.jpg)
មន្ត្រីសហភាពអឺរ៉ុប និងមន្ត្រីកម្ពុជាពេលចេញពីជំនួបប្រជុំនៅក្រសួងមហាផ្ទៃ កាលពីថ្ងៃអង្គារ។ ផា លីណា
ភ្នំពេញៈ ប្រតិភូកម្ពុជាបានថ្លែងប្រាប់សហគមន៍អឺរ៉ុបថា បើទោះជាកម្មវិធី «ការអនុគ្រោះពន្ធលើទំនិញទាំងអស់លើកលែងតែសព្វាវុធ (EBA)» អាចនឹងត្រូវព្យួរក៏ដោយ ក៏កម្ពុជានឹងមិនផ្លាស់ប្តូរការតាំងចិត្តរបស់ខ្លួនឡើយជាអ្វីដែលអ្នកវិភាគយល់ថា ការព្យួរ EBA នឹងរុញច្រានឲ្យកម្ពុជាទៅរកចិនកាន់តែខ្លាំងហើយអ្នកនយោបាយកម្ពុជាទាំងអស់គឺជាអ្នកដែលត្រូវតែទទួលការស្តីបន្ទោស ចំពោះការមិនអាចស្វែងរកដំណោះស្រាយនយោបាយបាន។
លោក លុយ ដាវីត រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិបានថ្លែងនៅវិទ្យាស្ថានអឺរ៉ុបសម្រាប់ការសិក្សាអំពីអាស៊ីហៅកាត់ថា EIAS នៅទីក្រុងប្រ៊ុចសែល កាលពីចុងខែមិថុនា លើប្រធានបទ «តើប្រទេសកម្ពុជានឹងធ្វើដំណើរទៅទីណា?» ដោយលោកថ្លែងពន្យល់អំពីស្ថានការណ៍នយោបាយរបស់កម្ពុជាបច្ចុប្បន្ន និងការយល់ខុសលើកម្ពុជាចំពោះអ្វីដែលលោកចាត់ទុកថា ដោយសារតែការផ្សព្វផ្សាយមិនពិតពីកម្ពុជា។
យោងតាមសុន្ទរកថា របស់លោកដែលភ្នំពេញប៉ុស្តិ៍ទទួលបានកាលពីម្សិលមិញលោក ដាវីត ថ្លែងថារបាយការណ៍ជាច្រើនអំពីកម្ពុជា ដែលរៀបចំដោយស្ថាប័នដែលមានលក្ខណៈប្រហាក់ប្រហែលគ្នា និងមានប្រភពមូលនិធិប្រហែលគ្នាគឺជារបាយការណ៍ «ដូចគ្នា តែខុសគ្នា» ដោយលោកពន្យល់ថា របាយការណ៍ទាំងនេះស្ទើរតែដូចគ្នាទាំងស្រុងខុសតែគម្របរបាយការណ៍ និងឈ្មោះស្ថាប័ន។
ក្រោយពីពន្យល់អំពីស្ថានការណ៍របស់កម្ពុជាលោក លុយ ដាវីត បានបញ្ជាក់អំពីជំហររបស់កម្ពុជាដោយលោកថ្លែងថា៖ «ពាក់ព័ន្ធនឹងលទ្ធភាពនៃការ-ដាក់ទណ្ឌកម្មយើងយល់ឃើញថា ការហ៊ុមព័ទ្ធសេដ្ឋកិច្ចនឹងមិនជំរុញឲ្យមានដំណោះស្រាយផ្នែកនយោបាយចំពោះសោកនាដកម្មរបស់កម្ពុជាទេ។
