.jpg)
អ្នកទោសដើរមុខពន្ធនាគារខេត្តកណ្ដាល កាលពីម្សិលមិញ។ ហុង មិនា
ភ្នំពេញៈ មន្ត្រីជាន់ខ្ពស់អគ្គនាយកដ្ឋានពន្ធនាគារនៃក្រសួងមហាផ្ទៃ បានឱ្យដឹងកាលពីថ្ងៃម្សិលមិញថា ស្ថានភាពបច្ចុប្បន្ននៃជំងឺកូវីដ ១៩ បានកំពុងរីករាលដាលឆ្លងចូលទៅតាមពន្ធនាគារមួយចំនួននៅក្នុងប្រទេសកម្ពុជា ដែលចាំបាច់តម្រូវឱ្យមានឧបករណ៍តេស្តរហ័ស និងថ្នាំសម្រាប់ទប់ស្កាត់ និងបង្ការ ការចម្លង ក្នុងចំណោមអ្នកដែលកំពុងជាប់ឃុំ។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារបានថ្លែងប្រាប់ ភ្នំពេញ ប៉ុស្ដិ៍ កាលពីម្សិលមិញថា ផ្អែកតាមសេចក្ដីណែនាំថ្មី បច្ចុប្បន្នមន្ដ្រីនៃអគ្គនាយកដ្ឋាពន្ធនាគារកំពុងសម្រុកចុះទៅតាមពន្ធនាគារគោលដៅ ដើម្បីត្រួតពិនិត្យ និងដាក់វិធានការទប់ស្កាត់ បង្ការ កុំឱ្យមានការបន្តឆ្លងរីករាលដាលជំងឺកូវីដ ១៩ ចូលក្នុងពន្ធនាគារ ប៉ុន្តែនៅខ្វះខាតសម្ភារសម្រាប់បង្ការការចម្លងមេរោគ។
លោក សវនា បានថ្លែងថា៖ «អគ្គនាយកដ្ឋានពន្ធនាគារយើងត្រូវការចាំបាច់នាពេលនេះ គឺឧបករណ៍ធ្វើតេស្តរហ័សរកមេរោគកូវីដ ១៩ ព្រោះវាជាវត្ថុចាំបាច់ក្នុងការស្រាវជ្រាវរកអ្នកផ្ទុកមេរោគកូវីដ ១៩ ដើម្បីបង្កើនវិធានការការពារ។ ក្រៅពីនេះយើងក៏ត្រូវការចាំបាច់នូវថ្នាំបុរាណចិនដែលជា ថ្នាំវីតាមីនសេ សម្រាប់ព្យាបាលជំងឺកូវីដ ១៩ និងថ្នាំជួយទ្រទ្រង់មួយចំនួនទៀត សម្រាប់ព្យាបាលអ្នកជំងឺកំពុងជាប់ឃុំ»។
លោកបានបញ្ជាក់ថា៖ «ឧបករណ៍ធ្វើតេស្តរហ័ស និងថ្នាំសម្រាប់ព្យាបាលអ្នកជំងឺកូវីដ ១៩ គឺយើងកំពុងតែខ្វះហើយយើងកំពុងខិតខំស្នើសុំជំនួយទាំងទៅរាជរដ្ឋាភិបាល និងអង្គការដៃគូនានា»។
លោកបានអះអាងថា ឱសថបុរាណចិនសម្រាប់ព្យាបាលជំងឺកូវីដ ១៩ ក្រោយពេលប្រើប្រាស់ដល់ជនជាប់ឃុំនៅក្នុងពន្ធនាគារខេត្ដព្រះសីហនុគឺមានប្រសិទ្ធភាពល្អ ហើយបច្ចុប្បន្ន ជនជាប់ឃុំដែលមានជំងឺកូវីដជាង ៧០ ភាគរយ ហើយបានព្យាបាលជាសះស្បើយ។
លោក សវនា បានបញ្ជាក់ផងដែរ ថា លោកមិនទទួលបានគោលការណ៍ក្នុងការបង្ហាញទិន្នន័យបច្ចុប្បន្នភាពជនជាប់ឃុំដែលឆ្លងជំងឺកូវីដ ១៩ នោះទេ។ ប៉ុន្ដែរឿងនេះជាសមត្ថកិច្ចរបស់ក្រសួងសុខាភិបាល និងរដ្ឋបាលរាជធានី-ខេត្ដ។
