.jpg)
លោក នេត្រ ភក្ត្រា (បង់កក្រមា) ថ្លែងទៅកាន់អ្នកកាសែត និងមន្ត្រីបរិស្ថានពីថ្ងៃ ៣១ មករា។ រូប យូសុះ អាប់ឌុលរ៉ាស់ហ៊ីម
ព្រះវិហារៈ មានសំណុំរឿង និងជនល្មើសពាក់ព័ន្ធនឹងការរុករានដីព្រៃការបរបាញ់សត្វ និងកាប់ឈើខុសច្បាប់ក្នុងដែនជម្រកសត្វព្រៃភ្នំពក-ភ្នំត្នោត នៅខេត្តព្រះវិហារចំនួន ២២ ករណី ត្រូវបានបញ្ជូនទៅតុលាការនៅក្នុងឆ្នាំ ២០២០ និង ២ ករណីទៀតនៅដើមឆ្នាំ ២០២១ ដែលចំនួននេះមានការថយចុះប្រមាណ ៥០% បើធៀបនឹងឆ្នាំ ២០១៩។
នេះបើតាមលោក មាស ញឹម អនុប្រធានមន្ទីរបរិស្ថានខេត្តព្រះវិហារទទួលបន្ទុកតំបន់ការពារដែលបានឱ្យដឹងពីថ្ងៃទី ៣១ ខែមករា។ លោកថា កម្លាំងរបស់លោកបានទប់ស្កាត់ និងបង្ក្រាបជនល្មើសដែលបានកាប់ទន្ទ្រានរានដីធ្លីការកាប់ឈើធ្វើអាជីវកម្ម និងបរបាញ់សត្វព្រៃខុសច្បាប់នៅក្នុងភ្នំត្នោត-ភ្នំពកនេះ និងបានកសាងសំណុំរឿងទៅតុលាការខេត្ត ហើយត្រូវបានផ្តន្ទាទោសដាក់ពន្ធនាគារពី ១ ឆ្នាំទៅ ៥ ឆ្នាំចំនួន ១០ ករណី។
លោកបន្តថានៅសល់ប្រមាណ ១២ ករណីទៀត តុលាការខេត្តបាននិងកំពុងបន្តនីតិវិធីតាមសំណុំរឿងនីមួយៗ។ ក្រៅពីនេះក៏មានករណីមន្ត្រីឧទ្យានុរក្សចាប់យកមកអប់រំធ្វើលិខិតព្រមាន និងការដកវត្ថុតាងយកមករក្សាទុកដើម្បីឱ្យរាងចាលផងដែរ។
សម្រាប់ដើមឆ្នាំ ២០២១ នេះគឺមានសំណុំរឿង ២ ករណីទៀតបានរៀបចំសំណុំរឿងបញ្ជូនទៅតុលាការនៅថ្ងៃចន្ទ។
លោក មាស ញឹម បញ្ជាក់ទៀតថា តាមរយៈការចាប់ដាក់ពន្ធនាគារតាមច្បាប់ ការផាកពិន័យ និងប្រាប់ពួកគាត់ពីទោសទណ្ឌ និងអប់រំណែនាំបានធ្វើឱ្យបទល្មើសក្នុងដែនជម្រកភ្នំត្នោត-ភ្នំពកនេះមានការថយចុះប្រមាណ ៥០ ភាគរយ។
បើតាមលោក មាស ញឹម ផែនការបន្ទាប់ទៀតគឺមន្ទីរបរិស្ថានខេត្តកំពុងសហការជាមួយ USAID រៀបចំកំណត់ព្រំប្រទល់ដែនជម្រកសត្វព្រៃភ្នំត្នោត-ភ្នំពកនេះ ព្រោះកន្លងមកមានពលរដ្ឋមិនបានដឹងពីតំបន់ណាជាតំបន់អភិរក្ស និងតំបន់ណាដែលពួកគាត់មានសិទ្ធិក្នុងការប្រើប្រាស់។ ដូច្នេះនៅពេលកំណត់តំបន់រួចពលរដ្ឋនឹងយល់ច្បាស់អំពីតំបន់ដែលគាត់មានសិទ្ធិអាស្រ័យផល។
លោកថា៖ «យើងបានកំណត់តំបន់ជា ៤ គឺតំបន់ស្នូលតំបន់អភិរក្ស តំបន់ប្រើប្រាស់ដោយចីរភាព និងតំបន់សហគមន៍។ នៅពេលដែលកំណត់រួចហើយបទល្មើសនឹងមានការថយចុះ។ បទល្មើសភាគច្រើនគឺជាអ្នកចំណូលស្រុកមកពីខេត្តសៀមរាប និងកំពង់ធំ និងប្រជាពលរដ្ឋនៅក្នុងមូលដ្ឋានមានចំនួនតិចតួចបំផុត»។