ការព្យួរ EBA គឺស្មើនឹងការពិន័យពួកយើងដែលការពារស្ថាប័នរបស់យើងប្រឆាំងនឹងការផ្លាស់ប្តូររបបតាមបែបមិនប្រជាធិបតេយ្យ ហើយវាក៏នឹងមិនផ្លាស់ប្តូរការតាំងចិត្តរបស់យើងបានដែរ។ ផ្ទុយទៅវិញវានឹងធ្វើឲ្យប៉ះពាល់ដល់ប្រជាជនក្រីក្រ និងក្លាយជាឧបសគ្គក្នុងដំណើរដ៏គួរឲ្យកត់សម្គាល់របស់យើងឆ្ពោះទៅរក «ការអភិវឌ្ឍប្រកបដោយចីរភាព»។
លោកថ្លែងបន្តថា៖ «ទោះបីជាមានសម្ពាធពីខាងក្រៅច្រើនក៏ដោយ ខ្ញុំអាចធានាជូនអស់លោក-លោកស្រីថា គ្មាននរណាម្នាក់អាចមានមន្ទិលសង្ស័យចំពោះឆន្ទៈរបស់យើងក្នុងការពង្រឹងប្រជាធិបតេយ្យប្រកបដោយសន្តិភាព និងការលើកស្ទួយវិបុលភាពរបស់ប្រជាជនកម្ពុជាឡើយ»។
លោក ដាវីត ក៏បានថ្លែងថារាជរដ្ឋាភិបាលកម្ពុជាប្តេជ្ញាធ្វើឲ្យការបោះឆ្នោតនៅថ្ងៃទី ២៩ កក្កដា ខាងមុខនេះជាជ័យជម្នះផ្នែកប្រជាធិបតេយ្យហើយថា កម្ពុជានឹងមានអនាគតភ្លឺស្វាងក្នុងនាម «និមិត្តរូបប្រជាធិបតេយ្យ» ក្នុងតំបន់។
លោកបណ្ឌិត ឈាង វណ្ណារិទ្ធ សាស្ត្រាចារ្យនៅវិទ្យាស្ថាន Yusof Ishak ផ្នែកការសិក្សាអំពីអាស៊ីអាគ្នេយ៍មានមូលដ្ឋានក្នុងប្រទេសសិង្ហបុរីបានថ្លែងពីម្សិលមិញថា ការសម្រេចដាក់ទណ្ឌកម្មលើកម្ពុជាត្រូវតែផ្អែកលើភាពជាក់ស្តែង ថាតើវានឹងមានឥទ្ធិពល ឬធ្វើឲ្យមានភាពប្រសើរឡើងអ្វីខ្លះទៅលើបរិយាកាសនយោបាយ និងលទ្ធិប្រជាធិបតេយ្យរបស់កម្ពុជា។
លោកថ្លែងថា៖ «ការដាក់ទណ្ឌកម្មនឹងរុញច្រានកម្ពុជាឲ្យកាន់តែជិតស្និទ្ធជាមួយចិន។ ទណ្ឌកម្មនឹងមិនប៉ះពាល់ដល់ជំហររបស់អ្នកដែលកាន់អំណាចទេ។ ប្រជាជនកម្ពុជាទាំងអស់នឹងរងផលប៉ះពាល់ ហើយអ្នកនយោបាយកម្ពុជាទាំងអស់ គឺជាអ្នកដែលត្រូវតែទទួលការស្តីបន្ទោសចំពោះការដែលមិនអាចស្វែងរកដំណោះស្រាយនយោបាយបាន»។
ស្រដៀងគ្នានេះលោក បណ្ឌិត ឡៅ ម៉ុងហៃ អ្នកវិភាគនយោបាយបានថ្លែងថា ការប្រកាសជំហររបស់កម្ពុជានៅដំណាក់កាលនេះបង្ហាញពីបរាជ័យរបស់កម្ពុជាហើយថា «ដោយមានការគាំទ្រយ៉ាងរឹងមាំពីចិនលោកនាយករដ្ឋមន្ត្រីរបស់យើងនឹងមិនងាករេទេ»។
លោក ជុំ សុន្ទរី អ្នកនាំពាក្យក្រសួងការបរទេសបានបដិសេធធ្វើអធិប្បាយ បន្ទាប់ពីកិច្ចប្រជុំចុងក្រោយជាមួយប្រតិភូសហភាពអឺរ៉ុបនៅក្រសួងការបរទេសកាលពីម្សិលមិញ៕
