.jpg)
លោកស្រី Cecilia MalmstrÖm ប្រធានគណៈកម្មាធិការពាណិជ្ជកម្មសហភាពអឺរ៉ុប។ រូបថត សហការី
ភ្នំពេញៈ គណៈកម្មការសហភាពអឺរ៉ុប កំពុងវាយតម្លៃលើសិទ្ធិមនុស្ស និងស្ថានការណ៍ការងារនៅកម្ពុជា មុននឹងធ្វើសេចក្តីសម្រេចថាតើនឹងត្រូវព្យួរប្រព័ន្ធអនុគ្រោះពន្ធ EBA ឬយ៉ាងណា ខណៈមន្ត្រីកម្ពុជាយល់ថា បើគ្មានរបៀបវារៈនៅពីក្រោយ លទ្ធភាពនៃការព្យួរ EBA គឺតិចណាស់ ដោយសារកម្ពុជា បានដោះស្រាយបញ្ហាពាក់ព័ន្ធល្អប្រសើរហើយ។
ក្រោយពេលប្រតិភូគណៈកម្មការសហភាពអឺរ៉ុប និងសេវាកិច្ចការបរទេសរបស់អឺរ៉ុប បានបំពេញទស្សកិច្ចស្វែងរកការពិតរយៈពេលមួយសប្តាហ៍នៅកម្ពុជា លោកស្រី Cecilia MalmstrÖm ប្រធានគណៈកម្មាធិការពាណិជ្ជកម្មសហភាពអឺរ៉ុប បានថ្លែងកាលពីសប្តាហ៍មុនថា សហភាពអឺរ៉ុប កំពុងវាយតម្លៃ លើព័ត៌មានដែលប្រមូលបានពីបេកកម្មនៅកម្ពុជា ដើម្បីឈានទៅដល់ការសម្រេចចិត្តលើជំហានបន្ទាប់។
តាមរយៈសេចក្តីប្រកាសព័ត៌មាន កាលពីថ្ងៃទី ១២ ខែកក្កដា ឆ្នាំ ២០១៨ លោកស្រី MalmstrÖm បានថ្លែងថា ការវិវត្តថ្មីៗ ដែលគួរឲ្យបារម្ភ បានតម្រូវឲ្យមានការពិនិត្យយ៉ាងដិតដល់ ថាតើប្រទេសកម្ពុជា កំពុងបំពេញការប្តេជ្ញាចិត្តរបស់ខ្លួនឬអត់។ ព័ត៌មានដែលបេសកកម្ម EU បានផ្តោតទៅលើ គឺការធ្លាក់ចុះយ៉ាងខ្លាំ លើបញ្ហាសិទ្ធិនយោបាយ និងសិទ្ធិបោះឆ្នោត ក៏ដូចជាការរាំងខ្ទប់សកម្មភាពរបស់អង្គការសង្គមស៊ីវិល។
លោក ស្រី MalmstrÖm ថ្លែងថា៖ «មានភាពខ្វះខាតជាច្រើន នៅពេលនិយាយដល់យន្តការដោះស្រាយជម្លោះដីធ្លី និងការគំរាមកំហែងធ្ងន់ធ្ងរ ដល់សេរីភាពនៃការប្រមូលផ្តុំ និងសិទ្ធិទាមទារជាសមូហភាព។ នៅក្នុងគោលការណ៍ពាណិជ្ជកម្មរបស់សហភាពអឺរ៉ុប យុត្តិធម៌សង្គម គឺជាទិដ្ឋភាពសំខាន់មួយ ដែលរួមមានការគោរពសិទ្ធិមនុស្ស និងស្តង់ដារសំខាន់នៃសេរីភាពនិងការងារ»។
លោកស្រីមិនបានបញ្ជាក់ថា តើសហភាពអឺរ៉ុប នឹងធ្វើការសម្រេចចិត្តនៅពេលណាទេ ប៉ុន្តែថា ការព្យួរប្រព័ន្ធអនុគ្រោះពន្ធ EBA គឺជា«វិធានការចុងក្រោយ ប្រសិនបើកិច្ចខិតខំប្រឹងប្រែងទាំងអស់របស់យើងបរាជ័យ ក្នុងការដោះស្រាយការព្រួយបារម្ភទាំងនេះ»។
