.jpg)
មន្ត្រីពេលចូលរួមសិក្ខាសាលាកាលពីថ្ងៃ ១៩ តុលា។ រូបថត ក្រសួងសង្គមកិច្ច
ភ្នំពេញៈ លោក ឯម ច័ន្ទមករា រដ្ឋលេខាធិការក្រសួងសង្គមកិច្ច អតីតយុទ្ធជន និងយុវនីតិសម្បទា បានចាត់ទុកការបង្កើនការផ្សព្វផ្សាយព័ត៌មាន ឬប្រព័ន្ធស្វែងរកការងារឱ្យបានទូលំទូលាយដល់ជនមានពិការភាពគឺជាកិច្ចការសំខាន់ ស្របពេលដែលប្រទេសជាតិកំពុងប្រឈមបញ្ហាជំងឺកូវីដ១៩ និងគ្រោះទឹកជំនន់នាពេលបច្ចុប្បន្ន។
ការថ្លែងរបស់លោកបែបនេះបានធ្វើឡើងនៅក្នុងពិធីបិទសិក្ខាសាលាពិគ្រោះយោបល់ស្តីពី “ឱកាសសេដ្ឋកិច្ចសម្រាប់ជនមានពិការភាព” នៅសណ្ឋាគារកាំបូឌីយ៉ាណាកាលពីថ្ងៃទី ១៩ ខែតុលា ដោយមានការចូលរួមពីមន្ត្រីទូតអូស្ត្រាលីប្រចាំកម្ពុជា អង្គការសង្គមស៊ីវិល និងជនមានពិការភាព។
លោក ឯម ច័ន្ទមករា បានលើកឡើងថា ការបង្កើនការផ្សព្វផ្សាយព័ត៌មាន ឬប្រព័ន្ធស្វែងរកការងារឱ្យបានទូលំទូលាយដល់ជនមានពិការភាព គឺជាកិច្ចសំខាន់ ហើយការបង្កើនការយល់ដឹងអំពីបទដ្ឋានគតិយុត្តពាក់ព័ន្ធការកំណត់អត្រា និងបែបបទជ្រើសរើសជនមានពិការភាពចូលបម្រើការងារជាមួយអ្នកជាប់កាតព្វកិច្ចត្រូវតែបន្តសកម្មភាពឱ្យកាន់តែមានភាពសកម្ម។
លោកបានសង្កត់ធ្ងន់ថា៖ «ការកសាងបទដ្ឋានគតិយុត្តដើម្បីផ្គូផ្គងសមត្ថភាព និងការងាររបស់ជនមានពិការភាពដែលអាចធ្វើបាន និងផ្តល់ការសម្របសម្រួលរកការងារដល់ជនមានពិការភាពដែលមានលក្ខណសម្បត្តិ និងសមត្ថភាពបំពេញនូវមុខងារតួនាទី និងការទទួលខុសត្រូវក្នុងមុខតំណែង ត្រូវជំរុញឱ្យស្របតាមគោលនយោបាយរបស់រាជរដ្ឋាភិបាលកម្ពុជា។ ការតម្រង់ទិសក្នុងការបង្កើតមុខរបរសមស្របសម្រាប់ជនមានពិការភាពតាមរយៈការស្រាវជ្រាវអំពីតម្រូវការមូលដ្ឋាន និងការពិគ្រោះយោបល់ គួរចាប់ផ្តើមធ្វើដោយមានការពិភាក្សាឱ្យបានល្អិតល្អន់ជាមួយជនមានពិការភាព។
ក្នុងឆ្នាំ ២០១៩ ជនមានពិការភាពបានបម្រើការងារទាំងស្ថាប័នរដ្ឋ និងឯកជនទូទាំងប្រទេសសរុបមាន ៦ ៦៥២ នាក់ ក្នុងនោះជនមានពិការភាពចំនួន ២ ៨៦០ នាក់ បានចូលបម្រើការងារក្នុងក្រសួង និងស្ថាប័នរដ្ឋចំនួន ៤០។ ចំណែកវិស័យឯកជនវិញមានជនមានពិការភាពចំនួន ៣ ៧៩២ នាក់ បានចូលបម្រើការងារក្នុងវិស័យធនាគារ គ្រឹះស្ថានមីក្រូហិរញ្ញវត្ថុ សណ្ឋាគារ រោងចក្រ។ នេះបើតាមស្ថិតិដែលក្រសួងសង្គមកិច្ចបានធ្វើការសាកល្បងនៅរាជធានីភ្នំពេញ ខេត្តកណ្តាល និងខេត្តសៀមរាបលើ ១០២ អង្គភាព។
