.jpg)
លោក នេត្រ ភក្ត្រា អ្នកនាំពាក្យក្រសួងបរិស្ថាន ថ្លែងទៅកាន់អ្នកសារព័ត៌មានកាលពីថ្ងៃទី ៣ ខែវិច្ឆិកា។ ហុង មិនា
ភ្នំពេញៈ មន្ត្រីបាននិយាយថា ករណីកាប់ទន្ទ្រានយកដីព្រៃដោយខុសច្បាប់ នៅតាមតំបន់ការពារមានការកើនឡើង ដោយសារតែតម្លៃដីធ្លីកើនឡើង និងមានការអភិវឌ្ឍលើវិស័យកសិកម្ម និងកសិឧស្សាហកម្មកាន់តែច្រើន។
លោក នេត្រ ភក្ត្រា អ្នកនាំពាក្យក្រសួងបរិស្ថានប្រាប់ក្រុមអ្នកសារព័ត៌មានកាលពីថ្ងៃទី ៣ ខែវិច្ឆិកា ថា បច្ចុប្បន្ននេះស្ថានភាពបទល្មើសដែលក្រៅពីការលួចកាប់ឈើ ដឹកជញ្ជូនឈើខុសច្បាប់ដែលមានទ្រង់ទ្រាយតូចក៏នៅមានបទល្មើសទន្ទ្រានកាន់កាប់ដីព្រៃខុសច្បាប់មានការកើនឡើង ដោយសារតែតម្លៃដីមានការកើនឡើង ហើយតម្រូវការដីសម្រាប់ការអភិវឌ្ឍធ្វើកសិកម្ម កសិឧស្សាហកម្ម គឺមានការកើនឡើង។
លោកលើកឡើងថា៖ «បើយើងប្រៀបធៀបទៅនឹងឆ្នាំ ១៩៦៤ កម្ពុជាមានផ្ទៃដីព្រៃប្រមាណ ៧៣ ភាគរយ ដែលមានប្រជាជនត្រឹមតែ ៥ លាន ៧ សែននាក់ប៉ុណ្ណោះ ប៉ុន្តែនៅត្រឹមឆ្នាំ ២០១៨ ដោយយោងទៅលើរបាយការណ៍កម្ពុជានៅសល់ដីព្រៃ ប្រមាណ៤៦,៨៦ ភាគរយគឺមាន ៨,៥ លានហិកតា»។
លោកបន្តថា៖ «ចំនួននេះ បើយើងធៀបបច្ចុប្បន្ននេះ យើងបាត់បង់ (ព្រៃឈើ) ពី ៧៣ ភាគរយ មក ៤៦ ភាគរយ ប៉ុន្តែកំណើនប្រជាជនកម្ពុជាកើនឡើងពី ៥,៧ លាននាក់ ដល់ ១៦ លាននាក់»។
បើតាមលោក ភក្ត្រា កំណើនដីគម្របព្រៃឈើដែលបាត់បង់គឺវាកើនទៅជាដីចម្ការ ដីលំនៅឋានរបស់ប្រជាពលរដ្ឋ ដែលធ្វើឱ្យមានការប្រែប្រួល។ លោកបញ្ជាក់ថា៖ «ការអភិវឌ្ឍក៏ធ្វើឱ្យមានសម្ពាធដល់ធនធានធម្មជាតិ ហេតុដូច្នេះហើយតាមរយៈក្រុមប្រឹក្សាជាតិអភិវឌ្ឍន៍ដោយចីរភាព (ក.ជ.អ.ច) គឺយើងបានរៀបចំនូវផែនការយុទ្ធសាស្ត្របរិស្ថានជាតិឆ្នាំ ២០១៦-២០២៣ ដើម្បីធ្វើយ៉ាងណាគ្រប់គ្រង និងកាត់បន្ថយនូវផលប៉ះពាល់ដល់បរិស្ថាន»។
ក្រសួងបរិស្ថានបាននិងកំពុងបន្តអនុវត្តនូវស្មារតីនៃកិច្ចប្រជុំគណៈរដ្ឋមន្ត្រីកាលពីថ្ងៃទី ៣ ខែ កក្កដា ឆ្នាំ ២០២០ ដែលលោកនាយករដ្ឋមន្ត្រី ហ៊ុន សែន បានបញ្ជាឱ្យក្រសួងចំនួន ៣ គឺក្រសួងបរិស្ថាន ក្រសួងរៀបចំដែនដី នគរូបនីយកម្ម និងសំណង់ និងក្រសួងកសិកម្ម រុក្ខាប្រមាញ់ និងនេសាទ ធ្វើការពិនិត្យ សិក្សា ចងក្រង ស្រាវជ្រាវទៅលើដីដែលពលរដ្ឋកាន់កាប់អាស្រ័យផលយូរឆ្នាំក្នុងតំបន់ការពារធម្មជាតិដើម្បីកាត់ឆ្វៀលឱ្យពលរដ្ឋទាំងនោះ។
