ព្រះវិហារៈ មន្ត្រីរាជបណ្ឌិត្យសភាកម្ពុជាបានអះអាងថា ករណីជនល្មើសលួចចូលទៅកាប់ឈើដែលមានទំហំធំៗនៅក្នុងឧទ្យានរាជបណ្ឌិត្យសភាកម្ពុជាតេជោសែនឫស្សីត្រឹបស្ថិតនៅក្នុងស្រុកឆែប ខេត្តព្រះវិហារនៅតែកើតមានជាបន្តបន្ទាប់ បើទោះបីមានការអប់រំផ្សព្វផ្សាយ និងណែនាំអំពីសារៈសំខាន់នៃព្រៃឈើយ៉ាងណាក៏ដោយ។
លោក សុខ ទូច ប្រធានរាជបណ្ឌិត្យសភាកម្ពុជាប្រាប់ ភ្នំពេញ ប៉ុស្តិ៍ កាលពីម្សិលមិញថា សកម្មភាពនៃការលួចចូលទៅកាប់ឈើនៅក្នុងឧទ្យានរាជបណ្ឌិត្យសភាកម្ពុជា តេជោសែន ឫស្សីត្រឹបពីសំណាក់ពលរដ្ឋទាំង ៣១ គ្រួសារដែលរស់នៅក្នុងឧទ្យាននេះ ហាក់មានការថមថយ បន្ទាប់ពីមានការចាប់គោយន្តរបស់ពួកគេ ប៉ុន្តែនាពេលបច្ចុប្បន្ននេះមានអ្នកចំណូលថ្មីចូលទៅលួចកាប់ឈើធ្វើអាជីវកម្មម្តង។
លោក សុខ ទូច ថ្លែងថា ជាក់ស្តែងកាលពីថ្ងៃទី ២៨ ខែមីនា ឆ្នាំនេះ លោកចាប់បានគោយន្តចំនួន ១ គ្រឿង និងរត់រួច ១ គ្រឿង ដែលគោយន្តទាំងនេះបានដឹកឈើមានទំហំមុខកាត់ចាប់ពី ៦០ ទៅ ៨០ សង់ទីម៉ែត្រ មានទំហំ ២ ឱបទៅ ៣ ឱប និងកាប់បំផ្លាញដើមឈើអស់ជាច្រើនដើម។
លោក សុខ ទូច បានបញ្ជាក់ថា៖ «ប្រសិនបើបន្តការបំផ្លាញយ៉ាងដូច្នេះ តើយើងនឹងអភិរក្សយ៉ាងដូចម្ដេច? ដូច្នេះហើយយើងនឹងចាប់យកដោយពុំផ្ដល់សម្ភារ និងគោយន្តដែលជាមធ្យោបាយក្នុងការកាប់បំផ្លាញព្រៃឈើទាំងនេះវិញឡើយ។
អាលើកក្រោយនេះអត់ឱ្យវិញទេព្រោះវាតដៃ។ ម្សិលមិញ [ថ្ងៃទី ២៨ មីនា] បាញ់ អស់ច្រើនគ្រាប់ណាស់ បើមានអ្នកថតវិញ ដូចហូលីវូដអ៊ីចឹង»។
ទោះជាយ៉ាងណាលោក សុខ ទូច ថ្លែងថា លោកមិនមានវិធានការ ឬស្វែងរកជនដែលបានរត់រួចនោះទេ ប៉ុន្តែជាវិធានការបន្ទាប់ លោកស្នើឱ្យស្ថាប័នពាក់ព័ន្ធជួយបន្ថែមមន្ត្រីឧទ្យានុរក្សយ៉ាងហោចណាស់ឱ្យបាន ៦ នាក់ទើបអាចគ្រប់គ្រងបទល្មើសលួចចូលទៅកាប់ដើមឈើក្នុងឧទ្យាននេះបាន ខណៈបច្ចុប្បន្ននេះមានតែ ២ នាក់ប៉ុណ្ណោះ។
បើតាមលោក សុខ ទូច រហូតមកទល់ពេលនេះ លោក និងមន្ត្រីឧទ្យានុរក្សនៃឧទ្យានរាជបណ្ឌិត្យកម្ពុជាបានចាប់ទុកនូវរថយន្ត និងរថយន្តមានស្លាកលេខ ខ.ម និងគោយន្តសរុបចំនួន ៧ គ្រឿង ហើយដែលត្រូវបានប្រើប្រាស់ដោយជនល្មើសយកទៅកាប់បំផ្លាញព្រៃឈើធ្វើអាជីវកម្ម ។
លោក មាស ញឹម អនុប្រធានមន្ទីរបរិស្ថានខេត្តព្រះវិហារថ្លែងថា ជាធម្មតានៅរដូវប្រាំងប្រជាពលរដ្ឋនៅក្នុងខេត្តព្រះវិហារតែងធ្វើសកម្មភាពចូលកាប់ទន្ទ្រានរានយកដីព្រៃ និងកាប់ឈើធ្វើអាជីវកម្ម ប៉ុន្តែកម្លាំងរបស់តំបន់ការពារ និងអភិរក្សនីមួយៗមានការទប់ស្កាត់ និងបង្ក្រាបជាបន្តបន្ទាប់។
លោកបានបន្តថា ដោយឡែកសម្រាប់នៅតំបន់ឧទ្យានជាតិ-រាជបណ្ឌិត្យសភាកម្ពុជា តេជោសែន ឬស្សីត្រឹប បើទោះបីមិនស្ថិតនៅក្រោមការគ្រប់គ្រងរបស់ក្រសួងបរិស្ថានក៏មានប្រជាជនមួយក្តាប់តូច ឬជនខិលខូចមួយចំនួននៅតែចូលទៅកាប់ឈើ និងបរបាញ់សត្វធ្វើអាជីវកម្មដែរ ។
បើតាមលោក មាស ញឹម ពលរដ្ឋមួយក្តាប់តូចនោះ មិនគាំទ្រដល់ការបង្កើតជាតំបន់ឧទ្យាននេះទេ ព្រោះវាធ្វើឱ្យប៉ះពាល់ដល់ជីវភាពរបស់ពួកគាត់តាមរយៈការចូលទៅកាប់ឈើ និងបរបាញ់សត្វធ្វើអាជីវកម្ម។
លោក មាស ញឹម បញ្ជាក់ដូច្នេះថា៖ «ខ្ញុំនិយាយជារួមនៅក្នុងតំបន់ការពារធម្មជាតិនៅក្នុងខេត្តព្រះវិហារមានទាំងភ្លើងឆេះព្រៃ សកម្មភាពនៃការលួចកាប់ឈើធ្វើអាជីកម្ម និងការទន្ទ្រានយកដីព្រៃ នៅតែបន្តកើតមានជាបន្តបន្ទាប់ ព្រោះជារដូវគ្មានភ្លៀង ដែលអាចឱ្យគោយន្ត បរចូលទៅក្នុងព្រៃបាន និងបររទេះចូលទៅក្នុងព្រៃជ្រៅបាន វាងាយនឹងការកាប់ឈើធ្វើអាជីវកម្ម។
យើងក៏បានបញ្ជូនមន្ត្រីឧទ្យានុរក្សទៅការពារ និងទប់ស្កាត់ករណីនេះផងដែរ»៕
វីដេអូ៖