ត្បូងឃ្មុំៈ ប្រតិភូគណៈកម្មាធិការកិច្ចការព្រំដែនកាលពីថ្ងៃសៅរ៍បានចុះទៅពិនិត្យតំបន់ព្រំដែនក្នុងឃុំត្រពាំងផ្លុង ស្រុកពញាក្រែកជាទីដែលមានភាពចម្រូងចម្រាស ពាក់ព័ន្ធនឹងការអះអាងដែលថា កម្ពុជាបាត់បង់ទឹកដីទៅភាគីវៀតណាមដោយសារការបោះបង្គោលព្រំដែន។ គណៈកម្មាធិការនេះអះអាងថា កម្ពុជាមិនបានបាត់ដីដោយសារការបោះបង្គោលព្រំដែនដូចការលើកឡើងទេ។
ការចុះទៅពិនិត្យទីតាំងនេះ ធ្វើឡើងតាមបញ្ជារបស់លោកនាយករដ្ឋមន្ត្រី ហ៊ុន សែន បន្ទាប់ពីអ្នករិះគន់រឿងព្រំដែនដែលរួមមានលោក រ៉ុង ឈុន និងលោក សួង សុភ័ណ្ឌ បានអះអាងថា ការបោះបង្គោលព្រំដែនពីបង្គោលលេខ ១១៤ ដល់ ១១៩ មានភាពមិនប្រក្រតី និងធ្វើឲ្យប្រជាពលរដ្ឋបាត់បង់ដីអាស្រ័យផលទៅខាងវៀតណាមជាច្រើនរយហិកតា ឬចូលមកក្នុងដីកម្ពុជាប្រមាណ ៥០០ ម៉ែត្រ។ ការអះអាងរបស់អ្នករិះគន់ធ្វើឡើងដោយយោងតាមសម្ដីរបស់ពលរដ្ឋមូលដ្ឋាន។
លោកស្រី កុយ ពិសី អនុប្រធានគណៈកម្មាធិការព្រំដែនថ្លែងកាលពីថ្ងៃសៅរ៍នៅលើហ្វេសប៊ុកថា ប្រតិភូគណៈកម្មាធិការកិច្ចការព្រំដែនបានជួបជាមួយពលរដ្ឋ ១១ គ្រួសារដែលធ្លាប់បានជួបជាមួយលោក រ៉ុង ឈុន។ ពលរដ្ឋទាំងនោះបានឆ្លើយថា មិនមានការបាត់ដីទៅវៀតណាមទេ ហើយពួកគេបានចូលរួមជាមួយពួកក្រុមដែលលោកស្រីថា «អគតិ» កន្លងទៅដោយសារ «ពួកអគតិ» សន្យាថា នឹងជួយតវ៉ាសុំដីដែលកម្ពុជាទទួលបានបន្ទាប់ពីការបញ្ចប់ការងារខណ្ឌសីមា និងបោះបង្គោលព្រំដែននៅតំបន់នោះឲ្យពួកគាត់បានអាស្រ័យផលទៅថ្ងៃមុខតែប៉ុណ្ណោះ។
លោកស្រីប្រាប់ភ្នំពេញប៉ុស្តិ៍ពីម្សិលមិញថា៖ «គាត់ថា មកពីលោក រ៉ុង ឈុន ក្ដី សួង សុភ័ណ្ឌ ក្ដីហ្នឹងថា ជួយសុំដីដែលកម្ពុជានឹងទទួលបានបន្ទាប់ពីបញ្ចប់ការខណ្ឌសីមា និងបោះបង្គោល យើងបានដីមួយចំនួនមកខាងកម្ពុជា អ៊ីចឹងពួកគាត់ថានឹងជួយសុំដីហ្នឹងឲ្យពួកគាត់ធ្វើស្រែចម្ការដាំដុះ។ អ៊ីចឹងហើយបានជាគាត់ចូលរួមហែរហម ប៉ុន្តែពួកគាត់អត់មាននិយាយថា គាត់បាត់ដីគាត់ទេ។ កម្ពុជាអត់មានបាត់ដីទៅវៀតណាម ហើយដីរបស់គាត់ ក៏អត់មានបាត់ដែរ»។
លោកស្រីបន្តថា៖ «អ៊ីចឹងអ្វីដែលគាត់តវ៉ា គឺគាត់ចង់បានដីដែលកម្ពុជាបានមកពីវៀតណាម បន្ទាប់ពីការខណ្ឌសីមា និងបោះបង្គោល ប៉ុន្តែគាត់អត់មានថា គាត់បាត់ដីទៅវៀតណាមទេ គាត់ហ៊ានប្រឈមមុខចំពោះមុខច្បាប់ ប្រសិនជា រ៉ុង ឈុន ក្ដី សួង សុភ័ណ្ឌ ក្ដីថា ពួកគាត់អ្នកថា គាត់ហ៊ានតទល់។ អាហ្នឹងសម្ដីគាត់ជួបជាមួយពួកខ្ញុំនៅលើដី គឺគាត់និយាយអ៊ីចឹងចា៎»។
លោកស្រី កុយ ពិសី ស្នើសុំពលរដ្ឋកុំឲ្យមានចរិតមួយដែលនិយាយខុសពីការពិត បំភ្លៃរឿង និងមើលងាយដល់កិច្ចប្រឹងប្រែងរបស់រាជរដ្ឋាភិបាលកម្ពុជា។ ក្រុមការងាររបស់លោកស្រីបានប្រឹងប្រែងធ្វើការរហូតដល់មានការស្លាប់ និងរបួសដោយសារផ្ទុះមីនជាដើម។
