.jpg)
ការរៀបចំគម្រោងតខ្សែកាបអុបទិកក្រោមដីនៅខេត្តសៀមរាប នាពេលកន្លងទៅ។ រូបថត ក្រសួងព័ត៌មាន
សៀមរាបៈ លោក សុខ សីហា ប្រធានមន្ទីរប្រៃសណីយ៍ និងទូរគមនាគមន៍ ខេត្ដសៀមរាបបានឱ្យដឹងថា គម្រោងតខ្សែកាបអុបទិកបង្កប់នៅក្រោមដីនឹងត្រូវបញ្ចប់នៅឆ្នាំ ២០២៣ ខាងមុខនេះ ខណៈគម្រោងនេះទើបធ្វើបានរួចចំនួន ១៤ ខ្សែ (ផ្លូវ) ក្នុងចំណោម ៣៨ ខ្សែនៅក្នុងខេត្តសៀមរាប។
លោក សុខ សីហា ប្រាប់ ភ្នំពេញ ប៉ុស្តិ៍ កាលពីម្សិលមិញថា បច្ចុប្បន្ន ក្រុមការងារកំពុងតែមមាញឹកកាត់ទម្លាក់ខ្សែកាបអុបទិកលើអាកាស និងតខ្សែកាបអុបទិកនៅក្រោមដីនៅតាមបណ្តោយផ្លូវសំខាន់មួយចំនួន។
លោកបន្តថា៖ «កាលពីថ្ងៃទី ១៦ ខែឧសភា ក្រុមការងារពាក់ព័ន្ធរួមមាន អង្គភាពអគ្គិសនី,រដ្ឋាករទឹក និងក្រុមការងារសាងសង់ផ្លូវ ៣៨ ខ្សែ ក្នុងក្រុងសៀមរាបបានសហការគ្នាយ៉ាងមមាញឹកក្នុងការតបណ្ដាញខ្សែកាបទាំងអស់ដាក់ចូលក្នុងបំពង់កប់ក្រោមដីនៅតាមផ្លូវសំខាន់ៗ ដើម្បីធ្វើយ៉ាងណាលែងឱ្យមានខ្សែកាបទាំងអស់នៅលើអាកាសបន្ដទៀត »។
លោកបានបញ្ជាក់ថា៖ « តាមផែនការចំពោះមុខ រដ្ឋបាលខេត្តសៀមរាបនឹងកាត់ខ្សែកាបលើអាកាស និងដាក់ចូលក្នុងបំពង់ខ្សែកាបក្រោមដីឱ្យរួចរាល់នៅឆ្នាំ ២០២៣ ក្នុងចំណោម ៣៨ ខ្សែ និយាយរួមយើងធ្វើស្របតាមការស្ថាបនាផ្លូវ ៣៨ ខ្សែ ដែលរដ្ឋបាលកំពុងស្ថាបនា»។
លោកបន្តថា គម្រោងដាក់បណ្តាញផ្លូវខ្សែកាបក្រោមដីនេះគឺដើម្បីលើកកម្ពស់សោភណភាព និងសុវត្ថិភាពក្នុងទីក្រុងសៀមរាប ខណៈផ្លូវចំនួន ១៤ ខ្សែត្រូវបានបំពាក់ខ្សែកាបក្រោមដីរួចហើយ រួមមានតាមបណ្តោយផ្លូវលោកតាណឺយ, ផ្លូវជុំវិញផប់ស្ទ្រីត, ផ្លូវហ្សាលដឺហ្គោល, ផ្លូវ ៦០ ម៉ែត្រ, ផ្លូវកូម៉ៃ, ផ្លូវ៧មករា, ផ្លូវជាតិលេខ៦ ចាប់ពីព្រំប្រទល់រដ្ឋបាលស្រុកពួក ដល់ស្រុកប្រាសាទបាគង ផ្លូវស៊ីវុត្ថា និងផ្លូវសំខាន់ៗមួយចំនួនទៀតក្នុងក្រុងអង្គរ។
លោកឱ្យដឹងដែរថា៖ «ផ្លូវដែលបានបង្កប់ខ្សែកាបក្រោមដីរួចហើយមានប្រវែង ៧០ គីឡូម៉ែត្រក្នុងចំណោមគម្រោងសរុបជាង ២០០ គីឡូម៉ែត្រ ។
