ភ្នំពេញៈ រដ្ឋលេខាធិការ និងជាអ្នកនាំពាក្យក្រសួងបរិស្ថានលោក នេត្រ ភក្ត្រា បានអះអាងថា កម្ពុជាកំពុងតែផ្តោតការយកចិត្តទុកដាក់ជាសំខាន់ទៅលើការកាត់បន្ថយការបំភាយឧស្ម័នផ្ទះកញ្ចក់ក្នុងបរិយាកាស ដើម្បីជាការចូលរួមចំណែកការពារការប្រែប្រួលអាកាសធាតុ ខណៈមន្ត្រីជំនាញថាកម្ពុជាត្រូវព្យាយាមកាត់បន្ថយឧស្ម័នផ្ទះកញ្ចក់ឱ្យបានចំនួន ២១ លានតោននៅក្នុង ១ ឆ្នាំ។
ការលើកឡើងរបស់លោក នេត្រ ភក្ត្រា បែបនេះបានធ្វើឡើងនៅក្នុងពិធីផ្សព្វផ្សាយរបាយការណ៍បច្ចុប្បន្នភាពការចូលរួមចំណែករបស់ជាតិ ដើម្បីអនុវត្តអនុសញ្ញាក្របខ័ណ្ឌសហប្រជាជាតិស្តីពីការប្រែប្រួលអាកាសធាតុនៅក្រសួងបរិស្ថានពីថ្ងៃទី ៨ ខែកុម្ភៈ។
លោក នេត្រ ភក្ត្រា បានឱ្យដឹងថា កម្ពុជាងាយនឹងរងគ្រោះនូវបញ្ហាការប្រែប្រួលអាកាសធាតុនេះ ហេតុនេះទើបវិធានការបន្សុំាក៏ដូចជាវិធានការក្នុងការចូលរួមទប់ស្កាត់ការបំភាយឧស្ម័នផ្ទះកញ្ចក់ទៅក្នុងបរិយាកាសគឺជាបញ្ហាអាទិភាព។ បញ្ហាការប្រែប្រួលអាកាសធាតុនេះ ប្រសិនបើមិនមានវិធានការទប់ស្កាត់ទេនោះ វានឹងធ្វើឱ្យមានផលប៉ះពាល់ដល់ផលិតផលសរុបក្នុងស្រុក។
លោកថ្លែងថា៖ «កិច្ចការដែលប្រទេសកម្ពុជាបានផ្តោតជាសំខាន់គឺពាក់ព័ន្ធជាមួយនឹងការកាត់បន្ថយ និងការបំភាយឧស្ម័នផ្ទះកញ្ចក់ ការដាក់ចុះនូវផែនការ និងកម្មវិធីផ្សេងៗដូចជា ការប្រើប្រាស់នូវថាមពលកកើតឡើងវិញ ដូចជាប្រព័ន្ធសូឡាជាដើម»។
លោក ភក្ត្រា បានបន្តថា រដ្ឋាភិបាលកម្ពុជាបានកំណត់នូវចក្ខុវិស័យមួយ នៅក្នុងឆ្នាំ ២០៣០ កសាងខ្លួនឱ្យទៅជាប្រទេសមួយ ដែលមានចំណូលមធ្យមកម្រិតខ្ពស់ ហើយនៅឆ្នាំ ២០៥០ គឺជាប្រទេសដែលមានចំណូលខ្ពស់។ «កម្ពុជាជាប្រទេសដែលងាយរងគ្រោះនឹងការប្រែប្រួលអាកាសធាតុ ប្រសិនបើមិនមានផែនការសកម្មភាពនេះ ដាក់ចុះក្នុងការទប់ស្កាត់លើការប្រែប្រួលអាកាសធាតុទេគឺគោលដៅចក្ខុវិស័យនេះមិនអាចសម្រេចបាននោះទេ»។
លោក ទិន ពន្លក រដ្ឋលេខាធិការក្រសួងបរិស្ថានបានថ្លែងដែរថា ដើម្បីបន្សាបឧស្ម័នផ្ទះកញ្ចក់ គេត្រូវការវិធានការ ២ សំខាន់ ទី១ គឺវិធានការបន្សុំា និងទី២ គឺកាត់បន្ថយ។ ដំណើរការនេះផ្តោតលើវិស័យជាអាទិភាពសម្រាប់សេដ្ឋកិច្ចជាតិ ដូចជា កសិកម្មវិស័យសំណង់ វិស័យថាមពល សុខភាពសាធារណៈ ឧស្សាហកម្ម ការប្រើប្រាស់ដី និងការគ្រប់គ្រងសំណល់ វិស័យទេសចរណ៍ជាដើម។