«រាល់ថ្ងៃនេះ យើងធ្វើបានច្រើនហើយ សូមនាំគ្នាធ្វើម៉េចពួតដៃគ្នាដើម្បីបញ្ចប់ទៅ ដើម្បីឲ្យខ្មែរយើងស្រុកទេសយើងមានព្រំដែនមួយច្បាស់លាស់ ដើម្បីថែរក្សាទឹកដីយើងឲ្យបានគង់វង្ស។ នេះជាបំណងប្រាថ្នារបស់ថ្នាក់ដឹកនាំកំពូល និងគណបក្សក៏ដូចជារដ្ឋាភិបាល គឺទិសដៅមុតស្រួចណាស់ខិតខំមែនទែនក្នុងការធ្វើយ៉ាងណាបញ្ចប់ការងារនេះឲ្យបាននាពេលខាងមុខ»។
លោក វ៉ា គឹមហុង ទេសរដ្ឋមន្ត្រីទទួលបន្ទុកកិច្ចការព្រំដែន និងជាប្រធានគណៈកម្មាធិការចម្រុះកិច្ចការព្រំដែនថ្លែងប្រាប់អ្នកសារព័ត៌មាននៅកន្លែងចុះពិនិត្យព្រំដែនថា ដីខ្លះដែលត្រូវបានបោះបង្គោលព្រំសីមារួចហើយ កំពុងស្ថិតក្រោមការកាន់កាប់ដោយភាគីវៀតណាម។ ប៉ុន្តែដីនេះនឹងត្រូវប្រគល់មកឲ្យកម្ពុជាបន្ទាប់ពីមានការផ្លាស់ប្ដូរលិខិតូបករណ៍រវាងភាគីទាំង ២។
ចំពោះករណីរបស់លោក សួង សុភ័ណ្ឌ និងលោក រ៉ុង ឈុន លោក វ៉ា គឹមហុង ថ្លែងថា វាជាសមត្ថកិច្ចរបស់តុលាការក្នុងការវិនិច្ឆ័យ។
ពលរដ្ឋមួយចំនួនបានថ្លែងប្រាប់អ្នកសារព័ត៌មានក្នុងពេលដែលលោក វ៉ា គឹមហុង ចុះទៅទីនោះថា ពួកគេមិនបានបាត់បង់ដីធ្លីទេ ប៉ុន្តែបានស្នើសុំឲ្យរដ្ឋាភិបាលចេញប្លង់កម្មសិទ្ធិដល់ពួកគេ ដើម្បីអាចបង្កបង្កើនផលនៅលើដីទាំងនោះ។
លោក ជាម ច័ន្ទសោភ័ណ អភិបាលខេត្តត្បូងឃ្មុំដែលអមដំណើរប្រតិភូព្រំដែនបានអះអាងប្រាប់អ្នកសារព័ត៌មានថា កម្ពុជាមិនបានបាត់ដីសូម្បី ១ មិល្លីម៉ែត្រទេ ក្នុងការបោះបង្គោលព្រំដែនជាមួយវៀតណាម។
លោកថា៖ «ក្នុងនាមរដ្ឋបាលខេត្ត ដូចអ្វីដែលជាប្រសាសន៍របស់សម្ដេចតេជោ នាយករដ្ឋមន្ត្រីអ៊ីចឹងដែរ យើងត្រូវតែធ្វើយ៉ាងណារក្សាខណ្ឌសីមារបស់យើងនេះឲ្យទាល់តែបានមិនឲ្យបាត់ ១ មិល្លីម៉ែត្រទេ។ បើបាត់គឺថា ខ្ញុំយកជីវិតរបស់ខ្ញុំទៅធានាជូនបងប្អូនប្រជាពលរដ្ឋទាំងអស់ក្នុងនាមខ្ញុំជាអភិបាលខេត្ត។ ព្រោះយើងម្នាក់ៗយើងមានបេះដូងរបស់យើងជាខ្មែរ ហើយយើងមានឆន្ទៈរបស់យើងមុតមាំណាស់ ក្នុងការការពារបូរណភាពទឹកដីរបស់យើង»។
លោក រ៉ុង ឈុន សមាជិក ក្រុមប្រឹក្សាឃ្លាំមើលកម្ពុជាត្រូវបានសមត្ថកិច្ចចាប់ខ្លួនកាលពីចុងខែកក្កដា ចំណែកលោក សួង សុភ័ណ្ឌ ប្រធានគណបក្សខ្មែរឈ្នះត្រូវបានចាប់ខ្លួនកាលពីពាក់កណ្ដាលខែសីហា ពាក់ព័ន្ធនឹងការអះអាងដោយយោងលើសម្ដីពលរដ្ឋថា កម្ពុជាបានបាត់បង់ទឹកដីទៅវៀតណាមក្នុងការបោះបង្គោលខណ្ឌសីមារវាងប្រទេសទាំង ២។ អ្នកទាំង ២ ត្រូវបានចោទប្រកាន់ពីបទញុះញង់។ មនុស្សមួយចំនួនទៀតក៏ត្រូវបានចាប់ខ្លួន និងចោទប្រកាន់ពីបទញុះញង់ពាក់ព័ន្ធនឹងរឿងព្រំដែននេះដែរ៕
វីដេអូ៖