.jpg)
លោក ឧកញ៉ា គង់ គ្រឹង ដែលត្រូវបានសមត្ថកិច្ចចាប់ខ្លួនពាក់ព័ន្ធបទល្មើសព្រៃឈើ។ រូបថត កងរាជអាវុធហត្ថ
ភ្នំពេញៈ ក្រសួងការពារជាតិ និងក្រសួងមហាផ្ទៃកំពុងធ្វើការត្រួតពិនិត្យទៅលើមន្ត្រីកងកម្លាំងប្រដាប់អាវុធណាដែលមានងារជា «ឧកញ៉ា» ហើយនឹងស្នើឲ្យពួកគេធ្វើការជ្រើសរើស ថាតើត្រូវយកតួនាទីជាកងកម្លាំងប្រដាប់អាវុធដែលកំពុងបំពេញការងារតទៅទៀត ឬយកងារជា «ឧកញ៉ា»។ នេះបើតាមលោក ឈុំ សុជាត អ្នកនាំពាក្យក្រសួងការពារជាតិ និងលោក ខៀវ សុភ័គអ្នកនាំពាក្យក្រសួងមហាផ្ទៃ។
ចំណាត់ការរបស់ក្រសួងទាំង ២ នេះធ្វើឡើងបន្ទាប់ពីលោកនាយករដ្ឋមន្ត្រី ហ៊ុន សែន នៅក្នុងកិច្ចប្រជុំគណៈកម្មាធិការកណ្តាលរបស់គណបក្សប្រជាជនកម្ពុជានៅមជ្ឈមណ្ឌលពិព័រណ៍ និងសន្និបាតកោះពេជ្រ កាលពីថ្ងៃទី ២២ ខែសីហាបានបញ្ជាឲ្យមន្ត្រីកងកម្លាំងប្រដាប់អាវុធណាដែលមានងារជា «ឧកញ៉ា» ត្រូវធ្វើការជ្រើសរើសជាបន្ទាន់ ថាតើត្រូវយកងារ «ឧកញ៉ា» ឬយកតួនាទីជាកងកម្លាំងប្រដាប់អាវុធដែលខ្លួនកំពុងបំពេញការងារតទៅទៀត។ បើយោងតាមហ្វេសប៊ុករបស់លោក ហ៊ុន សែន ដែលបានបង្ហោះកាលពីថ្ងៃទី ២៣ ខែសីហាបានបញ្ជាក់ថា៖ «ហាមមិនឲ្យកងកម្លាំងប្រដាប់អាវុធទាំងអស់មានដូចជាទាហាន នគរបាល និងកងរាជអាវុធហត្ថមានងារជា «ឧកញ៉ា» តទៅទៀតឡើយដែលកន្លងមកមានមួយចំនួនបានយកតួនាទីទាំងនេះទៅប្រកបការងារផ្សេងៗខុសច្បាប់»។
លោក ឈុំ សុជាត បានថ្លែងកាលពីម្សិលមិញថា ក្រសួងការពារជាតិ បាននិងកំពុងចាប់ផ្តើមធ្វើការស៊ើបអង្កេតទៅលើមន្ត្រីកម្លាំងប្រដាប់អាវុធណាដែលមានងារជា «ឧកញ៉ា» ហើយឲ្យពួកគាត់ជ្រើសរើសយកងារជា «ឧកញ៉ា» ឬយកតួនាទីជាកងកម្លាំងប្រដាប់អាវុធ។ លោកបញ្ជាក់ថា៖ «យើងអនុវត្តតាមបទបញ្ជា (របស់សម្តេច ហ៊ុន សែន) យើងពិតជាមានមន្ត្រីដែលមានងារជា «ឧកញ៉ា» ដូច្នេះហើយទើបសម្តេចមានប្រសាសន៍ហើយ បើអត់ក៏មិនមានប្រសាសន៍ដូច្នេះទេ។ ដូច្នេះហើយយើងត្រូវអនុវត្តតាមបទបញ្ជា។ យើងកំពុងតែធ្វើការទៅលើរឿងហ្នឹង»។
ជាមួយគ្នានេះលោក ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិបានថ្លែងប្រាប់ភ្នំពេញប៉ុស្តិ៍កាលពីម្សិលមិញថា បទបញ្ជារបស់លោកនាយរដ្ឋមន្ត្រី គឺជាផ្នែកមួយនៃការធ្វើកំណែទម្រង់កម្លាំងប្រដាប់អាវុធដើម្បីកាត់បន្ថយមន្ត្រីណាដែលមានមុខងារច្រើន ហើយនៅពេលខាងមុខនឹងលែងមានមន្ត្រីដែលមានងារជា «ឧកញ៉ា» ទៀតហើយ។
