ភ្នំពេញៈ មន្ត្រីជាន់ខ្ពស់គណបក្សកាន់អំណាចកាលពីម្សិលមិញបានឆ្លើយតបចំពោះការរិះគន់ពីការតែងតាំងទីប្រឹក្សានៅតាមស្ថាប័នរដ្ឋ ដោយបានចាត់ទុកថានេះមិនមែនជាការខ្ជះខ្ជាយថវិកាជាតិដូចការលើកឡើងដោយគ្មានមូលដ្ឋាននោះទេ តែជាការលើកទឹកចិត្ត និងជាការជំរុញប្រសិទ្ធភាពការងារ ខណៈដែលមន្ត្រីទាំងនោះមានលក្ខណសម្បត្តិគ្រប់គ្រាន់។
ការបញ្ជាក់បែបនេះបានធ្វើឡើងដោយអ្នកនាំពាក្យគណបក្សប្រជាជនកម្ពុជា លោក សុខ ឥសាន បន្ទាប់ពីមានការរិះគន់មួយចំនួនដែលថាការតែងតាំងទីប្រឹក្សាក្រសួងការងារចំនួនជាង ១០០ នាក់ថាជាការខ្ជះខ្ជាយថវិកាជាតិ ហើយថាទីប្រឹក្សាទាំងនេះនឹងមិនអាចបំពេញការងារប្រកបដោយប្រសិទ្ធភាពបាន។
បើយោងតាមព្រះរាជក្រឹត្យដែលឡាយព្រះហស្តលេខាដោយព្រះមហាក្សត្រកម្ពុជា ព្រះបាទ នរោត្តម សីហមុនីកាលពីថ្ងៃទី ១១ ធ្នូថ្មីៗនេះបានសម្រេចតែងតាំងទីប្រឹក្សាក្រសួងការងារចំនួន ១០៧ នាក់ដែលក្នុងនោះ ២១ នាក់មានឋានៈស្មើអនុរដ្ឋលេខាធិការ និងក្រៅពីនេះមានឋានៈស្មើអគ្គនាយក។
ក្នុងចំណោមទីប្រឹក្សាទាំង ១០៧ នាក់នោះមានអ្នកខ្លះជាមេដឹកនាំសហជីព ដូចជាលោក ជួន មុំថុល ប្រធានសហភាពសហព័ន្ធសហជីពជាតិកម្ពុជា ហើយអ្នកខ្លះទៀតជាថ្នាក់ដឹកនាំសមាគមរោងចក្រកាត់ដេរកម្ពុជាដូចជា លោក ខេន លូ និងលោក កាំង ម៉ូនីកា ជាដើមដែលការតែងតាំងនេះធ្វើឡើងតាមសំណើរបស់លោកនាយករដ្ឋមន្ត្រី ហ៊ុន សែន។
ទាក់ទងនឹងការតែងតាំងនេះលោក សុខ ឥសាន បានពន្យល់តាមសារតេឡេក្រាមរបស់លោកកាលពីម្សិលមិញថានេះជាសិទ្ធិរបស់គណបក្សកាន់អំណាចដោយផ្អែកលើសំណូមពរការងារ លក្ខណសម្បត្តិ គុណសម្បត្តិរបស់សាមីជនហើយក៏មិនបានធ្វើឲ្យខ្ជះខ្ជាយថវិកាជាតិដែរ ប៉ុន្តែផ្ទុយទៅវិញគឺជាការលើកទឹកចិត្ត និងជំរុញឲ្យមានប្រសិទ្ធភាពការងារ។
លោកបញ្ជាក់ថា៖ «រាជរដ្ឋាភិបាលកម្ពុជាមានការទទួលខុសត្រូវក្នុងការប្រើប្រាស់ថវិការដ្ឋស្របតាមសំណូមពរត្រូវការចាំបាច់មានការសន្សំសំចៃ។ ចំពោះមន្ត្រីដែលគ្មានក្របខ័ណ្ឌនៅតាមក្រសួង និងស្ថាប័នរដ្ឋទើបអាចទទួលបានប្រាក់បៀវត្សរ៍។ ចំពោះមន្ត្រីដែលមានក្របខ័ណ្ឌនៅក្នុងក្រសួង និងស្ថាប័នរដ្ឋរួចហើយ បើទទួលការតែងតាំងជាទីប្រឹក្សាទោះមានឋាន:អ្វីក៏ដោយគឺមិនទទួលបានប្រាក់បៀវត្សរ៍ត្រួតថែមទៀតទេ»។
ជាមួយគ្នានេះលោក សុខ ឥសាន ក៏បានថ្លែងដែរថាអ្នករិះគន់ទាំងនោះបានចោទប្រកាន់មកលើរាជរដ្ឋាភិបាលដោយគ្មានមូលដ្ឋាន។
លោកបានបញ្ជាក់បន្ថែមថា៖ «សូមអ្នកដែលមិនដឹងខ្យល់ បើមិនដឹងអីនោះកុំនិយាយចោទរាជរដ្ឋាភិបាលថាខ្ជះខ្ជាយថវិការដ្ឋទៅលើបៀវត្សរ៍របស់ទីប្រឹក្សាដ៏ច្រើននោះ?»។
យ៉ាងណាក្ដីប្រធានអង្គការសម្ព័ន្ធគណនេយ្យភាពសង្គមកម្ពុជាលោក សន ជ័យ បានថ្លែងកាលពីម្សិលមិញថាការបន្តតែងតាំងទីប្រឹក្សានៅតាមក្រសួង និងស្ថាប័នធ្វើឲ្យចំនួនកាន់តែកើនឡើងច្រើន ប៉ុន្តែមិនអាចជួយបង្កើនប្រសិទ្ធភាពការងារដោយសារអ្នកខ្លះគ្រាន់តែចង់បានត្រឹមតំណែង និងងារជាឯកឧត្តម ឬលោកជំទាវតែដល់ធ្វើការខ្វះប្រសិទ្ធភាពនាំឲ្យខាតបង់ថវិកាជាតិ។
លោកបានបញ្ជាក់ថា៖ «យើងឃើញហើយចំនួនបន្តកើនឡើងរហូត។ តំណែងទីប្រឹក្សានេះមិនមែនតំណែងសម្រេចចិត្ត វាគ្រាន់តែជាការផ្តល់យោបល់ ហើយថា តើពួកគេទាំងនោះត្រូវបានគេយកមកពិចារណារដែរឬទេ មានទីប្រឹក្សាខ្លះយកតែងារទេ ដោយមិនយកប្រាក់ខែ។ តែបើអ្នកយកវា នាំឲ្យខ្ជះខ្ជាយថវិកាជាតិ»។
ទោះជាយ៉ាងណាក្តីការតែងតាំងទីប្រឹក្សាក្រសួងស្ថាប័ន និងថ្នាក់ដឹកនាំទាំងឡាយត្រូវបានគេមើលឃើញថាជាមធ្យោបាយមួយដែលរាជរដ្ឋាភិបាលប្រើដើម្បីជារង្វាន់ និងជាការផ្តល់កិត្តិយសដល់មន្ត្រីដែលធ្លាប់មានគុណសម្បត្តិជំនួសប្រាក់និវត្តដែលមិនសូវគ្រប់គ្រាន់៕