.jpg)
លោក សក់ សេដ្ឋា កាលពីពេលកន្លងទៅ។ រូបថត ប៉ូលិស
ភ្នំពេញៈ រដ្ឋលេខាធិការប្រចាំការក្រសួងមហាផ្ទៃលោក សក់ សេដ្ឋា បានឱ្យដឹងថា ការធ្វើវិសោធនកម្មច្បាប់ព្រៃឈើ ជលផល និងច្បាប់តំបន់ការពារធម្មជាតិនៅមិនទាន់អាចសម្រេចបានទេ ដោយសារមានបញ្ហាមួយចំនួនមិនទាន់ស្រុះស្រួលគ្នា ទី ១ គឺការបែងចែកអំណាច ទី ២ គឺរឿងធនធានមនុស្ស និងទី ៣ គឺការបែងចែកមុខងាររវាងក្រសួងជាមួយថ្នាក់ក្រោមជាតិ។
ថ្លែងប្រាប់ភ្នំពេញប៉ុស្តិ៍កាលពីចុងសប្ដាហ៍មុនលោក សក់ សេដ្ឋា បានឱ្យដឹងថា ទោះបីជាមានភាពសាំញ៉ាំបន្តិច ប៉ុន្តែក្រុមការងារបានស្រុះស្រួលគ្នាអំពីប្រព័ន្ធ និងនីតិវិធីមួយចំនួនរួចហើយ។ ប្រព័ន្ធគ្រប់គ្រងធនធានធម្មជាតិក្នុងច្បាប់សព្វថ្ងៃមានរបៀបមជ្ឈការបន្តិច ហេតុនេះត្រូវកែប្រែច្បាប់នេះដើម្បីធ្វើវិមជ្ឈការអំណាចទៅឱ្យថ្នាក់ក្រោមជាតិ។
លោកបានបញ្ជាក់ថា៖ «ច្បាប់បច្ចុប្បន្នឱ្យអំណាចហ្នឹងទៅមន្ត្រីរដ្ឋបាលជលផល មន្ត្រីឧទ្យានុរក្ស ឬក៏រដ្ឋបាលព្រៃឈើហ្នឹងជាមន្ត្រីនគរបាលយុត្តិធម៌ទោះបីថាប៉េអឹមចាប់ក៏ដោយ ប៉ូលិសចាប់ក៏ដោយត្រូវឱ្យសំណុំរឿងហ្នឹងទៅខាងព្រៃឈើ ខាងជលផលខាងអី ដើម្បីនាំរឿងហ្នឹងទៅតុលាការ វាមានបញ្ហាសាំញ៉ាំត្រង់ហ្នឹង»។
ទាក់ទិននឹងការធ្វើវិសោធនកម្មច្បាប់ទាំង ៣ នេះសកម្មជនការពារព្រៃឈើ លោក ហេង ស្រស់ បានថ្លែងថា ការធ្វើវិមជ្ឈការអំណាចទៅឱ្យខាងណាមួយគឺជានីតិវិធីរបស់រាជរដ្ឋាភិបាល។
ប៉ុន្តែលោកថា បើមើលលើការអនុវត្តច្បាប់វិញ ទោះបីជាមិនផ្ទេរអំណាចទៅដល់ថ្នាក់មូលដ្ឋានក៏ដោយ ក៏ការអនុវត្តច្បាប់របស់មន្ត្រីនៅតែមានភាពធូររលុង។
លោកថា៖ «ជាក់ស្តែងយើងមើលឃើញស្រាប់ហើយកាលពីមុន អំណាចនៅតំបន់ដែនជម្រកសត្វព្រៃមួយចំនួនគឺខាងក្រសួងកសិកម្មហ្នឹងមិនបានអនុវត្តច្បាប់ឱ្យបានតឹងរ៉ឹងទេ រុញទៅឱ្យក្រសួងបរិស្ថាន ពេលទៅដល់កណ្ដាប់ដៃក្រសួងបរិស្ថាន បែរជានៅតែមានការធូររលុង នៅតែមានការកាប់បំផ្លាញព្រៃឈើ ហើយនៅពេលបានអំណាចលើក្រសួងបរិស្ថានហើយ បែរជាក្រសួង...មិនឱ្យសកម្មជន និងសហគមន៍ចូលរួមចំណែកការពារតទៅទៀត»។
