.jpg)
ផ្ទះប្រជាពលរដ្ឋដែលរងផលប៉ះពាល់ដោយជំនន់ទឹកភ្លៀង។ សហការី
ព្រះសីហនុៈ គណៈកម្មាធិការជាតិគ្រប់គ្រងគ្រោះមហន្តរាយ ប្រកាសឲ្យប្រជាពលរដ្ឋមានការប្រុងប្រយ័ត្ន នៅពេលធ្វើដំណើរឆ្លងកាត់ចំណុចស្ពានសំរោង ស្ថិតក្នុងស្រុកកំពង់សិលា ខេត្តព្រះសីហនុ ដែលអាចប្រឈមនឹងការជន់លិច ។
ការប្រកាសបែបនេះ បន្ទាប់ពីក្រសួងធនធានទឹក និងឧតុនិយម បានជូនដំណឺងដល់ប្រជាពលរដ្ឋឲ្យយកចិត្តទុកដាក់ និងបង្កើនការប្រុងប្រយ័ត្ន ព្រោះកម្ពុជានឹងមានភ្លៀង និងខ្យល់ខ្លាំងនៅតំបន់ខេត្ដជាប់សមុទ្រពិសេសក្នុងភូមិសាស្ដ្រ ខេត្ដកោះកុង និងខេត្ដព្រះសីហនុ ចាប់ពីថ្ងៃទី ៣ ដល់ថ្ងៃទី ៦ ដោយសារឥទ្ធិពលខ្យល់ព្យុះ។
លោក កែវ វី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានប្រកាសឲ្យប្រជាពលរដ្ឋមានការប្រុងប្រយ័ត្ន នៅពេលធ្វើដំណើរឆ្លងកាត់ចំណុចស្ពានសំរោង ស្ថិតក្នុងស្រុកកំពង់សិលា ខេត្តព្រះសីហនុ ព្រោះតែស្ពាននេះអាចប្រឈមនឹងការជន់លិច បើភ្លៀងនៅតែបន្តធ្លាក់។
លោកបញ្ជាក់ថា៖ «ក្នុងរយៈពេលប៉ុន្មានថ្ងៃនេះ ដោយសារតែមានឥទិ្ធពលកន្ទុយព្យុះមក ធ្វើឲ្យមានភ្លៀង តាមតំបន់ព្រំដែន និងតំបន់មាត់សមុទ្រ ដែលធ្វើឲ្យប៉ះពាល់ច្រើន។ ដោយភាគច្រើននៅតំបន់មាត់សមុទ្រ ដែលរងការប៉ះពាល់ច្រើន ដូចជាក្នុងខេត្តព្រះសីហនុ ដែលមានភ្លៀងលិចម្តងជា២ដង ក្នុងខេត្តកោះកុង កែប និងខេត្តកំពត ក៏មានការជន់លិច តែមិនធ្ងន់ធ្ងរនោះទេ»។
លោកបញ្ជាក់បន្តថា៖ «ឥឡូវកំពុងមានបញ្ហាប៉ះពាល់នឹងស្ពាន ស្ទឹងសំរោង ដោយសារតែនៅសល់តែជាងកន្លះម៉ែត្រទៀតទេ ដែលវាអាចដល់កម្រិតប្រកាសអាសន្ន និងអាចបង្កការជន់លិច ដូចឆ្នាំមុន ខណៈពេលនេះ ក៏មានការបាក់ស្រុះក្បាលស្ពានអូរគគីរ ក្នុងព្រំដែនរវាងស្រុកកំពង់សិលាហ្នឹងដែរ។ មានការប៉ះពាល់បែបនេះ ខាងអាជ្ញាធរជំនាញកំពុងមានការជួសជុល ហើយយើងបានត្រៀមកម្លាំងចាំពិនិត្យ និងតាមដានស្ថានភាពនៅក្នុងតំបន់នេះ មានការកើនឡើងទឹកបន្ថែមទៀត»។
លោក កែវ វី បានអះអាងថា បើសិនជាទឹកនៅតែបន្តជន់ឡើងដល់កម្រិតដែលប្រកាសអាសន្ន ដោយមានកម្ពស់ទឹកពី ១ ទៅ ២ តឹកនៅលើផ្លូវនោះ ការចរាចររថយន្តធុនធំ នឹងត្រូវផ្អាកការឆ្លងកាត់ ហើយក្នុងករណីកម្ពស់ទឹកនេះ ឡើងទៅដល់ ៥ តឹក នោះគ្រប់យានយន្តទាំងអស់ នឹងត្រូវផ្អាក។ ប៉ុន្តែយ៉ាងណាលោកអះអាងថា ជំនន់ទឹកភ្លៀង ក្នុងឆ្នាំនេះ មានលក្ខណៈយឺតជាងឆ្នាំមុន ខណៈឆ្នាំ ២០១៨ កន្លងទៅ គឺចាប់ពីពាក់កណ្តាលខែកក្កដា គឺតំបន់នេះ មានការជន់លិចបាត់ទៅហើយ។