លោកបន្តថា៖ «ខ្ញុំមិនទទួលបានគោលការណ៍ចំពោះការឆ្លើយបំភ្លឺលើចំនួនអ្នកឆ្លងកូវីដ ១៩ ទេ។ ប៉ុន្ដែបើព័ត៌មានផ្លូវការរបស់ក្រសួងសុខាភិបាលក៏ដូចជារដ្ឋបាលរាជធានី-ខេត្ដប្រចាំថ្ងៃដែលបានចេញផ្សាយនោះជាសមត្ថកិច្ចក្នុងការផ្សាយរបស់គេ»។
យោងតាមសេចក្ដីជូនដំណឹងរបស់រដ្ឋបាលរាជធានី-ខេត្ដនាពេលកន្លងមកនេះជំងឺកូវីដ ១៩ កំពុងឆ្លងរីករាលដាលចូលពន្ធនាគារមួយចំនួនក្នុងនោះមានពន្ធនាគារមណ្ឌលអប់រំទី ១ ឬព្រៃស ពន្ធនាគារខេត្ដកណ្ដាល ពន្ធនាគារខេត្ដព្រះសីហនុ និងពន្ធនាគារខេត្ដបន្ទាយមានជ័យ ដែលមានជនជាប់ឃុំសរុបជិត ២០០ នាក់មានវិជ្ជមាន និង ជនជាប់ឃុំដែលពាក់ព័ន្ធផ្សេងទៀតកំពុងធ្វើតេស្ដរកមេរោគ និងធ្វើចត្ដាឡីស័ក។
លោក សវនា បានឱ្យដឹងថា ផ្អែកលើបទពិសោធកន្លងមកដែលបណ្ដាលឱ្យមានការផ្ទុះរីករាលដាលកូវីដចូលដល់ក្នុងពន្ធនាគារ គឺអគ្គនាយកដ្ឋានពន្ធនាគារបានយកបទពិសោធទាំងនោះមកចងក្រងជាសេចក្ដីណែនាំថ្មីសម្រាប់ដាក់ឱ្យអនុវត្តនៅតាមពន្ធនាគាររាជធានី-ខេត្ដ។
លោកបានថ្លែងថា៖ «គោលការណ៍ណែនាំថ្មី គឺយើងបន្ថែមការធ្វើចត្ដាឡីស័កចំពោះជនជាប់ឃុំដែលចូលថ្មី និងជនដែលសង្ស័យជាប់ពាក់ព័ន្ធនឹងជំងឺកូវីដ ១៩ ចាប់ពី ១៤ ថ្ងៃទៅ ២០ ថ្ងៃ និងដាក់ឱ្យនៅដាច់ដោយឡែក។ កាលពីមុនមកចំពោះជនជាប់ឃុំដែលចូលថ្មីគឺយើងគ្រាន់តែធ្វើការពិនិត្យសំណាកប៉ុណ្ណោះ។ ប៉ុន្ដែគោលការណ៍ថ្មីនេះគឺត្រូវពិនិត្យសំណាកជនជាប់ឃុំដែលចូលថ្មីចំនួន ៣ ដង»។
លោក សវនា បញ្ជាក់ថា កត្ដាចាំបាច់នាពេលបច្ចុប្បន្នដែរនោះ គឺកិច្ចសហការរវាងរដ្ឋបាលរាជធានី-ខេត្ដជាមួយអគ្គនាយកដ្ឋានពន្ធនាគារ និងពន្ធនាគារនៅតាមខេត្ដផ្ទាល់ក្នុងការអនុវត្ដវិធានការទប់ស្កាត់ ការឆ្លងរីករាលដាលចូលក្នុងពន្ធនាគារ។
លោកបានឱ្យដឹងថា បច្ចុប្បន្នអគ្គនាយកដ្ឋានពន្ធនាគារមានអង្គការដៃគូអភិវឌ្ឍន៍មួយចំនួនដែលកំពុងផ្ដល់កិច្ចសហការក្នុងការផ្ដល់ជំនួយក្នុងនោះមានគណៈកម្មការកាកបាទក្រហមអន្តរជាតិ (ICRC) និងភ្នាក់ងារអង្គការសហប្រជាជាតិនៅកម្ពុជា។
