The Phnom Penh Post Search

Search form

Logo of Phnom Penh Post newspaper Phnom Penh Post - មន្ត្រី​ឲ្យ​ពលរដ្ឋ​ប្រយ័ត្ន​ជំងឺ​ឆ្លង​ផ្លូវ​ដង្ហើម Mers




មន្ត្រី​ឲ្យ​ពលរដ្ឋ​ប្រយ័ត្ន​ជំងឺ​ឆ្លង​ផ្លូវ​ដង្ហើម Mers

Content image - Phnom Penh Post
ពលរដ្ឋ​​​កូរ៉េ​ខាង​ត្បូង​បិទ​ម៉ាស​​ដើរ​តាម​ផ្លូវ​ក្នុង​ទីក្រុង សេអ៊ូល ដែល​​មាន​​ករណី​​​ឆ្លង​ជំងឺ​ផ្លូវ​ដង្ហើម​មជ្ឈិមបូព៌ា (Mers) នេះ។ AFP

មន្ត្រី​ឲ្យ​ពលរដ្ឋ​ប្រយ័ត្ន​ជំងឺ​ឆ្លង​ផ្លូវ​ដង្ហើម Mers

ភ្នំពេញៈ មន្ត្រី​សុខាភិបាល​កម្ពុជា​បាន​អំពាវនាវ​ឲ្យ​ពលរដ្ឋ ដែល​មាន​បំណង​ធ្វើ​ដំណើរ​ទៅ​​បណ្តា​ប្រទេស​នៅ​មជ្ឈិមបូព៌ា ត្រូវ​ប្រុងប្រយ័ត្ន​ខ្ពស់ ចំពោះ​ការ​ឆ្លង​ជំងឺ​ផ្លូវ​ដង្ហើម​មជ្ឈិមបូព៌ា (Mers) ដែល​ជំងឺ​នេះ​ក៏​កំពុង​រាតត្បាត នៅ​ប្រទេស​កូរ៉េ​ខាង​ត្បូង​ ដែល​មាន​ពលករ​​កម្ពុជា ជាង​ ៣ ម៉ឺន​នាក់​កំពុង​ធ្វើការ​នៅ​ទី​នោះ​។

លោក លី សុវណ្ណ អ្នក​នាំពាក្យ​នៃ​ក្រសួង​សុខាភិបាល បាន​ប្រាប់​ភ្នំពេញ​ប៉ុស្តិ៍​​កាលពី​ម្សិលមិញ​ថា ក្រសួង​បារម្ភ​ចំពោះ​ជំងឺ​ឆ្លង​មួយ​នេះ ដែល​កើត​មាន​នៅក្នុង​ប្រទេស​កូរ៉េ ហើយ​បាន​ដាក់​វិធានការ​ឲ្យ​ពលរដ្ឋ​នៅ​កម្ពុជា និង​​ពលករ​​នៅ​កូរ៉េ ស្វែង​យល់​បន្ថែម​ពី​វិធានការ​ទប់ស្កាត់ និង​ការពារ​ខ្លួន​ពី​ជំងឺ​នេះ បើ​ទោះ​ជា​មិន​ទាន់​មាន​ការ​សង្ស័យ​​ពី​ការ​ឆ្លង​រោគ​សញ្ញា​ផ្លូវ​ដង្ហើម​ប្រភេទ​នេះ​មក​ដល់​កម្ពុជា​ក៏ដោយ​។

លោក​ថា៖ «សូម​បងប្អូន​ប្រយ័ត្ន បើ​មាន​គ្រុនក្តៅ​លើស​ពី​ ៣៨ ​អង្សា មាន​ក្អក ហត់ និង​រាករូស សូម​ប្រញាប់​រក​មន្ទីរពេទ្យ ឬ​កន្លែង​ព្យាបាល​ជា​បន្ទាន់។ បងប្អូន​ពលករ​នៅ​កូរ៉េ ត្រូវ​ពាក់​ម៉ាស់​មុខ កុំ​ប៉ះ​គេ»។

បើ​តាម​ទីភ្នាក់ងារ​ព័ត៌មាន​ចិន​ស៊ីនហួ​ផ្សាយ​កាលពី​ម្សិលមិញ​ថា ករណី​ជំងឺ​រោគ​សញ្ញា​ផ្លូវ​ដង្ហើម Mers ដែល​បង្ក​ឡើង​ដោយ​មេរោគ​ឈ្មោះ កូរ៉ូណាវីរុស (Corona Virus) បាន​រកឃើញ​មាន​ ៣៥ ​នាក់​ហើយ មាន​ជំងឺ​នេះ នៅ​ប្រទេស​កូរ៉េ។