សហភាពអឺរ៉ុប បញ្ជាក់ថា ទីផ្សារអឺរ៉ុប មានទំហំ ៤០ ភាគរយ នៃការនាំចេញសរុបរបស់កម្ពុជា ដោយការនាំចេញមានការកើនឡើងខ្លាំង គឺក្នុងទំហំ ២២៧ ភាគរយ ក្នុងចន្លោះឆ្នាំពីឆ្នាំ ២០១១ ដល់ឆ្នាំ ២០១១៦ ហើយនៅឆ្នាំ ២០១៧ ការនាំចេញពីកម្ពុជាទៅអឺរ៉ុប មានទឺកប្រាក់សរុប ៥ ពាន់លានដុល្លារ ដែលធ្វើឲ្យកម្ពុជា ស្ថិតក្នុងលំដាប់ទី ២ក្នុងចំណោមបណ្ដាប្រទេសដែលទទួលបានផលប្រយោជន៍ពីប្រព័ន្ធអនុគ្រោះពន្ធ EBA នេះ។
ទោះយ៉ាងណា មន្ត្រីសមាគមរោងចក្រកាត់ដេរនៅកម្ពុជា GMAC យល់ថា លទ្ធភាពនៃការព្យួរប្រព័ន្ធ EBA មានតិចតួចណាស់ ព្រោះកម្ពុជា មានការរីកចម្រើនច្រើន ហើយពាក់ព័ន្ធនឹងសិទ្ធិការងារ។
លោក កាំង ម៉ូនីកា អគ្គលេខាធិការរង និងជាអ្នកនាំពាក្យរបស់ GMAC ថ្លែងថា៖ «ខ្ញុំគិតថា យោងទៅលើការអភិវឌ្ឍជាក់ស្តែងកន្លងមក ក្នុងប្រទេសកម្ពុជាទាំងផ្នែកសេដ្ឋកិច្ច ទាំងផ្នែកសង្គម រួមទាំងការលើកកម្ពស់សិទ្ធិមនុស្សក៏ដូចជាសិទ្ធិការងារផង បើសិនជាគេធ្វើការវាយតម្លៃដោយយុត្តិធម៌ខ្ញុំគិតថា កម្ពុជា នឹងមិនត្រូវបានគេដាក់ទណ្ឌកម្មទេ»។
លោកបន្ថែមថា លោកមើលឃើញមានការវិវត្តទៅមុខ លើផ្នែកលទ្ធិប្រជាធិបតេយ្យ សិទ្ធមនុស្ស វិស័យការងារ ដោយមានការកើនឡើងប្រាក់ឈ្នួលជាលំដាប់ ហើយប្រព័ន្ធសន្តិសុខសង្គម ក៏មានការអនុវត្តបានល្អប្រសើរ។
ស្រដៀងគ្នានេះដែរ លោក មាស សុខដេរសាន អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ បានថ្លែងកាលពីម្សិលមិញថា ដោយផ្អែកលើជ្រុងសេដ្ឋកិច្ចកម្ពុជា លោកយល់ថា EU នឹងមិនព្យួរ EBA ទេ ប្រសិនបើមិនមានរបៀបវារៈណាមួយនៅពីក្រោយ។
លោកថ្លែងថា៖ «យើងខិតខំកែលម្អច្រើនហើយ តាំងពីរឿងកម្មករ ឬពាក់ព័ន្ធនឹងស្ករអំពៅ យើងបានដោះស្រាយ ហើយយើងក៏បានឆ្លើយតបទៅនឹង EU រួចហើយដែរ។ ថ្មីៗនះ យើងក៏បានបង្ហាញកិច្ចខិតខំប្រឹងប្រឹងរបស់រដ្ឋាភិបាល តាមអ្វីដែលជាវិធានការមានស្រាប់ ហើយនិងច្បាប់អនុញ្ញាត។ សម្រាប់យើងខ្ញុំ ខ្ញុំមិនដឹងថា ត្រូវធ្វើយ៉ាងម៉េចទៀតដើម្បីឲ្យ EU គាត់ទទួលយក ឬមិនទទួលយក។ សំខាន់បើ EU មិនមានរបៀបវារៈអ្វីនៅពីក្រោយទេ បញ្ហាវាកើតឡើង តាំងពីរាប់ឆ្នាំមកហើយ មិនមែនទើបឥឡូវទេ ហើយឥឡូវ យើងបានដោះស្រាយបញ្ហាចេញច្រើនហើយ»។
ភ្នំពេញ ប៉ុស្តិ៍ មិនអាចសុំការបំភ្លឺពីមន្ត្រីនៃក្រសួងពាក់ព័ន្ធផ្សេងទៀតបានទេកាលពីម្សិលមិញ៕