លោកបញ្ជាក់ថា៖ «សម្តេចលោកបញ្ជាក់ជាគោលការណ៍ទេ បើមានស័ក្តិមានតំណែងហើយ នៅពេលអនាគតមិនថា តែទាហាន ឬប៉ូលិសទេគឺត្រូវមានតំណែងតែមួយទេមិនអាចមានតំណែងនេះផង តំណែងនោះផង វាច្រើនពេកដូចជាវាពិបាកក្នុងការធ្វើទិន្ន័យឲ្យជាក់លាក់ណាស់។ នេះគឺជាវិធានការកែទម្រង់មួយ និងដើម្បីរៀបចំឲ្យមានសណ្តាប់ធ្នាប់ឡើងវិញ»។
លោកឧត្តមសេនីយ៍ទោ ថោង សូលីម៉ូ អ្នកនាំពាក្យអគ្គបញ្ជាការនៃកងយោធពលខេមរភូមិន្ទថ្លែងថាអគ្គបញ្ជាការនៃកងយោធពលខេមរភូមិន្ទនឹងធ្វើការស៊ើបអង្កេតទៅលើមន្ត្រីកម្លាំងប្រដាប់អាវុធណាដែលមានងារជា «ឧកញ៉ា» ហើយនឹងស្នើឲ្យពួកគាត់ធ្វើការជ្រើសរើសយកតួនាទីជាកងកម្លាំងប្រដាប់អាវុធ ឬងារជា «ឧកញ៉ា»។ ប៉ុន្តែលោកបញ្ជាក់ថាមន្ត្រីកម្លាំងប្រដាប់អាវុធដែលមានងារជា «ឧកញ៉ា» គឺមានចំនួនតិចតួចតែប៉ុណ្ណោះ។ លោកបន្ថែមថា៖ «គាត់ត្រូវតែបញ្ឈប់មួយដូចសម្តេចមានប្រសាសន៍។ គាត់នឹងត្រូវធ្វើការជ្រើសរើសថា តើគាត់ជ្រើសរើសយកងារជាឧកញ៉ា ឬយកតួនាទីជាកងកម្លាំងប្រដាប់អាវុធ»។
ប៉ុន្តែយ៉ាងណាក្តីទាំងលោក ឈុំ សុជាត និងទាំងលោក ទៀ បាញ់ សុទ្ធតែថ្លែងថា ពួកលោកមិនអាចបញ្ជាក់ថា តើមានទាហានប៉ុន្មាននាក់ដែលមានងារជា «ឧកញ៉ា» ដែលកំពុងបម្រើការងារនៅក្រសួងការពារជាតិនោះទេ។
នាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃក៏បានថ្លែងកាលពីម្សិលមិញដែរថា ក្រសួងមហាផ្ទៃនឹងធ្វើតាមបទបញ្ជារបស់លោកនាយករដ្ឋមន្ត្រី។ លោកបន្តថា៖ «យើងនឹងណែនាំគេ (ឧកញ៉ា) កុំឲ្យប្រើប្រាស់តួនាទីឧកញ៉ាទៀត។ យើងពិតជាមានមន្ត្រីដែលមានងារជាឧកញ៉ា។ យើងមាន ៤ ទៅ ៥ នាក់ដែរ។ គេបានងារឧកញ៉ាដោយផ្លូវច្បាប់យើងមិនអាចបដិសេធបានទេ តែបើអ្នកឯងជាឧកញ៉ាហើយ អ្នកឯងមិនអាចយកឈ្មោះឧត្តមសេនីយ៍បានទេហើយបើអ្នកឯងជាឧត្តមសេនីយ៍មិនអាចយកឈ្មោះជាឧកញ៉ាបានទេ»។
លោក ប៉ិចពិសី នាយកកម្មវិធីជាន់ខ្ពស់នៃអង្គការតម្លាភាពកម្ពុជាបានស្វាគមន៍ចំពោះបទបញ្ជារបស់លោកនាយករដ្ឋមន្ត្រីនេះដោយលោកចាត់ទុកថា វានឹងជួយកាត់បន្ថយនូវជម្លោះផលប្រយោជន៍ដោយសារតែកន្លងទៅមានមន្ត្រីកម្លាំងប្រដាប់អាវុធខ្លះមានងារជា «ឧកញ៉ា» បានប្រើអំណាចរបស់ខ្លួនដើម្បីគាបសង្កត់និងរឹបអូសដីធ្លីរបស់ប្រជាពលរដ្ឋ។ លោកបញ្ជាក់ថា៖ «ពេលណាយើងជាមន្ត្រីសាធារណៈហើយមានងារជាឧកញ៉ា វាអាចបង្កឲ្យុមានទំនាស់ផលប្រយោជន៍។ (ខ្ញុំ) គាំទ្រ និងស្វាគមន៍នូវវិធានការនេះដោយសារយើងអាចកាត់បន្ថយទំនាស់ផលប្រយោជន៍ និងការរកស៊ីរបស់គាត់»៕