លោកថ្លែងថា៖ «នៅឆ្នាំ ២០៣០ យើងនឹងប្តេជ្ញាធ្វើយ៉ាងណានឹងកាត់បន្ថយឱ្យបាន ៤០ ភាគរយ នៃការបញ្ចេញឧស្ម័នផ្ទះកញ្ចក់ធៀបជាមួយនឹងកម្រិតអភិវឌ្ឍន៍សេដ្ឋកិច្ចសង្គមតាមទម្លាប់ធម្មតា ស្មើនឹងប្រហែល ៦៥ លានតោន សមមូលឧស្ម័នផ្ទះកញ្ចក់»។
លោក ជួប ប៉ារីស៍ អគ្គនាយកនៃអគ្គនាយកដ្ឋានចំណេះដឹង និងព័ត៌មានបរិស្ថានបានថ្លែងដែរថា តាមរយៈរបាយការណ៍បច្ចុប្បន្នភាពការចូលរួមចំណែករបស់ជាតិដើម្បីអនុវត្តអនុសញ្ញាក្របខ័ណ្ឌសហប្រជាជាតិស្តីពីការប្រែប្រួលអាកាសធាតុ គឺជារបាយការណ៍ប្តេជ្ញាចិត្តក្នុងនាមជាតិកម្ពុជាដើម្បីរួមគ្នាកាត់បន្ថយឧស្ម័នផ្ទះកញ្ចក់នៅលើភពផែនដីឲ្យមកកម្រិតមួយល្មមកុំឱ្យផែនដីក្តៅពេកដែលនាំឱ្យមានការប្រែប្រួលអាកាសធាតុ។
លោកបានថ្លែងថា៖ «តាមសេណារីយោធម្មតានោះគឺថា បើយើងមិនចាត់ការទេនៅឆ្នាំ ២១០០ សីតុណ្ហភាពលើលោកយើងនឹងកើនពី ៤ ទៅ ៥ អង្សាជាមធ្យម នោះទឹកជំនន់ ខ្យល់ព្យុះកាន់តែច្រើន អ៊ីចឹងធ្វើម៉េចបន្ថយឱ្យបានត្រឹមតែល្មមដើម្បីរក្សាសីតុណ្ហភាពលើលោកនេះនៅឆ្នាំ ២១០០ កុំឱ្យលើស ២ អង្សា»។
លោកបានបន្តថា កម្ពុជាត្រូវព្យាយាមធ្វើយ៉ាងណាកាត់បន្ថយឧស្ម័នផ្ទះកញ្ចក់ក្នុងបរិយាកាសសម្រាប់ប្រទេសកម្ពុជាឱ្យបាន ២១ លានតោន ក្នុង ១ ឆ្នាំ ហើយក្នុងនោះផ្នែកខាងកសិកម្ម និងព្រៃឈើអាចមានលទ្ធភាពកាត់ដល់ទៅ ៦ ទៅ ៧ លានតោនក្នុង ១ ឆ្នាំ បើមានលទ្ធភាពគ្រប់គ្រាន់។
លោក វ៉ាន់ មុនីនាថ អគ្គលេខាធិការនៃអគ្គលេខាធិការដ្ឋានក្រុមប្រឹក្សាជាតិអភិវឌ្ឍន៍ដោយចីរភាពបានថ្លែងថា ការបញ្ចេញឧស្ម័នផ្ទះកញ្ចក់សរុបក្នុងឆ្នាំ ២០៣០ ត្រូវបានគេរំពឹងថានឹងកើនឡើងដល់ ៧៩ លានតោននៃសមមូលឧស្ម័នកាបូនិចក្នុង ១ ឆ្នាំ ខណៈការបញ្ចេញឧស្ម័នផ្ទះកញ្ចក់សរុបទាំងអស់ រាប់បញ្ចូលទាំងវិស័យព្រៃឈើ និងការប្រើប្រាស់ដីផ្សេងទៀតត្រូវបានគេរំពឹងថាកើនឡើងដល់ ១៥៥ លានតោន នៃសមមូលឧស្ម័នកាបូនិចក្នុង ១ ឆ្នាំ។
លោកបានបញ្ជាក់ថា៖ «ប្រសិនបើយើងអត់កាត់បន្ថយទេ នោះនៅឆ្នាំ ២០៣០ ហ្នឹងអាចនឹងចេញឧស្ម័នផ្ទះកញ្ចក់ហ្នឹង ១៥៥ លានតោន តែបើយើងអនុវត្តតាមវិធានការដែលមានទាំងវិធានការកាត់បន្ថយ និងវិធានការបន្សុំា យើងអាចកាត់បន្ថយរហូតទៅដល់ ៦៥ លានតោន»៕