ការ​អំពាវនាវ​របស់​មន្ត្រី​កម្ពុជា​នេះ ក៏​បាន​ធ្វើ​ឡើង​តាមរយៈ​ទំព័រ​ហ្វេសប៊ុក​របស់ «​នាយកដ្ឋាន​ប្រយុទ្ធ​ជំងឺ​ឆ្លង cdc» នៃ​ក្រសួង​សុខាភិបាល កាលពី​ថ្ងៃ​ពុធ​ភ្លាមៗ​ក្រោយ​ពេល​ប្រទេស​កូរ៉េ​ខាង​ត្បូង​បាន​រក​ឃើញ ៣០ ​​នាក់​មាន​ជំងឺ​នេះ និង​មនុស្ស​ពីរ​នាក់​បាន​ស្លាប់​ដោយសារ​ជំងឺ​ Mers នេះ​នៅ​ត្រឹម​ថ្ងៃ​អង្គារ​។ ជំងឺ​នេះ ឆ្លង​មក​ដល់​កូរ៉េ​ខាង​ត្បូង តាមរយៈ​អ្នក​ដំណើរ​កូរ៉េ​ម្នាក់​មាន​ជំងឺ​នេះ ឆ្លង​មកពី​មជ្ឈិមបូព៌ា។ ក្រុម​អ្នក​វិទ្យាសាស្ត្រ​មាន​ការ​សង្ស័យ​ថា ជំងឺ​នេះ ចម្លង​មកពី​សត្វ​អូដ្ឋ និង​សត្វ​ព្រៃ​ដទៃ​ទៀត ហើយ​វា​អាច​ឆ្លង​ពី​អ្នក​ឈឺ​ម្នាក់ ទៅ​មនុស្ស​ម្នាក់​ទៀត តាមរយៈ​ការ​ប៉ះពាល់​ផ្ទាល់​។

នាយកដ្ឋាន​ប្រយុទ្ធ​នឹង​ជំងឺ​ឆ្លង បាន​ដាក់​សារ​នៅក្នុង​បណ្តាញ​សង្គម​ហ្វេសប៊ុក ក្រើន​រំឭក​ដល់​ពលរដ្ឋ​ទូទៅ​ផង​ដែរ​ថា «បើសិន​ជា​អ្នក​ទើប​ត្រឡប់​មកពី​ឧបទ្វីប​មជ្ឈិមបូព៌ា និង​មាន​រោគសញ្ញា​គ្រុនក្តៅ ក្អក ពិបាក​ដកដង្ហើម និង​រាក អំឡុង​ពេល​ ១៤ ថ្ងៃ អ្នក​ត្រូវ​ទៅ​មន្ទីរពេទ្យ​ជា​បន្ទាន់ និង​ប្រាប់​គ្រូពេទ្យ​ថា​ អ្នក​ទើប​មកពី​តំបន់​មជ្ឈិមបូព៌ា»។

ចំពោះ​វិធានការ​កាត់បន្ថយ​ហានិភ័យ​នៃ​ការ​ឆ្លង​ជំងឺ​នេះ​មាន​ការ​លាង​ដៃ​ឲ្យ​ស្អាត​គ្រប់​ពេល ចៀសវាង​ការ​ហូប​សាច់​ចម្អិន​មិន​ល្អ បន្លែ​ឆៅ ផ្លែឈើ​មិន​​ចិត​សម្បក និង​ទឹក​មិន​មាន​សុវត្ថិភាព​និង​ចៀសវាង​ការ​ទៅ​លេង​កសិដ្ឋាន​ចិញ្ចឹម​សត្វ​។

លោក សុវណ្ណ បន្ត​ថា កម្ពុជា​មិន​ទាន់​មាន​ការ​សង្ស័យ​ឆ្លង​នូវ​ជំងឺ​នេះ​នៅ​ឡើយ​ទេ។ កម្ពុជា​ក៏​មាន​មន្ទីរ​ពិសោធន៍ សម្រាប់​រក​មេរោគ កូរ៉ូណាវីរុស ដែល​បង្ក​ឲ្យ​មាន​ជំងឺ Mers នេះ​ដែរ​។

MERS ជា​ជំងឺ​ផ្លូវ​ដង្ហើម​ដែល​គេ​បាន​រាយការណ៍​ដំបូង​នៅ​ប្រទេស អារ៉ាប៊ីសាអ៊ូឌីត​ក្នុង​ឆ្នាំ​ ២០១២។ មក​ទល់​ពេល​នេះ​ប្រទេស​ក្នុង​ឧបទ្វីប​មជ្ឈិមបូព៌ា កំពុង​រាតត្បាត​ជំងឺ​ Mers នេះ​រួមមាន​ប្រទេស​ហ្ស៊កដានី កូវ៉ែតអូម៉ង់ កាតា អារ៉ាប៊ីសាអូតឌីត អេមីរ៉ាតអារ៉ាប់រួម និង​យេម៉ែន​។

អង្គការ​សុខភាព​ពិភពលោក​បាន​រាយការណ៍ ករណី​សរុប​នៃ​អ្នក​កើត​ជំងឺ​នេះ​មាន​ចំនួន​​ ១០០០ ​នាក់ ដែល​ក្នុង​នោះ​មាន​ជាង ​៤០០ ​ករណី​បាន​ស្លាប់​តាំងពី​ឆ្នាំ ២០១២ មក​៕

អត្ថបទគួរចាប់អារម្មណ៍