អង្គការសហប្រជាជាតិ (UN) និងដៃគូមនុស្សធម៌កំពុងសម្របសម្រួលដើម្បីផ្តល់ជំនួយមនុស្សធម៌ជាបន្ទាន់ដល់អគ្គនាយកដ្ឋានពន្ធនាគារដើម្បីកាត់បន្ថយហានិភ័យ និងទប់ស្កាត់ការរាលដាលនៃជំងឺកូវីដ ១៩ បន្ទាប់ពីមានករណីឆ្លងជំងឺកូវីដ ១៩ ក្នុងសហគមន៍ ២០ កុម្ភៈ ដល់ជនជាប់ឃុំនៅក្នុងពន្ធនាគារ។ នេះបើតាមលោកស្រី Pauline Tamesis អ្នកសម្របសម្រួលអង្គការសហប្រជាជាតិនៅកម្ពុជាបានថ្លែងប្រាប់ភ្នំពេញប៉ុស្ដិ៍កាលពីថ្ងៃទី ១៩ ខែឧសភា។
លោកស្រីថ្លែងថា៖ «តាមរយៈការឆ្លងរីករាលដាលជំងឺកូវីដ ១៩ នៅក្នុងពន្ធនាគារខេត្តព្រះសីហនុ UN បានសហការជាមួយអាជ្ញាធរពន្ធនាគារ និងដៃគូមនុស្សធម៌ ដើម្បីវាយតម្លៃលើស្ថានភាពនៅទីនោះ។ អង្គការសហប្រជាជាតិនឹងផ្តល់ការគាំទ្រដល់អ្នកទោសដែលរងផលប៉ះពាល់ និងការត្រៀមបង្ការ ដើម្បីការពារចំពោះការផ្ទុកមេរោគកូវីដ ១៩ នៅក្នុងពន្ធនាគារ»។
លោក អំ សំអាត នាយករងអង្គការ លីកាដូ បានថ្លែងដោយបានបង្ហាញការព្រួយបារម្ភលើអ្នកជាប់ឃុំក្នុងពន្ធនាគារតាំងពីជំងឺកូវីដ ១៩ ចាប់ផ្តើមរីករាលដាលជាសកលនៅលើពិភពលោក ព្រោះពន្ធនាគារនៅប្រទេសកម្ពុជាមានភាពចង្អៀតណែនលើសលប់ ដូច្នេះបើមានការឆ្លងជំងឺនេះចូលទៅគឺមានហានិភ័យខ្ពស់ និងពិបាកក្នុងការបង្ការ និងទប់ស្កាត់។
លោកបានបន្តថា តុលាការគួរពិចារណាលើការដោះលែងឱ្យនៅក្រៅឃុំបណ្តោះអាសន្ន លើជនត្រូវចោទណាដែលជាប់ចោទពីបទល្មើសមជ្ឈិមកម្រិតស្រាល ជាពិសេសស្ត្រីដែលមានផ្ទៃពោះ ស្ដ្រីដែលមានកូនតាមម្តាយ និងអនីតិជន។
លោកថ្លែងថា តុលាការគួរពិនិត្យដោះលែងទៅលើទណ្ឌិតដែលជិតរួចទោសអ្នកមានជំងឺរ៉ាំរ៉ៃ ជាដើម ដែលមធ្យោបាយនេះអាចកាត់បន្ថយភាពចង្អៀតណែនក្នុងពន្ធនាគារ ហើយក៏ជាការកាត់បន្ថយហានិភ័យ និងជួយសម្រួលដល់ការគ្រប់គ្រង និងវិធានការបង្ការ និងការទប់ស្កាត់ការរីករាលដាលជំងឺកូវីដ ១៩ ក្នុងពន្ធនាគារ។ លីកាដូ ក៏មានក្រុមគ្រូពេទ្យបានសហការក្នុងការព្យាបាលអ្នកជាប់ឃុំនាពេលកន្លងមកផងដែរ៕
វីដេអូ៖