បើតាមលោក ស្រស់ ប្រសិនបើរាជរដ្ឋាភិបាលចង់ឱ្យមានប្រសិទ្ធភាពលើការទប់ស្កាត់ការកាប់បំផ្លាញព្រៃឈើត្រូវតែបញ្ឈប់រោងចក្រអារឈើ បញ្ឈប់នូវសិប្បកម្មឈើ បញ្ឈប់នូវការចេញលិខិតឱ្យដឹកឈើពីកម្ពុជាយកទៅលក់នៅក្រៅប្រទេស។ «ដរាបណាចំណុចទាំង ៣ នេះនៅតែកើតមាននោះទោះបីជាបង្កើតច្បាប់ប៉ុន្មានរយច្បាប់យកមកអនុវត្តទៀតក៏វាមិនមានប្រសិទ្ធភាពដែរ...»។
យ៉ាងណាក្ដី រដ្ឋលេខាធិការក្រសួងមហាផ្ទៃ និងជាប្រធានលេខាធិការដ្ឋាននៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) លោក ង៉ាន់ ចំរើន បានថ្លែងថា ការធ្វើវិសោធនកម្មច្បាប់ ដើម្បីផ្តល់អំណាចឱ្យអាជ្ញាធរផ្សេងៗចូលរួមគឺជាការចាំបាច់ត្រូវតែធ្វើឱ្យស្របតាមផ្លូវច្បាប់។
លោកបានបន្តថា ការផ្ទេរអំណាចមួយចំនួនឱ្យថ្នាក់មូលដ្ឋានពាក់ព័ន្ធច្បាប់ព្រៃឈើ ជលផល និងតំបន់ការពារធម្មជាតិនេះ គឺដើម្បីធានាបានការប្រមូលកម្លាំងសរុប ព្រោះសព្វថ្ងៃមានការខ្វះមន្ត្រីច្រើន ទាំងការគ្រប់គ្រងធនធានធម្មជាតិ ទាំងអនុរក្សព្រៃឈើ ថ្វីបើរដ្ឋាភិបាលអនុញ្ញាតឱ្យរើសបន្ថែមជាបន្តបន្ទាប់ក៏ដោយ។
ឆ្លើយតបនឹងការរិះគន់ពីការអនុវត្តច្បាប់ព្រៃឈើនៅមានភាពធូររលុងនេះ លោក ង៉ាន់ ចំរើន បានពន្យល់ថា អំណាចទាំងអស់គប្បីបែងចែកកុំឱ្យជាន់គ្នា ហើយមានលទ្ធភាពអាចជួយបំពេញកិច្ចការងារគ្នាទៅវិញទៅមកបាន។
លោក ចំរើន បញ្ជាក់ថា៖ «ត្រូវបែងចែកឱ្យអំណាចទៅខាងថ្នាក់ស្រុកប៉ុនណា ថ្នាក់ឃុំប៉ុនណាឱ្យអំណាចទៅខេត្ត ប៉ុនណា ពាក់ព័ន្ធការគ្រប់គ្រងព្រៃឈើ ជលផល និងការគ្រប់គ្រងធនធានធម្មជាតិ ឬតំបន់ឧទ្យានអី។ល។ និង ។ល។ ហូរហែ ដើម្បីបង្កការងាយស្រួលទៅដល់ប្រជាពលរដ្ឋនៅមូលដ្ឋានធ្វើការរាយការណ៍ពេលពួកគាត់ឃើញបទល្មើស»។
កាលពីថ្ងៃទី ២២ ខែកញ្ញា ឆ្នាំ ២០១៦ លោកនាយករដ្ឋមន្ត្រី ហ៊ុន សែន បានចេញសារាចរណែនាំស្តីពីវិធានការចាំបាច់នានាក្នុងការពង្រឹងការគ្រប់គ្រងធនធានធម្មជាតិ។ ក្នុងនោះបានធ្វើកំណែទម្រង់ស៊ីជម្រៅលើការគ្រប់គ្រងធនធានធម្មជាតិ ជាពិសេសលើវិស័យព្រៃឈើ និងជលផល តាមរយៈជំរុញឱ្យធ្វើវិសោធនកម្មច្បាប់ និងលិខិតបទដ្ឋានគតិយុត្តពាក់ព័ន្ធ ក៏ដូចជា ការបែងចែកឡើងវិញនូវសមត្ថកិច្ចឱ្យបានច្បាស់លាស់រវាងស្ថាប័នពាក់ព័ន្ធនៅថ្នាក់ជាតិ និងរដ្ឋបាលថ្នាក់ក្រោមជាតិ ដើម្បីធានានូវការលើកកម្ពស់ និងនិរន្តរភាពនៃការគ្រប់គ្រងធនធានធម្មជាតិ៕