រាជរដ្ឋាភិបាលកម្ពុជាបានអនុវត្តផែនការយុទ្ធសាស្ត្រស្តីពីពិការភាព ២០១៩-២០២៣ ក្នុងការគិតគូរយ៉ាងល្អិតល្អន់អំពីការដោះស្រាយជូនជនមានពិការភាព ដើម្បីបង្កើនការងារ និងសន្តិសុខសេដ្ឋកិច្ចក្នុងគោលដៅកាត់បន្ថយភាពក្រីក្រ តាមរយៈការលើកកម្ពស់កំណើនការងារសមស្រប និងការពង្រឹងអាជីព និងមុខរបរដើម្បីបង្កើនជីវភាពរស់នៅបានសមរម្យជូនជនមានពិការភាព។
តាមលោក ឯម ច័ន្ទមករា ការប្រកាសអនុវត្តកម្មវិធីផ្តល់សាច់ប្រាក់ជូនពលរដ្ឋក្រីក្រ និងងាយរងគ្រោះដោយសារជំងឺកូវីដ ១៩ ជូនគ្រួសារដែលមានបណ្ណសមធម៌ (ទាំងក្រ-១ និងក្រ -២) ប្រមាណជាង ៥៦ ម៉ឺនគ្រួសារដែលត្រូវចំណាយថវិកាប្រមាណ ២៥ លានដុល្លារ ក្នុង ១ ខែក្នុងនោះមានជនមានពិការភាពចំនួន ១០០ ៨៤៤ នាក់ (ស្ត្រីមានពិការភាពចំនួន ៥១ ៧៨២ នាក់) បានទទួលប្រាក់ឧបត្ថម្ភនេះ។
លោក ចាន់ សារិន នាយកប្រតិបត្តិអង្គការជំនួយនៃក្តីសង្ឃឹមសម្រាប់សហគមន៍បានលើកឡើងថា ជនពិការនៅតែមានឧបសគ្គក្នុងការទទួលបានឱកាសការងារ ព្រោះវិស័យមួយចំនួននៅមានការរើសអើង និងមិនទទួលយកជនមានពិការភាពមកបម្រើការ។ លោកបន្តថា បើរដ្ឋាភិបាលមានយន្តការបន្ថែមទៀត ដើម្បីធ្វើយ៉ាងណាឱ្យជនមានពិការភាពទទួលបានឱកាសការងារ ស្របតាមផែនការរបស់ខ្លួននោះ គឺជារឿងប្រសើរ។
ជាមួយនេះដែរលោក ចាន់ សារិន បានជំរុញដល់ជនពិការគ្រប់រូបគួរពង្រឹងសមត្ថភាព និងជំនាញរបស់ខ្លួនឱ្យបានខ្លាំង និងត្រូវតស៊ូក្នុងការងារដើម្បីទទួលបាននូវជីវិតការងារមួយប្រកបដោយសេចក្តីថ្លៃថ្នូរ ខណៈដែលសង្គមនៅមានការរើសអើងមកលើជនមានពិការភាពនៅឡើយ ហើយឱកាសការងារសម្រាប់ជនពិការក៏នៅតែមិនទូលំទូលាយនោះ។
បន្ថែមពីនេះទៀតលោកបានបញ្ជាក់ថា៖ «ជនពិការត្រូវពង្រឹងសមត្ថភាពទាំង ២ ទាំងជំនាញទន់ និងជំនាញរឹង ដើម្បីឆ្លើយតបទៅនឹងឱកាសការងារ និងឆ្លើយតបទៅនឹងអ្វីដែលនិយោជកចង់បាន។ កុំឱ្យគេជួលទៅហើយ យើងធ្វើការមិនកើត គេដៀលជនពិការហ្នឹង វាប៉ះទាំងអស់គ្នា។ ខ្ញុំអាចនិយាយបានថា ភាគរយដែលជនពិការទទួលបានជោគជ័យគឺនៅទាបណាស់គឺក្រោម ៥០ ភាគរយ»៕