លោក ភូមី មុន្នរិទ្ធ មន្ត្រីប្រចាំការនៃមន្ទីរសាធារណការ ខេត្តព្រះសីហនុ បានប្រាប់ភ្នំពេញប៉ុស្តិ៍ពីម្សិលមិញថា ជាទូទៅក្នុងតំបន់ស្ពានសំរោង ក្នុងស្រុកកំពង់សិលានេះ នឹងមានការជន់លិច បើកម្ពស់ទឹកឡើងដល់ ជាង ៥ ម៉ែត្រ។ ប៉ុន្តែលោកបញ្ជាក់ថា មកដល់ម៉ោង ៥ ល្ងាចម្សិលមិញ គឺកម្ពស់ទឹកនៅហ្នឹង ត្រឹម ៤ ម៉ែត្រ ៦៥ សង់ទីម៉ែត្រ។
លោកបញ្ជាក់ថា៖ «វាកំពុងនៅថេរ ដែលមិនទាន់ឡើងទៀតទេ ហើយការធ្វើដំណើររបស់ប្រជាពលរដ្ឋនៅតាម ដងផ្លូវគឺធម្មតា ប៉ុន្តែវាអាចនឹងមានការឡើងបន្ថែមទៀត បើវាឡើងដល់កម្រិតមួយហ្នឹង បើភ្លៀងនៅតែបន្តធ្លាក់ យើងប្រកាសអាសន្ន ហើយយើងនៅចាំមើលទីនេះជាក់ស្តែង បើមានការប្រែប្រួលយ៉ាងណាទៀត យើងនឹងផ្អាកបណ្តោះអាសន្ន»។
ខណៈជំនន់ទឹកភ្លៀង កាលពីម្សិលមិញដែរ បានបណ្តាលឲ្យជន់លិចផលដំណាំ ផ្លូវធ្វើដំណើរ និងលំនៅឋានប្រជាពលរដ្ឋមួយចំនួន នៅឃុំចំនួន ២ ក្នុងស្រុកសំឡូត ខេត្តបាត់ដំបង។
មន្ត្រីនគរបាលប្រចាំស្រុកសំឡូត ខេត្តបាត់ដំបង ដែលសុំមិនបញ្ចេញឈ្មោះ បានប្រាប់ភ្នំពេញប៉ុស្តិ៍ពីម្សិលមិញថា បន្ទាប់ពីមានភ្លៀងធ្លាក់ជាប់គ្នា ២ ថ្ងៃ បានបណ្តាលឲ្យទឹកស្ទឹង ដែលហូរកាត់ក្នុងស្រុកសំឡូត ខេត្តបាត់ដំបង បានជន់លិច ធ្វើឲ្យប៉ះពាល់ដល់ឃុំចំនួន ២ គឺឃុំតាតោក និងឃុំសំឡូត។ ទឹកជំនន់នេះ បានបង្កឲ្យប៉ះពាល់ដំណាំ ផ្លូវធ្វើដំណើរ និងលំនៅឋានប្រជាពលរដ្ឋមួយចំនួន ប៉ុន្តែលោកថា វាបានស្រកថមថយមកធម្មតាបន្តិចម្តងវិញ ដោយមិនបណ្តាលឲ្យប៉ះពាល់អាយុជីវិតប្រជាពលរដ្ឋនោះទេ។
លោកបញ្ជាក់ថា៖ «វាមិនទាន់មានខូចខាតអីធំទេ គ្រាន់តែឡើងមួយយប់ ហើយព្រឹកឡើងវាស្រកទៅវិញអស់ វាមានអីគ្រាន់តែមានភ្លៀងមួយប្រាវ។ វាលិចប៉ះពាល់ផលដំណាំខ្លះដែរ ដូចជាស្វាយ ពោត ប្រមាណ ៤ ទៅ ៥ ហិកតា តែចំនួននេះ មិនទាន់សរុបអស់នោះទេ ចាំមើលទឹកវាស្រកអស់សិន ថានឹងមានអ្វីប៉ះពាល់បន្តទៀត។ តែវាអត់មានប៉ះពាល់អ្វីធំដុំទេ ព្រោះទឹកភ្លៀវនេះ បានស្រកទៅវិញលឿន ហើយក៏មិនមានភ្លៀងធ្លាក់បន្តទៀតដែរ»៕