បើតាមលោក សីហា គម្រោងខ្សែបំពាក់ខ្សែកាបក្រោមដីបានចាប់ផ្តើមតាំងពីចុង ២០១៨ មកម្ល៉េះ ប៉ុន្តែដោយសារវិបត្តិកូវីដ ១៩ ក្រុមហ៊ុនមួយចំនួនបានផ្អាកជាបណ្តោះអាសន្ន និងបានដំណើរការឡើងវិញនៅឆ្នាំ ២០២១ នេះ។
លោកថា៖ «នៅចុងឆ្នាំ ២០១៨ ខែសីហា យើងចាប់ផ្តើមកាត់ខ្សែកាបលើអាកាសទម្លាក់មកដីដោយក្នុង ១ ខែ ធ្វើបាន ១ ផ្លូវ ដូច្នេះដល់ខែសីហា ២០១៩ យើងធ្វើបាន ១២ ខ្សែ (ផ្លូវ) ហើយនៅឆ្នាំ ២០២០ យើងគម្រោងធ្វើ ១២ ខ្សែ (ផ្លូវ) ទៀត តែចៃដន្យយើងធ្វើបានធ្វើតែ ២ ខ្សែទេ នៅខែមករា និងកុម្ភៈ ក៏ផ្អាកត្រឹមនោះ ដោយសារកូវីដ ព្រោះក្រុមហ៊ុនប្រតិបត្តិករមួយចំនួនមានបញ្ហាសេដ្ឋកិច្ច»។ «លុះដល់ចុងឆ្នាំ ២០២០ ដដែល យើងបានទទួលអំណោយរបស់សម្តេចតេជោក្នុងការជួសជុលស្ថាបនាផ្លូវ ៣៨ ខ្សែនៅខេត្តសៀមរាប យើងក៏ចាប់ផ្តើមគម្រោងនេះឡើងវិញ ដោយដាក់ខ្សែកាបក្រោមដីស្របតាមផ្លូវ ៣៨ ខ្សែ»។
លោក សីហា ឱ្យដឹងដែរថាក្នុងគម្រោងនេះមានក្រុមហ៊ុនចំនួន ២ ដែលទទួលបានអាជ្ញាប័ណ្ណពីនិយតករទូរគមនាគមន៍កម្ពុជា និងពីក្រសួងប្រៃសណីយ៍ទូរគមនាគមន៍ក្នុងការជីកកប់បណ្តាញខ្សែកាបក្រោមដីនៅក្នុងខេត្ដសៀមរាបនេះ គឺទី ១ គឺទូរគមនាគមន៍កម្ពុជារបស់រដ្ឋ និង ១ ទៀតក្រុមហ៊ុន CFOCN ជាក្រុមហ៊ុនឯកជន។
ក៏ប៉ុន្តែលោកបានបញ្ជាក់ថា ចំពោះបណ្តាក្រុមហ៊ុនអ៊ីនធឺណិតផ្សេងទៀតដែលមានអាជ្ញាប័ណ្ណបើកអាជីវកម្មស្របច្បាប់អាចជួលពីស្ថាប័នទាំង ២ នេះ ដើម្បីបំពាក់បណ្តាញខ្សែកាបរបស់ខ្លួនក្នុងការផ្តល់សេវាដល់អតិថិជន។
ទន្ទឹមនេះដែរ លោក សុខ សីហា អំពាវដល់ពលរដ្ឋ និងអតិថិជនឱ្យមានការយោគយល់ខ្ពស់ចំពោះរាល់ការដាច់ចរន្តអគ្គិសនី ទឹក និងអ៊ីនធឺណិត ក្នុងអំឡុងពេលអ្នកជំនាញកំពុងធ្វើការងារនេះជាប្រយោជន៍រួម។
លោកថា៖ «នៅពេលយើងជីកបណ្តាញទូរគមនាគមន៍មួយវាមានការប៉ះពាល់ទៅបណ្តាញក្រោមដីដទៃទៀត គឺដូចជាបណ្តាញអគ្គិសនីបណ្តាញលូទឹកភ្លៀង លូទឹកស្អុយ និងទឹកស្អាត ពេលយើងជីកទៅដាច់បណ្តាញអគ្គិសនី ឬដាច់បំពង់ទឹកស្អាត ដូច្នេះសូមពលរដ្ឋមេត្តាយោគយល់»៕