រដ្ឋលេខាធិការ និងជាអ្នកនាំពាក្យ ក្រសួងបរិស្ថាន លោក នេត្រ ភក្ត្រា ឱ្យដឹងដែរថា ការអនុវត្តច្បាប់ក្នុងតំបន់ភ្នំត្នោត-ភ្នំពកនេះគឺក្រសួងបានសហការជាមួយ USAID តាមរយៈគម្រោងព្រៃឡង់ និងបានសហការជាមួយដៃគូក្នុងការអនុវត្តច្បាប់ក្នុងនោះមន្ត្រីឧទ្យានុរក្សក្នុងតំបន់នេះបានត្រៀមអនុវត្តច្បាប់រួមជាមួយសហគមន៍កងរាជអាវុធហត្ថក្នុងការចុះបង្ក្រាបនៅតំបន់នេះ។ មានករណីជាច្រើនត្រូវបានចងក្រងបញ្ជូនទៅតុលាការដើម្បីអនុវត្តតាមច្បាប់ហើយកិច្ចការងារនេះក៏ត្រូវបានធ្វើនៅតំបន់ការពារធម្មជាតិ និងអភិរក្សផ្សេងទៀតទូទាំងប្រទេស។
លោក នេត្រ ភក្ត្រា ថ្លែងថា៖ «បទល្មើសនៅក្នុងតំបន់ភ្នំពក-ភ្នំត្នោតនេះភាគច្រើនជាករណីរុករានទន្ទ្រានដីបរបាញ់សត្វ និងលួចកាប់ដើមឈើខុសច្បាប់ ហើយត្រូវបានកត់សម្គាល់ថាក្នុងរយៈពេលកន្លងមកនេះមិនសូវកើតមានច្រើនទេដោយសារតែមានវិធានការតឹងរ៉ឹង អប់រំផ្សព្វផ្សាយ និងការចូលរួមពីពលរដ្ឋនៅក្នុងសហគមន៍»។
លោក ភក្ត្រា បានទទួលស្គាល់ថា ករណីលួចកាប់ឈើការលួចបរបាញ់សត្វ ដាក់អន្ទាក់ នៅតែមាន ប៉ុន្តែក្រសួងបរិស្ថានបានគិតគូរលើកកម្ពស់ជីវភាពពលរដ្ឋនៅក្នុងសហគមន៍។ ទោះយ៉ាងណា បច្ចុប្បន្នប្រជាសហគមន៍ដែលរស់នៅក្នុងតំបន់ការពារធម្មជាតិនេះបានចូលប្រមូលអនុផលព្រៃឈើហួសប្រមាណដោយមិនបានគិតពីនិរន្តរភាពជីវចម្រុះ។
លោកបញ្ជាក់ថា៖ «បើគេកាប់ឈើ ១ ដើមវានៅសល់ព្រៃ និងសត្វប៉ុន្តែបើករណីទន្ទ្រានកាន់កាប់ដីព្រៃពួកគាត់ត្រូវដុតកម្ទេចព្រៃចោលទាំងនេះហើយដែលយើងត្រូវការទប់ស្កាត់»។
លោក ពៅ យ៉ាត ប្រជាសហគមន៍នៅតំបន់ដែនជម្រកសត្វភ្នំពក-ភ្នំត្នោតដែលធ្លាប់ជាអ្នកបរបាញ់សត្វដែរនោះបានថ្លែងថា សត្វនៅក្នុងតំបន់នេះនៅតែមានប៉ុន្តែមិនទាន់មានសុវត្ថិភាពទេដោយសារចេះតែមានមនុស្សចូលបរបាញ់រាល់ថ្ងៃ។ ប៉ុន្តែវាបានកាត់បន្ថយបានច្រើន និងមានស្ថានភាពល្អប្រសើរដោយសារមានលោក Ben Davis ជាអ្នកអភិរក្ស និងការពារផ្ទាល់នៅក្នុងតំបន់និងមន្ត្រីបានចូលរួមជាមួយសហគមន៍ក្នុងការទប់ស្កាត់ និងណែនាំដល់ពលរដ្ឋ។ ដោយឡែកការរុករានទន្ទ្រានដីក៏ថយចុះដែរ ប៉ុន្តែវាមិនទាន់មានសុវត្ថិភាព ១០០% ទេ។
លោក Ben Davis បានឱ្យដឹងថា ដោយមានការចូលរួមពីមន្ត្រីឧទ្យានុរក្សរបស់ក្រសួងបរិស្ថាន និងប្រជាសហគមន៍ក្នុងការទប់ស្កាត់បទល្មើសផ្សេងៗនៅក្នុងតំបន់នេះបានធ្វើឱ្យបទល្មើសដែលភាគច្រើនកើតនៅពេលយប់ថយចុះគួរឱ្យកត់សម្គាល់ក្នុងពេលកន្លងមកនេះ។
លោកបន្តថា៖ «បើគ្មានក្រុមពួកគាត់ (មន្ត្រីសមត្ថកិច្ច) ទេវានឹងមានការលំបាកក្នុងការទប់ស្កាត់បទល្មើសនៅក្នុងតំបន់នេះមិនខានឡើយ»៕