លោកបន្ថែមថា៖ «នេះគឺជាការសម្រេចចិត្តដ៏ត្រឹមត្រូវរបស់រាជរដ្ឋាភិបាល នៅក្នុងការឈានទៅដល់ការដោះស្រាយបញ្ហាដីធ្លីនៅក្នុងតំបន់ការពារធម្មជាតិរបស់យើងឱ្យចប់សព្វគ្រប់ បន្ទាប់ពីយើងបានដាក់ឱ្យអនុវត្តនូវបទបញ្ជា ០០១ របស់រាជរដ្ឋាភិបាល ដើម្បីកាត់ឆ្វៀល វាស់វែង ជូនដល់ប្រជាពលរដ្ឋដែលបានកាន់កាប់ដីអាស្រ័យផលយូរឆ្នាំ»។
លោកថ្លែងថា៖ «ឥឡូវនេះ យើងកំពុងតែឈានដល់ដំណាក់កាលដែលដោះស្រាយបញ្ហាជម្លោះដីធ្លី ឬក៏មានបញ្ហាមួយចំនួនទៀតនៅក្នុងតំបន់ការពារធម្មជាតិដើម្បីឱ្យដាច់ស្រេច ដើម្បីយើងកំណត់ព្រំឱ្យបានច្បាស់លាស់ ហើយធ្វើយ៉ាងណាឱ្យមានការការពារដែលនេះគឺជាវិធានការមួយដ៏មានប្រសិទ្ធភាពក្នុងការទប់ស្កាត់ក្នុងការទន្ទ្រានដីព្រៃដោយខុសច្បាប់»។
លោក ប៉ែន ប៊ុណ្ណារ៍ មន្ត្រីកម្មវិធីពង្រឹងសិទ្ធិអំណាចសហគមន៍មូលដ្ឋាននៃសមាគមអាដហុកបានឱ្យដឹងថា ចំពោះករណីកាន់កាប់ទន្ទ្រានដីព្រៃនេះ មានការប្រតិកម្មតាំងពីយូរណាស់មកហើយ ខណៈដែលដីព្រៃ ១ ផ្នែកធំត្រូវបានទន្ទ្រានកាន់កាប់ដោយបុគ្គលមានអំណាច ដូចជា ឧកញ៉ាធំៗជាដើម ហើយអ្វីទាំងអស់នេះគឺជាការទទួលខុសត្រូវដោយក្រសួងស្ថាប័នពាក់ព័ន្ធរបស់រដ្ឋាភិបាល។
លោកបានបន្តថា៖ «បើគ្រាន់តែនិយាយ វាមិនទាន់គ្រប់គ្រាន់នោះទេ ពីព្រោះប្រទេសយើងមានច្បាប់ដែលបានចែងយ៉ាងច្បាស់ជុំវិញការទន្ទ្រានដីព្រៃធ្វើជាកម្មសិទ្ធិ គឺត្រូវមានទោស។ ជាមួយគ្នានេះ ក្រសួងស្ថាប័នពាក់ព័ន្ធត្រូវប្រើប្រាស់ច្បាប់ក្នុងការដកហូត ឬផ្តន្ទាទោសចំពោះបុគ្គលដែលទន្ទ្រានយកដីរដ្ឋនោះ»។
បើតាមលោក ប៊ុណ្ណារ៍ ក្រៅពីការផ្តន្ទាទោស «ច្បាប់ព្រៃឈើបានចែងថា ឧក្រិដ្ឋជនព្រៃឈើត្រូវទទួលខុសត្រូវ និងសងការខូចខាតព្រៃឈើហ្នឹង ធ្វើយ៉ាងម៉េចធ្វើឱ្យដូចដើមឡើងវិញ»។
លោក គ្រើង តុលា សកម្មជនការពារព្រៃឈើនៅក្នុងខេត្តមណ្ឌលគិរីបានអះអាងថា ការរុករានកាន់កាប់ទន្ទ្រានដីព្រៃឈើរបស់រដ្ឋនេះគឺមានការអនុញ្ញាតពីអាជ្ញាធរ និងមន្ត្រីពាក់ព័ន្ធមួយចំនួន។ លោកបន្តថា ការពង្រីកដីកសិកម្ម និងការផ្តល់ដីសម្បទានច្រើនលើសលប់បានធ្វើឱ្យដីព្រៃត្រូវបានបាត់បង់។
លោកបញ្ជាក់ថា៖ «ដូច្នេះរដ្ឋាភិបាលគួរតែគិតគូរឡើងវិញ ចំពោះការផ្តល់ដីសម្បទានសេដ្ឋកិច្ចនេះទៅឱ្យក្រុមហ៊ុនឯកជនវិនិយោគ ប៉ុន្តែបើវិនិយោគ រដ្ឋាភិបាលគួរតែវិនិយោគដោយខ្លួនឯងដោយរៀបចំឱ្យទៅជាតំបន់អេកូទេសចរណ៍ដើម្បីផ្តល់ចំណូល និងការងារជូនពលរដ្ឋនៅតាមមូលដ្ឋានវិញល្អជាង»៕
វីដេអូ៖
