់​មក​ប្រកួត​ក្នុង​សង្វៀន​នៅ​​ប្រទេស ​កម្ពុជា ​នោះ​ទេ​​។